ISAMBILILO 30

Awafwe Wangawa nu Wumi na Swinya!

Iyakupulinta

Imfwa yaluma nkaninye swinya yikaleta uwulanda. Awuli umulandu wuno e Baibolo yikakwitila imfwa ukuti umulwani. (1 Wakorinte 15:26) Mwi Sambililo 27, wasambilizile ukuti e Yehova alifumyapo imfwa. Nomba ciliwa wuli kwe wano wafwile kaali? Mwe lyo-o isambililo wandi usambilile ivivule pa wulayo nawunji uwakuti e Yehova, alizyulupula imintapendwa ya wantu pa kuti wize wawe nu wumi nu kwikala amanda pe. Co-o cilicitika mpakanye! Uzye kweni e Yehova angawazyulupula? Nomba nga wiza wazyulupuka waliwakwikala kwi? Uzye akwi yulu nanti munsi?

1. Acani cino Yehova akalonda ukucitila wa lupwa lwitu ni viwuza wano wafwa?

E Yehova akalucila ukuzyulupula wonsinye wano wafwa. E Job umonsi wi suwilo, wasuwizile ukuti nanti wafwa nye e Yehova atalitela amwiwilile. Walanzile kwe Leza ukuti: “Uyize unjite nga njitawe [ukufuma mu nkungwe].”—Wazya Job 14:13-15.

2. Twamanya wuli ukuti awafwe walizyulupuka?

Pano e Yesu walinji mu nsi, e Leza wamupile amaka yakuzyulupula awafwe. Wazyulupuzile akakazyana aka myaka 12 nu mwana umonsi uwe namfwilwa. (Marko 5:41, 42; Luka 7:12-15) Ne mukupita kwa mpindi, e Lazaro, e ciwuza wakwe, wafwile. Nanti acakuti pano Lazaro wafwizile papisile amanda 4, e Yesu wayile amuzyulupula. Walile wapepa kwe Leza, wapunzile ukuti: “Lazaro, fuma!” paponye “wino wafwile afuma.” Umupumanye! (Yohani 11:43, 44) Teyelenganya vino iviwuza na walupwa wakunzile pe wo-o uwanda!

3. Acani cino cilicitika kwe wonsinye wano wafwa?

E Baibolo yatulaya ukuti: “Kuliwa ukuzyulupuka.” (Imilimo 24:15) Wonsinyene wano e Yesu wazyulupuzile pano walinji mu nsi watayile kwi yulu. (Yohani 3:13) Watemilwe nkaninye ukuwa nu wumi na swinya. Wonye avino Yesu wandi acite nombanye, wandi azyulupule imintapendwa ya wantu wano wafwa pa kuti wize wawe nu wumi mu paradise, monye munsi. E Yesu watili, “wonsi wano wali munkungwe,” ukuli ukuti na walyanye wano wafwile imyaka na myaka, icakuti na wantu wawilila, lelo wano Leza acili akakwizuka, walizyulupuka.—Yohani 5:28, 29.

SAMBILILA IVICILE PA-A

Sambilila ukufuma mu Baibolo umulandu wuno tungasinincizya ukuti e Yesu wawa na maka yakuzyulupula awafwe, nu kuti avino alicita. Lola navino ukumanya ukuti kuliwa ukuzyulupuka kungakusansamusya nu kukupa isuwilo.

E Yesu wazyulupula Lazaro lyo na awantu wano wakulolako ciwapezizye amano.

4. E Yesu walanjizizye apatiswenye ukuti angazyulupula awafwe

Sambilila na vinji pe vino e Yesu wacitizile Lazaro e ciwuza wakwe. Wazyani Yohani 11:14, 38-44, nu kulanzyanya ya-a amawuzyo:

Twamanya wuli ukuti molimonye e Lazaro wafwile?—Lola pa vesi 39.
Nga cakuti e Lazaro wayile kwi yulu, uzye ukwelenganya ukuti e Yesu nga wamwisizye kwi yulu nu kumuleta munsi?

Tambani e VIDYO.

