Vino Tungacita pa Kutwalilila Ukusuwila Ukuti e Yehova Alileta Insi Mpya

1-2. Avyani vino tuzipizile ukucita pano tukulindilila insi mpya?

TUKASALIFYA nkaninye wo-o vino e Yehova watulaya ukwiza mukufumyapo iviwipe nu kuleta insi mpya. (2 Pet. 3:13) Nanti acakuti tutamanya impindi nu wanda pano insi mpya iliyiza, vyo vikucitika munsi vikulanjizya apatiswenye ukuti ipalamizile.​—Mat. 24:32-34, 36; Imili. 1:7.

² Asa mulandu ni myaka yino twamala mu cine, swensinye tuzipizile ukutwalilila ukuwawomya isuwilo litu ilyakuti e Yehova alificilisya vino watulaya. Amulandu ci? Amuno nanti acakuti twakwata isuwilo iliwomenye, lingatonta. Awuli umulandu wuno umutumwa Paulo witizile ukukanawa ni suwilo ukuti “uluwembu luno lukatulema zuwa.” [NWT] (Hebe. 12:1) Fwandi pa kuti isuwilo litu litakatonte, tuzipizile twakwelenganya lyonsinye pe vino vikalanjizya ukuti insi mpya iliwako.​—Hebe. 11:1.

3. Avyani vino twandi tusambilile mwe co-o icipande?

³ Mwe co-o icipande, twandi tusambilile pa vintu vitatu vino vingalenga tusuwile sana ukuti e Yehova alileta insi mpya. (1) Ukwelenganya pa nzuwi ya kwe Yesu (2) ukwelenganya pa maka ya kwe Yehova, ne (3) ukucita vino vingalenga tupalamile sana kwe Yehova. Swinya twandi tusambilile na pe vino amazwi yano Yehova wanenile e Habakuku yangawomya isuwilo litu mwe ya-a amanda. Nomba lekani tutalicile ukulanda pe vimwi vino tungapitamo, vino vingalondekwa ukuti tuwe ni suwilo iliwome ilya kuti e Yehova alileta insi mpya.

VINO VINGALONDEKWA UKUWA NI SUWILO ILIWOME

4. Avyani vimwi vyo tukapingulapo vino vikalondekwa ukuwa ni suwilo iliwome?

⁴ Cila wanda, tukapingula pa vintu vino vikalondekwa ukuwa ni suwilo iliwome. Ku cakulolelako, pe vino tukapingulapo pangawa awantu wakwizya nawo, ivya kumalilamo icitendwe, amasambililo, pi twala, ukukwata awana apano ni ncito zyakuwomba. Fwandi pano tukupingula pe vyo-o ivintu cingazipa ukuyikolowozya ukuti, ‘Uzye vino napingulapo vikulanjizya ukuti na suwila ukuti e Yehova wandi ayonone yo-o insi nu kuleta insi mpya? Nanti uzye nkapingula ukucita ivintu ngati awa mwe yo-o insi wano wakalola ukuti nga wafwa lyo calala casila?’ (Mat. 6:19, 20; Luk. 12:16-21) Tuliwapingula icete pa vintu nga cakuti tuli ni suwilo iliwome ilyakuti insi mpya yipalamizile nkaninye.

5-6. Amulandu ci wuno tuzipizile ukuwa ni suwilo iliwome pano tukupita mu ntazi? Lanjililani.

⁵ Tukapita mu ntazi zino zikalondekwa ukuwa ni suwilo iliwome. Tungalwala indwala imbipisye, ukutucuzya nanti vye ivintu vinji vino vingalenga tunyocele insizi. Kweni, nga apano intazi vye zyatuponela, tungalola ngati twandi tusipicizye. Lelo nga cakuti yoyo intazi yikuyilako vye pa nkolelo, tungalondekwa ukuwa ni suwilo iliwome pakuti tutwalilile ukusipicizya nu kuwombela e Yehova ni nsansa.​—Roma. 12:12; 1 Pet. 1:6, 7.

⁶ Cinji acakuti ngi ntazi yikuyilakovye pankolelo, tungalola ngati insi mpya yicili nkaninye yitaliyiza pe yo-o impindi. Nomba uzye vwilani nga tukwelenganya wo-o, lyo cikusula mukuti isuwilo litu lyatonta? Awe nakalya! Ku cakulolelako, nga twafika mu cisanya po kukapya nkaninye, tungalola nge icisiku citalitela cize nu kwiza. Lelo nanti ciwe wo-o, icisiku cikakwiza ni mvula ikatalika nu kutonya. Wonye avino cikawa nga cakuti intazi zino tukupitamo zyatuwomela nkaninye, tungayivwa ngati insi mpya yitaliyiza zuwa. Nomba nga cakuti isuwilo litu aliwome, tukamanya ukuti ukwiza kweni yiliyizanye amuno e Yehova awino walaya. (Amalu. 94:3, 14, 15; Hebe. 6:17-19) Isuwilo lya musango wo-o, lingatwavwa ukutwalilila ukuwika ukupepa Yehova pa nkolelo mu wumi witu.

