Segundo ña̱ Samuel
12 Ña̱kán, Jehová chi̱ndaʼára ta̱ Natán ku̱a̱ʼa̱nra nu̱ú ta̱ David. Tá ni̱xa̱a̱ ta̱ Natán nu̱ú ta̱ David, ka̱chira: “Iin ñuu ni̱xi̱yo u̱vi̱ na̱ ta̱a, iin ta̱ ku̱i̱ká ta iin ta̱ nda̱ʼví. 2 Ta̱ ku̱i̱ká xi̱kuumiíra ku̱a̱ʼání ndikachi* síʼi ta saátu si̱ndi̱ki̱ síʼi, 3 soo ta̱ nda̱ʼví xi̱kuumiíra iin kuití ndikachi síʼi loʼo tí sa̱tára.* Ta̱yóʼo xi̱ndaaníra ndikachi loʼo kán, ta tíyóʼo xa̱ʼnurí xíʼinra ta saátu xíʼin na̱ se̱ʼera. Ta loʼo kuití ña̱ʼa ña̱ xi̱kuumiíra ña̱kán kúú ña̱ xi̱xixirí ta mií vaso ña̱ xi̱xiʼira kán xi̱xiʼirí ta xi̱kisi̱rí ndaʼa̱ra. Ta nda̱a̱ táki̱ʼva íyo se̱ʼera saá ni̱xi̱yorí. 4 Iin ki̱vi̱, ki̱xaa̱ iin ta̱a ta̱ ke̱e xíká nu̱ú ta̱a ta̱ ku̱i̱ká yóʼo, soo va̱ása níxiinra kuniñúʼura ndikachi síʼi ni si̱ndi̱ki̱ síʼi sa̱na̱ra ña̱ keʼéra ña̱ kuxu ta̱ ta̱a yóʼo. Nu̱úka ña̱yóʼo, ki̱ʼinra ndikachi loʼo sa̱na̱ ta̱ nda̱ʼví ta i̱xatu̱ʼvararí ña̱ kuxu ta̱ ki̱xaa̱ nu̱úra”.
5 Tá xi̱niso̱ʼo ta̱ David ña̱yóʼo, ni̱sa̱a̱níra xíʼin ta̱ ta̱a kán ta ni̱ka̱ʼa̱nra xíʼin ta̱ Natán: “Chínaʼíi̱* xa̱ʼa̱ Jehová, Ndióxi̱ ta̱ táku, ña̱ xíniñúʼu kuvi ta̱ ta̱a ta̱ ke̱ʼé ña̱yóʼo. 6 Xa̱ʼa̱ ña̱ ke̱ʼéra ña̱yóʼo ta va̱ása níkundáʼvi-inira kunira ta̱ nda̱ʼví, ku̱mí yichi̱ xíniñúʼu chaʼvira ya̱ʼvi ndikachi loʼo yóʼo”.
7 Tasaá ni̱ka̱ʼa̱n ta̱ Natán xíʼin ta̱ David: “Ta̱a ta̱ ke̱ʼé ña̱yóʼo kúú yóʼó. Ña̱yóʼo kúú ña̱ káʼa̱n Jehová Ndióxi̱ na̱ ñuu Israel: ‘Yi̱ʼi̱ kúú ta̱ nda̱kaxin yóʼó ña̱ koún rey nu̱ú na̱ ñuu Israel ta sa̱kǎkui̱ yóʼó nu̱ú ta̱ Saúl. 8 Nda̱taxii̱ ndiʼi ña̱ xi̱kuumií ta̱ Saúl ndaʼún ta saátu nda̱taxii̱ ná síʼira ndaʼún. Ta nda̱taxitui̱ ndiʼi na̱ ñuu Israel ndaʼún ta saátu na̱ tribu ta̱ Judá ña̱ va̱ʼa kaʼndachíñún nu̱úna. Soo tá loʼoní kúú ña̱yóʼo túviún, xa̱a̱ ni̱xi̱yo tu̱ʼvai̱ ña̱ keʼíi̱ ku̱a̱ʼáníka ña̱ʼa xa̱ʼún. 9 ¿Nda̱chun va̱ása níxiún kuniso̱ʼún tu̱ʼun Jehová ta ke̱ʼún ña̱ va̱ása va̱ʼa nu̱úra? Xíʼin espada xa̱ʼníún ta̱ Urías ta̱ hitita. Tándi̱ʼi xa̱ʼníúnra xíʼin espada na̱ ammonita, nda̱kiʼún ñá síʼira ta ti̱ndaʼún xíʼinñá. 10 Ña̱kán, ndiʼi tiempo kininí koo ña̱ kuvi na̱ veʼún, saáchi ni loʼo va̱ása ní ixato̱ʼún yi̱ʼi̱ tá ki̱ndaún ñá síʼi ta̱ Urías ta̱ hitita ta ti̱ndaʼún xíʼinñá’. 11 Ña̱yóʼo kúú ña̱ káʼa̱n Jehová: ‘Vitin taxii̱ tu̱ndóʼo ndaʼún, ta ti̱xin veʼe miíún kúú ña̱ kana ña̱yóʼo. Ta kuninu̱ún kindai̱ ná síʼún ta taxii̱ná ndaʼa̱ inka ta̱a, ta ta̱yóʼo ku̱su̱nra xíʼinná nu̱ú ndiʼi na̱ yiví. 12 Yóʼó ke̱ʼé se̱ʼún ña̱yóʼo, soo yi̱ʼi̱ keʼíi̱ña nu̱ú ndiʼi na̱ ñuu Israel ta saátu nu̱ú ndiʼi na̱ yiví’”.
