Isaías
50 Ña̱yóʼo kúú ña̱ káʼa̱n Jehová:
“¿Ndáa míí ku̱a̱ʼa̱n tutu ña̱ káʼa̱n ña̱ xa̱a̱ ni̱ndo̱o siʼíndó ñá ta̱xíi̱n?
¿Á ni̱xi̱íkoi̱* ndóʼó xa̱ʼa̱ ña̱ níkái̱?*
Ni̱ki̱a̱ʼvindó xa̱ʼa̱ ku̱a̱chi miívandó
ta xa̱ʼa̱ ku̱a̱chi ña̱ ni̱ki̱ʼvindó ta̱xíi̱n siʼíndó.
2 Tá saá, ¿nda̱chun kǒo níxi̱yo nda̱a̱ ni iinna tá ki̱xii̱?
¿Nda̱chun va̱ása níndakuiin nda̱a̱ ni iinna tá ka̱nai̱?
¿Á kǒo ndee̱ ndaʼíi̱ ña̱ sakǎkui̱ ndóʼó?
¿Á kǒo kúúmiíi̱ ndee̱ ña̱ ndatavái̱ ndóʼó?
Kotondó. Tá xa̱ʼndai̱ chiñu, ni̱yi̱chi̱ mar;
ndásai̱ yu̱ta ñuʼú yi̱chí.
Ta xa̱ʼa̱ ña̱ kǒo ti̱kui̱í, táʼyi̱ ti̱a̱ká
ta xíʼi̱rí xa̱ʼa̱ ña̱ yíchi̱rí.*
3 Ndásanaai̱ chí ndiví
ta nda̱a̱ táki̱ʼva íyo ña̱ ndáku̱ndixi ti̱ko̱to̱ ndayí* saá íyoña”.
4 Táta káʼnu Jehová sánáʼa̱ra yi̱ʼi̱ ndáaña ka̱ʼi̱n,
ña̱ va̱ʼa viíní ndakuii̱n yuʼú* na̱ ku̱naa.
Ndiʼi xi̱ta̱a̱n* sándakáxíra-inii̱;*
táxira ña̱ viíní ná kuniso̱ʼi̱ nda̱a̱ táki̱ʼva xíniso̱ʼo na̱ sákuaʼa.
5 Táta káʼnu Jehová, nda̱kunára so̱ʼi̱,
ta va̱ása ní ixaso̱ʼi̱ nu̱úra.
Va̱ása níkeʼíi̱ ña̱ kúni̱ miíi̱.
6 Ta̱xii̱ sa̱tái̱ ña̱ ná kani na̱ xi̱kani yi̱ʼi̱,
sa̱kúyatii̱n nu̱úi̱ nu̱ú na̱ xi̱tuʼun ixí* yuʼíi̱.
Va̱ása níchise̱ʼíi̱ nu̱úi̱ tá xi̱sakúkaʼanna nu̱úi̱, ni tá xi̱kundaana tási̱ína* nu̱úi̱.
7 Soo táta káʼnu Jehová chindeétáʼan xíʼi̱n.
Ña̱kán va̱ása kukaʼan nu̱úi̱.
Ña̱kán nda̱satéʼíi̱ nu̱úi̱ nda̱a̱ táki̱ʼva íyo iin yu̱u̱ ña̱ téʼé,
ta kúnda̱a̱-inii̱ ña̱ va̱ása kukaʼan nu̱úi̱.
8 Yatinva íyo ta̱ káʼa̱n xa̱ʼíi̱ ña̱ kéʼíi̱ ña̱ nda̱kú.
¿Ndáana kivi taxi ku̱a̱chi xa̱ʼíi̱?*
Inkáchi ná ndakunditayó.
¿Á íyo iin na̱ kivi taxi ku̱a̱chi xa̱ʼíi̱?
Ná kuyatinna.
9 Kotondó. Táta káʼnu Jehová kúú ta̱ chíndeétáʼan xíʼi̱n.
¿Ndáana ka̱ʼa̱n ña̱ kúúmiíi̱ ku̱a̱chi?
Kotondó. Ndiʼi na̱yóʼo ndiʼi-xa̱ʼa̱na nda̱a̱ táki̱ʼva ndíʼi-xa̱ʼa̱ iin ti̱ko̱to̱.
Ti̱kixín kúú tí kaxí na̱yóʼo.
10 ¿Ndáana íyo xíʼinndó íxato̱ʼó Jehová
ta xíniso̱ʼona tu̱ʼun ta̱ káchíñu nu̱úra?
¿Ndáana xa̱a̱ xíka nu̱ú naa, nu̱ú kǒo ñuʼu̱ túu̱n?
Ná kandíxana ki̱vi̱ Jehová, ta ná kundaa-inina Ndióxi̱na.
11 “Kotondó. Ndiʼi ndóʼó na̱ ndákaʼmi iin ñuʼu̱
kakandó nu̱ú túu̱n ñuʼu̱ yóʼo.
Ña̱yóʼo kúú ña̱ keʼíi̱ xíʼinna:
nduvana kundoona xa̱ʼa̱ ña̱ ndeéní kiʼvi̱na.