7. Avyani vino tuzipizile ukucenjelako?

⁷ Tukalondekwa ukuwa ni suwilo iliwome na pano tukuwomba umulimo wakuwizya. Amuno awavule wano tukawizizya wakalola ngati “ilandwe zima” lino likalanda ukuti e Yehova alileta insi mpya, alilyasi vye vitalitela vicitike. (Mat. 24:14; Ezek. 33:32) Tuzipizile ukucenjela pa kuti naswe tutatalika ukuvwilika vino Yehova akatusambilizya ngati avino weni wakacita. Na cino cingatwavwa, akutwalilila ukuwomya isuwilo litu. Acino lekani tulande pa vintu vitatu vino vingatwavwa ukucita wo-o.

UKWELENGANYA PA NZUWI YA KWE YESU

8-9. Uzye ukwelenganya pa nzuwi ya kwe Yesu kungawomya wuli isuwilo litu?

⁸ Cimwi cino cingatwavwa ukuwomya isuwilo litu, akwelenganya sana pa nzuwi ya kwe Yesu. Amuno inzuwi ayino yalenga tusuwile ukuti e Yehova alificilisya vino watulaya. Nga tukwelenganya sana pa mulandu wuno Yehova wapezile Umwana wakwe ukuwa anzuwi, na vino wayikundizile ukucita wo-o, isuwilo lyakuti alileta insi mpya likawomelako. Nomba amulandu ci wuno twalandila wo-o?

⁹ Lekani tulande pe vino calinji pa kuti kuwe yo-o inzuwi. E Yehova watumile Umwana wakwe e katote swinya e ciwuza wakwe umupalamisye, ukuti ayize akwatilwe munsi nu wumi uwupwililike. Pano e Yesu walinji munsi, wasipicizizye intazi zyonsinye zino wapitangamo. Ukwasowa nu kuvwilika, pa-a palinji ukuwombesya. Umukwasi witu uwa lukundo atazumilizizye Umwana wakwe ukuti ayize acule nu kufwa pa kuti vye twize tuwe nu mutende pa ka mpindi vye katici, lelo apa kuti twize twikale umuyayaya. (Yoha. 3:16; 1 Pet. 1:18, 19) Fwandi atalileka vyonsinye vyo-o viyevye mu minzi, alisinincizya ukuti mpakanye waleta insi mpya yino watulaya.

UKWELENGANYA SANA PA MAKA YA KWE YEHOVA

10. Ukulingana na Waefeso 3:20, avyani vino Yehova wawa na maka yakucita?

¹⁰ Icaciti wili cino cingatwavwa ukuwomya isuwilo, akwelenganya sana pa maka ya kwe Yehova. Amuno wawa na maka yakuficilisya vyonsinye vino watulaya. Awantu awavule wakalola ngati citanga cicitike ukwikala umuyayaya. Ncepamwi cino calenga walola wo-o, apa mulandu wa kuti vyonsinye vino Yehova akalaya kusi umuntu wino angavicita. Lelo sweswe twamanya ukuti angacita icili consinye, amuno we Leza wa Maka yonsi. (Job 42:2; Mar. 10:27) Fwandi cisituzungusya nga cakuti walaya ivintu vino umuntu uwili wensinye atanga acite.​—Wazyani Waefeso 3:20.

11. Landani pa wulayo wakuzungusya wumwi wuno Yehova walayile. (Lolani akambokosi ka kuti “Amalayo Yakuzungusya Yamwi Yano Yaficilisizwe.”)

¹¹ Lekani tulande pa malayo yamwi yano walayile awawomvi wakwe ku nsizi yano yalolekanga ngati yatanga yaficiliswe. Walayile e Abrahamu ne Sara ukuti walinji nu kukwata umwana nanti acakuti walinji awakote. (Inta. 17:15-17) Wamunenile nu kuti alipa awana wano walifuma mwe weliwe insi ya Kanani. Papisile imyaka imivule pano awina Israeli wano walinji aluko luno lwafumile mwe Abrahamu walinji awazya mu Egypt. Na co-o calenzile caloleka ngati uwulayo wuno e Yehova walayile e Abrahamu wutalinji nu kuficiliswa. Mukupita kwa mpindi, e Yehova wizile anena e Elizabeti wino walinji amukote ukuti walinji nu kukwata umwana. Swinya wanenile ne Mariya wino walinji we mwali ukuti nawe walinji nu kukwata umwana. Naco-o calinji nu kuficilisya uwulayo wuno Yehova walayile pa myaka imivule nkaninye mu calo ca Edeni!​—Inta. 3:15.

