Isaías
14 Kundáʼvi-ini Jehová kunira ta̱ Jacob ta tuku ndaka̱xinra na̱ ñuu Israel. Taxira ná kundoona* nu̱ú ñuʼúra, ndakutáʼan na̱ inka ñuu xíʼinna ta kundoona xíʼin na̱ se̱ʼe ta̱ Jacob. 2 Ta na̱ ñuu Israel ndakiʼinna na̱yóʼo ta ku̱ʼu̱nna xíʼinna nu̱ú ke̱ena, ta nu̱ú ñuʼú ña̱ ta̱xi Jehová ndaʼa̱na kachíñundáʼvina nu̱ú na̱ ñuu Israel, ta taánna na̱ nda̱kasi miína veʼeka̱a ta kaʼndachíñuna nu̱ú na̱ xi̱ ixandi̱va̱ʼa xíʼinna tá xi̱kachíñuna.
3 Tá ná taxi Jehová ña̱ va̱ása xo̱ʼvi̱kandó* ta va̱ása ndi̱ʼika-inindó ta va̱ása kachíñundáʼvikandó, 4 kusi̱kindaandó ta̱ rey ñuu Babilonia ta ka̱ʼa̱nndó ña̱yóʼo:
“Kotondó ndáa ki̱ʼva ndi̱ʼi-xa̱ʼa̱ ta̱ xi̱ ixandi̱va̱ʼa xíʼin inkana ña̱ kachíñuna nu̱úra.
Kotondó, kǒo íxandi̱va̱ʼakara xíʼin inkana.
5 Jehová sa̱kánara yitu̱n tú xi̱xiniñúʼu na̱ ndi̱va̱ʼa-ini,
sa̱táʼnu̱ra karroti* na̱ xáʼndachíñu,
6 sa̱ndíʼi-xa̱ʼa̱ra na̱ xi̱kani na̱ ñuu,
na̱ kue̱ʼe̱ní na̱ xi̱ndiku̱n sa̱tá inkana ña̱ kaʼndachíñuna nu̱úna.
7 Vitin va̱ʼaní ndóo ndiʼi na̱ yiví.
Ndáʼyi̱ kóʼóna* xa̱ʼa̱ ña̱ kúsi̱í-inina.
8 Nda̱a̱ yitu̱n tú enebro kúsi̱í-ini xa̱ʼa̱ ña̱ ndo̱ʼún,
saátu tú cedro tú íyo chí Líbano.
Káʼa̱nnú ña̱yóʼo: ‘Nani tá ndi̱ʼi-xa̱ʼún, ta̱ʼán kixi nda̱a̱ ni iinna kaʼndana ndi̱ʼi̱’.
9 Tá nu̱ún ini Ya̱vi̱* nu̱ú ñúʼu na̱ ni̱xi̱ʼi̱, nda̱a̱ ña̱ xáʼní na̱ yiví nda̱kanda̱-iniña tá xi̱niña yóʼó kán.
Xa̱ʼa̱ yóʼó sandákáxíña-ini* na̱ ni̱xi̱ʼi̱ na̱ kǒo ndee̱,
sandákáxíña-ini ndiʼi na̱ ndi̱va̱ʼaní-ini na̱ níʼi yichi̱ nu̱ú na̱ yiví.
Sándaku̱ndichiña ndiʼi na̱ chíñu na̱ ndóo nu̱ú tayi̱ nu̱ú xáʼndachíñuna.
10 Ndiʼi na̱yóʼo kíxáʼana káʼa̱nna ña̱yóʼo xíʼún:
‘¿Á tá íyo ndi̱ʼi̱ saá íyoún vitin chi va̱ása kívi keʼún nda̱a̱ ni iin ña̱ʼa?
11 Ndi̱ʼi-xa̱ʼa̱ ña̱ ni̱nuní kúniún
ta va̱ása sákaʼakana yaa nu̱ún.
