Mwakolanya Yesu Wino Wawombesyanga mu Mulimo wa Kuwizya

1. Acani cino cikatupusanyako kwe wano wakayilola ukuti awina Klistu?

ICINTU cimwi cino cikatupusanyako kwe wano wakayilola ukuti awina Klistu, akuwombesyaa mu mulimo wakuwizya. (Tait. 2:14) Lelo mpindi zimwi mungakwivwa uwukata wakuwizya. Mungayivwa ngati avino e eluda wumwi wino akawombesya nkaninye walanzile. Watili, “Mpindi zimwi icakuwizya cisiwamo.”

2. Acani cino cingalenga mpindi zimwi twakwivwa uwukata wakuwomba umulimo wakuwizya?

² Tungakwivwa icete ukuwomba imilimo yinji mwi wungwe lya kwe Yehova ukucila ukuwomba umulimo wakuwizya. Amulandu ci? Amuno ukuwomba imilimo ponga ngati akuzenga nu kuzifya vino vikononeka, ukuwomba umulimo wakwavwilizya wano waponezilwe na masanso nu kuwomelezya awanawitu na wankazi, tungalola zuwa ivizima vino vikufumamo. Ku cakulolelako, nga tukuwombela ponga na wanawitu na wankazi mu mutende, tukalanjizyanya ulukundo swinya tukamanya ukuti wakasalifya pe vino tukawacitila. Lelo tungalanga twawombela mucifulo cimwi pa myaka imivule nomba awavule wakakana ukwivwa. Swinya twamanya ukuti pano insilo yansi yikuya yikupalamila, awavule waliwakana ukwivwa kwi lyasi lizima. (Mat. 10:22) Nomba asa mulandu na wo-o, acani cino cingatwavwa ukutwalilila ukuwawombesya mu mulimo wakuwizya?

3. Uzye icilanjililo cino cikazanwa pe Luka 13:​6-9 cikatusambilizya cani pe Yesu?

³ Tungasambililako kwe Yesu ivya kuwombesya mu mulimo wakuwizya. Pano walinji munsi, asitela alekepo ukuwombesya mu mulimo wakuwizya. Swinya pano impindi yayanga yikupalamila iyakuti aye kwi yulu, apano wawombesyanga na sana. (Wazyani Luka 13:​6-9.) E Yesu wayikolinye ku muwomvi wa mucalo wino wawomvile imyaka yitatu akusakamala umuti lelo wutakomanga. Wonye avino e Yesu wamazile imyaka yitatu akuwizizya awa Yuda, lelo awavule wakananga ukwivwa. Nomba atalesile ukuwizya, walinji ngati amuwomvi wa mucalo wino wasuwizile ukuti wanda wumwi umuti wulikoma.

4. Avintu ci 4 vino twandi tusambilile vino vyalenzile e Yesu awawombesya?

⁴ Mwe co-o icipande, twandi tusambilile pe vino Yesu wawombesyanga mu mulimo wakuwizya maka maka mu myezi 6 iyakulecelezyako pano atani aye kwi yulu. Ukusambilila pe vino wasambilizyanga na vino wacitanga, kungatwavwa ukutwalilila ukuwombesya mwe ya-a amanda. Twandi tusambilile pa vintu 4 vino vyalenzile e Yesu awawombesya: (1) Wawisile amano ku kucita ukulonda kwa kwe Yehova, (2) wawisile amano ku masesemo, (3) weyamizile pe Yehova, ne (4) wasuwizile ukuti wamwi walisuka wivwe.

