Mwapingulapo Ukucita Vino Vingasecelesya Yehova

1. Antazi ci yimwi yino swensinye tukawa nayo?

CILA wanda tukalondekwa ukupingulapo ivya kucita. Vimwi vikawa avipepuka ukupingulapo, ponga ngati akusola impindi yakulala na vino twandi tulye umutondo tondo. Lelo vimwi vyatala nkaninye. Amuno vikakuma uwumi witu, insansa zitu, awantu wano twakunda na wuciwuza witu ne Yehova. Nomba tukalonda twazanamo ivizima ni ndupwa zitu mwe vino twapingulapo. Ni cicindamisye acakuti, tukalonda vino twapingulapo viwasecelesya e Yehova.—Roma. 12:​1, 2.

2. Avintu ci vitatu vino vingamyavwa ukupingulapo icete pa vintu?

² Muliwapingula icete pa vintu nga cakuti pano mutani mupingulepo (1) mwamanya ivisinka vyonsi, (2) mwamanya vino Yehova akakwelenganya pe wowo umulandu ne (3) mukwelenganyapo sana pe vino mukulonda ukupingulapo. Mwe co-o icipande, twandi tulande pe vyo-o ivintu vitatu vino tuzipizile ukukonka pano tutani tupingulepo pe cimwi swinya candi cilande na pe vino ukwiluka kungatwavwa.—Imilu. 2:11.

MWAMANYA IVISINKA VYONSI

3. Amulandu ci wuno muzipizile ukumanya ivisinka vyonsi pano mutani mupingulepo pe cimwi? Lanjililani.

³ Icakutalicila pano mutani mupingulepo pe cimwi, akumanya ivisinka vyonsi pe vino mukulonda ukupingulapo. Amulandu ci wuno ukucitila wo-o kucindamizile? Katulanjilile. Nga cakuti umuntu amulwale akaya kwe dokota pakuti amanye indwala yino alwile. Kweni e dokota asifikavye atalika ukumupa umulembo ukwasowa ukuti amupime nanti ukumukolowozya vino akwivwa. Wonye avino namwemwe muzipizile ukucita, mwatalicila ukumanya ivisinka pe vino mukulonda ukupingulapo. Na co-o cililenga mupingulepo icete. Mungacita wuli wo-o?

4. Ukulingana ni Imilumbe 18:​13, mungacita wuli pakuti mumanye ivisinka vyonsi? (Lolani ni cikope.)

⁴ Mwakolowozya amawuzyo pakumanya ivisinka vyonsi. Tuti wamita ukuya mukwizizya ponga kumwi, uzye muzipizile ukuyako? Nga cakuti mutamanyile wino atantisile koko ukwizizya ponga, mungakolowozya wino amisile ukuti: “Akwinye swinya ampindi ci pano kuliwa ko-o ukusunkana? Kuliwa awantu wanga? Weweni wino aliwa pa nkolelo kwe vino viliwacitika? Awaweni wano walizanwako? Avyani vino viliwako? Uzye kuliwa nipala?” Ukukolowozya amawuzyo ya musango wo-o, kungamyavwa ukupingulapo icete.—Wazyani Imilumbe 18:13.

5. Avyani vino muzipizile ukucita nga mwamanya ivisinka vyonsi?

⁵ Nga mwamanya ivisinka muzipizile ukwelenganyapo sana pe vino ivintu viliwa. Mungacita wuli ngawaminena ukuti kuliwa wantu wano wasikonka amasundo ya kwe Yehova swinya kuliwa ni pala? Uzye mukulola ukuti ko-o ukwizizya ponga kungiza kuwe ngati akuzevya kwa wantu wa mwe yo-o insi? (1 Pet. 4:3) Uzye kuliwako pa mpindi yino mukaya mukulongana nanti mu kuwizya? Nga mwelenganya pe vyonsinye vyo-o, cilimipepucila ukupingulapo icete. Lelo kuli nacinji cino muzipizile ukucita. Nga cakuti mwamanya vino ivintu viliwa, cingazipa ukuyikolowozya ukuti; nge Yehova weni akakwelenganyapo wuli?—Imilu. 2:6.

MWAMANYA VINO YEHOVA AKAKWELENGANYA

6. Ukulingana ne Jemusi 1:​5, amulandu ci wuno tuzipizile ukulenga e Yehova ukuti atwavwe?

⁶ Mwalenga Yehova ukuti amyavwe ukumanya vino akakwelenganya pe cino mukulonda ukupingulapo. Watulaya ukutupa amano yakwiluka nga cakuti vino tukulonda ukupingulapo vingamusecelesya. Swinya akapa ya-a mano “cipepe nanti kukampila.”—Wazyani Jemusi 1:5.