12 Nda̱a̱ chí ndiví ki̱taún nda̱kavaún
yóʼó ta̱ íyo nda̱a̱ táki̱ʼva íyo ki̱mi tí ndáye̱ʼe̱ tá xi̱ta̱a̱n.*
¿Nda̱chun nda̱kavaún nu̱ú ñuʼú,
yóʼó ta̱ ku̱chiñu sa̱ndíʼi-xa̱ʼa̱ ku̱a̱ʼání ñuu?
13 Ña̱yóʼo nda̱kani-iniún: ‘Ndai̱ chí ndiví.
Nda̱a̱ chí sa̱tá ki̱mi tí kúú kuenta Ndióxi̱ koi̱ kaʼndachíñui̱,
ta koi̱ sa̱tá yuku̱ nu̱ú ndásakáʼnuna Ndióxi̱,*
ña̱ xíkání kíndo̱o ña̱ ndíkaa̱ chí norte.
14 Ndai̱ chí sa̱tá vi̱kó;
ta koi̱ nda̱a̱ táki̱ʼva íyo Ndióxi̱ ta̱ káʼnuní’.
15 Soo sakánana yóʼó ini Ya̱vi̱* nu̱ú ñúʼu na̱ ni̱xi̱ʼi̱,
nu̱ú kúnúní ini ya̱vi̱ sakánana yóʼó.
16 Na̱ ná kuni yóʼó koto va̱ʼana nu̱ún;
Koto va̱ʼana ndáa ki̱ʼva íyoún ta kachina:
‘¿Á ta̱yóʼo kúú ta̱a ta̱ xi̱sakánda̱ ñuʼú,
ta̱ xi̱sayíʼvi ku̱a̱ʼání ñuu?
17 ¿Á ta̱yóʼo kúú ta̱ nda̱sa ñuʼú yóʼo nda̱a̱ táki̱ʼva íyo iin ñuʼú yi̱chí ta xi̱sandíʼi-xa̱ʼa̱ra ku̱a̱ʼání ñuu?
¿Á ta̱yóʼo kúú ta̱ xi̱ndakiʼin na̱ yiví na̱ inka ñuu
ta va̱ása níxi̱taxira ndikóna veʼena?’.
18 Ndiʼika na̱ rey viíní sa̱ndúxu̱nnana,
iin tá iinna ni̱ndu̱xu̱nna ini ya̱vi̱ ña̱ kúú kuenta miína.
19 Soo kǒo nísandúxu̱nna yóʼó ta sa̱kánana yóʼó,
táki̱ʼva kéʼéna xíʼin iin yitu̱n tú kúndasína xínina saá ke̱ʼéna xíʼún,
na̱ xa̱ʼnína xíʼin espada kúú na̱ ndóso sa̱táún,
na̱yóʼo kúú na̱ kóyo sa̱tá yu̱u̱ ña̱ ñúʼu ini iin ya̱vi̱,
yóʼó koún nda̱a̱ táki̱ʼva íyo na̱ ni̱xi̱ʼi̱, na̱ ni̱xa̱ñi̱ndosóna.*
20 Va̱ása ndu̱xu̱ún nu̱ú ni̱ndu̱xu̱n na̱yóʼo,
saáchi sa̱ndíʼi-xa̱ʼún ñuʼú miíún,
ta xa̱ʼníún na̱ ñuu miíún.
Va̱ása ndakaʼánkana xa̱ʼa̱ ki̱vi̱ na̱ ndi̱va̱ʼa-ini.
21 Ixatu̱ʼvandó iin lugar nu̱ú kaʼnína se̱ʼe ta̱yóʼo
kuvina xa̱ʼa̱ ku̱a̱chi na̱ táʼanna na̱ xi̱ndoo xi̱naʼá,
saá va̱ása ndundakúna ta ndakiʼinna ñuʼú
ta kutú ñuu nu̱úña ixaana”.
22 “Yi̱ʼi̱ kanitáʼan xíʼinna”, káchi Jehová ta̱ xáʼndachíñu nu̱ú na̱ ángel.
