Mwe Wacitici Wani mwe Wasongo mu vya kwe Leza pa Nsizi ya Kubatizwa

1. Avizima ci vino awacitici awavule wakucita?

CILA mwaka awacitici awavule wakubatizwa. Uzye na mwemwe apano mwabatizizwe? Nga pano mwabatizizwe, manyani ukuti wa ndume zinu na nkazi zinu mwi wungwe, wivwa icete nkaninye pe cino mwapingulapo ukucita swinya nga we Yehova weni, wacila na penepo. (Imilu. 27:11) Te yelenganyani katici pa vintu ivizima vino mwacita. Ku cakulolelako, mwawisileko sana amano kukusambilila Baibolo swinya ncepamwi mwasambilizile e Baibolo pa myaka imivule. Vino mwasambililanga vyalenzile musuwile ukuti e Baibolo Alizwi lya kwe Leza. Ni cicindamisye acakuti, mwamanya e Kalemba we Baibolo nukumukunda nkaninye. Mwizile mwakunda sana e Yehova, na co-o calenzile mupingulepo ukuyipa. Cino mupinguzilepo ukucita, acintu icizima nkaninye.

2. Avyani vino twandi tusambilile mwe co-o icipande?

² Ukwasowa nukuvwilika pano mwawombesyanga pa kuti mufikepo ukubatizwa, mufwile mwapisile mu ntazi izivule zino zyelezizye nisuwilo linu. Lelo napano mwandi muwaya mukukula muliwapita mu ntazi na zinjinye. E Satana aliwakwelezya na maka ukumilesya ukuwombela Yehova nukuleka ukumukunda. (Efes. 4:14) Kusi ukwelezya nanti katicinye ukumukoncelela. Acani cino cingamyavwa ukutwalilila ukuwa awa cisinka kwe Yehova nukuficilisya umulapo wakuyipa? Muzipizile ukutwalilila ukulunduluka nu ‘kulandalila’ pakuti mufikepo ukuwa wasongo mu vya kwe Leza. (Hebe. 6:1) Nomba mungacita wuli wo-o? Vyonye avino twandi tusambilile.

VINO MUNGACITA PAKUWA MWE WASONGO MU VYA KWE LEZA

3. Avyani vino awina Klistu wazipizile ukutwalilila ukucita pa nsizi yakubatizwa?

³ Nga cakuti twabatizwa tuzipizile twakonka ukusunda kwa mutumwa Paulo kuno wanenile awina Klistu wa mu Efese. Wawawomelezizye ukuti wazipizile ukuwa awina Klistu ‘wasongo.’ (Efes. 4:13) Mu nzila yinji tungalanda ukuti wawanenanga ukuti wazipizile ‘ukutwalilila ukulunduluka.’ Pakutwavwa ukwivwicisya co-o icisinka, wakolinye ukulunduka kwa ku muzimu kwe vino umwana akakula. Nga cakuti umwana wakwatwa, awakwasi wakwe wakamukunda nkaninye swinya wakakwivwa icete. Lelo nanti ciwe wo-o, we umwana asitwalililavye ukuwa akanya. Mukupita kwampindi akakwiza mukuleka ukuwa ni “miwele yawutichi.” (1 Kor. 13:11) Wonye avino cawa na ku wina Klistu. Nga twabatizwa, tuzipizile ukutwalilila ukulunduluka. Lekani tulandeko pe vimwi vino vingatwavwa ukucita wo-o.

4. Avyani vino vingamyavwa ukuwa wasongo mu vya kwe Leza? Londololani. (Wafilipi 1:9)

⁴ Twalililani ukukundilako e Yehova. Mwakunda kaali e Yehova, lelo mungaya mukumukundilako. Amunzila ci? Umutumwa Paulo walanzileko pa nzila yonga yino yikazanwa pa Wafilipi 1:9. (Wazyani.) Wapepezileko awina Filipi ukuti: “ulukundo lwinu lulandalile ukukula lulange lukakula.” Fwandi na sweswenye tungaya tukukundilako e Yehova. Tungacita wuli wo-o? Tungacita wo-o ukupitila mukuwa “nukumanyichisya kwenecho nukuwa nipanzyo lyakusimichila.” Pano tukuya tukumanyilako e Yehova, tukaya tukumukunda nukusalifya pamiwele yakwe nape vino akacita ivintu. Tukavwambisya sana ukucita ivintu vino vikamusecelesya nukukana cita ivintu vino vingamulumisya umwezo. Swinya tukawombesya na maka ukumanya vino Yehova akalonda twacita ni vyakucita vyovyo ivintu.