7. Mungacita wuli pakumanya vino Yehova akakwelenganya pe vino mukulonda ukupingulapo? Lanjilillani.

⁷ Nga cakuti mwapepa kwe Yehova ukuti amyavwe, mwawikako sana amano ukulola vino akumyasuka. Ku cakulolelako, nga cakuti mwasowa pano muli pawulendo, mungakolowozya wumwi wino akakwikala kwe yoyo incende ukuti amilanjilile. Uzye nomba vwilani nga mwamukolowozya, mungatalika ukupita pano atani amyasuke? Asa vino mungacita. Mungalindilila ukuti amilanjilile ukwakuya. Wonye avino nasweswenye tuzipizile ukucita. Nga cakuti twapepa kwe Yehova ukuti atupe amano, tuzipizile ukwelezya na maka ukwiluka vino Yehova akutwasuka ukupitila mukuvwambilizya mwe Baibolo ni visinka vya masundo vino vingawomba ukulingana na cino tukulonda ukupingulapo. Ndi vino tetwalandapo, pano mukupingulapo nga cakuti mungaya mukwizizya ponga na wanji, muzipizile ukulola vino Baibolo yikalanda pa kuzevya kwa mwe yo-o insi, pakwizya na wamiwele miwipe na pa wuzima wuno wawa mukuwika ivya Wufumu inkolelo mu wumi.—Mat. 6:33; Roma. 13:13; 1 Kor. 15:33.

8. Mungacita wuli pakuzana ivyewo vino mukuvwamba? (Lolani ni cikope.)

⁸ Mpindi zimwi mungalondekwa awakumyavwa ukuvwamba ivyewo vino mukulonda. Umwanawitu nanti e nkazi e songo mu vya kwe Leza angamyavwa nanti ukumipandako amano. Lelo ukuvwambilizya ivyewo mwe weneco akuno kungamyavwa nkani. Mungazana ivyewo vino vingamyavwa mwi buku lyakuti Ibuku lya Kwavwa Inte zya kwe Yehova Ukuzana Ivyewo ni lyakuti Amawaliko Yano Yangavwa Awina Klistu mu Mikalile mu cizungu. Mwakwizuka ukuti cino mukucitila vyonsinye vyo-o, apakuti mupingulepo ukucita vino vingasecelesya e Yehova.

9. Tungamanya wuli ukuti vino twapingulapo vyandi visecelesye e Yehova? (Waefeso 5:17)

⁹ Tungamanya wuli ukuti vino twapingulapo vyandi visecelesye e Yehova? Icakutalicila, tuzipizile ukumumanyicisya. E Baibolo yikalanda ukuti “Ndi wamanya Umutele Wenga, wiluka”. (Imilu. 9:10) Tungakwiluka nga cakuti twamanya imiwele ya kwe Yehova, ukulonda kwakwe, vino wakunda na vino wapata. Mungayikolowozya ukuti, ‘Ukulingana na vino namanya e Yehova, avyani vino ningapingulapo ukucita vino vingamusecelesya?’—Wazyani Waefeso 5:17.

10. Amulandu ci wuno twacindamicila nkani ivisinka vya masundo ya mu Baibolo ukucila wa lupwa na wantu wanji?

¹⁰ Mpindi zimwi pakuti tupingulepo ukucita cino cingasecelesya e Yehova, tungalondekwa nu kulumisya walupwa na wantuvye wanji umwezo. Ku cakulolelako, awakwasi wamwi wangapaticizya umwana wawo umwanaci ukuti atwalwe ku monsi wa ndalama wino angiza awalipile ivyuuma ivivule asamulandu nu kuti atawoma mu vya kwe Leza. Kweni wakucita wo-o amuno wakulonda umwana wawo ayize ayikale icete. Nomba nga watwalwa weweni wino aliwamwavwa ukuwoma mu vya kwe Leza? Nge Yehova weni angalolapo wuli pakupingula kwa musango wo-o? Icasuko tukacizana pe Mateyu 6:33. Pa-a e Yesu wawomelezizye awina Klistu ukuti “Mutele muvwambe Uwufumu” wa kwe Leza inkolelo. Nanti acakuti twacindika awakwasi na wantu wanji, icicindamisye sana cino twawikako amano akulenga Yehova ukusecelela.

MWAKWELENGANYAPO SANA PE VINO MUKULONDA UKUPINGULAPO

11. Amiwele ci yino yawa pa Wafilipi 1:​9, 10 yino yingamyavwa ukwelenganyapo pe vino mukupingulapo?

¹¹ Pa nsizi yakuvwambilizya ivisinka vya masundo ya mu Baibolo vino vingamyavwa, mwakwelenganyapo sana na pe vino mukulonda ukupingulapo. (Wazyani Wafilipi 1:​9, 10) Ukwiluka kungamyavwa ukwelenganya pe vino vingiza vifume mwe vino mwapingulapo. Vimwi ivintu vyapepuka ukupingulapo lelo vimwi vitapepuka. Nomba ukwiluka kungamyavwa ukupingulapo icete na pe vilyanye iviwome.

12-13. Uzye ukwiluka kungamyavwa wuli ukupingulapo icete pano mukusolapo incito yakuwomba?

