Mungaficilisya Vino Mwapanga Ukucita mu Mulimo wa kwe Yehova

1. Avyani vino swe wavule tukapotwa ukucita?

UZYE mukatela amupangapo ivya kucita mu mulimo wa kwe Yehova amupotwa ukuficilisya? Nga vya miciticilapo lyo mutawa mwenga.b Ku cakulolelako, e Filipi walondanga ukuwapepa lyonsinye nu kuzifyako amapepo yakwe, lelo wapotwanga ukucita wo-o. E Erika nawe walondanga ukuwawanjilila pa kuya mu kusunkana kwa kuya mu mulimo wakuwizya, lelo napeyonye impindi acili akacelwa. Ne e Tomáš welezya imiku ni miku ukutalika ukuwazya e Baibolo pa kuti ayimale. Walanzile ukuti: “Ntayitopwanga ukuwazya e Baibolo. Nelezizye imiku yitatu ukutalika ukuwazya, lelo lyonsinye nga natalika, napelelanga vye mwi buku lya kwe Levitikasi, ampela indeka.”

2. Amulandu ci wuno mutazipizile ukwivwa uwuwi nga cakuti kuli vimwi vino mwapanga ukucita lelo mutani muficilisye?

² Nga cakuti kwawa vimwi vino mwapanga ukucita mu mulimo wa kwe Yehova lelo mutani muficilisye, mutazipizile ukwivwa uwuwi. Swinya mwakwizuka ukuti pa kuficilisya na vilyanye vino mukulola ukuti avitici naponye pa kalondekwa impindi nu kuwombesya. Wo-o vino mukavwambisya ukuficilisya vino mwapanga ukucita mu mulimo wa kwe Yehova, cikalanjizya apatiswenye ukuti mwacindika wuciwuza winu na weliwe swinya mukalonda ukumuwombela ukufika pano papelezile amaka yinu. E Yehova akakwivwa icete nkaninye pe vino mukawombesya swinya asikwenecela ukuti mwamucitila ivintu ivikulu ukucila pe vino mungakumanisya. (Amalu. 103:14; Mika 6:8) Fwandi pano mukupanga ivya kucita, mwasinincizya ukuti mungavificilisya. Nomba nga cakuti mwapanga ivya kucita, avyani vino mungacita pa kuficilisya? Lekani tulandeko pe vimwi vino mungacita.

UKUVWAMBISYA UKUFICILISYA VINO MWAPANGA

3. Amulandu ci wuno ukuvwambisya ukuficilisya vino mwapanga kwacindamila?

³ Cacindama nkaninye ukuwa nu mwezo wakuvwambisya ukuficilisya vino mwapanga. Amuno umuntu wino akavwambisya ukuficilisya vino wapanga, akawombesya na maka yakwe yonsinye pa kuti aficilisye. Ukuvwambisya ukuficilisya vino mwapanga tungakukolanya ku muza wuno wukusunka uwato ukuwutwala kuno wukuya. Nga cakuti umuza wukupupa cingalenga wino akupisya aye afike kuno akuya. Swinya nga cakuti wowo umuza wukupupa nkaninye cingalenga aye afike na zuwa. Wonye avino cawa na kwe vino tukapanga ukucita mu mulimo wa kwe Yehova, tungaficilisya nga cakuti tukuvwambisya sana. Umwanawitu uwizana lya kuti David ku El Salvador walanzile ukuti “Nga cakuti ukuvwambisya ukuficilisya cimwi kukawa ukuwombesya na maka ukucicita. Swinya kukawa ukusinincizya ukuti pasi icili consinye cino cingalenga upotwe ukuficilisya.” Nomba lyo mungacita wuli pa kuti mwavwambisya ukuficilisya vino mwapanga?

4. Ukulingana na Wafilipi 2:13, avyani vino tungapepelapo? (Lolani ni cikope.)

⁴ Mwapepa ukuti mwavwambisya ukuficilisya vino mwapanga. E Yehova angawomvya umuzimu wakwe uwutele pa kumyavwa ukuficilisya vino mwapanga. (Wazyani Wafilipi 2:13.) Manda yamwi tungapanga ivya kucita pa mulandu vye wakuti avizima swinya avino cizipizile ukuwa. Lelo ncepamwi tungalanga tutakuvwambisya nu kuficilisya vino twapanga. Wonye avino calinji kwe nkazi uwizina lya kuti Norina uwaku Uganda. Wapanzile ukuti wandi atalike ukutungulula isambililo lye Baibolo. Lelo atavwambisyanga ukucita wo-o pa mulandu wakuti walolanga ngati asa wekasambilizya muzima. Nomba cani camwavwizye? Walanzile ukuti: “Natalisile ukupepa kwe Yehova cila wanda ukuti anjavwe ukuwavwambisya ukutungulula isambililo lye Baibolo. Cinji acakuti nawombelanga na pe vino napepelangapo, ponga ngati akuzifyako imisambilizizye yane. Pansizi ya myezi vye mitici nizile ntalika ukuwavwambisya sana ukutungulula isambililo lye Baibolo. Swinya mwe wulyanye umwaka, nizile intalika ukutungulula amasambililo ye Baibolo yawili.”