WAWISILE AMANO KU KUCITA UKULONDA KWA KWE YEHOVA

5. Uzye e Yesu walanjizizye wuli ukuti wawisile amano ku kucita ukulonda kwa kwe Leza?

⁵ E Yesu wawombesyanga nkaninye ukuwomba umulimo wakuwizya “ilandwe zima ilya Wufumu wakwe Leza” amuno wamanyile ukuti avino Yehova walondanga ukuti awacita. (Luk. 4:43) E Yesu wawisile umulimo wakuwizya pa nkolelo mu wumi wakwe. Amuno na palyanye pano kwasyazile amanda matici ukuti aye kwi yulu, wapitanga “mutwaya tukulu nututici,” akuwizya ilyasi lizima. (Luk. 13:22) Cinji acakuti wasambilizizye na wanji ukuwomba wo-o umulimo.—Luk. 10:1.

6. Uzye umulimo wakuwizya walemenkana wuli ni milimo yinji yino tukawomba mwi wungwe lya kwe Yehova? (Lolani ni cikope.)

⁶ Napeyonye impindi, umulimo wakuwizya awuli umulimo uwukulu wuno e Yehova ne Yesu wakalonda twawomba. (Mat. 24:14; 28:​19, 20) Imilimo yonsinye yino tukawomba mwi wungwe lya kwe Yehova yikatunjilila umulimo wakuwizya. Ku cakulolelako, tukazenga ama Ng’anda ya Wufumu pakuti wano tukawizizya wakwiza mukulonganilamo. Swinya imilimo yino tukawomba pa Bethel na mu ncende zinji yikalenga umulimo wakuwizya ukuya pa nkolelo. Ne nga kwacitika uwusanso tukasinincizya ukuti awanawitu na wankazi wakweti vino wakulondekwa pakuti watwalilile ukulongana nu kuwomba umulimo wakuwizya. Nga tukwizuka ukuti umulimo wakuwizya wacindama nu kuti awuli umulimo wuno Yehova akalonda twawomba, tuliwavwambisya ukuwizya lyonsinye. E János e eluda waku Hungary watili: “Nkakwizuka ukuti kusi umulimo wuno wacindama wuno walusya umulimo wakuwizya, amuno awuli umulimo uwukulu.”

7. Amulandu ci wuno Yehova akalondela tutwalilile ukuwizya? (1 Timoti 2:​3, 4)

⁷ Tungawombesya mu mulimo wakuwizya nga cakuti tukuwika amano ku wantu ndi vino Yehova akacita. Akalonda awavule ukwivwa kwi lyasi lizima nu kutalika ukusambilila pe weliwe. (Wazyani 1 Timoti 2:​3, 4.) Swinya akatusambilizya ivyakuwomba wo-o umulimo amuno wamanya ukuti awantu nga wivwa wangiza wapusuke. Ku cakulolelako, mwe broshuwa yakuti, Kundanji Awantu Mwawasambilizya mwawa vino vingatwavwa ukutalika ukulanzyanya na wantu nu kupanga awasambi. Nanti acakuti awantu wangakana ukwivwa pe yo-o impindi, wangiza wasolepo ukutalika ukuwombela Yehova pano uwucuzi wukulu wutani wusile. Vino tukuwasambilizya pe yo-o impindi avino vingiza viwavwe ukutalika ukumuwombela ku nkolelo. Lelo vyo-o vingiza vicitikevye nga cakuti twatwalilila ukuwizya.

WAWIKANGA AMANO KU MASESEMO

8. Uzye ukumanya amasesemo kwalenzile e Yesu awawomvya wuli impindi yakwe?

⁸ E Yesu wamanyile vino amasesemo yalinji nu kuficiliswa. Ku cakulolelako, wamanyile ukuti walinji nu kuwomba umulimo wakuwizya imyaka yitatu ni myezi 6. (Dan. 9:​26, 27) Swinya wamanyile uwusesemo wuno walandanga pa mpindi yino walinji nu kufwilapo na vino walinji nu kufwa. (Luk. 18:​31-34) Pa mulandu wakuti Yesu wamanyile vino vyalinji nu kumuciticila, calenzile awawomvya icete impindi swinya wawombesyanga pakuti amale umulimo wuno wamupile.