12. Amuvyani muno e Joshua 23:14 ne Ayizeya 55:10, 11 yikatulanjizya amaka ya kwe Yehova?

¹² Nga cakuti twelenganya pa malayo yano Yehova walayile ku nsizi na vino wacisile pa kuyaficilisya, cikatwavwa ukusinincizya ukuti wakwata amaka nkaninye. Swinya isuwilo litu ilyakuti alileta insi mpya likawomelako. (Wazyani Joshua 23:14; Ayizeya 55:10, 11.) Cinji acakuti, lyo-o isuwilo likalenga catupepucila ukunenako wanji ukuti wo-o vino Yehova watulaya ukuti alileta insi mpya asa lilyasi vye vilicitika. Amuno e Yehova nye umweneco awino walanzile pi yulu lipya ni nsi mpya ukuti: “Amazwinye yaa ayakusimichila swinya amasuwilwa.”​—Ukuwu. 21:1, 5.

UKUCITA VINO VINGALENGA TUPALAMILE SANA KWE YEHOVA

13. Uzye ukulongana kungawomya wuli isuwilo litu? Londololani.

¹³ Ica citi tatu cino cingalenga isuwilo litu ukuwomelako, akucita vino vingatupalamika kwe Yehova. Lekani tulandeko pa vizima vimwi vino tukazanamo mukuzanwa mukulongana. Ku cakulolelako, e Anna wino wawombako imilimo imilekane lekane mu mulimo wa mpindi zyonsi, watili: “Ukuzanwa mu kulongana, ku kawomya isuwilo lyane. Nanti acakuti wino akupa ilyasi asa we kalanda muzima nkani swinya atalanzilepo ni cipya icili consinye mwi lyasi lyakwe, kukawako cimwi co nkasendamo cino cikanjavwa ukwivwicisya ivya mu Baibolo nu kuwomya isuwilo lyane.”b Cinji acakuti isuwilo litu likawomelako nga cakuti tukuteyelezya ku vyasuko vya wanawitu na wankazi.​—Roma. 1:11, 12; 10:17.

14. Uzye umulimo wakuwizya wukawomya wuli isuwilo litu?

¹⁴ Cinji acakuti, isuwilo litu likawomelako nga cakuti tukuwombako mu mulimo wakuwizya. (Hebe. 10:23) E Barbara, wino wawombela e Yehova ukucila pa myaka 70 watili: “Nkalola ukuti umulimo wakuwizya wukawomya isuwilo. Amuno lyonsinye nga cakuti nkunenako wanji pa vizima vino Yehova watulaya, isuwilo lyane likaya likuwomelako.”

15. Uzye ukuyisambilizya Baibolo kungawomya wuli isuwilo litu? (Lolani ni cikope.)

¹⁵ Kwawa na cinjinye cino cingalenga tuwe ni suwilo iliwome: akuli ukuti Isambililo lya pa lwitu. Ku cakulolelako e Susan walanzile ukuti cikamupepucila nga cakuti watanticila kucili impindi yakuyisambilizizyapo. Watili: “Pa sabata nkapekanizizya kucili isambililo lya Ulupungu lwa kwe Malonda lino tuliwasambilila mwe sabata yino yikukonkapo. Ne pa Mande na pe Ciwili, nkapekanya ukulongana kwa mukasi ke sabata. Amanda yano yasyala nkawa ni sambililo lya pa lwane.” Wo-o vino e Susan watanticila kucili impindi ya kuyisambilizya, cikamwavwa ukutwalilila ukuwomya isuwilo lwakwe. E Irene nawe wino wawombela pa ma ofesi makulu pa myaka imivule, wazana ukuti ukuyisambilizya pa masesemo ya mu Baibolo kukawomya nkaninye isuwilo lwakwe. Watili, “Nasinincizya ukuti e Yehova akaficilisya amasesemo yonsinye, kusi nanti kamwinye kano kakasyala.”c

“CHILICHITWA”

16. Amulandu ci wuno amazwi yano e Yehova wanenile e Habakuku yakawombela na kwe sweswenye mwe ya-a amanda? (Waheberi 10:36, 37)

