ISAMBILILO 15
Uzye e Yesu Weweni?
E Yesu awino walumbuka nkaninye pa wantu wonsinye. Nanti aca kuti awavule wamanya izina lyakwe, watamanya ivivule pe weliwe. Avyani vino Baibolo yalanda pe Yesu?
1. Uzye e Yesu weweni?
E Yesu amungeli wa maka wino akakwikala kwi yulu. Awino e Yehova watalicizilepo ukwelewula pa vintu vyonsinye. Acino wakamwitila ukuti “Wekatote umwanamonsi, wino wakula walusya ivyelewulwa vyonsi mwi yulu na munsi.” (Wakolose 1:15) Wakamwita nu kuti “emusyupu [wino wakwatwa wenga],” amuno awino e Yehova welewuzile wenganye ukwasowa nu wakumwavwa. (Yohani 3:16) E Yesu wawombezile ponga ne Yehova, Umukwasi wakwe pakwelewula ivintu vyonsinye mu nsi na mwi yulu. (Wazya Wakolose 1:16.) Na pe yonye impindi we ciwuza umupalamisye uwa kwe Yehova. Swinya acili we “Lizwi” lya kwe Leza, amuno awino e Leza akawomvya ukumuvwanjilako.—Yohani 1:14.
2. Nga cani cino Yesu wizizile mu nsi?
Mupipi ni myaka 2,000 yino yapita, e Yehova wacisile icizungusyo. Wawomvizye umuzimu wakwe uwutele pa kusenda uwumi wa kwe Yesu nu kuwuwika muwula wa mukazyana wino walinji wemwali; e Mariya. Wonye avino Yesu wizile akwatilwa mu wuntu. (Wazya Luka 1:34, 35.) E Yehova watumile e Yesu ukwiza munsi ukuwa we Mesiya nanti e Klistu wino walayilizilwe, swinya uwakutuula awantu.a Vyonsinye vino Yehova walandizile lya nkani mu Baibolo pe Mesiya, vizile avificiliswa wulyanye mwe Yesu. Co-o cavwa awantu ukumanya ukuti, e Yesu mutupunye awili “Mesiya umwanakwe Leza mumi” kutawa na winji.—Mateyu 16:16.
3. Uzye e Yesu wawa kwinye?
Pano Yesu wafwile, e Leza wamuzyulupuzile awa mungeli naswinya. Anyocela na kwiyulu. E “ Leza wamukuzizye awa papela ukulusye vyonsi.” (Wafilipi 2:9) Pa-a pano tukulanda, e Yesu amungeli wamaka nkaninye. E Yehova mutupunye awino wamulusya amaka, kutawa na winji.
SAMBILILA IVICILE PA-A
Manyilapo navinji pe Yesu, nu mulandu wuno ukusambilila pe weliwe kwa cindamila.
4. E Yesu ase Leza wa Maka Yonsi
E Baibolo ikalanda ukuti nanti aca kuti e Yesu amungeli wa maka nkaninye mwi yulu, akatontela e Yisi, e Yehova. Acani cino twalandila wo-o? Tambani e VIDYO pakulola vino e Baibolo yikasambilizya pa wupusano wuno wawa pe Yesu ne Leza wamaka yonsi.
Ya-a amawaliko yandi yatwavwe ukumanya uwupusano wuno wawa pe Yehova ne Yesu. Wazyani iwaliko lyonga na lyonga nu kulanzyanya iwuzyo lino lili penepo:
Wazyani Luka 1:30-32.
Uzye umungeli walondolozile ukuti e Yesu wawa wuli nu ‘wamwilewelewe’ akuli ukuti e Yehova?
Wazyani Mateyu 3:16, 17.
Uzye izwi ukufuma kwiyulu lyatili wuli pano Yesu wabatizwanga?
Uzye ukulola ukuti lyalinji alya kwe weni?
Wazyani Yohani 14:28.
Uzye wino wakula walusya umuwuye pa mwana ne yisi, weweni?