5. Avyani vino tuzipizile twakwelenganyapo vino vingatwavwa ukuficilisya vino twapanga ukucita?

⁵ Mwakwelenganya pe vino Yehova wamicitila. (Amalu. 143:5) Umutumwa Paulo welenganyanga sana pe vino Yehova walinji ni cikuku kwe weliwe, na co-o calenzile awamuwombela ukufika pano papelezile amaka yakwe. (1 Kor. 15:9, 10; 1 Tim. 1:12-14) Namwemwenye nga cakuti mukwelenganya pe vino e Yehova wamicitila, muliwavwambisya sana ukuficilisya vino mwapanga ukucita. (Amalu. 116:12) Lekani tulande pe cino cavwizye e nkazi uwa ku Honduras ukuficilisya vino wapanzile ukuti atalike ukuwomba wupayiniya wa mpindi zyonsi. Watili: “Nelenginye sana pe vino e Yehova wankunda. Wandeta mwi wungwe muno mwawa awantu wakwe. Swinya akansakamala nu kuncinjilila. Pano nelenginye pe vyo-o, nizile inkundilako nkaninye e Yehova swinya nalondanga ukuwombesya pa kuti ntalike ukuwomba wupayiniya.”

6. Acani cinji cino cingatwavwa ukuwavwambisya ukuficilisya vino twapanga?

⁶ Mwakwelenganya pa vizima vino vilifumamo nga cakuti mwaficilisya vino mwapanga ukucita. Lolani cino cavwizye e Erika, wo tulanzilepo kaali wino atalondanga ukucelwa mu kusunkana kwa kuya mu mulimo wakuwizya. Watili: “Nizile injiluka ukuti kwalinji ivivule vino napusyangako nga cakuti nacelwa. Lelo nga cakuti nawanjilila, nawangako ni mpindi yakulamuka awanawitu na wankazi nu kuwa nawo caponga. Swinya nivwangako ni nzila zimwi izyakuwombelamo umulimo wakuwizya, zino zyalenzile ndakwivwa icete nu kuzifyako imiwombele yane.” E Erika wawisile sana amano pa vizima vino vyawa mukuwanjilila, na co-o calenjile aleke ukucelwa. Nga mwemwe, avizima ci vino mungakwelenganyapo? Nga cakuti mukalonda ukuzifyako mwe vino mukawazya e Baibolo nanti ukupepa, mwakwelenganya pe vino ukuwazya nanti ukupepa kulimyavwa ukuwa na wuciwuza uwuwome ne Yehova. (Amalu. 145:18, 19) Ne nga cakuti kwawa imiwele yimwi yino mukalonda ukuzifyako, mwakwelenganya pe vino ukucita wo-o kulilenga mwakwivwana icete na wantu wanji. (Kolo. 3:14) Cingazipa sana nga cakuti mwalemba imilandu yino yikulenga mwavwambisya ukuficilisya vino mwapanga. Swinya lyonsinye mwalolapo pe vino mwalemba. E Tomáš, wino tetulanzilepo watili: “Nga cakuti pali imilandu imivule yino yikulenga ndavwambisya ukuficilisya vino napanga ukucita, nkawombesya na maka yane yonsinye pa kuti mficilisye.”

7. Acani cino cavwizye e Julio nu muci ukuficilisya vino wapanzile ukucita?

⁷ Mwazanwa na wantu wano wangamyavwa ukuficilisya vino mwapanga ukucita. (Imilu. 13:20) Lekani tulande pe cino cavwizye e Julio nu muci ukuficilisya vino wapanzile ukuwomba. Wa-a awatwalane walondanga ukuya mu kuwombela kuno wakawizya wacepa. Acani cino cawavwizye ukucita wo-o? E Julio walanzile ukuti: “Twasozilepo ukupanga iviwuza na wantu wano watuwomelezyanga ukuficilisya vino twalondanga ukuwomba. Awavule pe wa-a, lyo waficilisya kaali vino naswenye twalondanga ukucita swinya watunenangako na vimwi vino vingatwavwa. Watukolowozyanga na pano tufisile swinya watuwomelezyanga.”

