Mwakolanya Awangeli Wacisinka

1-2. (a) Uzye swe wantu twapusana wuli na wangeli? (b) Amwinye mumwi muno twakolana na wangeli?

PANO mwasambilizilevye icine, e Yehova wamilesile mu lupwa lwakwe ulucinjililwe swinya muno mwawa wakapepa wakwe wano wakundana nkaninye. Mwe lo-o ulupwa, mwawa na wangeli awacisinka awavule. (Dan. 7:​9, 10) Nga twivwavye izwi lya kuti awangeli, ilivule tungatalika ukwelenganya pe vino wapusanako na sweswe swe wantu. Ku cakulolelako, weni wamala imyaka imivule kwi yulu ukucila pe yino swe wantu twikala munsi. (Job 38:​4, 7) Awangeli wawa nkaninye na maka ukutucila. Cinji acakuti awatele sana swinya walungamana ukutulusya pamulandu wakuti tutapwililika.—Luk. 9:26.

² Lelo nanti ciwe wo-o, kwawa mumwi muno twakolana. Ku cakulolelako, ndi wulyanye vino awangeli wawa, nasweswenye tukakolanya imiwele ya kwe Yehova, swinya twawa ni nsambu zyakuyisolelapo ivyakucita. Awangeli wonsinye wawa na mazina, watawa icili conga swinya wawa ni milimo imipusane pusane yino wakawomba. Wonye avino cawa nakwe sweswenye. Cinji acakuti, swensinye ponga na wangelinye tukapepa e Yehova e Kelewula witu.—1 Pet. 1:12.

3. Avyani vino twandi tusambilile mwe co-o icipande?

³ Pamulandu wakuti twakolana mu vivule na wangeli, icakulolelako cawo cingatuwomelezya, swinya tungasambililako ivizima ivivule. Mwe co-o icipande twandi tusambilile pe vino tungawakolanya ukuyicefya, ulukundo, vino wakasipicizya na vyo wakawombesya ukulenga iwungwe ukutwalilila ukuwa alisanguluke.

AWANGELI WAYICEFYA

4. (a) Uzye awangeli wakalanjizya wuli ukuti wayicefya? (b) Acani cino calenga awangeli wayicefye? (Amalumbo 89:7)

⁴ Awangeli wacisinka wayicefya. Nanti acakuti wamanya ivivule, wawa na maka swinya wawa na mano, wakakwivwila e Yehova. (Amalu. 103:20) Pano wakuwomba imilimo yino Yehova wawapa, wasiyilumvya nanti ukulenga ilumbo lyaya kwe woliwo. Wakakwivwa icete nga wawomba vino Yehova wawanena nanti acakuti pasi nanti wumwi wino amanyile ukuti awano wawomvile.a (Inta. 32:​24, 29; 2 Izya. 19:35) Wakakana ukupocelela umucinzi wuno wuzipizile ukuya kwe Yehova. Acani cino calenga wayicefye wo-o? Amuno wakunda e Yehova swinya wamucindika nkaninye.—Wazyani Amalumbo 89:7.

5. Uzye umungeli walanjizizye wuli ukuti walinji amuyicefye pano walunjikanga umutumwa Yohani? (Lolani ni cikope.)

⁵ Lekani tulande pi lyasi lya mu Baibolo limwi lino likalanjizya vino awangeli wayicefya. Mu ma 96 C.E., umungeli wumwi wino atamanyikwa ni zina wizile mukulanjizya e Yohani icilolwa cakuzungusya. (Ukuwu. 1:1) Uzye e Yohani wacisile wuli pacilolwa cino wamulanjizizye? Walondanga ukutalika ukupepa umungeli. Lelo umungeli wamulesizye paponye ukuti: ‘Awe, utachita wowo: nemuwomvi muwuyo, swinya ne munyonko. . . Pepanga Leza!’ (Ukuwu. 19:10) Ukwasowa nu kuvwilika we-e umungeli wayicefizye nkaninye. Amuno atalondanga umucinzi ukuya kwe weliwe. Acino wanenile e Yohani paponye ukuti awapepa Yehova. Cinji acakuti, atayilolanga ukuti wacindime ukucila Yohani. Nanti acakuti we-e umungeli wawombezile e Yehova pa myaka imivule swinya walinji na maka amavule ukucila Yohani, wayicefizye nu kumunena ukuti amuwomvi muwuye. Na pano wamulunjikanganye, atamukalipizile nanti ukuwomvya amazwi amawipe. Lelo wamulunjisile mu cikuku. Amuno wamanyile ukuti cino calenzile e Yohani alonde ukumupepa, apa mulandu wakuti vino waweni vyamuzungusizye.

