Isaías
21 Ña̱yóʼo kúú ña̱ kundoʼo ñuʼú yi̱chí ña̱ íyo nda̱a̱ táki̱ʼva íyo mar:*
Ndeéní va̱xi ta̱chí chí sur,
chí ñuʼú yi̱chí ke̱eña va̱xiña, nu̱ú ñuʼú ña̱ yíʼvina xínina.
2 Xi̱nii̱ iin visión ña̱ i̱yoní:
ñuu ña̱ sándaʼvi, sandáʼviña inkana
ñuu ña̱ sándiʼi-xa̱ʼa̱, sandíʼi-xa̱ʼa̱ña inkaña.
Kanitáʼan xíʼinna ñuu Elam. Ndakasi sa̱tá ñuu yóʼo ñuu Media.
Va̱ása taxikai̱ saxóʼvi̱ña* inkana nda̱a̱ táki̱ʼva xi̱keʼéña.
3 Xa̱ʼa̱ ña̱kán ndíʼi̱ní-inii̱.
Ndóʼoníi̱ nda̱a̱ táki̱ʼva ndóʼo iin ñaʼá ñá káku se̱ʼe.
Kǒo kívi kuniso̱ʼi̱ saáchi ndíʼi̱ní-inii̱;
kǒo kívi kotoi̱ saáchi iin ku̱a̱ʼa̱n-inii̱.
4 Iin kísini̱nu níma̱i̱; yíʼviníi̱.
Xi̱kuni̱níi̱ kuñuú soo vitin yíʼvivai̱ tá kúñuú.
5 Kanindichindó mesa ta katandó tayi̱.
Kuxundó ta koʼondó.
Ndóʼó na̱ kúúmií chiñu ña̱ ndáyáʼvi,
ndakunditandó ta chikaa̱ndó aceite sa̱tá escudo.
6 Saáchi ña̱yóʼo kúú ña̱ ni̱ka̱ʼa̱n Jehová xíʼi̱n:
“Kaʼnda chiñu nu̱ú iin ta̱a ña̱ ná kundaara, ta ná natúʼunra xa̱ʼa̱ ña̱ kunira”.
7 Ta ta̱yóʼo xi̱nira iin carreta tú xíka nu̱ú ku̱a̱chi tú ñúu* u̱vi̱ kuáyi̱,
iin carreta tú xíka nu̱ú ku̱a̱chi tú ñúu burro,
iin carreta tú xíka nu̱ú ku̱a̱chi tú ñúu tí camello.
Viíní xi̱ndaara ta va̱ʼaní xi̱kiʼinra kuenta.
8 Tasaá ndeéní ni̱nda̱ʼyi̱ra nda̱a̱ táki̱ʼva ndáʼyi̱ tí ndikaʼa:*
“Jehová, tá káʼñu* níndichii̱ xi̱ní veʼe súkun ta ndái̱
ta saátu ndiʼi ñuú ndái̱.
9 Kotondó ndáana va̱xi:
Va̱xi na̱ ta̱a ta ndósona sa̱tá carreta tú xíka nu̱ú ku̱a̱chi ta tí kuáyi̱ ñúu túyóʼo”.
Tasaá ndeéní ni̱ka̱ʼa̱nra ña̱yóʼo:
“Xa̱a̱ ndi̱ʼi-xa̱ʼa̱ña. Ndi̱ʼi-xa̱ʼa̱ Babilonia.
Nu̱ú ñuʼú ku̱unra ña̱ʼa ña̱ i̱xava̱ʼana ña̱ ndásakáʼnuna”.
10 Ndáʼviní na̱ ñui̱ na̱ ni̱xa̱ñi̱na* nda̱a̱ táki̱ʼva kéʼéna xíʼin trigo,
ña̱ kána nu̱ú ñuʼíi̱,
na̱túʼi̱n xíʼinndó xa̱ʼa̱ ña̱ ni̱ka̱ʼa̱n Jehová ta̱ xáʼndachíñu nu̱ú na̱ ángel xíʼi̱n, ta̱ kúú Ndióxi̱ na̱ ñuu Israel.
11 Ña̱yóʼo kúú ña̱ kundoʼo ñuu Dumá:*
Íyo iin na̱ kána yi̱ʼi̱ chí Seír:
“Yóʼó ta̱ ndáa, ¿ndáaña kúu tá ñuú?
Yóʼó ta̱ ndáa, ¿ndáaña kúu tá ñuú?”.
12 Ta ta̱ ndáa káʼa̱nra ña̱yóʼo:
“Xa̱a̱ ku̱a̱ʼa̱n túvi ta saátu xa̱a̱ ku̱a̱ʼa̱n kúñuú.
Tá kúni̱ndó nda̱ka̱tu̱ʼunndó, nda̱ka̱tu̱ʼunvandó.
Naʼa tukundó”.
13 Ña̱yóʼo kúú ña̱ kundoʼo yoso̱ yi̱chí:
Chí yuku̱ ña̱ íyo chí yoso̱ yi̱chí ku̱su̱nndó,
ndóʼó na̱ ñuu Dedán na̱ inkáchi kítáʼan xíka.
14 Kúáʼandó taxindó ti̱kui̱í ná koʼo na̱ yíchi̱,*
ndóʼó na̱ ndóo chí ñuu Temá,
kúáʼanndó xíʼin ña̱ kuxu na̱ xínu ku̱a̱ʼa̱n.
15 Saáchi na̱yóʼo xi̱nuna nu̱ú na̱ kúni̱ kaʼní-ñaʼá xíʼin espada, xi̱nuna nu̱ú na̱ ta̱vá espada,
xi̱nuna nu̱ú na̱ kúni̱ kaʼní-ñaʼá xíʼin kuxu̱n* ta saátu nu̱ú ku̱a̱chi ña̱ ndeéní.
16 Saáchi ña̱yóʼo kúú ña̱ ni̱ka̱ʼa̱n Jehová xíʼi̱n: “Ti̱xin iin ku̱i̱ya̱ ndiʼi-xa̱ʼa̱* ña̱ ndáyáʼviní ña̱ kúúmií na̱ ñuu Quedar. 17 Na̱ ta̱a na̱ ñuu Quedar, na̱ xáʼa̱n nu̱ú ku̱a̱chi na̱ xíni̱ kuniñúʼu kuxu̱n, ndáa loʼova koona, saáchi Jehová Ndióxi̱ na̱ ñuu Israel kúú ta̱ ni̱ka̱ʼa̱n ña̱yóʼo”.