Ukulingana ne Luka

21 Nomba e Yesu waweni awa vyuma wakusumbila ivya wupe vyawo mu kabokosi ka musangulo. 2 Swinya paponye waweni e mukamfwilwa akusumbila utuma koini tuwili ututici nkaninye tuno tutacindime na nkani.* 3 Acino watili: “Nkuminena icisinkanye nkuti we-e mukamfwilwa umupina asumbizilemo izivule ukulusya wonsinye. 4 Amuno wonsinye wa-a zino tewakusangula, tewakufumya pa vyuma vyawo, lelo weni ayikundizile ukuwikamo zyonsinye zino tekweti izyakuwomvya.”

5 Pa nsizi ye vyo-o, pano awantu wamwi walandanga pe vino itempile lyalolekanga icete ku mawe amazima yano wawomvizye, ni vintu ivizima vino wapile kwe Leza, 6 e Yesu watili: “Vyonsinye vyo-o vino mukulola pa-a, impindi yikwiza pano kutaliwa iliwe lino lilisyala pa liwuye, yonsinye yalisumbwa.” 7 Nawo wamukolowozizye ati: “Musambilizya, ampindi ci pano vyonsinye vyo-o vilicitika swinya avyani vino tulimanyilako ukuti vyatalika ukucitika?” 8 Nawe wawanenile ukuti: “Cenjelani pakuti awantu watize wamisovye, amuno awantu waliyizila mwi zina lyane, waliwalanda ukuti, ‘anene,’ swinya ‘impindi yipalamizile.’ Mutize muyeko. 9 Swinya Yesu watili, nga mwiza mwivwa inkondo ni vimvulunganya, mutize muwatina. Amuno vyonsinye vyo-o vizipizile ukutalicilapo ukucitika pano insilo yitani yize. Nomba insilo yitaliyiza papo na papo.”

10 Wa wanenile nu kuti: “Inko zilitalika ukulwa na mawufumu yalitalika ukulwisyanya. 11 Kuliwa ivizumanzi, ne mu vifulo ivivule muliwa ivipowe ni zya ndwala. Swinya awantu walilola ivintu vyakutinya ni vya maka vikufuma mwi yulu.

12 “Nomba pano vyonsinye vyo-o vitani vicitike, awantu walimilema, ukumicuzya, walimitwala mu masinagogi nu kuminyepa mu vifungo. Swinya walimitwala ku zyamfumu na kwa kateka pa mulanduvye wi zina lyane. 13 Yo-o yiliwa ampindi iyakuti muwawizizye. 14 Acino mutati muwayipekanizizya lyankani vino mulilanda pakuti mwize muyipokolole, 15 amuno ndimipa amano swinya ndimyavwa ukumanya ivyakulanda pakuti awalwani winu wize wapotwe ivyakwasuka. 16 Awakwasi winu, awanyonko, walupwa ni viwuza vinu walimipa ku walwani winu, nawo walikoma wamwi pe mwemwe, 17 na wantu wonsinye walimipata pa mulandu wi zina lyane. 18 Lelo kusi ulunyele nanti longa ulwa ku mitwe yinu luno lulipona pansi. 19 Mwize mutwalilile ukusipicizya apano mulipusuka.

20 “Lelo nga mwiza mwalola awasoja wazinguluka umusumba wa Yerusalemu, mwize mumanye ukuti umusumba wuli mukononwa. 21 Wonsinye wano waliwa mu Yudeya wize watalike ukusamalila ku myamba, na wonsinye wano waliwa mu musumba wize watalike ukufumamo, na wonsinye wano waliwa kulonde ya musumba watize winjilemo, 22 amuno mwe yayo amanda, uwukali wa kwe Leza wuliyiza pakuti vyonsinye vino vyalembwa vize vificiliswe. 23 Ciliwipila nkaninye awanaci wano waliwa pa wukulu na wano waliwa nutunya utwakonsya pe yoyo impindi! Amuno munsi muliwa uwucuzi, nu wukali wa kwe Leza wuliyiza pe wa-a awantu. 24 Wamwi waliwakoma ukuwomvya wapanga ne wanji waliwasenda mu wuzya mu nko* zinji; swinya awantu wa mu nko zinji walitwalilila ukulyatanjila Yerusalemu mpaka pano impindi ya nko yilificiliswa.

25 “Kuliwa ivimanyilo kwi lanzi, umwezi ni ntanda, ne munsi muliwa icimanyilo, na wantu wonsinye waliwa ni ntete amuno watalimanya ivyakucita pa mulandu nu kupoma kwa kwe sumbi na vino aminzi yaliwakatuka. 26 Swinya awantu waliwanyuluka ku ntete pano wakulindilila vino viliwacitika munsi amuno ivintu vya maka ivya mwiyulu viliyingana. 27 Apano Walilola umwana wa muntu akwiza mu mawingo lyo ali na maka nu wucindami. 28 Lelo pano vyonsinye vyo-o vilitalika ukucitika, mwize mwimilile nu kwinula imitwe yinu, amuno lyo impindi yakuti e Leza amipususye yapalamila.”

29 Swinya wawanenile icakulolelako ati: “Lolecesyani umukunyu ni vimiti vinji, 30 nga vyatalika ukulemba, mukamanya ukuti icisiku capalamila. 31 Avino na mwemwenye nga mwiza mwalola vyo-o ivintu vyatalika ukucitika, mwize mumanye ukuti Uwufumu wa kwe Leza wupalamizile. 32 Nkuminena icisinkanye nkuti, yo-o inkulo italipita, mpaka vyonsinyene vyo-o vize vicitike. 33 Iyulu ni nsi vilifumapo, nomba amazwi yane yeni, yaliwako umuyayaya.

34 “Lelo mwayisakamala pakuti mutawika nkani amano ku kulya, nu kumwa, na mukusakamala pa vintu vino mukalonda mu wumi pakuti wo-o uwanda wutize wumipumincizye ngati alukonje. 35 Amuno wuliyiza pe wonsinye wano wikala munsi. 36 Acino lolanji swinya mwapepa lyonsinye pakuti mwize mupusuke kwe vyonsinye vyo-o vino vilicitika na pakuti mwize mwimilile pa nkolelo ya Mwana wa muntu.”

37 Umusanya e Yesu wayanga mukusambilizya mwi tempile, ne uwusiku wayanga mukulala ku Mwamba wa Miolife. 38 Swinya awantu wonsinye wayanga mwi tempile umutondo tondo mukuteyelezya kwe weliwe.