9. Uzye ukwivwicisya amasesemo ya mu Baibolo kungatwavwa wuli?

⁹ Nga cakuti tukwelenganya pa masesemo yano yakuficiliswa na yano yandi yaficiliswe nombanye, tungawombesya mu mulimo wakuwizya. Twamanya ukuti insilo ya nsi yipalamizile. E Baibolo yalandizile lyankani pe vino awantu waliwa mu manda yakulecelezya na vino viliwacitika, swinya vyonye vyo-o avino vikucitika. Tukulola kuno uwuteko wa maka uwa Anglo-America nu wuteko wa Russia na wano wakawutunjilila wakulwisyanya. Ya-a ama wuteko yakuficilisya uwusesemo wuno wukalanda pa mfumu ya kukambazwa ke ndilo ni ya kukambazwa ke kamani mwe ya-a “manda ya kulecelezya.” [NWT] (Dan. 11:40) Twamanya nu kuti uwuteko wa maka uwa Anglo-America wukakwimililako amatamba ya kwi kolano lino lyalandwapo pe Daniel 2:​43-45. Ukulingana na wo-o uwusesemo, tusakuvwilika nanti katicinye ukuti Uwufumu wa kwe Leza wandi wonone amawuteko yonsinye. Wo-o uwusesemo wukutulanjizya ukuti insilo ya nsi yipalamizile nkaninye. Acino tuzipizile twawombesya sana mu mulimo wakuwizya.

10. Avyani vino vikalenga twavwambisya ukutwalilila ukuwombesya mu mulimo wakuwizya?

¹⁰ Amasesemo ya mu Baibolo yakalanda na pa vizima vimwi vino vikalenga twavwambisya ukuwizizya wanji. E nkazi Carrie uwa ku Dominican Republic watili, “Ukwelenganya pa masesemo yano yakalanda pa vizima vino Yehova alitucitila ku nkolelo, kukalenga na vwambisya ukunenako wanji.” Walanzile nu kuti: “Nga nalola intazi zino awantu wakupitamo mwe ya-a amanda, nkalola ukuti nawonye wazipizile ukusambilila pe ya-a amalayo.” Amasesemo ya mu Baibolo yakalenga tutwalilile ukuwomba umulimo wa kuwizya, amuno twamanya ukuti e Yehova akawa nasweswe pano tukuwomba. E nkazi Leila wino akakwikala ku Hungary watili: “Uwusesemo wuno wawa pe Ayizeya 11:​6-9, wukalenga nawizizya na walyanye wano wakuloleka ukuti watanga wivwe. Amuno Namanya ukuti uwili wensinye angapiluka nga cakuti e Yehova wamwavwa.” Ne umwanawitu Christopher wino akakwikala mu Zambia watili: “Ndi vino e Marko 13:10 yikalanda, ilyasi lizima likuwizwa insi yonsinye. Na co-o cikalenga nalola ukuti alongo ukuficilisyako wo-o uwusesemo.” Nga mwemwe, amasesemo ci yano yakamyavwa?

WEYAMILANGA PE YEHOVA

11. Amulandu ci wuno Yesu walondekwanga ukweyamila pe Yehova pakuti atwalilile ukuwombesya mu mulimo wakuwizya? (Luka 12:​49, 53)

¹¹ E Yesu weyamizile pe Yehova pakutwalilila ukuwombesya mu mulimo wakuwizya. Nanti acakuti e Yesu walinji nu mucinzi pano wawizyanga, wamanyile ukuti awavule walinji nu kukana ukwivwa nu kumupata. (Wazyani Luka 12:​49, 53.) Swinya pamulandu na wonye umulimo wakuwizya, intunguluzi zya simapepo walondanga ukumukoma. (Yoha. 8:59; 10:​31, 39) Lelo watwalilizilevye ukuwizya amuno wamanyile ukuti e Yehova walinji nawe. Watili: ‘Nsinenga: ukuwa e Tata wino wantuma alinani. . . . atansya nenga, amuno nkachita vino wakunda.’—Yoha. 8:​16, 29.

