Isaías
62 Ka̱ʼa̱nkavai̱ xa̱ʼa̱ Sion,
ta va̱ása koo táxii̱n xa̱ʼa̱ Jerusalén,
nda̱a̱ ná koo ña̱ nda̱kú ta ndaye̱ʼe̱ña nda̱a̱ táki̱ʼva yéʼe̱ iin ñuʼu̱,
nda̱a̱ ná ka̱kuña, ta ña̱yóʼo kooña táki̱ʼva íyo iin yitu̱n tú xíxi̱ nu̱ú.
2 “Yóʼó ñá ñaʼá, na̱ ñuu kunina ña̱ nda̱kú ña̱ kéʼún,
ta ndiʼi na̱ xáʼndachíñu kunina ña̱ ndáyáʼviníún.
Ta chinúuna iin ki̱vi̱ún ña̱ xa̱á,
ta mií Jehová kúú ta̱ chinúu ki̱vi̱ún.
3 Táki̱ʼva koo iin corona ña̱ liviní, saá koún kundika̱ún ndaʼa̱ Jehová,
táki̱ʼva koo iin ti̱ko̱to̱ ña̱ kánuu xíni̱ ta̱ rey, saá koún kundika̱ún ndaʼa̱ Ndióxi̱ún.
4 Va̱ása ka̱ʼa̱nkana xíʼún ña̱ kúún iin ñaʼá ñá ni̱ndo̱o
ta va̱ása ka̱ʼa̱nkana xa̱ʼa̱ ñuʼún ña̱ ki̱ndoo miíña.
Saáchi ka̱ʼa̱nna xíʼún, Ñá kúsi̱íní-inii̱ xíʼin,
ta Ñaʼá ñá ti̱ndaʼa̱, ka̱ʼa̱nna xíʼin ñuʼún.
Saáchi kusi̱íní-ini Jehová xíʼún
ta ñuʼún kooña nda̱a̱ táki̱ʼva íyo iin ñaʼá ñá ti̱ndaʼa̱.
5 Saáchi nda̱a̱ táki̱ʼva tíndaʼa̱ iin ta̱ loʼo kúa̱an xíʼin iin ñá loʼo kúa̱an,
na̱ se̱ʼún tindaʼa̱na xíʼún.
Táki̱ʼva kúsi̱í-ini ta̱ tíndaʼa̱ xíʼin ñá tíndaʼa̱ xíʼinra,
yóʼó sakúsi̱íún-ini Ndióxi̱ún.
6 Xi̱ní nama̱ ña̱ íyo ñuu Jerusalén, chindoi̱ na̱ kundaa.
Ndiʼi tiempo xíniñúʼu ka̱ʼa̱n na̱yóʼo, ni kúúña káʼñu* á ñuú.
Ndóʼó na̱ káʼa̱n xa̱ʼa̱ Jehová,
va̱ása ndakindee̱ndó
7 va̱ása taxindó ndakindee̱ra nda̱a̱ ná chindúʼú kútu̱ra xa̱ʼa̱ ñuu Jerusalén,
nda̱a̱ ná taxira ndasakáʼnunaña iníísaá nu̱ú ñuʼú”.
8 Jehová chi̱naʼára* xíʼin ndaʼa̱ kúaʼara, xíʼin ndaʼa̱ra ña̱ kúúmiíní ndee̱:
“Va̱ása taxikai̱ trigo* ña̱ kúúmiíún ndaʼa̱ na̱ sáa̱-ini xíni yóʼó ña̱ kuxunaña,
ta saátu va̱ása koʼo na̱ inka ñuu vino xa̱á tá kúúmiíún tá ka̱chíñuníún xa̱ʼa̱.
9 Saáchi na̱ chíʼi trigo, kuxunaña ta ndasakáʼnuna Jehová;
ta na̱ chíʼi tí uva koʼona vino tíyóʼo yéʼíi̱ ña̱ yi̱i̱”.
10 Ya̱ʼandó, ya̱ʼandó chí yéʼé.
Ndakunándó nu̱ú yichi̱, ña̱ va̱ʼa ya̱ʼa na̱ ñui̱.
Keʼéndó, keʼéndó yichi̱.
Tavándó yu̱u̱ nu̱úña.
Ta kanindichindó iin yitu̱n tú kuni na̱ ñuu.
11 Kotondó. Nda̱a̱ nu̱ú xíkání káʼa̱n Jehová:
“Ka̱ʼa̱nndó ña̱yóʼo xíʼin ñá se̱ʼe Sion:
‘Koto. Xa̱a̱ ku̱nu̱mí ka̱kuún.
Koto. Ta̱yóʼo níʼira ña̱ va̱ʼa ña̱ táxii̱ ndaʼa̱na,
ta níʼira ña̱ chaʼvirana’”.
12 Ka̱ʼa̱nna xa̱ʼa̱na ña̱ kúúna iin ñuu ña̱ yi̱i̱, na̱ nda̱satá* Jehová,
ta ka̱ʼa̱nna xa̱ʼún ña̱ kúún Ñá kúni̱nína xínina, Ñuu ña̱ va̱ása nísandákoondaʼa̱na.