¹⁶ Awawomvi wa kwe Leza walindilila pa mpindi iyitali ukuti e Yehova ayonone yo-o insi imbipe. Nomba pa mulandu wakuti insilo ya kwe yo-o insi yitiza ukulingana na vino awantu wenecelanga, wamwi wangakwelenganya ukuti yikuzimba. Lelo nanti ciwe wo-o, e Yehova wamanya vino awawomvi wakwe wakayivwa. Awuli umulandu wuno wanenezile ne kasesema Habakuku ukuti: “Walika mumawaliko, amuno impindi itani ifichile iyakuti choo chifiswe. Ukuwa impindi yandi yize nanti kuzimba, nachino nakulanjizya chiliwa achakusimichila. Pamwi chingachelwa ukuchitwa, ukuwa wazipila ukuchilindilila; chilichitwa pampindi yino nayania, chitalichelwa.” (Haba. 2:3) Uzye e Yehova wanenile e Habakuku mutupunye ya-a amazwi? Nanti uzye ya-a amazwi yano wamunenile yakatwavwa na sweswe mwe ya-a amanda? E Yehova wanenile umutumwa Paulo ukuti awawomvya ya-a amazwi ku wina Klistu wawuye wano walindililanga sana insi mpya. (Wazyani Waheberi 10:36, 37.) Nasweswenye nga twatalika ukwelenganya ukuti e Yehova akuzimba ukutupususya, twakwizuka ukuti, “chilichitwa. . . . Chitalichelwa.”

17. Uzye e nkazi wumwi wawomvizye wuli amazwi yano Yehova wanenile e Habakuku?

¹⁷ Awawomvi wa kwe Yehova awavule, wakakonka amazwi yano Yehova wanenile Habakuku aya kuti “wazipila ukuchilindilila.” Wamwi wacita wo-o pa myaka imivule. Ku cakulolelako, e nkazi wumwi uwi zina lyakuti Louise wino watalisile ukuwombela Yehova mu 1939, watili: “Pe yoyo impindi nelenganyanga ukuti e Amagedoni yalinji nu kwiza lyo ntani male ni sukulu. Lelo co-o asa cino cacitisile. Pa myaka imivule, nazana ukuti cikanjavwa nga cakuti nkuwazya pa ma lyasi ya mu Baibolo yano yakalanda pa wantu wano walindilizile pa mpindi intali ukuti e Yehova ayize aficilisye vino wawalayile. Pe ya-a amalyasi pawa ilyasi lya kwe Nowa, Abrahamu, e Jozefu apano na yanji. Ukucita wo-o kwalenga ntwalilile ukulindilila Yehova ukuti ayize aficilisye vino watulaya. Cinji acakuti kwanjavwa swinya kwavwa na wantu wanji ukusuwila ukuti insi mpya yili mupipi nkaninye.” Ukwasowa nu kuvwilika, na wanjinye wano wawombela e Yehova pa myaka imivule, wangazumilizyako kwe vino we-e nkazi walanzile!

18. Uzye ivyelewulwa vingatwavwa wuli ukuwomya isuwilo litu?

¹⁸ Kweni insi mpya yitani yize. Lelo nanti ciwe wo-o, kwawako ivintu vimwi vino vyawako kaali, ndi vino imiti, intanda, izyanyama apano na wantu. Pasi nanti wumwinye wino angavwilika ukuti vyo-o ivintu vitawako nanti acakuti kwalinjiko impindi yimwi pano vitalinjiko. Tukavilola, amuno e Yehova awino wavyelewuzile. (Inta. 1:1, 26, 27) Swinya e Yehova walaya ukutuletela insi mpya. Twamanya ukuti alificilisya wo-o uwulayo. Awantu waliwayitopwa uwumi wa muyayaya. Fwandi tusivwilika nanti katicinye ukuti e Yehova alileta insi mpya pa mpindi yilyanye yino umweneco wasola.​—Ayize. 65:17; Ukuwu. 21:3, 4.

19. Mungacita wuli pa kuti muwomye isuwilo linu?

¹⁹ Lyonsinye mwacita vino vingalenga isuwilo linu ukuwomelako. Mwasalifya sana pa nzuwi, mwakwelenganya pa maka ya kwe Yehova, nu kucita vino vingalenga mupalamile kwe weliwe. Nga mwacita wo-o, muliwa pe “wano wakasuwila swinya wakalindilila chimyamya, ukupochelela chino Leza walayilizya.”​—Hebe. 6:11, 12; Roma. 5:5.