6. Tungakolanya wuli ukuyicefya kwa wangeli?

⁶ Tungakolanya wuli ukuyicefya kwa wangeli? Tutazipizile twayivwa pa milimo yino tukawomba mwi wungwe lya kwe Yehova, nanti ukulenga awantu watupa umucinzi pa mulandu na vino tukacita. (1 Kor. 4:7) Cinji acakuti, tutazipizile twalola ngati twacindama ukucila wanji pa mulandu wakuti twawombela e Yehova pa myaka imivule ukuwacila nanti pa mulandu wa milimo yimwi yino twawa nayo. Nomba pano tukuya tukuwa ni milimo, apano tuzipizile twaya tukuyicefya. (Luk. 9:48) Ndi wulyanye vino awangeli wakacita, nasweswenye tuzipizile twayikundila ukuwombela wanji. Tutazipizile ukulenga awantu walola ngati twacindama ukuwacila.

7. Tungalanjizya wuli ukuti twayicefya pano tukulunjika wumwi?

⁷ Tungalanjizya ukuti twayicefya pano tukulunjika wumwi, ndi vino umwanawitu, e nkazi nanti umwana. Mpindi zimwi tungalondeka ukumulunjika mukulungatika. Nga cawa wowo, lyo tuzipizile ukucita ngati amungeli wino walunjisile e Yohani mu cikuku. Tuzipizile ukusipa lelo tutazipizile ukulenga wino twalunjika asyale akuyivwa uwuwi. Nga cakuti tutakuyilola ukuti twacindama ukulusya wanji, tuliwawalunjika mu mucinzi swinya mu lukundo ukuwomvya Baibolo.—Kolo. 4:6.

AWANGELI WAKUNDA AWANTU

8. (a) Ukulingana ne Luka 15:​10, uzye awangeli wakalanjizya wuli ukuti wakunda awantu? (b) Amulimo ci wuno awangeli wakawomba pano tuli mu mulimo wakuwizya? (Lolani ni cikope pa nkupo.)

⁸ Awangeli wasiyipawula ku wantu. Swinya wasifumyakovye amano kwe vino vikawaciticila nanti ukuwalola ngati watacindama. Lelo wawakunda nkaninye. Wakasecelela sana nga cakuti wino wacisile uluwembu ulukulu walapila nanti nga wino walesile ukuwombela e Yehova wanyoka mwi wungwe. Cinji acakuti, wakasecelela nga wumwi wasambilila pe Yehova nu kupilula imiwele yakwe pakutivye awamuwombela. (Wazyani Luka 15:10.) Awangeli wakawombesya ukutunjilila umulimo wakuwizya. (Ukuwu. 14:6) Nanti acakuti wasiwizizya awantu mukulungatika, wangatungulula e kawizya ku muntu wino akulonda ukusambilila. Kweni tutanga tulande ukuti lyonsinye awangeli awano wakatutungulula ku wantu wano wakulonda ukusambilila. Amuno e Yehova angawomvya inzila nazinjinye, ndi vino umuzimu wutele pakutwavwa nu kututungulula kwe wino akulonda ukusambilila. (Imili. 16:​6, 7) Lelo awangeli awano akawomvya sana. Fwandi pano tuli mu mulimo wakuwizya, tungasuwila ukuti tuli na wangeli wano wakutwavwa.—Lolani akambokosi kakuti “Amapepo Yawo Yasusilwe.”