NGA CAKUTI TUTAKUVWAMBISYA UKUWOMBA

8. Acani cino cingacitika nga cakuti tukuwombela pe vino twapanga ukucita pa mpindi vye pano twivwa ukuti apano tungawombelapo? (Lolani ni cikope.)

⁸ Icisinka acakuti, swensinye kukawako impindi zimwi pano tusivwambisya ukuwomba. Lelo co-o lyo cisakusula mukuti tutakulonda ukuwombela pa kuficilisya vino twapanga ukucita. Ku cakulolelako, umuza wungawa na maka nkaninye aya kusunka uwato ukuwutwala kuno wukuya. Lelo nanti ciwe wo-o, amaka yano umuza wukakwata cila wanda yakapusana pusana swinya mpindi zimwi kusiwapo nu muza. Nomba uzye vwilani nga cawa wo-o, e kapisya wa wato akakwimilila nu kuleka ukupisya uwato? Awe nakalya! Amuno amawato yamwi yakakwata wa mashini ne yanji yakwata imisiko nanti imizwa yakupisizya uwato. Fwandi e kapisya wa wato angawomvya icili consinye pe vyo-o pa kutwalilila ukupita mpaka akafike kuno akuya. Ukuvwamba ukuficilisya vino twapanga, tungakukolanya ku muza. Manda yamwi tungavwambisya ukuwomba ne manda yamwi pole. Fwandi nga cakuti tukuwombela pe vino twapanga ukucita pa mpindi vye pano twivwa ukuti apano tungawombelapo, mpamwi tutanga tukumanisye ukuficilisya. Lelo ngati awulyanye vino e kapisya wa wato akawomvya inzila zinji pa kuti akafike kuno akuya, nasweswenye tungakwelezya na maka ukuwombela pe vino twapanga asa mulandu nu kuti mpindi zimwi tutanga twavwambisya ukuwomba. Kweni, ukucita wo-o kutapepuka. Lelo nga twaficilisya vino twapanga ukucita, tuliwa ni nsansa. Acino pano tutani tulande pe vino tuzipizile ukucita, lekani tulanzyanye pi wuzyo lino lyakonkapo.

9. Uzye cawa icetenye ukutwalilila ukwelezya na maka ukuwombela pe vino twapanga ukucita nanti acakuti tutakuvwambisya ukuwomba? Londololani.

⁹ E Yehova akalonda twamuwombela ni nsansa swinya mukuyikundila. (Amalu. 100:2; 2 Kor. 9:7) Nomba uzye tuzipizile ukutwalilila ukuwombela pe vino twapanga ukucita nanti acakuti tutakuvwambisya ukuwomba? Lekani tulandeko pa mutumwa Paulo. Walanzile ukuti: “Ukuwa nkupamantula umuwili wane swinya nkuwutwala muwuzya.” (1 Kor. 9:25-27) E Paulo wayipaticizyanga ukucita ivizima nanti acakuti mpindi zimwi atalondanga ukucita wo-o. Uzye vwilani e Yehova wivwanga icete wo-o vino Paulo wacitanga pa kumusecelesya? Ukwasowa nu kuvwilika wivwanga icete swinya wamulambuzile pa kuwombesya kwakwe.​—2 Tim. 4:7, 8.

10. Avizima ci vino vyawa mukutwalilila ukuwombela pe vino twapanga ukucita na pano tutakuvwambisya ukuviwomba?

¹⁰ E Yehova akakwivwa icete nkaninye nga walola tukuwombela pe vino twapanga ukucita na pano tutakuvwambisya ukuviwomba. Akakwivwa icete pa mulandu wakuti mpindi zimwi tukawomba ivintu vino tutakunda, lelo tukaviwomba pa mulandu wakuti twamukunda. Fwandi ndi wulyanye vino Yehova walambuzile e Paulo, na sweswenye alitulambula pa kuwombesya kwitu. (Amalu. 126:5) Cinji acakuti, nga twalola vino Yehova watupaala tungatalika ukuvwambisya ukuwomba. E nkazi Lucyna uwa ku Poland watili: Mpindi zimwi nsilonda ukuya mukuwomba umulimo wakuwizya, maka maka nga ntonsile. Lelo nga cakuti naya nawombako, nkawa ni nsansa nkaninye.” Lekani nomba tulole vino tungacita nga cakuti twaleka ukuvwambisya ukuwomba.

