Isaías
6 Tá ku̱i̱ya̱ ña̱ ni̱xi̱ʼi̱ ta̱ rey Uzías, xi̱nii̱ Jehová ña̱ íyora nu̱ú iin trono súkunní ta yuʼú ti̱ko̱to̱ra nda̱kasiña iníí ini templo. 2 Chí si̱kíra xi̱ndita na̱ serafín ta iin tá iinna ni̱xi̱yo i̱ñu̱ ndi̱xi̱nna; u̱vi̱ ndi̱xi̱nna xi̱ndakasiña nu̱úna, u̱vi̱ ndi̱xi̱nna xi̱ndakasiña xa̱ʼa̱na, ta xíʼin inka u̱vi̱ña xi̱ndachína.
3 Ta ndeékaví xi̱kaʼa̱nna xíʼin táʼanna:
“Jehová ta̱ xáʼndachíñu nu̱ú na̱ ángel, ta̱ yi̱i̱ kúúra, ta̱ yi̱i̱ kúúra, ta̱ yi̱i̱ kúúra.
Chútú ndee̱ra iníísaá nu̱ú ñuʼú”.
4 Ta ndeéní ki̱si yitu̱n tú tíin yéʼé xa̱ʼa̱ ña̱ ndeéní ni̱ka̱ʼa̱nna, ta chu̱tú yi̱ʼma̱ ini veʼe kán.
5 Tasaá ni̱ka̱ʼi̱n: “Ndáʼviníi̱.
Ta̱ kuvi kúúvai̱,
saáchi ta̱ ku̱a̱chi kúi̱ ta ña̱ yaku̱a̱* kúú ña̱ káʼi̱n
ta íyoi̱ xíʼin na̱ ñuu na̱ káʼa̱n ña̱ yaku̱a̱,
xi̱ninu̱úi̱ ta̱ Rey, Jehová ta̱ xáʼndachíñu nu̱ú na̱ ángel”.
6 Tasaá, iin ta̱ serafín ndáchíra ki̱xaa̱ra nu̱úi̱ ta níʼira ti̱ka̱yi̱ ña̱ xíxi̱ ña̱ ta̱vára nu̱ú altar xíʼin pinza. 7 Ti̱inra yuʼíi̱ ta ka̱chira:
“Koto, ña̱yóʼo ni̱tu̱ndaaña yuʼún.
Kǒoka ku̱a̱chi kúúmiíún
chi xa̱a̱ ndo̱ova ku̱a̱chiún”.
8 Tasaá xi̱niso̱ʼi̱ ni̱ka̱ʼa̱n Jehová ña̱yóʼo: “¿Ndáana chindaʼíi̱ ta ndáana ku̱ʼu̱n nu̱úyó?”. Ta nda̱kuii̱n: “Yóʼo íyoi̱. Yi̱ʼi̱ chindaʼún ku̱ʼu̱n”.
9 Tasaá nda̱kuiinra: “Kúáʼan ta ka̱ʼún ña̱yóʼo xíʼin na̱ ñuu:
‘Ni tuku ta tuku ná kuniso̱ʼondó ña̱yóʼo,
va̱ása kunda̱a̱-inindó xíʼinña;
ni tuku ta tuku ná kotondó ña̱yóʼo,
va̱ása kunda̱a̱-inindó’.
10 Ndasatéʼé* níma̱ na̱ ñuu yóʼo,
ndakasi so̱ʼona
ndakasi nu̱úna
ña̱ va̱ʼa ná kǒo kunina
ta ná va̱ása kuniso̱ʼona
tasaá kǒo kunda̱a̱-inina,
ta va̱ása ndikóna nu̱ú Ndióxi̱ ta va̱ása ndaʼana”.
11 Tasaá ni̱nda̱ka̱tu̱ʼíi̱n: “¿Jehová, nda̱a̱ amaví kuuka ña̱yóʼo?”. Ta nda̱kuiinra:
“Nda̱a̱ ná ndiʼi-xa̱ʼa̱ ndiʼi ñuu ta va̱ása kundookana nu̱úña
ni va̱ása kundooka na̱ yiví ini veʼena,
nda̱a̱ ná ndiʼi-xa̱ʼa̱ ñuʼú kán ta kǒoka na̱ kundoo nu̱úña;
12 nda̱a̱ ná sakúxíká Jehová ndiʼi na̱ ta̱a,
nda̱a̱ ná va̱ása kooka nda̱a̱ ni iin ña̱ʼa nu̱ú ñuʼú yóʼo.
13 ”Soo kookava loʼo na̱ yiví na̱ kundoo nu̱ú ñuʼú yóʼo, ta tuku kaʼminana. Na̱ ñuu Israel íyona nda̱a̱ táki̱ʼva íyo iin yitu̱n káʼnu á iin yitu̱n tú roble tú xáʼndana ta kíndo̱o xa̱ʼa̱nú; tá ná kixáʼa ndanana xa̱ʼa̱nú, ña̱ yi̱i̱ xa̱a̱ña kooña”.