Cindikani E Kelewula Winu pa Kuwa na Mawuyo ya ku Muzimu

“Umuntu wino ali muwanto wino atamanyile apakulambila, angayavye ciyeyeye.” Wino walanzile ya-a amazwi amwina Roma wino wasambilila nkaninye amano yawantu, wino walinjiko pampindi ya watumwa. Swinya ya-a amaswi yakalanjizya ukuti pakuti imikalile yamuntu yiwe icete, azipizile ukupanga ivyakucita.

Mu Baibolo mwawa ivyakulolelako vya wantu wano wapazile ivya kucita. E Nowa wawombesizye pamyaka 50, “awaza uwato muno weliwenye nichiwanza chakwe wapusuchizile.” E kasesema Musa weni “walolelanga ichilambu chakunkolelo.” (Hebe. 11:7, 26) E Leza wapile e Joshua wino wapyanile e Musa, ivyakucita pakucivya insi ya Kenani.​—Amasu. 3:21, 22, 28; Josh. 12:7-24.

Umutumwa paulo wapazile ivyakucita mu vya kwe Leza mu mpindi ya mu ma C.E vyo-o vyakumile namazwi yano Yesu walanzile ayakuti; “Nilandwe zima lyoo ilya Wufumu wamwiyulu liliwalandwa munsi yonsi, liwe achipanichisyo kumyiko yonsi.” (Mat. 24:14) Pakuwomeleziwa namazwi ni vilolwa vino vyafumanga kwe tatakulu e Yesu, apali ponga nu mulimo wuno wapilwe uwakuti “akawumbulile amakandi nanti awinansi” izina lya kwe [Yesu’]. E Paulo wa wombesizye nkaninye pakupanga amawungwe yawina Klistu amavule mu Asia Minor monsi na ku Europe.​—Imili. 9:15; Kolo. 1:23.

Acisinka ukufuma nakali awawomvi wa kwe Yehova wakamucindika pano wakupanga ivya kucita ivizima nu kuvificilisya. Tungacita wuli pakupanga ivya kucita mu vya kwe Leza? Avyani vino tungapanga ukucita, swinya tunga citawuli pa kuvificilisya?

Imyezo Imilungamane Yikalondekwa

Munsi mwawa awantu awavule nkaninye wano wakapanga ivyakucita, awuli umulandu wuno mumikalile yitu cacindamila ukupanga ivya kucita. Vino tukapanga ivya kucita mu vya kwe Leza vya pusana nkaninye nivya munsi. Cino cikalenga awantu ukuwa namawuyo ya mwe yo-o insi, wakalondesya nkaninye ukuwa ni cuuma nu kumanyikwa. Ukwasowa nu kupita mumbali, ukupanga ivya kucita vino vingalenga tulumbuke mu wikazi kutazipa! Vino tungapanga ukucita mu vya kwe Leza avyovyo vino vyakuma ukupepa kwitu swinya vino vikatunjilila Uwufumu wa kwe Leza. (Mat. 6:33) Cino cikalenga tupange ivyakucita amuno twakunda e Leza na wantu. Co-o cikalenga twayipelesya mu wukapepa.​—Mat. 22:37-39; 1 Tim. 4:7.

Acino pano tukupanga ivya kucita mu vya kwe Leza, nampo nga mukulonda ukuwombesya mu mulimo nanti ukulunduluka mu vya kwe Leza imyezo yinu yizipizile ukuwa ayacisinka. Nanti ciwe wo-o, asawelyonsi pano vino mwapanga ukucita vingaficiliswa nanti acakuti muli nu mwezo uwulungamane. Uzye tungapanga wuli ivyakucita nu kuwombesya pakuti tuvificilisye?

Tuzipizile Ukupampamila pe Vino Twapanga Ukucita

Teyelenganyani pe vino e Yehova wamazile ukwelewula ivyelewulwa vyonsinye. Amazwi yakuti “akuwa manguzi nu mutondotondo,” yakalanjizya ukuti e Yehova wankinye impindi iyakwelewula ivintu. (Inta. 1:5, 8, 13, 19, 23, 31) Pano iciputulwa campindi conga naconga icakwelewula ivintu catalisile, wamanyile icete vino walinji nu kwelewulananti vino walinji nu kumalilicizya pe wulyanye uwanda. (Ukuwu. 4:11) E Yobo icikolwe citu walanzile ukuti “Pasi wino angamulesya e[Yehova] ukuchita chino akulonda.”(Job 23:13) Nce pamwi e Yehova wivwile icete sana ukulola “wila chintu chino welewuzile, na vonsi vyazifile nankanye”!​—Inta. 1:31.

