Daniel

3 Ta̱ rey Nabucodonosor i̱xava̱ʼara iin ña̱ʼa* ña̱ oro ña̱ káʼnuní, ki̱ʼva 27 metro* súkunña ta ki̱ʼva 3 metro* ndíka̱ña. Ta ka̱nindichiraña yoso̱ ña̱ naní Dura, chí ñuu Babilonia. 2 Tasaá, ta̱ rey Nabucodonosor sa̱ndátakara ndiʼi na̱ chíñu na̱ xi̱kiʼin kuenta xíʼin na̱ xi̱xaʼndachíñu, na̱ xi̱chindeétáʼan xíʼin na̱yóʼo, na̱ chíñu, na̱ xi̱taxi consejo ndaʼa̱ ta̱ rey, na̱ xi̱kiʼin kuenta xíʼin ña̱ʼa ña̱ ndáyáʼvi, na̱ xi̱ndatiin ku̱a̱chi, na̱ xi̱ndisochíñu ta saátu ndiʼi na̱ xi̱chindeétáʼan xíʼin na̱ xi̱xaʼndachíñu ñuu válí ña̱ va̱ʼa ku̱ʼu̱nna vikó xa̱ʼa̱ ña̱ ni̱xi̱nu ña̱ i̱xava̱ʼa ta̱ rey Nabucodonosor.

3 Tasaá, ndiʼi na̱ chíñu na̱ xi̱kiʼin kuenta xíʼin na̱ xi̱xaʼndachíñu, na̱ xi̱chindeétáʼan xíʼin na̱yóʼo, na̱ chíñu, na̱ xi̱taxi consejo ndaʼa̱ ta̱ rey, na̱ xi̱kiʼin kuenta xíʼin ña̱ʼa ña̱ ndáyáʼvi, na̱ xi̱ndatiin ku̱a̱chi, na̱ xi̱ndisochíñu ta saátu ndiʼi na̱ xi̱chindeétáʼan xíʼin na̱ xi̱xaʼndachíñu ñuu válí nda̱takana ña̱ va̱ʼa ku̱ʼu̱nna kunina ña̱ ni̱xi̱nu ña̱ i̱xava̱ʼa ta̱ rey Nabucodonosor. Ta xi̱kunditana nu̱ú ña̱ʼa ña̱ i̱xava̱ʼa ta̱ rey Nabucodonosor. 4 Ta̱ nátúʼun* xa̱ʼa̱ ña̱ kúni̱ ta̱ rey, ndeéní ni̱ka̱ʼa̱nra ña̱yóʼo: “Ndóʼó na̱ yiví na̱ ke̱e ñuu válí xíʼin ñuu náʼnu, na̱ káʼa̱n xa̱a̱ síín síín tu̱ʼun, ña̱yóʼo kúú chiñu ña̱ táʼnda̱ nu̱úndó, 5 tá ná kuniso̱ʼondó tivina ndiki̱, flauta, arpa, arpa tú loʼo, instrumento tú kúúmií yi̱ʼva̱, flauta káʼnu xíʼin ndiʼika ña̱ʼa ña̱ xíniñúʼuna sákaʼana, xíniñúʼu kuxítíndó ta ndasakáʼnundó ña̱ʼa ña̱ oro ña̱ i̱xava̱ʼa ta̱ rey Nabucodonosor. 6 Soo tá ná va̱ása kuxítíndó ta va̱ása ndasakáʼnundóña, ndi̱ku̱n taánna ndóʼó ini horno* ña̱ xíxi̱”. 7 Ña̱kán, tá xi̱niso̱ʼona ña̱ ti̱vina ndiki̱, flauta, arpa, arpa tú loʼo, instrumento tú kúúmií yi̱ʼva̱ xíʼin ndiʼika ña̱ʼa ña̱ xíniñúʼuna sákaʼana, ndiʼi na̱ yiví na̱ ke̱e ñuu válí xíʼin ñuu náʼnu, na̱ káʼa̱n xa̱a̱ síín síín tu̱ʼun, xi̱kuxítína ta nda̱sakáʼnuna ña̱ʼa ña̱ oro ña̱ i̱xava̱ʼa ta̱ rey Nabucodonosor.