9. Tungalanjizya wuli ukuti twakunda awantu ndi vino awangeli?

⁹ Tungakolanya wuli awangeli? Ngatwivwa wawilizya ukuti wino wamufumizye mwi wungwe anyosile, tuzipizile ukusecelela ndi wulyanye vino awangeli wakacita. Tuzipizile ukulanjizya ukuti twakunda weyo umwanawitu nanti e nkazi nu kuti twivwile icete nkaninye pano anyosile. (Luk. 15:​4-7; 2 Kor. 2:​6-8) Tungakolanya awangeli ukupitila mukuwomba pano papelezile amaka yitu mu mulimo wakuwizya. (Ekawi. 11:6) Swinya ndi wulyanye vino awangeli wakatwavwa pano tukuwizya, avino tuzipizile ukulola inzila zino tungavwilamo awanawitu na wankazi. Ku cakulolelako, tunganenako e kawizya umupya ukuti twize tuwombe nawe mu mulimo. Cinji acakuti, tungavwako awa cisongo nanti wano wakalwalilila ukupitila mukuwanena ukuti twize tuwombeko nawo mu mulimo

10. Avyani vino tungasambililako kwe nkazi Sara?

¹⁰ Tungacita wuli nga cakuti kwawa vimwi vino vyalenga tuleke ukuwombesya mu mulimo wa kwe Yehova? Tuzipizile ukulola inzila na zinji zino tungawombelamo. Lekani tulande pe nkazi Sara,b uwa ku India. Pa nsizi yakuwomba wupayiniya pa myaka ku ma 20, we-e nkazi wizile alwala sana swinya walalangavye. Pano calinji wo-o, wayivwanga uwuwi nkaninye. Lelo mukupita kwa mpindi wizile atalika ukuwa ni nsansa naswinya, pa mulandu wakuti awanawitu na wankazi wamwavwanga swinya wawazyanga e Baibolo lyonsinye. Kweni atawombanga umulimo wakuwizya ndi vino wawombanga kaali, nomba wizile atalika ukuwomvya inzila iyipya. Watumilangavye awantu ama foni pa mulandu wakuti wapotwanga ukukumanisya ukulemba ama kalata. Watumizile ivipempu vino wakweti, nawo wamulanjizizyeko na wanji wano walondanga ukusambilila. Avyani vino vyafumilemo? Mu myezivye mitici wizile awa na masambililo 70 yano atalinji nu kuwakumanisya ukutungulula. Acino wapileko yamwi kwa kawizya mwi wungwe. Swinya awavule pe wa-a awasambi watalika ukuzanwa mukulongana. Ukwasowa nu kuvwilika, awangeli wafwile wakakwivwa icete nkaninye ukuwombela ponga na wanawitu na wankazi wo wawa ngati we Sara, wano wakawombesya ukufika pano papelezile amaka yawo mu mulimo wakuwizya.

AWANGELI WAKASIPICIZYA

11. Uzye awangeli wacisinka walanjizya wuli ukuti wakasipicizya?

¹¹ Awangeli wacisinka wawa acakulolelako icizima nkaninye kwe sweswe icakusipicizya. Wakakwivwa uwuwi ukulola vino Yehova akasipicizya umutiticizya nu wuwipe vino vyacitika pa myaka imivule. Ku cakulolelako, waweniko na pano e Satana ni vyelewulwa vinji ivya kwiyulu wano wawombelanga ponga wapondocezile e Yehova. (Inta. 3:1; 6:​1, 2; Yud. 6) E Baibolo yalandapo na pa mungeli wacisinka wino walwisyinye nu mungeli muwipe pa manda amavule. (Dan. 10:13) Cinji acakuti, awangeli walolako ukuti ukufumilila pano e Yehova welewulizile e Adamu ne Eva ukufika pe yo-o impindi, awantuvye watici awano wasolapo ukuwapepa e Yehova. Nomba asa mulandu na vyonsinye vyo-o, wa-a awangeli wacisinka watwalilila ukuwombesya mu mulimo wa kwe Yehova ni nsansa. Amuno wamanya ukuti pa mpindi injanane, e Yehova alifumyapo umutiticizya wonsinye.

12. Avyani vino vingatwavwa ukusipicizya?

¹² Tungakolanya wuli awangeli? Ndi wulyanye vino cawa kuwangeli, nasweswenye tukalola umutiticizya munsi. Lelo twamanya ukuti e Yehova alifumyapo uwuwipe wonsinye pa mpindi injanane. Ngati awulyanye vino cawa ku wangeli, ‘tusitonta ukucita ivizima.’ (Gal. 6:9) Swinya e Yehova watulaya ukuti wandi awatwavwa ukusipicizya. (1 Kor. 10:13) Fwandi tuzipizile twapepa kwe Yehova ukuti atupe umuzimu wutele wuno wukatwavwa ukuwa awatekanye nu kuwasecelela. (Gal. 5:22; Kolo. 1:11) Nomba mungacita wuli nga cakuti wakumicuzya? Mutazipizile ukutina lelo muzipizile ukusuwila sana e Yehova. Nawe wandi awamyavwa lyonsinye nu kumiwomya.—Hebe. 13:6.