13 Tasaá ni̱ka̱ʼa̱n ta̱ David xíʼin ta̱ Natán: “Ni̱ki̱ʼvii̱ ku̱a̱chi nu̱ú Jehová”. Ta ta̱ Natán ni̱ka̱ʼa̱nra xíʼin ta̱ David: “Jehová íxakáʼnuva-inira xa̱ʼa̱ ku̱a̱chiún, va̱ása kuviún. 14 Soo ni saá, xa̱ʼa̱ ña̱ ni loʼo va̱ása ní ixato̱ʼún Jehová, se̱ʼún ta̱ sa̱kán ka̱ku kuvivara”.
15 Tándi̱ʼi, ta̱ Natán nda̱kiʼinra ku̱a̱ʼa̱nra chí veʼera.
Ta Jehová ta̱xira ña̱ ná kiʼin kue̱ʼe̱ ta̱ loʼo se̱ʼe ta̱ David ta̱ sa̱káku ñá Bat-Seba ñá xi̱kuu ñá síʼi ta̱ Urías. 16 Ta̱ David ni̱ka̱ʼa̱n-ndáʼvira xíʼin Ndióxi̱ xa̱ʼa̱ ta̱ loʼo yóʼo. Nda̱a̱ ni loʼo va̱ása níxixira ta nda̱kasira miíra veʼe, ta ndiʼi ñuú xi̱ndúʼura nu̱ú ñuʼú. 17 Soo na̱ xi̱kuaʼa̱ na̱ xi̱kachíñu nu̱ú ta̱ David xi̱kuyatinna nu̱úra ña̱ va̱ʼa ndaniʼinara nu̱ú ñuʼú, soo va̱ása níxiinra. Ta saátu va̱ása níxiinra kuxura xíʼinna. 18 Tá ni̱ya̱ʼa u̱xa̱ ki̱vi̱, ni̱xi̱ʼi̱ ta̱ loʼo yóʼo. Ta na̱ káchíñu nu̱ú ta̱ David xi̱yiʼvína ka̱ʼa̱nna xíʼinra ña̱ xa̱a̱ ni̱xi̱ʼi̱ ta̱ loʼo se̱ʼera. Ta xi̱kachina: “Tá xi̱taku ta̱ loʼo yóʼo, xi̱kaʼa̱nyó xíʼin ta̱ rey ta va̱ása níxi̱xiinra kuniso̱ʼora miíyó. ¿Ndáa ki̱ʼva ka̱ʼa̱nyó xíʼinra vitin ña̱ xa̱a̱ ni̱xi̱ʼi̱ ta̱ loʼo se̱ʼera? Nda̱a̱ kivi keʼéra iin ña̱ va̱ása va̱ʼa”.
