Isaías
58 “Ndeéní nda̱ʼyi̱ kóʼún,* va̱ása sandákoún ña̱ nda̱ʼyi̱ kóʼún.
Nda̱ʼyi̱ kóʼún nda̱a̱ táki̱ʼva tívina iin ndiki̱.
Ka̱ʼa̱n xíʼin na̱ ñui̱ xa̱ʼa̱ ña̱ i̱xaso̱ʼona nu̱úi̱,
ka̱ʼa̱n xíʼin na̱ veʼe ta̱ Jacob xa̱ʼa̱ ku̱a̱chi ña̱ ni̱ki̱ʼvina.
2 Ki̱vi̱ tá ki̱vi̱ nándukúna yi̱ʼi̱,
káʼa̱nna ña̱ kútóonína sakúaʼana xa̱ʼa̱ yichíi̱,
kúni̱na koona nda̱a̱ táki̱ʼva íyo iin ñuu ña̱ kéʼé ña̱ nda̱kú,
ña̱ va̱ása nísandákoo ley Ndióxi̱ña.
Káʼa̱nna xíʼi̱n ña̱ nda̱kúní ná ndatii̱n ku̱a̱chi xíʼinna
ta káʼa̱ntana ña̱ kútóonína kuyatinna nu̱ú Ndióxi̱:
3 ‘¿Nda̱chun kǒo xítoún tá va̱ása xíxindi̱ iníí ki̱vi̱?*
Tá náʼa̱ndi̱ ña̱ kúsuchí-inindi̱, ¿nda̱chun va̱ása xítoún ña̱yóʼo?’.
Saáchi xa̱ʼa̱ miívandó* ndíʼi̱-inindó tá va̱ása xíxindó iníí ki̱vi̱
ta íxandi̱va̱ʼandó xíʼin na̱ káchíñu nu̱úndó.
4 Ta ndiʼi ki̱vi̱ ña̱ va̱ása xíxindó, na̱ kánitáʼanva kúúndó ta náandó,*
ta kánindó yi̱kí inkana xa̱ʼa̱ ña̱ sáa̱níndó.
Ni ná sandákoondó ña̱ kuxundó nda̱a̱ táki̱ʼva kéʼéndó vitin
va̱ása kundatundó ña̱ xa̱a̱ ña̱ káʼa̱nndó chí ndiví ta kuniso̱ʼi̱ña.
5 ¿Á saá kúni̱i̱ ná keʼéndó ki̱vi̱ ña̱ va̱ása xíxindó?
¿Á saá kúni̱i̱ ná na̱ʼa̱ndó ña̱ kúsuchí-inindó?
¿Á xíniñúʼu ndaku̱ndeendó* nda̱a̱ táki̱ʼva ndáku̱ndee ku̱ʼu̱ ña̱ súkunní xáʼnu ta ndakandúʼúndó* sa̱tá ti̱ko̱to̱ ndayí* xíʼin ya̱a̱?
¿Á ña̱yóʼo kúú ña̱ xíniñúʼu keʼéndó ki̱vi̱ ña̱ va̱ása xíxindó ta á kúsi̱í-ini Jehová xíʼinña?
6 Va̱ása. Chi ña̱ kúni̱i̱ ná keʼéndó ki̱vi̱ ña̱ va̱ása xíxindó kúú ña̱yóʼo:
ña̱ ná tavándó cadena ña̱ sáxo̱ʼvi̱* inkana,
ná ndaxínndó yókó* tú núʼnina,
ña̱ ná sañándó na̱ xóʼvi̱ ta ka̱ʼnu̱ndó ndiʼi yókó;
7 ña̱ taxindó ña̱ xíxindó ndaʼa̱ na̱ kǒo ña̱ kuxu,
ña̱ taxindó veʼendó ná koo na̱ nda̱ʼví ta saátu na̱ kǒo veʼe,
ña̱ taxindó ti̱ko̱to̱ndó kundixi na̱ kǒo ti̱ko̱to̱
ta saátu ña̱ chindeétáʼanndó xíʼin na̱ veʼe miíndó.
