Isaías
31 Ndáʼviní na̱ ku̱a̱ʼa̱n chí Egipto ña̱ ndukúna na̱ chindeétáʼan xíʼinna,
na̱ ndáa-ini tí kuáyi̱,
na̱ ndáa-ini carreta tú xíka nu̱ú ku̱a̱chi xa̱ʼa̱ ña̱ ku̱a̱ʼání kúúnú,
na̱ ndáa-ini kuáyi̱* tí xíka nu̱ú ku̱a̱chi xa̱ʼa̱ ña̱ ndakúnírí
soo va̱ása ndáa-inina Ndióxi̱ na̱ ñuu Israel, Ndióxi̱ ta̱ yi̱i̱
ta va̱ása nándukúna Jehová.
2 Soo ndíchitu ta̱yóʼova ta chindaʼára iin tu̱ndóʼo nu̱úna,
va̱ása ndandikó-inira xa̱ʼa̱ ña̱ ka̱ʼa̱nra.
Taxira castigo ndaʼa̱ na̱ ndi̱va̱ʼa-ini
ta saátu na̱ chíndeétáʼan xíʼin na̱ kéʼé ña̱ va̱ása va̱ʼa.
3 Na̱ yivíva kúú na̱ egipcio, su̱ví Ndióxi̱ kúúna;
kití kuitíva kúú kuáyi̱ sa̱na̱na ta su̱ví espíritu kúúrí nda̱a̱ táki̱ʼva íyo Ndióxi̱.
Tá ná sandákaa̱ Jehová ndaʼa̱ra,
na̱ chíndeétáʼan xíʼinna kachiʼina*
ta ndakava na̱ chíndeétáʼanna xíʼin;
inkáchi kuvi ndiʼina.
4 Saáchi ña̱yóʼo kúú ña̱ ni̱ka̱ʼa̱n Jehová xíʼi̱n:
“Nda̱a̱ táki̱ʼva kéʼé ndikaʼa* tí yúta̱* tí ndakúní tá ndáʼyi̱rí sa̱tá kití tí kúni̱rí tiinrí
ta ni ndákutáʼan iin tiʼvi na̱ ndáa kití ña̱ sayíʼvinarí,
va̱ása yíʼvirí tá xíniso̱ʼorí ña̱ káʼa̱nna
ta ni va̱ása yíʼvirí xa̱ʼa̱ ña̱ ndeéní ndáʼyi̱na,
saá keʼé Jehová ta̱ xáʼndachíñu nu̱ú na̱ ángel tá ná nuura ña̱ kanitáʼanra xíʼinna
xa̱ʼa̱ yuku̱ Sion ta saátu xa̱ʼa̱ xi̱kí ña̱ kúúmiíña.
5 Jehová ta̱ xáʼndachíñu nu̱ú na̱ ángel ndakiʼinra tu̱ʼun na̱ ñuu Jerusalén nda̱a̱ táki̱ʼva kéʼé tí saa tí ndáa se̱ʼe válírí.
Ndakiʼinra tu̱ʼunña ta sakǎkuraña.
Ixakáʼnu-inira xa̱ʼa̱ña ta sakǎkuraña”.
6 “Ndóʼó na̱ ñuu Israel ndikóndó nu̱ú ta̱ i̱xaso̱ʼondó nu̱ú. 7 Saáchi ki̱vi̱ saá kundasíndó kunindó ndióxi̱ndó ña̱ ku̱vaʼa xíʼin plata á ña̱ ku̱vaʼa xíʼin oro, ña̱ i̱xava̱ʼandó xíʼin ndaʼa̱ndó tasaá ni̱ki̱ʼvindó ku̱a̱chi.
8 Kaʼnína na̱ ñuu Asiria xíʼin espada soo su̱ví na̱ yiví keʼé ña̱yóʼo;
sandíʼi-xa̱ʼa̱nana xíʼin espada soo su̱ví na̱ yiví keʼé ña̱yóʼo.
Xa̱ʼa̱ ña̱yóʼo kununa ku̱ʼu̱nna
ta ixandúxana xíʼin na̱ va̱lí kúa̱an ña̱ kachíñundáʼvina.
9 Yu̱u̱ náʼnu ña̱ kúúmiína ndiʼi-xa̱ʼa̱ña xa̱ʼa̱ ña̱ yi̱ʼvíníña,
ta na̱ kúúmií chiñu ña̱ ndáyáʼvi nu̱úna, yi̱ʼvínína tá ná kunina yitu̱n tú na̱ʼa̱ nu̱úna ña̱ ndatakana”, káchi Jehová,
ñuʼu̱ra túu̱nña chí Sion ta chí Jerusalén íyo horno* ña̱ kúú kuentara.