12. Avyani vino e Yesu wawomelezizye awasambi wakwe ukucita nga cakuti watalika ukuwacuzya?

¹² E Yesu wanenile awasambi wakwe ukuti wazipizile wakweyamila pe Yehova pakuti watwalilile ukuwomba umulimo wakuwizya. Lyonsinye wawizusyanga ukuti e Yehova walinji nu kuwawavwa nga wakuwacuzya. (Mat. 10:​18-20; Luk. 12:​11, 12) Pa mulandu wakuti wamanyile ukuti awavule waliwakana ukwivwa ilyasi lizima, wawawomelezizye ukuti wacenjela. (Mat. 10:16; Luk. 10:3) Wawanenile nu kuti nga cakuti awantu watakulonda ukuteyelezya, watazipizile ukuwapaticizya. (Luk. 10:​10, 11) Swinya wawanenile ukuti nga watalika ukuwacuzya wafumapo. (Mat. 10:23) Nanti acakuti e Yesu wawombesyanga swinya wasuwizile e Yehova, atayitwalangavye mu ntazi.—Yoha. 11:​53, 54.

13. Amulandu ci wuno tungasuwila ukuti e Yehova wandi awatwavwa?

¹³ Tukalondekwa ukwavwa kwa kwe Yehova pakuti tutwalilile ukuwizya asa mulandu nu kuti wangakana ukwivwa. (Ukuwu. 12:17) Amulandu ci wuno tungasuwila ukuti e Yehova wandi awatwavwa? Apamulandu ni pepo lino Yesu wapefile lino likazanwa pe Yohani icipandwa 17. Pa-a e Yesu walenzile e Yehova ukuti awacinjilila awatumwa wakwe. E Yehova wasusile lyo-o ipepo, amuno ibuku lya Imilimo likalanda pe vino e Yehova wavwizye awatumwa ukutwalilila ukuwomba umulimo wakuwizya asa mulandu nu kuwacuzya. Mwe lyo-o ipepo e Yesu walenzile e Yehova ukuti ayize awacinjilila na wano walinji nu kwivwa kwe vino awatumwa wawizyanga. Pe wano Yesu wapepezile ukuti e Yehova ayize awawavwa pawa na sweswenye. E Yehova watwalilila ukwasuka ipepo lino Yesu wapefile. Fwandi nasweswenye wandi awatwavwa ndi wulyanye vino wavwanga awatumwa.—Yoha. 17:​11, 15, 20.

14. Twamanya wuli ukuti tulitwalilila ukuwizya ilyasi lizima? (Lolani ni cikope)

¹⁴ Pano insilo yakwe yo-o insi yikuya yikupalamila, citandi ciwapepuka ukuwizya ilyasi lizima. Lelo e Yesu watunenile ukuti tulipocelela ukwavwa kuno tuliwalondekwa pakuti twize tutwalilile ukuwizya. (Luk. 21:​12-15) Ndi wulyanye vino e Yesu na wasambi wakwe wacitanga, tusipaticizya awantu ukuti wateyelezya pano tukuwawizizya. Awanawitu wano wikala ku ncende kuno wawinda umulimo witu, wakatwalilila ukuwizya, amuno weyamila pe Yehova asa pa maka yawo. Ndi wulyanye vino Yehova wavwanga awawomvi wakwe kunsizi, na mweyanye amanda wandi awatupa amaka ‘yakuwizya Ilandwe’ ukulingana na vino akalonda mpaka umweneco ayize ati casila. (2 Tim. 4:17) Mutakwiwilila ukuti nga mweyamila pe Yehova alimyavwa ukutwalilila ukuwizya ilyasi lizima.

