Segundo ña̱ Reyes

6 Na̱ se̱ʼe na̱ profeta ni̱ka̱ʼa̱nna xíʼin ta̱ Eliseo: “Táñuní nu̱ú ndóoyó yóʼo. 2 Ixaún ña̱ ma̱ní taxi ná ku̱ʼu̱nndi̱ chí yu̱ta Jordán ta iin tá iinndi̱ ná ndukúndi̱ yitu̱n ta ixava̱ʼandi̱ iin veʼe nu̱ú kundoondi̱ kán”. Ta ta̱kán nda̱kuiinra: “Kúáʼanndó”. 3 Soo iin na̱yóʼo ni̱ka̱ʼa̱nna xíʼinra: “¿Á kivi loʼo ku̱ʼún xíʼinndi̱ táta?”. Ta ta̱yóʼo ni̱ka̱ʼa̱nra: “Va̱ʼa, ku̱ʼu̱nvai̱ xíʼinndó”. 4 Tasaá ku̱a̱ʼa̱nvara xíʼinna. Tá ni̱xa̱a̱na chí yu̱ta Jordán ki̱xáʼana xáʼndana yitu̱n. 5 Tá xáʼnda iin ta̱ ta̱a yóʼo iin yitu̱n, xi̱ní yáchara nda̱kavaña ini ti̱kui̱í tasaá ndeéní ni̱ka̱ʼa̱nra: “Ndáʼviníi̱ táta, ña̱ ta̱xitóovana ndaʼíi̱* kúúña”. 6 Tasaá, ta̱ Eliseo ta̱ káchíñu nu̱ú Ndióxi̱ ta̱ nda̱a̱ ni̱nda̱ka̱tu̱ʼunrara: “¿Ndáa míí nda̱kavaña?”. Ta ta̱kán ni̱na̱ʼa̱ra nu̱úra ndáa míí nda̱kavaña. Tasaá ta̱ Eliseo xa̱ʼndara iin yitu̱n, ta sa̱kánaranú kán tasaá nda̱kunúu xi̱ní yácha nu̱ú ti̱kui̱í. 7 Ta ni̱ka̱ʼa̱nra xíʼinra: “Taváña”. Ta ta̱yóʼo sa̱káara ndaʼa̱ra ta ta̱váraña.

8 Ta̱ rey ñuu Siria nda̱kiʼinra ku̱a̱ʼa̱nra kanitáʼanra xíʼin na̱ ñuu Israel. Na̱túʼun-táʼanra xíʼin na̱ káchíñu nu̱úra xa̱ʼa̱ ña̱yóʼo ta ka̱chira: “Yóʼo ku̱ʼu̱nyó kundooyó tándi̱ʼi saá ku̱ʼu̱nyó inka táʼví kundooyó”. 9 Tasaá ta̱ Eliseo ta̱ káchíñu nu̱ú Ndióxi̱ ta̱ nda̱a̱, chi̱ndaʼára na̱ ku̱a̱ʼa̱n ka̱ʼa̱n ña̱yóʼo xíʼin ta̱ rey ñuu Israel: “Kiʼún kuenta ta kǒo ya̱ʼún chí lugar káa saáchi chí káa va̱xi na̱ sirio”. 10 Tasaá ta̱ rey ñuu Israel chi̱ndaʼára na̱ ku̱a̱ʼa̱n ka̱ʼa̱n xíʼin na̱ ndóo nu̱ú ni̱ka̱ʼa̱n ta̱a ta̱ káchíñu nu̱ú Ndióxi̱ ta̱ nda̱a̱. Ta ta̱ Eliseo xi̱natúʼunra xíʼin ta̱ rey ndáa míí xi̱ndoo na̱ sirio ta ta̱ rey kǒo níxi̱yaʼara kán, ta ku̱a̱ʼá yichi̱ ke̱ʼéra ña̱yóʼo.

11 Ta̱ rey ñuu Siria ni̱sa̱a̱níra ta sa̱ndátakara na̱ káchíñu nu̱úra ta ni̱ka̱ʼa̱nra xíʼinna: “Natúʼunndó xíʼi̱n, ¿ndáa ndóʼó kítáʼan xíʼin ta̱ rey ñuu Israel?”. 12 Iin ta̱ káchíñu nu̱úra nda̱kuiinra: “Nda̱a̱ ni iinndi̱ táta rey, saáchi ta̱ Eliseo ta̱ kúú profeta ñuu Israel kúú ta̱ nátúʼun xíʼin ta̱ rey xa̱ʼa̱ ndiʼi ña̱ káʼún, nda̱a̱ ña̱ káʼún tá íyoún cuarto nu̱ú kísi̱ún”. 13 Ta ta̱ rey yóʼo ni̱ka̱ʼa̱nra: “Kúáʼanndó kotondó ndáa míí íyora ña̱ va̱ʼa chindaʼíi̱ na̱ ta̱a ña̱ ku̱ʼu̱nna tiinnara”. Tá ni̱ya̱ʼa loʼo na̱túʼunna xíʼinra: “Chí Dotán íyora”. 14 Ndi̱ku̱n chi̱ndaʼára na̱ yósó* kuáyi̱, chi̱ndaʼára carreta tú xáʼa̱n nu̱ú ku̱a̱chi xíʼin ku̱a̱ʼání na̱ soldado ñuu kán ta ni̱xa̱a̱na tá ñuú ta xi̱kundoona iníí sa̱táña.