19 Tá xi̱ni ta̱ David ña̱ nátúʼun ya̱á na̱ káchíñu nu̱úra, nda̱kanixi̱níra ña̱ xa̱a̱ ni̱xi̱ʼi̱va ta̱ loʼo se̱ʼera. Ta̱ David ni̱nda̱ka̱tu̱ʼunra na̱ káchíñu nu̱úra: “¿Á xa̱a̱ ni̱xi̱ʼi̱va ta̱ loʼo?”. Ta na̱yóʼo ka̱china: “Ni̱xi̱ʼi̱vara”. 20 Tasaá, ta̱ David nda̱koora nu̱ú ñuʼú. Chi̱chira ta chi̱kaa̱ra aceite miíra, na̱samara ti̱ko̱to̱ra ta ku̱a̱ʼa̱nra chí veʼe Jehová ña̱ ndasakáʼnurara. Tándi̱ʼi, ndi̱kóra veʼera* ta ni̱ka̱ʼa̱nra ña̱ ná taxina ña̱ kuxura ta xi̱xivara. 21 Na̱ káchíñu nu̱úra ni̱nda̱ka̱tu̱ʼunnara: “¿Nda̱chun síínní ke̱ʼún? Tá tákuka ta̱ loʼo se̱ʼún, va̱ása níxi̱xixiún ta va̱ása nísandákoún ña̱ kuakún. Soo tá xa̱a̱ ni̱xi̱ʼi̱ra, nda̱koún ta xi̱xiún”. 22 Ta ta̱yóʼo ka̱chira: “Tá xi̱takura, va̱ása níxi̱xixii̱ ta xi̱xakui̱ saáchi xi̱ndakanixi̱níi̱ ‘Kǒo na̱ kúnda̱a̱-ini, sana kundáʼviva-ini Jehová kunira yi̱ʼi̱ ta taxira ña̱ kutaku ta̱ loʼo yóʼo’. 23 Soo vitin ña̱ xa̱a̱ ni̱xi̱ʼi̱ra, ¿nda̱chun va̱ása kuxui̱? ¿Á kiviva sandándikói̱ra? Yi̱ʼi̱ ku̱ʼi̱n chí nu̱ú ku̱a̱ʼa̱nra, soo ta̱kán va̱ása ndikóra nu̱úi̱”.
24 Tasaá, ta̱ David ki̱xáʼara sándi̱kora-ini ñá síʼira ñá Bat-Seba. Tándi̱ʼi, ni̱ki̱si̱ tukura xíʼinñá ta tá ni̱ya̱ʼa yo̱o̱ ka̱ku iin se̱ʼena ta chi̱nanínara Salomón.* Ta Jehová xi̱kuʼvi̱ní-inira xi̱xinira ta̱yóʼo. 25 Xa̱ʼa̱ ña̱ xi̱kuʼvi̱ní-ini Jehová xi̱xinirara, ni̱ka̱ʼa̱nra xíʼin ta̱ profeta Natán ña̱ ná ka̱ʼa̱nra xíʼinna ña̱ chinanínara Jedidías.*
26 Ta ta̱ Joab nda̱kundeéra ka̱nitáʼanra xíʼin na̱ ammonita na̱ xi̱ndoo chí Rabá, ta ku̱chiñura nda̱kiʼinra iin táʼví ñuu nu̱ú ni̱xi̱yo ta̱ rey. 27 Ña̱kán, ta̱ Joab chi̱ndaʼára na̱ ku̱a̱ʼa̱n ka̱ʼa̱n ña̱yóʼo xíʼin ta̱ David: “Ka̱nitáʼi̱n xíʼin na̱ ndóo chí Rabá ta ku̱chiñui̱ nda̱kiʼii̱n nu̱ú íyo ti̱kui̱ína.* 28 Ta vitin sandátaka ndiʼika na̱ soldado, ta kanitáʼún xíʼin na̱ ñuu yóʼo ta ndakiʼúnña. Ña̱ va̱ʼa ná ka̱ʼa̱n va̱ʼana xa̱ʼún ña̱ nda̱kiʼúnña ta su̱ví xa̱ʼa̱ yi̱ʼi̱ ka̱ʼa̱n va̱ʼana”.
29 Ña̱kán, ta̱ David sa̱ndákutáʼanra ndiʼi na̱ soldado na̱ kúúmiíra ta ni̱xa̱ʼa̱nra ka̱nitáʼanra xíʼin na̱ ndóo chí Rabá ta ku̱chiñura nda̱kiʼinraña. 30 Ta nda̱kiʼintura corona ña̱ xi̱núu xi̱ní ta̱ Malcam.* Ta corona yóʼo ve̱eña 34 kilo* ta ku̱vaʼaña xíʼin oro ta saátu xíʼin yu̱u̱ ña̱ liviní, ta chi̱núunaña xi̱ní ta̱ David. Ta nda̱kiʼintura ku̱a̱ʼání ña̱ʼa ña̱ ndáyáʼvi ñuu kán ku̱a̱ʼa̱n xíʼinra. 31 Ta saátu ta̱vára na̱ yiví ñuu kán ña̱ va̱ʼa kachíñuna ña̱ kaʼndana yu̱u̱, ña̱ kuniñúʼuna ña̱ʼa ña̱ ka̱a ña̱ xi̱ín* nu̱ú, yácha ña̱ ka̱a ta saátu ña̱ ixava̱ʼana ndo̱ʼo. Ña̱yóʼo kúú ña̱ ke̱ʼéra xíʼin ndiʼi ñuu na̱ ammonita. Tándi̱ʼi, ta̱ David xíʼin na̱ soldadora ndi̱kóna chí ñuu Jerusalén.