5-6. Tungacita wuli pakuti tukundileko e Yehova? Londololani.

⁵ E Yesu wakolanyanga nkaninye e Yehova. Fwandi nga cakuti twamanya e Yesu, tulikunda nkaninye e Yehova. (Hebe. 1:3) Inzila yonga yino yingatwavwa ukumanya icete e Yesu, akuwazya amalyasi Yilandwe 4 yano yakalanda pe weliwe. Nga cakuti musiwazya Baibolo cila wanda, cingazipa nga cakuti mwatalisile ukuwazya. Pano mukuwazya amalyasi yano yakalanda pe Yesu, mwawika sana amano pakumanya imiwele yakwe. Walinji amuyipepusye ku wantu wonsinye swinya watemilwe nukunyamula awana awatici. (Mar. 10:13-16) Atayimwamizye ku wasambilizi wakwe swinya walinji ni cikuku na co-o calenganga wawa awantungwa ukumunena vyonsinye vino wakuyivwa. (Mat. 16:22) Wo-o vino wacitanga calanjizyanga apatiswenye ukuti wakolanyanga Umukwasi wakwe uwa kwi yulu. Amuno ne Yehova nye atayimwamya. Tungalanda nawe ukupitila mwi pepo nukumunena vyonsinye vino tukuyivwa. Amuno watukunda swinya akatusakamala.​—1 Pet. 5:7.

⁶ E Yesu wivwilanga awantu inkumbu. Umutumwa Mateo walanzile pe Yesu ukuti: “Ala walola amawumba ichilanda achimulema, amuno watamikanga nukuluwaluwa ngati ang’onzi zino zisi numuchemi.” (Mat. 9:36) Nge Yehova weni akakwivwa wuli? E Yesu watili: ‘Awowonye avino ne Tata uwamwiyulu asilonda wumwi uwawatichinye ndi wa-a asowa.’ (Mat. 18:14) Ya-a mazwi yakatusansamusya nkaninye amuno yakatwavwa ukumanya ukuti e Yehova watukunda. Fwandi pano tukuya tukumanyilako e Yesu apano twandi twaya tukukundilako e Yehova

7. Uzye ukuwa ponga na wanawitu na wankazi wasongo mu vya kwe Leza kungamyavwa wuli?

⁷ Nga cakuti mukusumba impindi inkulu ukuwa ponga na wanawitu na wankazi wasongo mu vya kwe Leza wano wawa mwi wungwe, muliwaya mukukundilako e Yehova swinya muliwa mwe wasongo mu vya kwe Leza. Mwalola vino wawa ni nsansa. Wasilanguluka nanti katicinye pevino wapingulapo ukuwombela Yehova. Mungawanena ukuti wamisimicileko vimwi vino wazanamo mu mulimo wa kwe Yehova. Nga cakuti mukulonda ukupingulapo pe vimwi ivicindame, mungawanena ukuti wamipandeko amano. Mwakwizuka ukuti, “ndi wakapa wilango wavula chikachinjilila.”​—Imilu. 11:14.

8. Mungacita wuli nga cakuti mwatalika ukuvwilika vino Baibolo yikalanda?

⁸ Mutavwilika. Ndi vino tulanzilepo mu paragrafu 2, e Satana wandi awakwelezya na maka ukumilesya ukulunduluka nu kupalamila kwe Yehova. Nombanye nanti mukupita kwa mpindi, wamwi wandi wakwelezya na maka ukumilenga mu suwile ukuti e Yehova asa wino watwelewuzile lelo twizile atuwakovye pamulandu nukusanguka. Ncepamwi pano mwalinji mwe watici musitela mwelenganyepo pe co-o icisambilizyo, nomba pa-a pano mukuzile apano mwacisambilila ku sukulu. Swinya vino wakasambilizya wakusambilizya pa kusanguka, vingaloleka ngati avya cisinka. Lelo ncepamwi wakasambilizya winu wasitela welezyepo ukuvwambilizya pa visinka vino vikalanjizya ukuti kwawa e Kelewula. Mwakwizuka icisinka cino cikazanwa pa Imilumbe 18:17, pano pakati: “Penye umuntu wino akatalika ukuvwanga pamilandu, akaloleka ngati akusimichila, asuke esimilandu atalike ukumuwuzya amawuzyo.” Ukucila ukusuwila vyonsinye vino mwasambilila ku sukulu, muzipizile mwavwambilizya ivisinka vino vikazanwa mwi Zwi lya kwe Leza Baibolo, nga nukuvwambilizya mu mabuku yitu. Mungakolowozyako awanawitu na wankazi wano wazumizilepo mu kusanguka.b Mungawakolowozya ukuti wamineneko cino cawavwizye ukusuwila ukuti kwawa Kelewula. Ukucita wo-o kungamyavwa ukuzana ivisinka vino vingalenga musuwile ukuti kwawa Kelewula.

