Vino e Yehova Akatwavwa Ukuzizimicizya

1. Amulandu ci wuno cingatutalila ukuzizimicizya ukufika na ku nsilo? (1 Peter 5:10)

MWE YA-A amanda yakulecelezya awantu wa kwe Yehova wakupita muntazi izivule zino wakulondekwa ukuti wazizimicizya. Kucakulolelako, wamwi wakucula ku ndwala zino walwala pa mpindi intali. Wanji nawo wakucula pa mulandu wakuti wafwilwa awakundikwa wawo. Ne wamwi nawo wakuwacuzya kwa lupwa lwawo na kuwa muwuteko. (Mat. 10:​18, 36, 37) Muwakwizuka ukuti asamulandu ni ntazi zino mungapitamo, e Yehova angamyavwa ukuzizimicizya ukufika na ku nsilo.—Wazyani 1 Peter 5:10.

2. Uzye ukuzizimicizya kukasula mwinye?

² Ukuzizimicizya, akutwalilila ukuwa ni cisinka kwe Yehova nu kumuwombela ni nsansa asamulandu tukupita muntazi, wakutucuzya nanti twelezwa ukucita uluwembu. Swinya pa kuti tuzizimicizye tuzipizile nu kusuwila ukuti ivintu vilizipa. Kweni tutanga tuzizimicizyevye ku maka yitu swe weneco, lelo tungazizimicizyavye nga cakuti Yehova watupa “amaka makulu.” (2 Kor. 4:7) Mwe co-o icipande twandi tulande pa vintu 4 vino Yehova watupa pa kuti twazizimicizya. Swinya twandi tusambilile na pe vino tungacita pa kuti viwatwavwa.

IPEPO

3. Amulandu ci wuno tungalandila ukuti ipepo lyawa acakuzungusya?

³ E Yehova wawikako icintu cimwi icakuzungusya nkaninye cino cikatwavwa ukuzizimicizya. Walenga ukuti citupepucile ukuwalanda nawe asamulandu nu kuti swe wawembu. (Hebe. 4:16) Teyelenganyani pe co-o: tungapepa kwe Yehova impindi iyili yonsinye swinya pa ntazi iyili yonsinye. Akateyelezya ku mapepo mu citundu icili consinye swinya ku ncende iyili yonsinye pano tuli swenga na pano tuli mu cifungo. (Yona 2:​1, 2; Imili. 16:​25, 26) Nga cakuti tusakamisilwe icakuti tutamanyile ni vyakumunena naponye akalanga amanyile na vino tukulonda ukulanda. (Roma. 8:​26, 27) Fwandi mukusimicilanye ipepo acakuzungusya!

4. Amulandu ci wuno tungalandila ukuti ukupepa pa kuti tuzizimicizye kuyine nu kulonda kwa kwe Yehova?

⁴ Ukupitila mwe Baibolo, e Yehova watunena ukuti “ndi tukulenga icintu cimwi cino ciyine nu kulonda kwakwe akatwivwa.” (1 Yoh. 5:14) Uzye tungalenga e Yehova ukuti atwavwe ukuzizimicizya? Ee! Amuno ukucita wo-o kuyine nu kulonda kwakwe. Amulandu ci wuno twalandila wo-o? E Yehova watunena ukuti, nga twatwalilila ukuwa ni cisinka pano tukupita muntazi tungalenga ayasuke e Satana wino akamukwelengula. (Imilu. 27:11) E Baibolo ikalanda nu kuti e Yehova akalondesya nkaninye ‘ukulwila namaka wano imyezo yawo isi nakasinza nawe.’ (2 Imila. 16:9) Fwandi tungasuwila ukuti e Yehova wakwatisya amaka swinya akavwambisya nkaninye ukutwavwa ukuzizimicizya.—Ayize. 30:18; 41:10; Luk. 11:13.

5. Uzye ipepo lingatwavwa wuli ukuwa nu mutende wamumelenganyo? (Ayizeya 26:3)

⁵ E Baibolo ikatunena ukuti nga tukupepa kwe Yehova, apano “umutende wakwe Leza wuno walusya amelengania yawuntu, wuwachinjilila imyezo [yitu] namelengania [yitu].” (Flpi. 4:7) Uzye co-o cikasula mwinye? Awantu wano wasiwombela Yehova nawonye wakapita muntazi swinya wakakwelezya ukuwomvya inzila izilekane lekane pa kuti wiwilileko kuntazi zino wakupitamo. Kucakulolelako, wamwi wakasola ukutalika ukwelenganya pe vinji pa kuti wiwilile kuntazi zino wakupitamo nanti ukuteka umwezo. Ukucita wo-o kungawa ngati akuwika ici muzimu ciwipe mu mumelenganyo. (Linganyaniko Mateyu 12:​43-45.) Nanti acakuti umuntu angivwa icete nga cakuti wawomvya yo-o inzila, lelo wasiwa nu mutende wakusimicila wuno wukafuma kwe Yehova. Nga tukupepa kwe Yehova lyo tukulanjizya ukuti twamusuwila swinya “alitwalilila ukutupa umutende.”[NWT] (Wazyani Ayizeya 26:3.) Inzila yonga yino Yehova akatupelamo umutende wamumelenganyo, akupitila mu kutwavwa ukwizuka amawaliko yano yangatusansamusya. Ya-a amawaliko yakatwavwa ukwizuka vino e Yehova watukunda na vino akalondesya ukutwavwa swinya yakatwavwa ukuteka umwezo.—Amalu. 62:​1, 2.