VIDYO: Yesu Wazyulupula Lazaro (1:16)

5. Awavule walizyulupuka!

Wazyani Amalumbo 37:29, nu kulanzyanya lyo-o iwuzyo:

Uzye awantu wonsinye wano walizyulupuka waliwakwikala kwi?

E Yesu atalizyulupula vye wano wakapepa Yehova. Wazyani Imilimo 24:15, nu kulanzyanya lyo-o iwuzyo:

Weweni wino ukalondesya ukulola nga wiza wazyulupuka?

Umukwasi wa consi atontelezile pano akukatusya umwana wakwe mu tuulo.

Teyelenganya pe co-o: E Yesu angazyulupula wumwi wulyanye vino umukwasi angakatusya umwana wino alazile

6. Ukuzyulupuka kungakusansamusya nu kukupa isuwilo

Ilyasi lya mwana wa kwe Jailosi lyawomelezya awavule wano wafwilwapo swinya lyawasansamusya. Wazyani co-o cino cacitisile pe Luka 8:40-42, 49-56.

Pano e Yesu atani azyulupule umwana wa kwe Jailosi, wanenile e yisi ukuti: “Utatina: suwila.” (Lola vesi 50.) Uzye isuwilo lya kuzyulupuka lingakwavwa wuli nga . . .

wino wakunda wafwa?
caloleka ukuti wandi ufwe?

Tambani e VIDYO, nu kulanzyanya lyo-o iwuzyo.

VIDYO: Uzye Isuwilo lya Kuzyulupuka Likatwavwa Wuli Ukusipa? (3:21)

Imbali zimwi mwe vidyo yakuti ‘Uzye Isuwilo lya Kuzyulupuka Likatwavwa Wuli Ukusipa?’ Ivikope: 1. E nkazi akusansamusya Veronica pa kulongana lyo papita vye uwanda wonga ukufumilila pano umwana wawo e Phelicity wafwizile. 2. E Veronica nu mwana wakwe umukazyana wakusansamusya umwanaci ukuwomvya Baibolo.

Uzye isuwilo lya kuzyulupuka likawomya wuli awakwasi wa kwe Phelicity?

WAMWI WAKATI: “Asa cipepuke ukusuwila ukuti awantu walizyulupuka. Acitalenye.”

Nga wewe ukutipo wuli?
Aliwaliko ci lino ungawomvya pa kumwavwa ukumanya ukuti kuliwa ukuzyulupuka?

IVISINKA VIKULU

E Baibolo yalaya ukuti imintapendwa ye wano wafwa walizyulupuka. E Yehova akawalucila. Swinya wapa e Yesu amaka yakuwazyulupula.

Avyani Vino Wasambilila?

Uzye e Yehova ne Yesu wakayivwa wuli pa kuzyulupula awafwe?
Akwinye kuno wano walizyulupuka waliwakwikala? Uzye akwi yulu nanti amunsi? Amulandu ci wuno wasucila wowo?
Acani cino cikakusinila ukuti awafwe walizyulupuka?

Uwanda wuno twamala ukusambilila:

Yelezya Ukucita wo-o

Nga kuli wumwi wino wamanya wino afwizilwe e lupwa lwakwe nanti e ciwuza. Yelezya ukulola impindi inzima iya kumunenako pi suwilo lya kuzyulupuka.

Vinji:

Your other goal

MANYILAPO NA VINJI

Lola vimwi vino vingakwavwa nga wafwilwa.

“Vino Vingavwa Wino Afwizilwe” (Loleni! No. 3 2018)

Uzye kweni ivisinka vya mu Baibolo vingavwa wino afwizilwe?

Wino Wakunda ndi Wafwa (5:06)

Avyani vino vingavwa awacitici nga ca kuti umuntu wino wakunda wafwa?

Twaluwulwa (2:07)

Uzye awantu wonsinye walizyulupucila kwi yulu? Awaweni wano watalizyulupuka?

“Uzye Ukuzyulupuka Acani?” (Icipande ca pa webusayiti)