9. Mukusambililako cani kwe Melissa?

⁹ E nkazi Melissa wazanilemo ivizima mukuvwambilizya ivyewo vino vikalanda pakwelewula.c Walanzile ukuti: “Vino wasambilizyanga ku sukulu pakusanguka vyalolekanga ngati avya cisinka. Swinya pakutalika natinanga ukuvwambilizya ivisinka. Amuno nalolanga ngati vino ndizana pakusanguka avya cisinka. Lelo nizile injizuka ukuti e Yehova akalonda tuwe nimilandu yino yizipizile ukulenga tusuwile ukuti vino twazumilamo avya cisinka. Acino nizile intalika ukuvwambilizya. Nawazizye ibuku lyakuti Is There a Creator Who Cares About You? ne broshuwa yakuti Was Life Created? apano ni yakuti Vino Uwumi Watalisile​—Amawuzyo 5 Amacindame Nkaninye. Vino nazanile avino navwambisyanga. Nga cazifile sana nanga vwambilizye zuwa.”

10-11. Acani cino cingamyavwa ukutwalilila ukuwa awasanguluke? (1 Watesalonika 4:3, 4)

¹⁰ Kanani imiwele imiwipe. Nga cakuti umuntu wafika pa cimo ca wulumendo nanti wukazyana, apano kukawa ukuvwambisya sana ukucita uwuzelele. Swinya mpindi zimwi wamwi wangamipaticizya ukuti mucite nawo uwuzelele. Wonye avino ne Satana akalonda ukuti mwacita ukulingana navino umwezo winu wukulonda. Nomba acani cino cingamyavwa ukutwalilila ukuwa awasanguluke? (Wazyani 1 Watesalonika 4:3, 4.) Pano mukupepa ipepo lya pa lwinu, mwanena e Yehova vyonsinye vino mukuyivwa nukumulenga ukuti amiwomye. (Mat. 6:13) Mwakwizuka ukuti e Yehova akalondesya sana ukumyavwa asa kumilengulula. (Amalu. 103:13, 14) Ukuwazya Baibolo nakonye kungamyavwa. E Melissa wino tulanzilepo kaali, watamisile ukuleka ukwelenganya iviwipe. Watili: “Ukuwazya Baibolo cila wanda kwanjavwizye ukutwalilila ukwelezya na maka ukuleka ukwelenganya iviwipe. Swinya kwanjizusyanga ukuti ne wa kwe Yehova nukuti nkalonda na muwombela.”​—Amalu. 119:9.

¹¹ Mutazipizile mwakwelezya ukumala intazi mwenga. Mwanenako awakwasi winu vino vikumitamya. Kweni citapepuka ukunena awakwasi winu amalyasi ya musango wo-o, lelo acili icintu icicindame cino muzipizile ukucita. E Melissa watili: “Napefile kwe Yehova ukuti ampe amaka swinya nanenile ne tata pa ntazi yino nakweti. Pano nacisile wo-o, nivwileko icete. Swinya namanyile ukuti ne Yehova nye wakunzile pe vino napinguzilepo ukucita.”