15 Ya̱chi̱ní nda̱koo ta̱ káchíñu nu̱ú ta̱ Eliseo ta tá ki̱tara, xi̱nira ku̱a̱ʼání na̱ soldado na̱ yósó kuáyi̱ ta saátu carreta tú xáʼa̱n nu̱ú ku̱a̱chi ta ndóona iníí sa̱tá ñuu kán. Ta ndi̱ku̱n ni̱ka̱ʼa̱nra xíʼin ta̱ Eliseo: “Ndáʼviníyó táta, ¿ndáaña keʼéyó vitin?”. 16 Tasaá nda̱kuiinra yuʼúra: “Va̱ása yi̱ʼvíún. Saáchi ku̱a̱ʼáníkava kúú na̱ kítáʼan xíʼin miíyó nu̱úka na̱ kítáʼan xíʼin na̱ káa”. 17 Tasaá ki̱xáʼa ta̱ Eliseo káʼa̱nra xíʼin Ndióxi̱ ta ka̱chira: “Jehová, káʼa̱n-ndáʼvii̱ xíʼún ña̱ ná ndakunáún nu̱úra ña̱ va̱ʼa ná kotora ndáana íyo yóʼo”. Tasaá ndi̱ku̱n nda̱kuná Jehová nu̱ú ta̱ káchíñu nu̱ú ta̱ Eliseo, ta va̱ʼa xi̱nira ndiʼi na̱ íyo kán. Iníí yuku̱ ña̱ íyo sa̱tá ñuu nu̱ú ni̱xi̱yo ta̱ Eliseo chútúña xíʼin kuáyi̱ tí ñuʼu̱ ta saátu xíʼin carreta tú ñuʼu̱.

18 Tá ni̱xa̱a̱ na̱ sirio chí nu̱ú íyo ta̱ Eliseo, ta̱yóʼo ni̱ka̱ʼa̱nra xíʼin Jehová: “Ixaún ña̱ ma̱ní sakúáún nu̱ú na̱ soldado yóʼo”. Ña̱kán sa̱kúára nu̱úna nda̱a̱ táki̱ʼva ni̱ka̱ʼa̱n ta̱ Eliseo xíʼinra. 19 Tasaá ta̱ Eliseo ni̱ka̱ʼa̱nra xíʼinna: “Su̱ví yóʼo kúúña, su̱ví ñuu yóʼo kúúña. Kundiku̱nndó sa̱tái̱ ta ná ku̱ʼu̱nyó nu̱ú ta̱a ta̱ nándukúndó”. Soo ta̱yóʼo ni̱xa̱ʼa̱nra xíʼinna chí Samaria.

20 Tá ni̱xa̱a̱na chí Samaria, ta̱ Eliseo ni̱ka̱ʼa̱nra xíʼin Ndióxi̱: “Jehová, ndakuná nduchúnu̱úna ña̱ va̱ʼa ná kotona”. Ña̱kán nda̱kuná Jehová nduchúnu̱úna ta xi̱nina ña̱ ndóona ma̱ʼñú ñuu Samaria. 21 Ndi̱ku̱n tá xi̱ni ta̱ rey ñuu Israel na̱yóʼo ni̱ka̱ʼa̱nra xíʼin ta̱ Eliseo: “¿Á kaʼníi̱na táta? ¿Á kaʼníi̱na?”. 22 Tasaá ni̱ka̱ʼa̱nra xíʼinra: “Va̱ása kaʼníúnna. ¿Á xáʼnívaún na̱ ndákiʼún tá xáʼún nu̱ú ku̱a̱chi? Taxi si̱ta̱váʼa kuxuna ta saátu ti̱kui̱í koʼona ta taxi ná ndikóna nu̱ú ta̱ káchíñuna nu̱ú”. 23 Ña̱kán ke̱ʼéra iin vikó káʼnu ta na̱yóʼo xi̱xina ta xi̱ʼina. Tándi̱ʼi, chi̱ndaʼárana ña̱ ndikóna nu̱ú ta̱ káchíñuna nu̱ú. Ta na̱ sirio va̱ása níki̱ʼvikana nu̱ú ñuʼú na̱ ñuu Israel ña̱ kindaana ña̱ʼana.