6. Avyani vino mungapepelapo? (Lolani ni cikope.)

⁶ Vino Mungacita. Nga cakuti mwawa ni ntazi, mwanena Yehova vino mukuyivwa. E Baibolo ikati “Tayila Imfumu e Leza amatamyo yako” swinya mwamulenga ukuti amipe umutende. (Amalu. 55:22) Mwamulenga nu kuti amipa amano pa kuti mumanye vino mungacita. (Imilu. 2:​10, 11) Pano mukupepa ukuti amyavwa ukuzizimicizya, mutakwiwilila nu kumusalifya. (Flpi. 4:6) Mwakwelenganya pa nzila zino akamyavwilamo cila wanda pa kuzizimicizya. Swinya mwamusalifya pe vino akamyavwa na pa vizima vino akamicitila. Nanti acakuti mungapita muntazi mutakwiwilila inzila zino e Yehova akawomvya pa kumyavwa.—Amalu. 16:​5, 6.

E BAIBOLO

7. Uzye ukuwazya kungatwavwa wuli ukuwazizimicizya?

⁷ E Yehova watupa Baibolo pa kuti yatwavwa ukuzizimicizya. Mu Baibolo mwawa amawaliko yano yakalenga atusinincizya ukuti e Yehova aliwatwavwa. Lekani tulole icakulolelako conga. Pe Mateyu 6:8 pa kati: umukwasi winu “wamanya lyankani vyonsi vino mwasowelwa napano mutani mumulenge.” E Yesu awino walanzile ya-a amazwi, swinya wamanya nkaninye e Yehova ukulusya umuntu uwili wensinye. Fwandi twasuwila ukuti pano tukucula, e Yehova akamanya vino tukulonda swinya akatwavwa. Mu Baibolo mwawa amalyasi amavule yano yakalanda pe Yehova ukuti angatupa amaka yano yakulondekwa pa kuti twazizimicizya intazi.—Amalu. 94:19.

8. (a) Landani pa cakulolelako ca cisinko ci sundo lya mu Baibolo cino cingatwavwa ukuzizimicizya. (b) Cani cingatwavwa ukuwakwizuka ivisinko vya masundo ya mu Baibolo pano tukulonda ukupingula pe vimwi nanti ukuzizimicizya intazi?

⁸ Mu Baibolo mwawa ivisinko vya masundo vino vingatwavwa ukuzizimicizya intazi zino tukupitamo. Mwe vyo-o ivisinko vya masundo ya mu Baibolo mwawa ukupanda amano kuno kungatwavwa ukupingula icete pa vintu. (Imilu. 2:​6, 7) Kucakulolelako, e Baibolo ikatuwomelezya ukukana wasakamikwa pa vintu vino vilicitika kunkolelo, lelo tuzipizile ukuwasintilila pe Yehova cila wanda. (Mat. 6:34) Nga cakuti tukuwazya Baibolo cilawanda nu kwelenganyapo sana, cilawatupepucila ukwizuka ivsisinko vya masundo pano tukulonda ukupingula pe vimwi nanti ukumanya vino tungacita pa kuzizimicizya intazi yimwi.

9. Uzye amalyasi ya mu Baibolo yakawomya wuli isuwilo litu mwe Yehova?

⁹ Mu Baibolo tungawazya pa vyakulolelako vya wantu wano wasuwizile nkaninye e Yehova swinya wawavwizye. (Hebe. 11:​32-34; Jemu. 5:17) Nga cakuti tukwelenganyapo sana pe ya-a amalyasi, tukawomya sana isuwilo ukuti e Yehova “alilinga litu wechisawu chitu, wemaka yitu, penye akalonda ukwavwilizya mumpindi zyamatamyo.” (Amalu. 46:1) Ukwelenganya sana pe vino awawomvi wa kwe Yehova awa kunsizi walanjizizye ukuti wamusuwizile, na vino watwalilizile ukumuwombela asamulandu wapitanga muntazi, cikalenga nasweswe twavwambisya sana ukuwa wakolanya.—Jemu. 5:​10, 11.