8 Tá ku̱u ña̱yóʼo, sava na̱ caldeo ku̱yatinna ta ni̱ka̱ʼa̱nna ña̱ vatá* xa̱ʼa̱ na̱ judío. 9 Ni̱ka̱ʼa̱nna xíʼin ta̱ rey Nabucodonosor: “Ndiʼi tiempo ná kutakún táta rey. 10 Yóʼó táta rey, xa̱ʼndaún chiñu ña̱ ndiʼi na̱ yiví na̱ ná kuniso̱ʼo tá ná tivina ndiki̱, flauta, arpa, arpa tú loʼo, instrumento tú kúúmií yi̱ʼva̱, flauta káʼnu xíʼin ndiʼika ña̱ʼa ña̱ xíniñúʼuna sákaʼana, xíniñúʼu kuxítína ta ndasakáʼnuna ña̱ʼa ña̱ oro ña̱ i̱xava̱ʼún, 11 soo tá va̱ása kúxítína ta va̱ása ndásakáʼnunaña, xíniñúʼu taánnana ini horno ña̱ xíxi̱. 12 Táta rey, sava na̱ judío na̱ ta̱xiún chiñu ndaʼa̱ ña̱ chindeétáʼanna xíʼin na̱ kíʼin kuenta xíʼin na̱ ndóo ñuu Babilonia, va̱ása nína̱ʼa̱ ña̱ íxato̱ʼóna yóʼó. Na̱yóʼo kúú ta̱ Sadrac, ta̱ Mesac xíʼin ta̱ Abednego. Na̱yóʼo va̱ása ndásakáʼnuna ndióxi̱ún ta va̱ása kúni̱na ndasakáʼnuna ña̱ʼa ña̱ oro ña̱ i̱xava̱ʼún”.

13 Tasaá ni̱sa̱a̱ní ta̱ Nabucodonosor ta xa̱ʼndara chiñu ña̱ ná kuniʼina ta̱ Sadrac, ta̱ Mesac xíʼin ta̱ Abednego ku̱ʼu̱n xíʼinna nu̱úra. Tasaá, ni̱xa̱ʼa̱nna xíʼin na̱ ta̱a yóʼo nu̱ú ta̱ rey. 14 Ta ni̱ka̱ʼa̱n ta̱ Nabucodonosor xíʼinna: “Sadrac, Mesac, Abednego, ¿á ña̱ nda̱a̱ kúú ña̱ va̱ása ndásakáʼnundó ndióxi̱ ña̱ ndásakáʼnui̱ ta va̱ása kúni̱ndó ndasakáʼnundó ña̱ʼa ña̱ oro ña̱ i̱xava̱ʼi̱? 15 Tá ná kuniso̱ʼondó tivina ndiki̱, flauta, arpa, arpa tú loʼo, instrumento tú kúúmií yi̱ʼva̱, flauta káʼnu xíʼin ndiʼika ña̱ʼa ña̱ xíniñúʼuna sákaʼana ta kúxítíndó ta ndásakáʼnundó ña̱ʼa ña̱ ke̱ʼíi̱, va̱ʼava tá saá ná keʼéndó. Soo tá va̱ása xíínndó ndasakáʼnundóña, ndi̱ku̱n taánna ndóʼó ini horno ña̱ xíxi̱. ¿Ta ndáa ndióxi̱ kuchiñu sakǎku ndóʼó nu̱úi̱?”.

16 Ta̱ Sadrac, ta̱ Mesac xíʼin ta̱ Abednego nda̱kuiinna yuʼú ta̱ rey: “Kǒo inka ña̱ kivi ka̱ʼa̱nndi̱ xíʼún xa̱ʼa̱ ña̱yóʼo táta rey Nabucodonosor. 17 Tá ná taún ndi̱ʼi̱ ini horno, Ndióxi̱ ta̱ ndásakáʼnundi̱ kiviva sakǎkura ndi̱ʼi̱, ta saátu va̱ása taxira ixandi̱va̱ʼún xíʼinndi̱. 18 Soo ni ná va̱ása keʼéra ña̱yóʼo táta rey, xíniñúʼu kunda̱a̱-iniún ña̱ va̱ása ndasakáʼnundi̱ ndióxi̱ún ta ni va̱ása ndasakáʼnundi̱ ña̱ʼa ña̱ oro ña̱ i̱xava̱ʼún”.

19 Tasaá ni̱sa̱a̱ní ta̱ Nabucodonosor xíʼin ta̱ Sadrac, ta̱ Mesac xíʼin ta̱ Abednego, ta kue̱ʼe̱kaví nda̱kotora nu̱úna. Ña̱kán xa̱ʼndara chiñu ña̱ u̱xa̱ka yichi̱ ná sasáa̱na horno. 20 Ta saátu xa̱ʼndara chiñu nu̱ú sava na̱ ta̱a na̱ ndakúní na̱ xíka nu̱ú ku̱a̱chi, ña̱ ná katúnna ta̱ Sadrac, ta̱ Mesac xíʼin ta̱ Abednego ta ná taánnana ini horno ña̱ xíxi̱.