24 Tándi̱ʼi ku̱u ndiʼi ña̱yóʼo, ta̱ Ben-Hadad ta̱ rey ñuu Siria sa̱ndátakara ndiʼi na̱ soldado ta ni̱xa̱ʼa̱nna xi̱kundoona sa̱tá ñuu Samaria. 25 Xa̱ʼa̱ ña̱kán ki̱xáʼa íyoní so̱ko chí Samaria. Ta xa̱ʼa̱ ña̱ xi̱ndoona sa̱tá ñuu yóʼo, xi̱ní iin burro xi̱ndaaña ki̱ʼva iin kilo* ña̱ plata ta loʼo kuití* si̱ʼví tí paloma xi̱ndaaña 60 gramo* ña̱ plata. 26 Tá ni̱ya̱ʼa ta̱ rey ñuu Israel ku̱a̱ʼa̱nra nu̱ú nama̱, iin ñá ñaʼá ndeéní ni̱ka̱ʼa̱nñá: “Táta rey chindeétáʼan xíʼinndi̱”. 27 Tasaá ta̱yóʼo ni̱ka̱ʼa̱nra xíʼinñá: “Tá va̱ása chíndeétáʼan Jehová xíʼún, ¿ndáa míí ku̱ʼi̱n kiʼii̱n ña̱ʼa ña̱ va̱ʼa chindeétáʼi̱n xíʼún? ¿Nu̱ú ndátivina trigo? ¿Nu̱ú íxava̱ʼana vino á aceite?”. 28 Ta̱ rey ni̱nda̱ka̱tu̱ʼunrañá: “¿Ndáaña ndóʼún?”. Ta ñáyóʼo nda̱kuiinñá: “Ñá ñaʼá yóʼo ni̱ka̱ʼa̱nñá xíʼi̱n: ‘Vitin ná kuxuyó se̱ʼún ta taa̱n kuxuyó se̱ʼi̱’. 29 Ña̱kán sa̱chíʼyo̱ndi̱* se̱ʼi̱ ta xi̱xindi̱ra. Tá inka ki̱vi̱ ni̱ka̱ʼi̱n xíʼinñá: ‘Taxi se̱ʼún ná kuxuyóra’, soo ñáyóʼo chi̱se̱ʼévañá se̱ʼeñá”.

30 Tá xi̱niso̱ʼo ta̱ rey ña̱ ni̱ka̱ʼa̱n ñá ñaʼá yóʼo nda̱tára ti̱ko̱to̱ra. Tasaá nda̱kundeéra ku̱a̱ʼa̱nra nu̱ú nama̱, ta na̱ yiví xi̱nina ña̱ ndíxira ti̱ko̱to̱ ndayí* chí ti̱xin ti̱ko̱to̱ra. 31 Tasaá ni̱ka̱ʼa̱nra: “Ndeéní ná koo castigo taxi Ndióxi̱ ndaʼíi̱ tá ná kǒo kaʼndai̱ xi̱ní ta̱ Eliseo se̱ʼe ta̱ Safat ki̱vi̱ vitin”.

32 Ta̱ Eliseo íyora veʼera ta kán ndóo na̱ níʼi yichi̱ nu̱ú na̱ ñuu* xíʼinra. Ta̱ rey chi̱ndaʼára iin ta̱a ku̱a̱ʼa̱n nu̱úra ta miíra ndíku̱nra ku̱a̱ʼa̱nra sa̱tára, soo tá kúma̱níka xa̱a̱ra, ta̱ Eliseo ni̱ka̱ʼa̱nra xíʼin na̱ níʼi yichi̱ nu̱ú na̱ ñuu: “¿Á ki̱ʼinndó kuenta ña̱ se̱ʼe ta̱ xáʼní kán chi̱ndaʼára iinna ña̱ kaʼndana xi̱níi̱? Xa̱a̱ koo tu̱ʼvandó tá ná kixaa̱ ta̱ chi̱ndaʼára, ndakasindó yéʼé ta kunditandó sa̱tá túyóʼo ña̱ va̱ʼa ná kǒo ndakunára, chi saátu ta̱ chi̱ndaʼá-ñaʼá ndíku̱nra va̱xira sa̱tára”. 33 Tá káʼa̱nka ta̱ Eliseo xíʼinna, ni̱xa̱a̱ ta̱a ta̱ chi̱ndaʼá ta̱ rey ta ta̱ rey ka̱chira: “Jehová kúú ta̱ ta̱xi tu̱ndóʼo yóʼo ndaʼa̱yó. ¿Ña̱kán nda̱chun kundatui̱ ña̱ chindeétáʼan Jehová xíʼinyó?”.