8 Tá saá ná keʼéndó, ndaye̱ʼe̱ndó nda̱a̱ táki̱ʼva yéʼe̱ tá túvi
ta kamaní ndaʼandó.
Ña̱ nda̱kú ña̱ kéʼéndó, kooña nda̱a̱ táki̱ʼva íyo ña̱ ku̱a̱ʼa̱n chí nu̱úndó ta ndee̱ Jehová ña̱ káʼnuní ku̱ʼu̱nña chí sa̱tándó.
9 Tasaá kanandó Jehová ta ndakuiinra yuʼúndó;
kana kóʼóndó ña̱ ná chindeétáʼanra xíʼinndó ta ka̱ʼa̱nra ña̱yóʼo xíʼinndó: ‘Yóʼo íyoi̱’.
Tá ná tavándó yókó tú ve̱ení ndíso inkana,
tá ná va̱ása sanáʼa̱ ndaʼa̱kandó inkana* ta saátu tá va̱ása káʼa̱nkandó tu̱ʼun ña̱ sáxo̱ʼvi̱ inkana,
10 tá táxindó ña̱ kútóondó kuxundó ndaʼa̱ inkana,
tá táxindó ña̱ xíniñúʼu na̱ xóʼvi̱,
saá ndaye̱ʼe̱ndó nda̱a̱ táki̱ʼva yéʼe̱ nu̱ú naa,
ni íyondó nda̱a̱ táki̱ʼva íyo ña̱ naa
soo xa̱a̱ndó koondó nda̱a̱ táki̱ʼva íyo káʼñu.*
11 Ndiʼi tiempo kuniʼi Jehová yichi̱ nu̱úndó
ta taxira ña̱ xíniñúʼundó ni ná kundoondó nu̱ú ñuʼú yi̱chí;
ta taxira ndee̱ ndaʼa̱ndó,*
ta koondó nda̱a̱ táki̱ʼva íyo iin jardín ña̱ va̱ʼaní kóso̱na,
koondó nda̱a̱ táki̱ʼva íyo nu̱ú kána ti̱kui̱í tá va̱ása yíchi̱.
12 Xa̱ʼa̱ ndóʼó ndasava̱ʼana ñuu yatá ña̱ ndi̱ʼi-xa̱ʼa̱,
ndóʼó ndasaviíndó xa̱ʼa̱ ñuu ña̱ ndi̱ʼi-xa̱ʼa̱ tá ni̱xi̱yo na̱ táʼanndó na̱ xi̱ndoo xi̱naʼá.
Ta ka̱ʼa̱nna xíʼinndó ña̱ kúúndó na̱ sándaʼa nama̱ ña̱ ndi̱ʼi-xa̱ʼa̱,
ta saátu ka̱ʼa̱nna xíʼinndó ña̱ kúúndó na̱ sándaʼa yichi̱ nu̱ú kivi kundoona.
13 Tá íxato̱ʼóndó ki̱vi̱ sábado ta va̱ása ndíʼi̱-inindó xa̱ʼa̱ mií kuitíndó* ki̱vi̱ yi̱i̱ yóʼo,
ta káʼa̱nndó ña̱ kúúña iin ki̱vi̱ sábado ña̱ kúsi̱íní-inindó xíʼin, iin ki̱vi̱ ña̱ yi̱i̱ nu̱ú Jehová, iin ki̱vi̱ ña̱ xíniñúʼu ixato̱ʼóndóra,
ta íxato̱ʼóndóra nu̱úka ña̱ kundi̱ʼi-inindó xa̱ʼa̱ miíndó, nu̱úka ña̱ ka̱ʼa̱nndó tu̱ʼun ña̱ kǒo ndáyáʼvi,
14 tasaá yi̱ʼi̱ Jehová taxii̱ ña̱ ná kusi̱íní-inindó,
ta taxii̱ ná kaʼndachíñundó chí yuku̱ ña̱ súkun.
Taxii̱ ná kusi̱í-inindó xíʼin herencia ta̱ Jacob, táʼanndó ta̱ ni̱xi̱yo xi̱naʼá,
saáchi mií Jehová kúú ta̱ ni̱ka̱ʼa̱n ña̱yóʼo”.