WAKAKWAVWILIZYAKO IWUNGWE UKUTWALILILA UKUWA ALISANGULUKE

13. Amulimo ci uwuyiwele wuno awangeli wakawomba mwe ya-a amanda yakulecelezya? (Mateyu 13:​47-49)

¹³ Mwe ya-a amanda yakulecelezya, e Yehova wapa awangeli umulimo wumwi uwuyiwele. (Wazyani Mateyu 13:​47-49.) Awantu awavule ukuzinguluka insi yonsinye wakalonda ukuteyelezyako kwi lyasi lizima. Swinya wamwi nga wivwa kwe lyo-o ilyasi wakapilula imiwele yawo pakuti wawombela e Yehova nu kwikala ukulingana na vino akalonda ne wamwi asa vino wakacita. Acino e Yehova wapa awangeli umulimo wakupawunkanya ‘awawembu ukuwafumya muwalungamane.’ Co-o cikusula mukuti wawapa umulimo wakwavwilizyako iwungwe ukutwalilila ukuwa alisanguluke. Fwandi wumwi ndi waleka ukuwombela e Yehova pa mulandu ni vintu ivilekane lekane, lyo citakusula mukuti calala casila atalitalikapo naswinya nanti ukuti mwi wungwe mutandi mwawa intazi. Lelo tungasuwila ukuti awangeli wakawombesya kukwavwilizya iwungwe ukutwalilila ukuwa alisanguluke.

14-15. Tungakolanya wuli awangeli pakulenga iwungwe ukutwalilila ukuwa alisanguluke? (Lolani ni cikope.)

¹⁴ Tungakolanya wuli awangeli? Tungawakolanya ukupitila mukuwomba uluwali lwitu ulwakulenga iwungwe ukutwalilila ukuwa alisanguluke. Tungacita wo-o ukupitila mukuwombesya ukucinjilila wuciwuza witu ne Yehova nu kuwazanwa ponga na wantu wano wamukunda. (Amalu. 101:3) Swinya tungavwa awanawitu na wankazi ukutwalilila ukuwa awa cisinka kwe Yehova. Ku cakulolelako, avyani vino tuzipizile ukucita nga twamanya ukuti umwanawitu nanti e nkazi wumwi acisile uluwembu ulukulu? Pa mulandu wakumukunda, tuzipizile ukumuwomelezya ukuya mukunena wa eluda. Nga cakuti wakana ukuya mukulanda, tuzipizile ukuya mukuwanena sweswenye. Amuno lyo tukulonda weyo umwanawitu nanti e nkazi wino atonsile anyosye zuwa wuciwuza wakwe ne Yehova.—Jemu. 5:​14, 15.

¹⁵ Ku cawulanda, wamwi nga wacita uluwembu ulukulu wakawafumya mwi wungwe. Nga cawa wowo, tukaleka ‘ukuwa apaliponga’ nawo.c (1 Kor. 5:​9-13) Yo-o imitanticile yikalenga iwungwe ukutwalilila ukuwa alisanguluke. Fwandi nga cakuti tutakuwa ponga na wano wawafumya mwi wungwe, lyo tukulanjizya ukuti twawakunda. Amuno nga walola ukuti tutakwizya nawo pa mulandu wakuti tukulonda ukuwa ni cisinka kwe Yehova, cililenga nawonye wavwambisya ukunyoka. Swinya nga wanyoka tukawa ni nsansa ponga ne Yehova na wangeli wakwe.—Luk. 15:7.

16. Amwinye muno tukuvwambisya sana ukuwakolanya awangeli?

¹⁶ Alongo nkaninye ukusambilila pa wangeli nu kumanya ukuti tukawombela pongo nawo. Acino lekani twakolanya imiwele yawo imizima ponga ngati: akuyicefya, ukukunda awantu, ukusipicizya nu kulenga iwungwe ukutwalilila ukuwa alisanguluke. Swinya nga cakuti tukuwakolanya, tulitwalilila ukuwa mu lupwa lwa kapepa wa kwe Yehova umuyayaya.