12. Uzye mungacita wuli pakuti mwapingula icete pa vintu?

¹² Mwatungululwa ni visinka vya masundo ya mu Baibolo. Pano mukuya mukukula awakwasi winu walimizumilizya ukuwayipingulila pa vintu. Lelo nanti ciwe wo-o, kucili kuli ivintu ivivule vino mutani mumanye. Mungacita wuli pakuti mutize mupingulepo ukucita icintu cimwi cino cingonona wuciwuza winu ne Yehova? (Imilu. 22:3) E nkazi Kari walondolozileko vimwi vino vyamwavwizye ukuwapingula icete pa vintu. Wamanyile ukuti, nga cakuti umuntu we songo mu vya kwe Leza, asilondeka na masundo yakumutungulula mu vintu vyonsinye mu wumi. Walanzile ukuti: “Nazipizile ukwivwicisya ivisinka vya Baibolo, ukucila ukuwakonkavye amasundo.” Pano mukuwazya Baibolo mwayikolowozya ukuti: ‘Uzye vyo-o vino nawazya vikunsambilizya cani pe vino Yehova akakwelenganya? Uzye muli ivisinka vya masundo vino vinganjavwa ukucita ivintu ivizima? Nga amuno vili, avizima ci vino ndizanamo nga cakuti naviwomvya?’ (Amalu. 19:7; Ayize. 48:17, 18) Nga cakuti mukuwazya e Baibolo nukwelenganyapo pe vino mukuwazya, ciliwamipepucila ukupingula pa vintu mu nzila yino yikasecelesya Yehova. Amuno muliyivwicisya vino Yehova akakwelenganya pa vintu.

13. Uzye iviwuza ivizima vingatwavwa wuli? (Imilumbe 13:20)

¹³ Mwasola iviwuza vino vyakunda e Yehova. Ndi vino tulazilepo kaali mu paragrafu 7, iviwuza vino mwasolapo ukwizya navyo vingamyavwa ukuwa wasongo mu vya kwe Leza. (Wazyani Imilumbe 13:20.) Pakutalika e nkazi uwizina lya kuti Sara walesile ukuwa ni nsansa. Lelo mukupita kwa mpindi kwizile akuwa cimwi cino cacitisile cino calenzile atalike ukuwa ni nsansa na swinya. Wavwanzile ukuti: “Nizile imba ni viwuza ivizima nkaninye pa mpindi injanane. Kwalinji e nkazi wumwi uwacitici wino twapekanyanga nawe isambililo lya Ulupungu lwa kwe Malonda cila sabata. Ne nkazi winji nawe walenzile ntalike ukwasukapo na swinya pa kulongana. Pamulandu ni viwuza vino nakweti, calenzile ntalike ukuwika sana amano kwi sambililo lya palwane na kwi pepo. Nizile imba na wuciwuza uwuwome ne Yehova na swinya, swinya nizile imba ni nsansa.”

14. Uzye e Julien wapanzile wuli iviwuza ivizima?

¹⁴ Mungacita wuli pakuti mupange iviwuza ivizima vino vingamyavwa ukuwa wasongo muvya kwe Leza? E Julien wino we eluda pe yo-o impindi, watili “Napanzile iviwuza ivizima ukupitila mukuwomba nawo mu mulimo wakuwizya. Wa-a wano walinji aviwuza vyane wawombesyanga swinya wanjavwizye ukulola vino ukuwomba mu mulimo wakuwizya kukakwivwika icete. Acino nizile intantika ukuti njize mbombeko wupayiniya. Nizile injiluka ukuti cino calenzile ntawa ni viwuza ivizima, apamulandu wakuti nalolanga ngati wano wangawavye aviwuza vyane awano twalingine icimo. Lelo nanti ciwe wo-o, napanga iviwuza ivizima pa Bethel. Icakulolelako cawo canjavwa ukusolapo icete ivyakumalilamo icitendwe, na co-o calenga impalamile sana kwe Yehova.”

15. Akusoka ci kuno e Paulo wanenile e Timoti pakusola iviwuza? (2 Timoti 2:20-22)

¹⁵ Mungacita wuli nga cakuti mwazana ukuti kuli wumwi wino mukulola ukuti nga mwapanga wuciwuza nawe, mungonona wuciwuza winu ne Yehova? E Paulo wamanyile ukuti mwi wungwe lyakutalicilako ilya wina Klistu mwalinji wamwi wano welenganyanga nukucita ivintu ngati asa wina Klistu. Acino wasosile e Timoti ukuti awataluke. (Wazyani 2 Timoti 2:20-22.) Wuciwuza witu ne Yehova awuno wacindama. Fwandi tutazipizile ukupanga iviwuza vino vingalenga wo-o wuciwuza witu ukononeka wuno twawombesizye na maka yitu yonsinye ukuwupanga.​—Amalu. 26:4.

