Ukulingana ne Luka

6 Pano e Yesu na wasambi wakwe wapitanga mu calo ca ngano pa wanda wi sabata, awasambi watalisile ukusinza ingano wakuzipukusa ku makasa nga wakulya. 2 Walile Awafalisi walola wo-o, watalisile ukulanda ukuti: “Amulandu ci wuno awasambi wako wakacita vino watazipizile ukucita pa wanda wi sabata?” 3 Nga Yesu awasuka ati: “Uzye mutawazya mu Mawaliko pe vino Devedi wacisile pano weliwe na wonsi wano walinji nawo wivwile inzala? 4 Winjizile mu ng’anda ya kwe Leza nu kulya imikate yino yapilwe kwe Leza, swinya wapileko na wonsi wano walinji nawo yimwi. Ukulingana ni sundo kusi wano wazipizile ukulya yoyo imikate sukavye wa simapepo.” 5 Swinya wawanenile nu kuti: “Umwana wa muntu awino wakwata amaka pi sabata.”

6 Pa wanda wunji uwi sabata e Yesu wayile ayinjila mwi sinagogi nu kutalika ukusambilizya. Swinya mwalinji umonsi wino ikasa lya kwe ndilo lyakalizile. 7 Wakasambilizya wa masundo na wafalisi walolecesyanga pakuti walole nga wandi apozye umuntu pi sabata, wavwambanga apakumupelela umulandu. 8 Lelo pa mulandu wakuti e Yesu wamanyile vino welenganyanga, wanenile umonsi wino ikasa lyakalizile ukuti: “Katuka nzanga uyimilile pakasi.” Nawe wakatusile ayayimilila. 9 Apano Yesu awanena ati: “Uzye cawipa ukucita icizima nanti ukucita iciwipe pa wanda wi sabata, ukupususya umuntu nanti ukumukoma?” 10 Walile wawalolecesya wanenile umonsi ati: “Tambalika ikasa lyako.” Nawe walitambalisile, alipola na paponye. 11 Lelo wakasambilizya wa masundo na wafalisi wafuzilwe nkaninye, acino watalisile ukulanzyanya pe vino walinji nu kucita kwe Yesu.

12 Wanda wumwi e Yesu wayile ku mwamba mukupepa, swinya wapefile kwe Leza uwusiku wonsinye. 13 Pano kwacile, wisile awasambi wakwe ukuti waye kwe weliwe swinya wasozile awasambi 12 pe woliwo, wano watalisile ukwita ukuti awatumwa. 14 Palinji e Simoni wino winisile ukuti Petro ne Andreya umunyina, e Jemusi, e Yohani, e Filipu, e Bartolomeyo, 15 e Mateyo, e Tomasi, e Jemusi umwana wa kwe Alifeyo, e Simoni wino akakwitwa ukuti “umucincile,” 16 e Yuda umwana wa kwe Jemusi, ne Yuda Skarioti, wino wizile akazya Yesu.

17 Watentemusile nawo umwamba nu kuyayimilila apatambalale, swinya palinji iwumba ilikulu ilya wasambi wakwe, na wantu awavule wano wafumile mu Yudeya, mu Yerusalemu na mu citungu ca Turi ne Sidoni, wano wizile mukuteyelezya kwe weliwe na wano walondanga ukuti awapozye. 18 Na wantu nye wano walinji ni mizimu imiwipe, wapolanga. 19 Co-o calenzile ukuti awantu wavwambisya ukumulemamo, amuno nga cakuti wumwi wamulemamo, amaka yafumanga mwe weliwe swinya wonsinye wapolanga.

20 Apano Yesu wizile alolecesya awasambi wakwe atalika ukuwanena ukuti:

“Mwe wa nsansa, mwe wapina, amuno Uwufumu wa kwe Leza awinu.

21 “Mwe wa nsansa mwe wano mukakwivwa inzala pe yo-o impindi, amuno muliyikuta.

“Mwe wa nsansa mwe wano mukalosya pe yo-o impindi, amuno mulisecelela.

22 “Mwe wa nsansa nga cakuti awantu wamipata, ukumiwinga, ukumituka nu kukwelengula izina linu pa mulandu wa Mwana wa muntu. 23 Muwasecelela nga cakuti vyo-o vyacitika, amuno Leza alimipa icilambu icikulu, swinya wonye wo-o avino na wakwasi wawo wacitanga kwa kasesema.

24 “Acawulanda kwe mwemwe mwe wavyuma, amuno vyo mukweti pe yo-o impindi acili icilambu cino mwapocelela.

25 “Acawulanda kwe mwemwe mwe wano mwikuta pe yo-o impindi, amuno muliwa ni nzala.

“Acawulanda kwe mwemwe mwe wano mukaseka pe yo-o impindi, amuno muliwa mwalila nu kulosya.