¹² Lekani tulande pe co-o icakulolelako, tuti mukuvwamba incito yakuwomba iyakuti mwasakalalilamo ulupwa lwinu. Nomba kwaloleka incito ziwili. Acino mwatalika ukuvwambilizya ivisinka vyonsi pe zyozyo incito, ponga ngati avino wakawomba, vino watantika imiwombele, impindi yino mwandi mwasumba ukufuma ku ng’anda ukuya ku ncito na vinji. Pansizi ya kuvwambilizya, mwazana ukuti zyonsinye zili icetenye ku mwina Klistu ukuwomba. Acino mwasolapo yonga pa mulandu wakuti ayino mwatemwa nanti pamulandu wakuti muliwafola indalama imvule. Nomba kuli na vinjinye vino muzipizile ukwelenganyapo pano mutani mupingulepo.

¹³ Ku cakulolelako, uzye zyo-o incito ziwili zingiza zyalenga mwapotwa ukuzanwa mu kulongana kumwi? Uzye pe zyozyo incito pali yimwi yino yingiza yilenge mwapotwa ukuwa ponga nu lupwa nu kuwavwa ukupalamila kwe Yehova? Ukuyikolowozya amawuzyo ndi vino ya-a kungamyavwa ukuwika ivya Wufumu inkolelo. Akuli ukuti, ukuwika pa nkolelo ukupepa Yehova nu kusakamala ulupwa lwinu ukucila ukuwika amano ku kuvwamba indalama. Swinya cililenga mupingulepo ukucita cino cingasecelesya e Yehova.

14. Uzye ulukundo nu kwiluka vingatwavwa wuli?

¹⁴ Ukwiluka kulitwavwa ukuwakwelenganyapo pano tukupingula pe vino vingakuma wanji pakuti “tutawapunuzya.”[NWT] (Flpi. 1:10) Ukucita wo-o kwacindama nkaniye pano tukupingula pa vintu vya palwitu ndi vino pa mizwalile ni milolecele. Ku cakulolelako, tungalanga twatemwa imilolecele yimwi nanti imizwalile yimwi. Nomba tungacita wuli nga vikupunuzya wanji? Ukwiluka kulitwavwa ukucindika vino wakuyivwa. Swinya ulukundo lulilenga tuzyale ivya mucinzi nu kucita “vino vingasechelesya nawanji.” (1 Kor. 10:​23, 24, 32; 1 Tim. 2:​9, 10) Na co-o cililenga tupingulepo ukucita vino vikulanjizya ukuti twawakunda nu kuwacindika.

15. Avyani vino muzipizile ukucita pano mukupingulapo ukucita icintu cimwi icicindame?

¹⁵ Nga mukulonda ukupingulapo pa cintu cimwi icicindame, mwakwelenganya pe vino muliwalondekwa ukucita pakuti muficilisye. E Yesu watuwomelezizye ukuti “mwapenda” vino vingasumbwapo. (Luk. 14:28) Fwandi pano mutani mupingulepo pe cimwi, mwakwelenganya pa mpindi, ivintu na maka yano yaliwalondekwa pakuti muficilisye. Mpindi zimwi mungalondekwa ukukolowozya wa lupwa pe vino wenga na wenga aliwacita pakumitunjilila pe cino mwapingulapo. Amulandu ci wuno ukucitila wo-o kucindamizile? Amuno kungamyavwa ukumanya mumwi muno muzipizile ukupilukako pe vino mupinguzile nantivye ukupingulapo ukucita ivintu vinji. Cinji acakuti, nga mwanenako wa lupwa lwinu pe vino mupinguzile swinya mukwivwila na vino wakuminena, walimitunjilila ukuficilisya vino mupinguzilepo.—Imilu. 15:22.

MWAPINGULAPO UKUCITA VINO MULIKUMANISYA

16. Avyani vino muzipizile ukukonka pakupingulapo vino mungakumanisya ukucita? (Lolani na kambokosi kakuti “Ivyakucita Pakupingulapo Icete pa Vintu.”)

¹⁶ Nga cakuti mukonsile vyonsinye vyo-o vino twasambililapo, lyo muyipekinye ukupingulapo icete. Amuno muvwambilizizye ivisinka vyonsi pe cino mukulonda ukupingulapo swinya muweni nivisinka vya masundo ya mu Baibolo vino vingamyavwa ukupingulapo ukucita cino cingasecelesya e Yehova. Pa-a nomba mungalenga ukuti e Yehova amyavwe ukuficilisya vino mwapingulapo.

17. Acintu ci icikulu nkani cino cikalenga umuntu apingulapo icete pa vintu?

¹⁷ Nanti acakuti kwawa ivivule vino mwapingulapo icete ku nsizi, mwakwizuka ukuti icikulu nkani cino cikalenga umuntu apingulapo icete pa vintu akweyamila pa mano ya kwe Yehova, asa pe vino umweneco wamanya nanti pe vino wacenjelamo. E Yehova mutupunye awino angamipa amano yacisinka, ukumanya nga nukwiluka. Vyo-o avili ivintu ivicindame vino vingamyavwa ukupingulapo icete. (Imilu. 2:​1-5) Swinya e Yehova angamyavwa ukupingulapo ukucita cino cingamusecelesya.—Amalu. 23:​2, 3.