“Nda̱a̱ ni iinna va̱ása ndakaʼánka xa̱ʼa̱ ki̱vi̱ ñuu Babilonia, ni xa̱ʼa̱ ki̱vi̱ na̱ ná kindo̱o ñuu yóʼo, ni xa̱ʼa̱ na̱ se̱ʼena ni xa̱ʼa̱ na̱ kooka chí nu̱únínu”, káchi Jehová.
23 “Taxii̱ ná kundoo tí puercoespín nu̱ú ña̱yóʼo, sandákutúi̱ ti̱kui̱í nu̱úña ta sandíʼi-xa̱ʼíi̱ña”, káchi Jehová ta̱ xáʼndachíñu nu̱ú na̱ ángel.
24 Jehová ta̱ xáʼndachíñu nu̱ú na̱ ángel chi̱naʼára* ña̱yóʼo:
“Nda̱a̱ táki̱ʼva ni̱ka̱ʼi̱n kuuña saá kuuvaña,
ta ña̱ nda̱kaxii̱n keʼíi̱ xi̱nuvaña.
25 Sandíʼi-xa̱ʼíi̱ na̱ ñuu Asiria nu̱ú ñuʼíi̱
ta ku̱a̱ñi̱ndosói̱na chí yuku̱.
Kindai̱ yókóna* sa̱tá na̱ ñui̱
ta va̱ása kundisokana ña̱ʼa na̱yóʼo”.
26 Ña̱yóʼo kúú ña̱ kundoʼo iníísaá ñuʼú,
ña̱yóʼo kúú ndee̱ Ndióxi̱ ña̱ kuniñúʼura ña̱ taxira castigo ndaʼa̱ ndiʼi na̱ ñuu.
27 Saáchi Jehová ta̱ xáʼndachíñu nu̱ú na̱ ángel xa̱a̱ chi̱kaa̱-inira keʼéra ña̱yóʼo,
¿ta ndáana kuchiñu kasi nu̱úra ña̱ keʼéra ña̱yóʼo?
Tá ná kuniñúʼu Ndióxi̱ ndee̱ra ña̱ taxira castigo,
¿ndáana kivi kasi nu̱úra ña̱ keʼéra ña̱yóʼo?
28 Ku̱i̱ya̱ ña̱ ni̱xi̱ʼi̱ ta̱ rey Acaz, Ndióxi̱ chi̱ndaʼára tu̱ʼun yóʼo:
29 “Ndóʼó na̱ ñuu Filistea va̱ása kusi̱í-inindó
xa̱ʼa̱ ña̱ ni̱ta̱ʼnu̱ karroti ta̱ xi̱kani ndóʼó.
Saáchi ini ndi̱vi̱ tí ko̱o̱ kita iin ko̱o̱ tí kue̱ʼe̱,*
ta se̱ʼe tíyóʼo kue̱ʼe̱ní koorí ta kamaní koorí.
30 Se̱ʼenu̱ú na̱ nda̱ʼví kuxuna
ta va̱ása kundi̱ʼi-inina tá ná ku̱su̱nna,
soo kaʼníi̱ na̱ ñuún xíʼin so̱ko,
ta kuvi na̱ ná kindo̱o.
31 Nda̱ʼyi̱ kóʼó ndóʼó na̱ íyo chí yéʼé.
Nda̱ʼyi̱ kóʼó ndóʼó na̱ íyo chí ñuu.
Ndiʼi ndóʼó na̱ íyo chí Filistea ndakava-inindó.
Saáchi nda̱a̱ chí norte ke̱e na̱ soldado va̱xina
ta táki̱ʼva va̱xi yi̱ʼma̱ saá va̱xina,
inkáchi kítáʼan ndiʼina va̱xina ta kǒo na̱ kíndo̱o chí sa̱tá”.
32 ¿Ndáaña ka̱ʼa̱nna xíʼin na̱ chi̱ndaʼá na̱ ñuu?
Ka̱ʼa̱nna xíʼinna, Jehová kúú ta̱ chi̱ndúʼú xa̱ʼa̱ yuku̱ Sion,
ta na̱ nda̱ʼví na̱ ñuura kúú na̱ kundoo kán.