Uzye e Yesu wasuzile mwinye pakwita Yehova ukuti Tata?
Wazyani Yohani 12:49.
Uzye e Yesu akalola ukuti walingana ne yisi? Nga wewe ukutipo wuli?
5. Vino vyalanjizizye ukuti e Yesu awino walinji we Mesiya
Mwe Baibolo mwawa amasesemo amavule yano yakalanda pe Mesiya. Akuli ukuti wino Leza wasozile ukwiza mukutula awantu. Yanye amasesemo ayano yawavwizye ukumumanya zuwa. Tambani e VIDYO pakusambilila pa masesemo yamwi yano Yesu waficilisizye pano wizile mu nsi.
Wazyani ya-a amasesemo ya mwe Baibolo nu kulanzyanya ya-a mawuzyo:
Wazyani Mika 5:2 pa kuti mulole kuno Mesiya walinji nu kukwatilwa.b
Uzye inkwatwa ya kwe Yesu yaficilisizye wo-o uwusesemo?—Mateyu 2:1.
Wazyani Amalumbo 34:20 ne Zakariya 12:10 pakuti mulole vino Baibolo yalandizile lya nkani pa mfwa ya kwe Yesu.
Uzye ya-a amasesemo yaficilisizwe?—Yohani 19:33-37.
Amulandu ci wuno tungalandila ukuti e Yesu asa wino watanticizile lyankani ukuti ayize apite mwe vyonsinye vyo-o pakuti vificiliswe?
Uzye ya-a amasesemo yakwavwa ukusinincizya ukuti e Mesiya walinji weweni?
6. Uwuzima wuno wawa mukusambilila pe Yesu
E Baibolo yalanda umulandu wuno cacindamila ukusambilila pe Yesu nu mulimo wuno akawomba. Wazyani Yohani 14:6 ne 17:3, nu kulanzyanya lyo-o iwuzyo:
Amulandu ci wuno cacindamila ukusambilila pe Yesu?
E Yesu watwiyulizile inzila yakuwa iviwuza vya kwe Leza. Wasambilizyanga icisinka pe Yehova, swinya mwe weliwe amuno tungawela nu wumi wa muyayaya
WAMWI WAKATI: “Inte zya kwe Yehova watazumila mwe Yesu.”
Ungasuka wuli?
IVISINKA VIKULU
E Yesu amungeli wamaka nkaninye. Amwana wa kwe Leza swinya awili e Mesiya.
Avyani Vino Wasambilila?
Amulandu ci wuno e Yesu akakwitilwa ukuti ‘we katote pa vyelewulwa vyonsi’?
Avyani vino e Yesu wacitanga pano atani ayize mu nsi?
Twamanya wuli ukuti e Yesu awili e Mesiya?
MANYILAPO NA VINJI
Sambilila na vinji pa mulimo wa kwe Mesiya.
Manya nga cakuti e Leza wapafile e Yesu wulyanye vino awantu wakapapa awana.
“Acani Cino Yesu Akakwitilwa Ukuti Umwana wa kwe Leza?” (Icipande ca pa webusayiti)
Sambilila umulandu wuno icisambilizyo ca kuti mwe Leza wenga mwawa wa Leza watatu citawela aca mwe Baibolo.
“Uzye e Yesu we Leza?” (Ulupungu lwa kwa Kalinda, April 1, 2009)
Wazya vino uwumi wa mwanaci wumwi wapilusile pa nsizi ya kusambilila icisinka pe vino Baibolo ikasambilizya pe Yesu.
“Umwanaci umuYuda Walondolola Umulandu Wuno Wapilucizile mwe Vino Wazumizilemo” (Loleni!, May 2013)
a Mu Masambililo 26 ne 27 tulisambilila umulandu wuno tukalondela uwa kututula, na vino Yesu wacisile pa kututula.
b Lola Amazwi na Yanji pa 2 pakulola uwusesemo wuno walanzile pa mpindi yino Mesiya walinji nu kuloleka mu nsi.