11. Uzye e Yehova angatwavwa wuli ukuyilama?

¹¹ Mwapepa ukuti e Yehova awamyavwa ukuyilama. Ukuyilama, amwata wakumanya umwakupelela pano ukwelenganya pe cimwi nanti ukucita. Lyo-o izwi likawomba nga cakuti mukulanda pa kwelezya na maka ukukana cita iciwipe. Lelo nanti ciwe wo-o, tuzipizile ukuyilama na pa kuti tucite icizima maka maka nga cakuti tukuwomba umulimo uwuwome nanti nga tutakuvwambisya ukuwomba. Mwakwizuka ukuti ukuyilama kwawa pa vikomwa vya ku muzimu. Fwandi nga mukulonda ukuwayilama, mwapepa kwe Yehova ukuti amyavwe ukuwomvya umuzimu wakwe uwutele. (Luk. 11:13; Gal. 5:22, 23) E David wino tulanzilepo kaali walondolozile vino ipepo lyamwavwizye. We-e umwanawitu walondanga ukuti awawa ni sambililo lya pa lwakwe lyonsinye. Watili: “Napefile kwe Yehova ukuti awanjavwa ukuyilama. Nawe wanjavwizye ukutalika ukuyisambilizya ukwasowa ukuleka.”

12. Uzye iwaliko lye Ekawizya 11:4 lingatwavwa wuli ukuficilisya vino twapanga mu mulimo wa kwe Yehova?

¹² Mutalindilila ukuti mpaka ivintu vize vizipe. Ivintu vitalitela vizipe mwe yo-o insi inkote. Fwandi nga tukulindilila ukuti mpaka ivintu vize vizipe, tutalificilisya vino twapanga mu mulimo wa kwe Yehova. (Wazyani Ekawizya 11:4.) Umwanawitu uwizina lyakuti Dayniel watili: “Ivintu vitazipapo. Lelo aswe wano tukavizifya nga tukutalika vye ukuwomba ukwasowa ukulindilila ukuti mpaka vize vizipe.” Ne umwanawitu winji uwizina lyakuti Paul uwa ku Uganda nawe walanzilepo pa mulandu na wunji wuno tutazipizile ukuwayawaya. Watili: “Nga cakuti twatalika ukuwomba asa mulandu nu kuti ivintu visi icete, e Yehova angatwavwa.”​—Mala. 3:10.

13. Awuzima ci wuno wawa mu kutalicila pa tutici pa kuti tuficilisye vino twapanga ukucita?

¹³ Muwatalicila pa tutici. Nga cakuti vino twapanga ukucita vikuloleka ngati aviwome, tungaleka ukuvwambisya ukuficilisya. Nga avino cawa na kwe mwemwe, cingazipa ukutalika ukuwomba katici katici. Ku cakulolelako, nga cakuti mwapanga ukuzifyako imiwele yimwi, cingazipa ukutalika ukuyilanjizya katici katici. Ne nga cakuti vino mwapanga ukucita, akumala ukuwazya Baibolo yonsinye, cingazipa ukucefyako impindi ya kuwazya. E Tomáš wino tulanzilepo kaali, camutalizile nkaninye ukuficilisya vino wapanzile ukuti ayize amale ukuwazya e Baibolo mu mwaka wonga. Watili: “Nizile inziluka ukuti nasozilepo ukuwazya mu luwilo. Acino nizile intalika ukuwazya naswinya. Pa-a peni natantisile ukuti nandi nawazya ama vesi yatici vye nu kwelenganyapo. Na co-o calenzile nakwivwa icete nkaninye ukuwazya.” Pano Tomáš’ wayanga akwivwa icete ukuwazya, calenzile atalike ukuwazya pa mpindi intali. Na mukupita kwa mpindi, wizile amala e Baibolo yonsinye.c

NGA CIMWI CALENGA CIMITALILE UKUFICILISYA VINO MWAPANGA UKUCITA

14. Avyani vimwi vino vingalenga citutalile ukuficilisya vino twapanga ukucita?

¹⁴ Asa mulandu na vino twawa nanti vino tukavwambisya ukuwomba, mpindi zimwi kukawa vino vikalenga acituwomela ukuficilisya vino twapanga ukucita. Ku cakulolelako, “umukosi nanti ivintu ivyasowa ukwenecela,” vingatusendela impindi yakuwombela pe vino twapanga ukucita. (Ekawi. 9:11) Ne mpindi zimwi tungapita vye mu ntazi iziwome zino zingalenga twakwivwa uwuwi icakuti na maka ayatusowela kumwi. (Imilu. 24:10) Swinya ukukanapwililika nako kungalenga tucite vimwi vino vingalenga cituwomele ukuficilisya vino twapanga. (Roma. 7:23) Cinji acakuti, mpindi zimwi ukutonta akuno kungalenga. (Mat. 26:43) Nomba uzye acani cino cingatwavwa, nga cakuti kwawa vimwi vino vyalenga cituwomele ukuficilisya vino twapanga ukucita?

