Ukulingana ne Luka
4 Pano Yesu wafumile mu luzi lwa Yordani umuzimu wa kwe Leza walinji pe weliwe, swinya wamutunguluzile mu mpanga. 2 Wisilemo amanda 40 swinya konye akuno Satana wayile amwelezya. Pa mulandu wakuti atalilepo icili consinye pe ya-a amanda, wivwile inzala. 3 Acino e Satana wayile kwe weliwe nu kumwelezya, amunena ati: “Nga molimonye we mwana wa kwe Leza, pilula lyo-o iliwe liwe avyakulya.” 4 Nga Yesu amwasuka ati: “Amawaliko yakati, ‘Asa cakulya citupu cino cingalenga umuntu ukuwa nu wumi.’”
5 Nga Satana amusenda amutwala pa mwamba papela, amulanjizya ama wufumu yonsinye aya mu nsi pa kampindivye katici. 6 Amunena ati: “Nandi nkupe amaka pa ma wufumu yonsinye ya-a nu wucindami wa kwe yoliyo, amuno yonsinye ayane swinya nkapa kwe wino nakunda. 7 Nkukupa vyonsinye vyo-o nga wampempavye lyonganye.” 8 Nge Yesu amwasuka ati: “Amawaliko yakati, ‘Uwapepa e Yehova* e Leza wako wenganye swinya awino uwawombela.’”
9 Satana anyoka amusenda amutwala ku Yerusalemu, ayamukwezya pa ntonje ya cikulwa ci tempile nga amunena ati: “Nga we mwana wa kwe Leza, tolocela pansi, 10 amuno Amawaliko yakati, ‘Alituma awangeli wakwe kwe wewe mukukucinjilila. 11 Walikunyamulila pa makasa yawo pakuti utize ucisike kwi liwe.’” 12 Ne Yesu wamwasusile ati: “Amawaliko yakati, ‘Utakwelezya e Yehova* e Leza wako.’” 13 Pano Satana wamazile ukumwelezya, wamusile aya mukulindilila impindi yinji iyiyane iyakumwelezezyapo.
14 E Yesu wanyocezile ku Galili lyo ali nu muzimu wa kwe Leza. Swinya na wantu wano wikalanga kwe coco icifulo walandanga ivizima pe weliwe. 15 Watalisile nu kusambilizya mu masinagogi yawo, na wantu watalisile ukumupa umucinzi.
16 E Yesu wayile ku Nazareti kuno wakulizile, swinya ukulingana na vino wacitanga lyonsinye, winjizile mwi sinagogi pa wanda wi Sabata nu kuya mu kuwazya ku nkolelo. 17 Wamupile icimvungwa ca kwe kasesema Ezaya, nawe wavunguluzile nu kuzana pano palemvilwe ukuti: 18 “Umuzimu wa kwe Yehova* wawa pe nene, wampaka ukuwizya ilyasi lizima ku walanda. Wantuma ukunena wano wanyepwa ukuti walisapulwa, mu kwiyula aminso ya ntonko, ukuluwula wano watiticizwa, 19 wantuma na mukuwanena vino wangiza wapalwe ne Yehova* naswinya.” 20 Walile wamalavye ukuwazya, wavunzile icimvungwa apa e kapyunga wa mwi sinagogi nga ayikala; swinya wonsinye wano walinji mwi sinagogi wamulolecesyanga. 21 Nga atalika ukuwanena ati: “Lyo-o iwaliko lyo mwivwa, lyafiliciliswa uwanda wilelo.”