UZYE UKUPANGA IVYA KUCITA KUNGAMYAVWA WULI UKUWA WASONGO MU VYA KWE LEZA?

16. Avyani vimwi vino mungapanga ukucita?

¹⁶ Mwapanga ivya kucita ivizima. Mwapanga ivya kucita vino vingalenga muwe ni suwilo iliwome swinya vino vingalenga muwe mwe wasongo mu vya kwe Leza. (Efes. 3:16) Ku cakulolelako, mungatantika ukuti mwawazya nukuyisambilizya Baibolo cila wanda. (Amalu. 1:2, 3) Ncepamwi mungalola muno muzipizile ukuzifya pakuti mwapepa lyonsinye kwe Yehova ukufuma pansi ya mwezo. Nanti ncepamwi mungalola ukuti muzipizile ukuzifyako mwe vino mukasolapo ivya kumalilamo icitendwe na vino mukawomvya impindi. (Efes. 5:15, 16) Nga cakuti Yehova walola vino mukuwombesya pakuti vye muwe mwe wasongo mu vya kwe Leza, aliwasecelela.

17. Avizima ci vino vikafuma mukwavwako awantu wanji?

¹⁷ Muliwa mwe wasongo mu vya kwe Leza, nga cakuti mukwavyako awantu wanji. E Yesu watili: “Ukupa akwalongo wuli ukulusya ukupochelela.” (Imili. 20:35) Muliwawa ni nsansa nkaninye nga cakuti mukuwomvya amaka ni mpindi yinu kukwavwa wanji. Ku cakulolelako, mungapanga ukwavwilizyako awa cisongo na wano wakalwalilila mwi wungwe linu. Ncepamwi mungawakalilako vino wakulonda nanti ukuwavwa ukumanya ivya kuwomvya ivya kupangapanga. Nga mwe wanawitu, mungapanga ukuti mwize mufikepo ukuwa umuwomvi wino akatumicila, pakuti mwakwavwilizya sana awanawitu na wankazi. (Flpi. 2:4) Mungalanjizya ukuti mwakunda nawalyanye wano asa Nte zya kwe Yehova ukupitila mukuwawizizyako ilyasi lizima pa Wufumu. (Mat. 9:36, 37) Nga mungakumanisya, mungapanga ukuwombako wupayiniya, ukuwombako pa Bethel nanti mu mulimo wawuzengo.

18. Uzye ukulundulula umulimo winu uwakuwombela Yehova kungamyavwa wuli ukuwa wasongo mu vya kwe Leza?

¹⁸ Ukuwombako umulimo wa mpindi zyonsi kungalenga muwe na masyuko yakuwomba imilimo imivule nukupalamila kwe Yehova. Ukuwombako wupayiniya kungalenga mwize muzanweko kwi Sukulu lya Kawizya wa Wufumu, ukuwombako pa Bethel nanti mu mulimo wawuzengo. E nkazi uwacitici uwizina lya kuti Kaitlyn watili: “Pano na batizizwe vye nawombanga sana mu mulimo wakuwizya na wanawitu na wankazi wasongo mu vya kwe Leza. Na co-o canjavwizye ukupalamila nkaninye kwe Yehova. Icakulolelako cawo icizima, calenzile nayisambilizya sana Baibolo nukuzifyako imisambilizizye yane.”

19. Avizima ci vino mulizanamo nga cakuti mwatwalilila ukuwombesya ukuwa wasongo mu vya kwe Leza?

¹⁹ Nga cakuti mukuwombesya ukuwa mwe wasongo mu vya kwe Leza, e Yehova alimipa ivizima ivivule. Mutaliwawomvya amaka yinu kukucita ivintu vino vitacindama. (1 Yoh. 2:17) Swinya mutaliyivwapo uwuwi wuno tukayivwa nga cakuti tutapinguzile icete pa vintu. Lelo muliwasecelela mukuwombesya kwinu swinya muliwa ni nsansa. (Imilu. 16:3) Icakulolelako cinu icizima ciliwawomelezya awanawitu na wankazi wonsinye, wasongo na waticinye. (1 Tim. 4:12) Ni cicindamisye acakuti, muliwa nu mutende swinya mulizanamo ivizima vino vyawa mukusecelesya Yehova nukuwa na wuciwuza uwuzima na weliwe.​—Imilu. 23:15, 16.