10. Uzye mungacita wuli pa kuti Baibolo yamyavwa?

¹⁰ Vino mungacita. Mwawazya Baibolo cilawanda swinya mwalembako amawaliko yamwi yano mukulola ukuti yangamyavwa. Awavule wazana ukuti ukuwazya iwaliko lye cilawanda cikalenga awawako na vimwi ivya kuwawomelezya ukufuma mwe Baibolo ivyakwelenganyapo pe wowo uwanda. E nkazi uwizina lya kuti Mariea wazana ukuti co-o cikakwavwa pano awakwasi wakwe wonsinye walwile indwala ya kwe kansa. Nomba acani cino camwavwizye ukuwasipicizya pano wasakamalanga awakwasi wakwe mu myezi yakulecelezyako ukuwa nu wumi? Walanzile ukuti: “Cila mutondotondo nayisambilizyanga iwaliko lye cila wanda nu kwelenganyapo. Co-o canjavwanga cilawanda ukuwakwelenganya pe Yehova na pa vizima vino akatusambilizya mwi zwi lyakwe ukucila ukuwika amano ukuwakwelenganyavye pa ntazi zino nalinji nazyo.”—Amalu. 61:2.

AWANAWITU NA WANKAZI

11. Uzye tukayivwa wuli nga twelenganya pe vino awanawitu na wankazi wakazizimicizya intazi?

¹¹ E Yehova watupa awanawitu na wankazi wano wakatwavwa ukuzizimicizya. Ukumanya ‘kuno awanawitu na wankazi wano wali munsi yonsi wakaponelwa nukuyimba kwamwatanye woo’ kukalenga atusinincizya ukuti tutawa swenga. (1 Pet. 5:9) Co-o cikusula mu kuti kwawa awanawitu na wankazi wano wakapita muntazi izili zyonganye na zino tukapitamo swinya watwalilila ukuwombela Yehova ni cisinka. Fwandi nasweswenye tungazizimicizya.—Imili. 14:22.

12. Uzye awanawitu na wankazi wangatwavwa wuli, swinya avyani vino nasweswe tungawacitila? (2 Wakorinte 1:​3, 4)

¹² Awanawitu na wankazi wangatwavwa ukuzizimicizya intazi ukupitila mwe vino wakulanda nu kutucitila. Umutumwa Paulo wasinincizizye co-o. Pano wamunyepezile pa ng’anda awanawitu na wankazi wamusansamusyanga nu kumuwomelezya. Swinya wamupangako na vino walondekwanga. Awuli umulandu wuno lyonsinye wasalifyanga wano wamwavwanga swinya wa walumbulanga na mazina. (Flpi. 2:​25, 29, 30; Kolo. 4:​10, 11) Namweyanye amanda, awanawitu na wankazi wangatuwomelezya nu kutwavwa ukuzizimicizya intazi zino tukupitamo swinya nasweswenye tungawavwa pano wakucula.—Wazyani 2 Wakorinte 1:​3, 4

13. Acani cino cavwizye e nkazi e Maya ukuzizimicizya?

¹³ Mu 2020 wa Polisi wizile awinjila mu ng’anda ye nkazi e Maya uwa ku Russia nu kutalika ukuvwambilizya vimwi. Nomba walondekwanga ukuya ku koti mukuyicinjilila pa kulanda pe vino wazumilamo. E Maya watili: awanawitu na wankazi wamuwomelezizye nkaninye pa mpindi yino wapitanga muntazi. Watili “Pa mpindi yonsinye yo-o yino napitanga muntazi, awanawitu na wankazi wantumilanga ama foni, ukundembela ama meseji na makalata. Vyo-o vyalanjizizye ukuti wankunda. Ukufuma na kali namanyile ukuti awanawitu na wankazi wankunda nkaninye swinya nawa mu lupwa luno lwawa nu lukundo. Lelo ukufuma mu 2020 apano nayilolela na minso yane.”

14. Avyani vino tungacita pa kuti twazanamo ivizima mu kwavwa ukufuma ku wanawitu na wankazi? (Lolani ni cikope.)

¹⁴ Vino mungacita. Pano mukuzizimicizya mwanenako awanawitu na wankazi. Swinya mutawayawaya ukuwuzyako wa eluda ukuti wamyavwe, amuno wangawa“achakuvwama kumuza, nakuvipunga nanti ku mvula inkulu.” (Ayize. 32:2) Muwakwizuka ukuti awanawitu na wankazi nawonye wakuzizimicizya intazi inkulu. Acino ukucitila wanji ivizima wano wakulonda ukwavwa cililenga mwasecelela swinya cilimyavwa ukuzizimicizya intazi zino mukupitamo.—Imili. 20:35.