15. Uzye nga cakuti kwawa vimwi vino vyalenga cituwomele ukuficilisya vino twapanga, lyo cikusula mukuti tuzipizile ukuleka ukwelezya ukuficilisya? Londololani. (Amalumbo 145:14)

¹⁵ Nga kwawa vimwi vino vyalenga cituwomele ukuficilisya vino twapanga, lyo citakusula mukuti tuzipizile ukuleka ukwelezya na maka ukuficilisya. E Baibolo yikatunena ukuti mpindi zimwi tungapita mu ntazi izivule. Swinya yikatunena nu kuti, tungatalika na swinyanye ukwelezya ukuficilisya vino twapanga nga cakuti e Yehova watwavwa. (Wazyani Amalumbo 145:14.) Lolani vino umwanawitu e Philip wino tulanzilepo kaali akacita pa kulola ukulunduluka kwakwe. Watili: “Nsiwika amano ku miku yino napotwa ukuficilisya vino napanga ukucita, lelo nkawika amano ku kutalika ukwelezya na swinya ukuficilisya vino napanga.” Ne e David, wino tulanzilepo pa kutalika watili: “Nsilola ukuti antazi nga cakuti kwawa vimwi vino vyalenga cimbomele ukuficilisya vino napanga, lelo nkalola ukuti alongo lwakulanjizya vino nakunda e Yehova.” Nga twatwalilila ukwelezya na maka ukuficilisya vino twapanga asa mulandu nu kuti ivintu vitazile, tukalanjizya apatiswenye ukuti tukalonda ukusecelesya Yehova. Ukwasowa nu kuvwilika, akakwivwa icete nkaninye nga walola mukwelezya na maka ukuficilisya vino mwapanga ukucita.

16. Avyani vino mungasambililako nga cakuti kwawa vyo vyalenga camitalila ukuficilisya vino mwapanga ukucita?

¹⁶ Mwasambililako nga cakuti kwawa vino vyalenga cimiwomele ukuficilisya vyo mwapanga. Mwakwelenganyapo sana pe cino calenzile nu kuyikolowozya ukuti, ‘uzye kuliko mumwi muno ningapiluka pa kuti ivya musango wo-o vitiza vinciticilepo naswinya?’ (Imilu. 27:12) Mpindi zimwi cino cingalenga cimiwomele ukuficilisya, apa mulandu wakupanga ukucita vino mutanga mukumanisye. Nga cakuti wo-o avino mukayivwa, cingazipa ukwelenganyapo sana nu kulola nga mungakumanisya ukuficilisya vino mwapanga.d E Yehova ataliwamilola ukuti mwavilwa nga cakuti mutaficilisizye vino mwapanga ukucita pa mulandu wakuti mutanga mukumanisye.​—2 Kor. 8:12.

17. Amulandu ci wuno tuzipizile twakwizukako na vino twacita kaali?

¹⁷ Mwakwizukako na vino mwacita. E Baibolo yikatunena ukuti e Yehova walungamana “atalitela ayiwilile vino mwacita.” (Hebe. 6:10) Fwandi na mwemwenye mutazipizile ukwiwilila. Muzipizile mwakwelenganyapo sana pe vino mwacita. Pe vyo-o ivintu pangawa ukuwomya wuciwuza winu ne Yehova, ukunenako wanji pe weliwe apano nu kubatizwa. Ndi wulyanye vino mwakumanisizye ukucita vyo-o apano ni vintu vinji, avino muzipizile ukutwalilila ukuwombela na pakuficilisya vino mwapanga ukucita na peyonye impindi.​—Flpi. 3:16

18. Avyani vino tuzipizile twakwizuka pano tukuwombela pa kuficilisya vino twapanga ukucita? (Lolani ni cikope.)

¹⁸ Nga cakuti e Yehova wamyavwa mungaficilisya vino mwapanga ukucita ngati awulyanye vino e kapisya wa wato akakwivwa icete nga wafika kuno akuya. Mwakwizuka ukuti wakapisya wa wato awavule, wakakwivwa icete pano wakupisya. Namwemwenye pano mukuwombela pa kuficilisya vino mwapanga ukucita, mwakwivwa icete ukulola vino Yehova akumyavwa nu kumipaala. (2 Kor. 4:7) Nga mutanenusile, alimipaala nkaninye ukucila na pa-a.​—Gal. 6:9.