WASUWIZILE UKUTI WAMWI WALISUKA WIVWE

15. Acani cino cikalanjizya ukuti e Yesu wasuwizile ukuti kwalinji wano walinji nu kwivwa kwi lyasi lizima?

¹⁵ E Yesu wasuwizile ukuti kwalinji wano walinji nu kwivwa kwi lyasi lizima. Co-o calenzile atwalilile ukuwa ni nsansa pano akuwomba umulimo wakuwizya. Ku cakulolelako, pano umwaka walinji mu kukumana ukufumilila pano watalicizile ukuwomba umulimo wakuwizya, waweni ukuti awavule walondesyanga ukuteyelezya kwi lyasi lizima. Acino wakolinye wa-a awantu ku vyakulya vino vicile vino vikulondekwa ukusombola. (Yoha. 4:35) Mupipi nu mwaka wonga wuno wakonsilepo, wanenile awasambi wakwe ukuti: “Ivizawalo vyavulisya.” (Mat. 9:​37, 38) Mukupita kwa mpindi walanzile amazwi ayali yonganye ukuti: “Ivizawalo vyavulisya. . . Acino lambilizyani umweni vizawalo atume awawomvi wanji awakuwomba umulimo wakusombola.” [NWT] (Luk. 10:2) Pamulandu wakuti e Yesu watwalilizile ukusuwila ukuti wamwi walinji nu kwivwa kwi lyasi lizima, calenzile awasecelela nga cakuti pawa wano wivwa.—Luk. 10:21.

16. Uzye ivilanjililo vino Yesu wawomvizye vyavwizye wuli awasambi wakwe? (Luka 13:​18-21) (Lolani ni cikope.)

¹⁶ E Yesu wasambilizizye awasambi wakwe ukuti wawika amano ku vizima pano wakuwomba umulimo wakuwizya, na co-o calinji nu kulenga watwalilile ukuwombesya mwe wo-o umulimo. Ku cakulolelako, lekani tulande pa vilanjililo viwili vino wawomvizye. (Wazyani Luka 13:​18-21.) Mu cilanjililo conga, wakolinye umulimo wakuwizya ku lupumba lwa muti luno lwakuzile aluwa acimuti icikulu. Cino casulanga mukuti awantu awavule walinji nu kwivwa kwi lyasi lizima, swinya kutalinji wino walinji nukulesya ko-o ukulunduluka. Mu cilanjililo cinji, wawomvizye umutawa pakulanda vino umulimo wakuwizya walinji nu kuwizwa mu ncende imvule ukuzinguluka insi nu kulenga awantu ukupiluka nanti acakuti watanga walanjizye papo na papo ukuti wapilusile. Vyo-o ivilanjililo vino Yesu wawomvizye vyavwizye awasambi wakwe ukumanya ukuti umulimo wakuwizya walinji nu kwavwa awavule.

17. Avyani vino vingalenga tutwalilile ukuwizya ilyasi lizima?

¹⁷ Nga twalola vino umulimo wakuwizya wukwavwa awantu ukuzinguluka insi yonsinye, cikalenga twavwambisya ukutwalilila ukuwizya. Cila mwaka awavule wakazanwa ku cizusyo nu kutalika ukusambilila Baibolo nasweswe. Swinya awavule wakabatizwa nu kutalika ukuwomba umulimo wakuwizya. Kweni tusimanya wano wangivwa kwi lyasi lizima, lelo cino twamanya acakuti e Yehova akawunganika iwumba likulu wano walipusuka pa wucuzi wukulu. (Ukuwu. 7:​9, 14) E Yehova umweneco wa mulimo wamanya ukuti awavule wangivwa kwi lyasi lizima, awuli umulandu wuno tuzipizile ukutwalilila ukuwizya.

18. Uzye tukalonda ukuti awantu watulola wuli?

¹⁸ Awasambi wa kwe Yesu wakawombesya mu mulimo wakuwizya. Wonye avino awatumwa wacitanga. Wawombesyanga nkaninye swinya walinji awasipe. Co-o calenganga awantu wawamanya zuwa ukuti “wawanga nu Yesu.” (Imili. 4:13) Acino fwandi lekani twawombesya nu kuwa awasipe pano tukuwomba umulimo wakuwizya pakuti awantu walola ukuti tukakolanya Yesu.