ISUWILO LYA KUNKOLELO

15. Uzye isuwilo lya kunkolelo lyavwizye wuli e Yesu, swinya likatwavwa wuli nasweswe? (Waheberi 12:2)

¹⁵ E Yehova watulaya ivizima kunkolelo vino vikatwavwa ukuzizimicizya. (Roma. 15:13) Izukani vino isuwilo lya kunkolelo lyavwizye e Yesu ukutwalilila ukuzizimicizya intazi inkulu pano walinji munsi. (Wazyani Waheberi 12:2.) E Yesu wamanyile ukuti nga watwalilila ukuwa ni cisinka walinji nu kulenga izina lya kwe Yehova ukucindikwa. Swinya welenganyanga na pakunyocelamo kwi yulu na vino calinji nu kuwa nga cakuti wawa Amfumu nu kutalika ukuteka ponga na wa 144,000. Wonye avino ni suwilo lya kunkolelo ilya kwikala umuyayaya mu paradise likatwavwa ukuzizimicizya intazi zyonsinye zino tukapitamo mwe yo-o insi ya kwe Satana.

16. Uzye isuwilo lya kunkolelo lyavwizye wuli e nkazi Anna ukuzizimicizya, swinya avyani vino tungasambililako?

¹⁶ Lekani tulande pe vino isuwilo lya kwikala munsi mpya kwavwizye e nkazi Anna uwa ku Russia wino umulume wa muwisile mu cifungo pano walindililanga ukuti wamuluwulusye. Pano co-o cacitisile e Anna watili: “napepanga lyonsinye kwe Yehova pe lyo isuwilo lino watupa ilya kunkolelo swinya alino nelenganyangapo sana. Na co-o calenzile ukuti ntayivwa nkani uwuwi. Namanya ukuti pa nsizi ye vyonsinye vyo-o iviwipe, vino viliyiza avizima. E Yehova alicimvya awalwani wonsinye swinya alitulambula.”

17. Uzye tungalanjizya wuli ukuti tukasalifya pi suwilo lya kunkolelo lino Yehova watupa? (Lolani ni cikope.)

¹⁷ Vino mungacita. Mwawako ni mpindi ya kwelenganya pa vizima vino Yehova wamilaya ukumicitila kunkolelo. Mwakwelenganya ukuti muli munsi mpya, na pa vizima vino muliwa navyo. Intazi zino tukupitamo pe yo-o impindi ‘azyampindi ntichi’ nga akuzilinganya kwe vino tuliyikala umuyayaya munsi impya. (2 Kor. 4:17) Cinji acakuti, mwakwelezya na maka ukuwuzyako wanji pe vino Yehova watulaya. Yelenganyani pe vino uwumi wa wantu wano wasiwombela Yehova wawa. Nawonye wakapita muntazi nomba watamanya ivizima vino watulaya kunkolelo. Ukuwanenavye vitici kungalenga wavwambisye ukumanya ivivule pa Wufumu wa kwe Yehova na pe vino watulaya.

18. Amulandu ci wuno tuzipizile ukusuwila mu malayo ya kwe Yehova?

¹⁸ Pano e Job wazizimicizye intazi nu kutwalilila ukuwa ni cisinka kwe Yehova walanzile ukuti: “Nakumanya we Mfumu Leza, kuno wewamaka yonsi ungachita chonsi chino ukulonda.” (Job 42:2) E Job wasambilizile ukuti pasi icili consinye cino cingalesya Yehova ukuficilisya vino watulaya. Co-o icisinka cingatwavwa ukuzizimicizya intazi zino tukupitamo. Lekani tulanjilile, tuti umwanaci walwala pa myaka imivule swinya wafupulwa pa mulandu wakuti wa dokota awavule wavilwa ukumupozya. Nomba wazana e dokota umusuwilwe swinya wamunena cino calenga alwale wamunena nu kuti andi awe icetenye. Wivwicete nanti acakuti pandi papite impindi pa kuti ayize apole. Camupepucila ukuzizimicizya amuno wamanya ukuti wandi apole. Wonye avino cawa na kwe sweswe ukumanya ukuti e Paradise iliyiza, ku katwavwa ukuwazizimicizya.

19. Avyani vino tukulondekwa pa kuti twazizimicizya?

¹⁹ Ndi vino tusambilizile e Yehova akatwavwa ukuzizimicizya intazi ukupitila mwi pepo, e Baibolo, awanawitu na wankazi nga ni suwilo lya kunkolelo. Nga cakuti tukwelezya na maka ukuwomvya vyonsinyene vyo-o vino e Yehova watupa, alitwavwa asa mulandu na vino tukupitamo pe yo-o impindi. Swinya tulitwalilila ukuzizimicizya ukuficila pano imitecele ya kwe Satana waliyifumyapo.—Flpi. 4:13.