26 “Acawulanda kwe mwemwe mwe wano wakalandila ivizima, amuno wonye avino awakwasi wawo awakukali wacitanga kwa kasesema wa wufi.

27 Lelo nkunena mwe wano mukuteyelezya nkuti: Twalililani ukukunda awalwani winu, nu kucita ivizima kwe wano wamipata. 28 Muwalenga e Leza ukuti apala wano wakalonda ukuti iviwipe vyamiciticila swinya mwapepelako wano wakamituka. 29 Wino wakuma kwi tama lyonga, akumupiliwulila ayume na kuliwuyenye; ne wino wakupoka icizwalo ca kunzi, akumuleka asende ni ca mukasinye. 30 Nga cakuti wumwi wamilenga vimwi mwamupa, ne wino wamipoka vimwi mutamunena ukuti aminyosezye.

31 “Mwacitila wanji vino mukalonda ukuti wamicitila.

32 Nga cakuti mwakundavye wano wamikunda, lyo acilambu ci cino mulipocelela? Amuno na wawembunye wakundavye wano wawakunda. 33 Ne nga cakuti mukakwavwavye wano wakamyavwa lyo acilambu ci cino mulipocelela? Amuno wonye avino na wawembu wakacita. 34 Ne swinya nga mukakongolesyavye* wano mumanyile ukuti waliminyosezya, lyo acilambu ci cino mulipocelela? Amuno na wawembunye wakakongolelesya awawembu wawuye wano wamanyile ukuti waliwanyosezya izivule. 35 Lelo mwemwe twalililani ukukunda awalwani winu nu kucita ivizima swinya mwakongolesya ukwasowa ukwenecela ukuti waminyosezye; nga mwacita wo-o apano walimipa icilambu icikulu ukufuma kwe Leza. Muliwa mwakwitwa ukuti mwe wana Wamukulisye, amuno wawa ni cikuku kwe wano wasisalifya na ku wawipenye. 36 Twalililani ukuwa nu luse, ndi vino Umukwasi winu wawa nu luse.

37 “Mutapingula wanji pakuti namwe watize wamipingule, mutavwambilizya iviluwo mwe wanji pakuti watize wamizane ni viluwo. Twalililani ukutetela wanji, pakuti namwenye wize wamitetele. 38 Mwapako wanji vino mwawa navyo nawo walimipa. Walimipungulila ivivule pa cizwalo cinu, wasindile nu kuyinganya lelo vilitwalilila ukuwa wulyanye. Amuno cino mukupimilako wanji acino namwenye walimipimilako.”

39 Swinya Yesu wawanenile ni cilanjililo cakuti: “Intonko yitange yitungulule intonko mbuye. Amuno zyonsinyene zingaponela mu cizinji. 40 E kasukulu* atange alusye umusambilizya wakwe, lelo nga cakuti wamusambilizya icete aliwa ngati amusambilizya wakwe. 41 Acani cino ukalolecesya akalisote kano kali mwi linso lya muwuyo ukusya icimuti cino cili mwi linso lyako? 42 Nga unganena wuli umunyonko uti, ‘Leka nkufumye akalisote kano kali mwi linso,’ pano wewe uli ni cimuti mwi linso? We cawufi we! Te fumya icimuti cino cili mwi linso lyako, apano ungalola icete akalisote kano kali mwi linso lya muwuyo.

43 “Amuno icimuti icizima cisikoma ivikomwa iviwipe ndi wulyanyene vino icimuti iciwipe citange cikome ivikomwa ivizima. 44 Icimuti consinye wakacimanyila ku vikomwa. Ku cakulolelako, awantu wasikuntula amakunyu nanti ivikomwa vyakupanjila waini ku myunga. 45 Umuntu muzima akafumya vino wasunga mu mwezo wakwe, nu muwipe akafumya iviwipe vino vyawa mu mwezo wakwe, amuno umuntu akalanda vino vizula mu mwezo wakwe.

46 “Amulandu ci wuno mukanjitila ukuti ‘Tatakulu! Tatakulu!’ lelo musicita vino nkalanda? 47 Wensinye wino akakwiza kwe nene akuteyelezya vino nkulanda swinya akuvikonka, 48 wawa ngati amonsi wino pano walondanga ukuzenga ing’anda yakwe, wimvile e fawundesheni* umuzike afisya na piwe, pano imvula yatonyile nkaninye, uluzi lwizwile nu kuya yuma kwe yo-o ing’anda, lelo yisitela yiyingane pa mulandu wakuti yazenzilwe icete. 49 Ne wino akakwivwavye vino nkusambilizya lelo atakuvikonka, wawa ngati amonsi wino wazenzile ing’anda yakwe ukwasowa fawundesheni.* Pano uluzi lwayile aluma kwe yo-o ing’anda yaponile ayononeka nkaninye.”