21 Tasaá ka̱túnnana ta ta̱ánnana ini horno ña̱ xíxi̱, xi̱ndixina ti̱ko̱to̱ náni̱, xi̱ndóso ti̱ko̱to̱ so̱ko̱na, xi̱ndóso síni̱ ña̱ ku̱vaʼa xíʼin ti̱ko̱to̱ xi̱nína ta xi̱ndixina inkaka ti̱ko̱to̱. 22 Xa̱ʼa̱ ña̱ sáa̱ní ta̱ rey tá xa̱ʼndara chiñu ta xa̱ʼa̱ ña̱ sa̱sáa̱nína horno, na̱ ta̱a na̱ ta̱án ta̱ Sadrac, ta̱ Mesac xíʼin ta̱ Abednego ini horno ni̱xi̱ʼi̱vana chi ni̱xi̱xi̱na. 23 Soo ta̱ Sadrac, ta̱ Mesac xíʼin ta̱ Abednego núʼni ndaʼa̱na tá ni̱ko̱yona ini horno ña̱ xíxi̱.

24 Tasaá, ni̱yi̱ʼvíní ta̱ rey Nabucodonosor ta kamaní nda̱kundichira ta ni̱nda̱ka̱tu̱ʼunra na̱ chíñu náʼnu: “¿Á su̱ví u̱ni̱ kúú na̱ ta̱a na̱ ka̱túnyó ta ta̱ányó ini ñuʼu̱?”. Na̱yóʼo nda̱kuiinna yuʼú ta̱ rey: “U̱ni̱ kúúvana táta rey”. 25 Ta̱ rey ni̱ka̱ʼa̱nra: “Kotondó, ku̱mí kúú na̱ ta̱a xítoi̱ xíka ma̱ʼñú ñuʼu̱ káa ta va̱ása xíxi̱na, ta nda̱a̱ táki̱ʼva náʼa̱ se̱ʼe na̱ ndióxi̱ saá náʼa̱ iinra”.

26 Ta̱ Nabucodonosor ku̱yatinra yéʼé horno ña̱ xíxi̱ ta ka̱chira: “Sadrac, Mesac, Abednego, ndóʼó na̱ káchíñu nu̱ú Ndióxi̱ ta̱ káʼnu, keendó ta kixindó yóʼo”. Tasaá, ta̱ Sadrac, ta̱ Mesac xíʼin ta̱ Abednego ke̱ena ma̱ʼñú ñuʼu̱ kán. 27 Ta na̱ chíñu na̱ xi̱kiʼin kuenta xíʼin na̱ xi̱xaʼndachíñu, na̱ xi̱chindeétáʼan xíʼin na̱yóʼo, na̱ chíñu xíʼin na̱ xi̱kuumií chiñu ña̱ ndáyáʼvi nu̱ú ta̱ rey na̱ nda̱taka kán, xi̱nina ña̱ kǒo ña̱ níndoʼo na̱ ta̱a yóʼo xíʼin ñuʼu̱. Nda̱a̱ ni iin ixí* xi̱nína va̱ása níxi̱xi̱, tá íyo ti̱ko̱to̱na tá ta̱ánnana saá íyoña tá ke̱ena ta ni va̱ása níxi̱xaʼa̱n yi̱ʼma̱na.

28 Tasaá ni̱ka̱ʼa̱n ta̱ Nabucodonosor: “Ná ndukáʼnu Ndióxi̱ ta̱ Sadrac, ta̱ Mesac xíʼin ta̱ Abednego, chi chi̱ndaʼára iin ángel ta sa̱kǎkura na̱ káchíñu nu̱úra. Na̱yóʼo xi̱ndaa-ininara ta va̱ása níkandíxana chiñu ña̱ xa̱ʼndai̱, chi̱kaa̱-inina kuvina nu̱úka ña̱ ndasakáʼnuna inka ndióxi̱, chi iinlá Ndióxi̱ miína ndásakáʼnuna. 29 Ña̱kán xáʼndai̱ chiñu yóʼo: nda̱a̱ ndáaka na̱ yiví na̱ ke̱e ñuu válí á ñuu náʼnu, na̱ káʼa̱n xa̱a̱ síín síín tu̱ʼun, tá ná ka̱ʼa̱nna iin ña̱ va̱ása va̱ʼa xa̱ʼa̱ Ndióxi̱ ta̱ Sadrac, ta̱ Mesac xíʼin ta̱ Abednego, ná sakúachi válínana ta nu̱ú ku̱ʼu̱n na̱ yiví tatána nduu veʼena, saáchi kǒo inka ndióxi̱ ta̱ kivi sakǎku nda̱a̱ táki̱ʼva sáka̱ku ta̱yóʼo”.

30 Tándi̱ʼi, ta̱ rey ta̱xira iin chiñu ña̱ ndáyáʼvika ndaʼa̱ ta̱ Sadrac, ta̱ Mesac xíʼin ta̱ Abednego chí ñuu Babilonia.