22 Wonsinye watalisile ukulanda ivizima pe weliwe, wazungusile nkaninye na pa mazwi amazima yano walanzile swinya yano yawafisile pa mwezo, watalisile ukulanda wakuti: “Uzye we-e asa mwana wa kwe Jozefu? 23 Nawe wawanenile ukuti: “Manyile mwandi mumbuzye nu mulumbe wakuti, ‘Ukapozya wanji ale yipozye na wemweneco, twivwa vino wacitanga ku Kapernahumu, acino nakonye kumwinu cita wulyanye vino wacitanga koko. 24 Walanzile nu kuti: “Nkuminena icisinkanye nkuti, kusi e kasesema wino wakamupocelela kumwawo. 25 Lelo nkuminena nkuti mu Israeli mwalinji wa mukamfwilwa awavule mu mpindi ya kwe Eliya pano imvula yalesile ukutonya pa myaka yitatu ni myezi 6, icakuti kwalinji icilala mu nsi yonsinye. 26 E Eliya watamutumilepo kwe mukamfwilwa uwili wensinye pe wa-a, lelo wamutumile kwe mukamfwilwa uwa ku Zarefati mu nsi ya Sidoni. 27 Ne swinya kwalinji awa mambombo awavule mu mpindi ya kwe kasesema Elisha, lelo atapozizyepo nanti wenga pe wa-a, sukavye Namani mutupunye umwina Asiria.” 28 Nga wonsinye wano wateyelezyanga mwi sinagogi awafulwa nkaninye. 29 Acino wamukatucizile awamusenda nu kumufumizya kunzi ya musumba, awamutwala pa mwamba papela pano pawezile umusumba pakuti wamusumbile pansi. 30 Lelo wizile ayongoloka, apulunkana pi wumbanye afumapo.
31 Wayile ku Kapernahumu mu musumba wa mu Galili, swinya wasambilizyanga awantu pa wanda wi Sabata, 32 nawo wazungusile nkaninye pe vino wasambilizyanga, amuno vino walandanga vyafumanga kwe Leza. 33 Nomba mwi sinagogi mwalinji umonsi wino walinji nu muzimu uwuwipe, wizile apunda ati: 34 “Ngu kulonda cani kwe sweswe we Yesu umwina Nazareti? Uzye uyizile mukutonona? Nkumanyile we muwomvi wa cisinka uwa kwe Leza.” 35 Lelo e Yesu wakalipizile umuzimu wuwipe, awunena ati: “Myalala, swinya fuma na mwe we-e umuntu.” Ngu muzimu awuponya we-e umonsi pa wantu nu kufuma mwe weliwe ukwasowa ukuti wumucise. 36 Wonsinye wazungusile, awatalika ukulanzyanya wakuti: “Nga milandile ci yo-o? Amuno akuwomvya amaka pakunena imizimu miwipe ukuti yifume mu wantu, nayo yikumwivwila!” 37 Acino ilyasi pe Yesu lyasalangine mu twaya tonsinye tuno twalinji mupipi.
38 Walile Yesu wafuma mwi sinagogi wayileyinjila mu ng’anda ya kwe Simoni. Wazanile nyinavyala wa kwe Simoni alwile malelya, swinya wamunenile ukuti amwavwe. 39 Acino Yesu wayile yimilila pano walinji, amupozya. Nawe wakatusile atalika nu kuwapekanizizya ivyakulya.
40 Pano ilanzi lyayanga mukwinjila, awantu watalisile ukumuletela awalwale wano walinji ni ndwala impusane pusane. Nawe wawalemangavye swinya wonsinye wapolanga. 41 Yesu wafumizye ni mizimu miwipe mu wantu awavule, nayo yapundanga ukuti: “We mwana wa kwe Leza.” Lelo wayikalipizile ukuti yitamulandapo ku wili wensinye, amuno yamumanyile ukuti walinji we Klistu.
42 Uwanda wuno wakonsilepo wayile ku ncende kuno kutalinji awantu, lelo awantu wasyazile wakumuvwamba, acino wamukonsile kuno walinji swinya wamunenile ukuti atakawasye. 43 Lelo wawanenile ukuti: “Nzipizile ukuwizya ilyasi lizima ilya Wufumu wa kwe Leza na ku wantu wa mu misumba yinji, amuno wonye awuli umulandu wuno wantumizile.” 44 Acino wayile ku Yudeya mukuwizya mwi Sinagogi.