Pakuti vino mwapanga ukucita vize vificilisiwe, nasweswenye tuzipizile ukupampamila pakuya ficilisya. Acani cino cinga twavwa ukuwa nu mute? Pano munsi mutalinji nanti cimwi, e Yehova wamanyile lyankani vino insi yalinji nu kuwa​—akuli ukuti icintu iciyembesye mwi yulu vino vyamuletelanga uwukankala nu mucizi. Nasweswenye tungalundulula umute uwakuvwambizya ukuficilisya vino akalonda ukucita mu wumi witu nga tukwelenganya pe vino vilifumamo navino ciliwa nga twacita wowo. Co-o acino caciticizile e Tony wino walinji ni myaka 19. Vino waweni pano watandalizile ama ofesi ya Nte zya kwe Yehova ku Western Europe vyamufisile pa mwezo. Ukufuma palyanye wayiwuzyanga ukuti, ‘Uzye cikakwivwika wuli ukwikala nu kuwombela papo?’ E Tony asitela aleke ukwelenganya ukuti wanda wumwi alifika ayepo, swinya watwalilizile ukukoncelela vino walondesyanga ukucita. Pasinzi ya myaka imivule wamwisile ukuya mukuwombela pa maofesi ya Nte zya kwe Yehova Ala watemilwe mukwivwavye!

Ukwizya nawantu wano waficilisya vino tukalonda ukucita kulilenga tuwe nu mute wa kuya ficilisya. Wa Jayson, wano walinji ni myaka 30, watakunzile umulimo wakuwizya pano walinji awalumendo. Pano wamazile isukulu lya ku secondali, watalisile wupainiya wampindi zyonsi. Acani cino calenga wa Jayson ukupampamila pakuwa wapainiya wampindi zyonsi? Wasusile ukuti: “Ukuwalanda na wapainiya nu kuwawomba nawo kwancincizizye ukutalika wupainiya.”

Ukulemba Vino Tukulonda Ukucita Kungatwavwa Ukuvificilisya

Vino tukulonda ukucita nga twavilemba vikapepuka ukuvificilisya. E Solomoni wilusile ukuti amazwi amazima yawa namaka yakutungulula umuntu ndi wulyanye vino icakusoncelezezyako cawa. (Ekawi. 12:11) Amazwi yamusango wo-o nga mwayalemba, yangafika umuntu pa mwenzo swinya angayizuka lyonsinye. Wo-o awuli umulandu wuno e Yehova wanenile imfumu zya mu Israeli ukuyilembela ibuku lya masundo.(Amasu. 17:18) Acino cingazipa ukulemba vino twapanga ukucita na vino twandi twakonka pa kuvificilisya. Tungalemba intazi zino tungapitamo pano tukokoncelela vino tukulonda ukucita navino tungacita pakuzimala. Ne cinji cingazipa ukumanya vino tungafika tumanyicisye nkaninye na vino tukulonda ukumanya nu kumanya wano wangatwavwa mwe vyovyo ivintu.

Ukutantika ifyakucita kwalenzile wa Geoffrey ukuwa wawome muvya kwe Leza. Wa Geoffrey wawomba wu painiya uwuyiwele pamyaka imivule , swinya wakawombela kunsi ya Asian kuno kutavula wa nte. Kucawulanda e wakwekwe wizile afwa mukupumincizya. Pamulandu na vino vyacitisile, wa Geoffrey wapanzile ivyakucita vino vyalenzile ukuti wa wombesya mu mulimo wa wupainiya. Pano walemvile vino walondanga ukuticita wapepezilepo swinya walondanga ukutalika amasambililo ye Baibolo ayapya yatatu mu kusila kwe wulyanye umwezi. Cila wanda wapitulukanga mwe vino wawombanga. Pa nsizi yamanda 10 wapitulukanga mwe vino wawombanga pakuti walole vino wakulunduluka. Uzye waficilisizye vino walondanga ukucita? Mwe wulyanye umwezi watalisile amasambililo ye Baibolo amapya 4. Ala wivwile icete mukwivwavye!

Mwapanga Ivya Kucita Vino Mungaficilisya Zuwa Ngati Avyakumanyilako Vino Mukulunduluka

Vino mwapanga ukucita mpindi zimwi vingaloleka ngati avisyupe nkaninye ukuvificilisya. E Tony wino tulanzilepo kali, walolanga ngati citange cicitike ukuwombela pa maofesi ya Nte zya kwe Yehova. Welenganyanga pe vino imisango yakwe yawifile swinya pe yo-o impindi lyo atani ayipe na kwe Yehova. E Tony wapinguzilepo ukuzifya imisngo yakwe ukulingana na vino Yehova akalonda swinya wapinguzilepo nu kubatizwa. Pansizi ya kubatizwa wapinguzilepo ukutalika ukuwomba wupainiya wakwavwilizya apano nu wampindi zyonsi. Swinya walemvile na manda yano walondanga ukutalika ukuwomba pe kalenda yakwe. Walile wawomba wupainiya pa mpindi injanane, ukuwombela pa maofesi ya Nte zya kwe Yehova kutalolekanga ngati aciloto kwe weliwe.

Na sweswenye cingazipa nga cakuti twankanya vino tukulonda ukucita pe vino tungaficilisya zuwa na vino tutange tuficilisye zuwa. Nga twapanga ukucita vino tungaficilisya zuwa, cingawa acimanyilo cakuti tukulonda ukuficilisya vino twapanga ukucita ku nkolelo. Ukupituluka mwe vino tukuwomba lyonsinye pano tukuficilisya vino tukalonda ukucita pa mpindi ntici, kungatwavwa ukuwika amano kwe vino twapanga ukucita vino vingasenda impindi ntali pa kuvificilisya. Ukuwa nu mute wakupepa kwe Yehova pa kuficilisya vino twapanga ukucita nako kungatwavwa ukutwalilila ukucita vino tukalonda. Umutumwa Paulo watuwomelezizye ukuti; “Pepanji impindi zyonsi.”​—1 Tes. 5:17.

Pepanji Impindi Yonsi

Umupampamila nu mute vikalondekwa. Vimwi vino tukalonda ukucita visicitika nanti twelenganye wulinye nanti tukulonda ukuvificilisya. Umusambi Yohani Marko ativwile icete pano umutumwa Paulo atalondanga ukumusenda mu wulendo wa citi wili uwa wu mishonari! (Imili. 15:37-40) E Marko walinji nu kusambililako kwe cino camuciticizile nukupilula vino walondanga ukucita pa kuti awombesya mu mulimo. Ukwasowa nu kuvwilika wasambilizileko kwe vino walondanga ukucita. Pansizi e paulo walanzile ivizima nkaninye pe Marko swinya e Marko waitofilwe nkaninye ukuwombela ponga nu mutumwa Peter mu Babiloni. (2 Tim. 4:11; 1 Pet. 5:13) Ncepamwi isyuko ikulu lino e Marko walinji nalyo, akulemba e kalata umuputwemo pa mikalile ni miwombele ya kwe Yesu.

Pano tukupanga ivyakucita mu mulimo wa kwe Leza mpindi zimwi nasweswenye tunganyocela insizi. Munzila ya kulekapovye, tuzipizile ukulola muno tukucita icete. Ukulola nga cakuti tungaficilisya vino twapanga ukucita nanti ukupilulako vino tukulonda ukucita nga cingacitika. Nga kwawa intazi, tukalondesya ukuwombesya, ukuwa nu mute apano nu mupampamila. Imfumu yamano e Solomoni akatunena ukuti. “Lambilizyanga Imfumu e Leza ukuti akupepe imyelenganizizye yako, apano ungachita ichete.”​—Imilu. 16:3.

Vimwi vino vikatuciticila vingalenga tupotwe ukuficilisya vino tukalonda ukucita. Kucakulolelako ukulwalilila nu kusakamala awapang’anda kungalenga tupotwe ukuficilisya vimwi vino twapanga ukucita. Tutakwiwilila icisinka icikulu icakuti, icilambu icikulisye awumi wamuyayaya kwi yulu na mu paradise monye munsi. (Luk. 23:43; Flpi. 3:13, 14) Nomba uzye tungapoka wuli co-o icilambu? Umutumwa Yohane walemvile ukuti “Ukuwa wensi wino akachita ukulonda kwakwe Leza alilandila.” (1 Yoh. 2:17) Nanti acakuti mpindi zimwi vino tukapitamo vingalenga tupotwe ukuficilisya vino tukalonda ukucita ‘tungatina Leza nukutontela masundo yakwe.’ (Ekawi. 12:13) Vino tukalonda ukucita mu vya kwe Leza, vikatwavwa ukuwika nkaninye amano ku kucita ukulonda kwa kwe Leza. Acino lekani twacindika e kelewula witu mwe vino tukupanga ukucita.

[Akambokosi]

Ivya kwe Leza Vino Tuzipizile Ukwelenganya Ukucita

○ Ukuwazya Baibolo cila wanda

○ Ukuwazya Ulupungu lwa kwe Malonda ne Loleni nga vyafumavye.

○ Ukuzifyako amapepo yitu

○ Ukuwa ni vikomwa vya muzimu wa kwe Leza

○ Ukuwawombesya mu mikalile

○ Ukusambilizya nu kuwizya icete

○ Ukumanya icete ivyakuwizizya pa foni muwunte wamwi lyasi na mu vifulo vya wukazi