Isaías
13 Ña̱yóʼo kúú visión ña̱ xi̱ni ta̱ Isaías se̱ʼe ta̱ Amoz xa̱ʼa̱ ña̱ va̱ása va̱ʼa ña̱ kundoʼo na̱ ñuu Babilonia:
2 “Xi̱ní iin xi̱kí ña̱ yu̱u̱ kanindichindó iin yitu̱n tú kuni ndiʼina.
Kanandóna, kaka ndaʼa̱ndó nu̱úna,
ña̱ va̱ʼa ná ki̱ʼvina nu̱ú kíʼvi na̱ ta̱a na̱ ndáyáʼvi.
3 Xa̱ʼndai̱ chiñu nu̱ú na̱ nda̱kaxii̱n.*
Ña̱ va̱ʼa na̱ʼi̱ ña̱ sái̱, sa̱ndátakai̱ na̱ soldadoi̱,
ta na̱yóʼo kúsi̱íkaví-inina ta kúta̱akaví-inina.
4 Kuniso̱ʼondó. Níʼiní chí yuku̱.
Táki̱ʼva níʼi ña̱ íyo iin ñuu ña̱ káʼnuní saá níʼi.
Kuniso̱ʼondó. Ndeéní níʼi íxaa ndiʼi na̱ ñuu na̱ íyo nu̱ú ñuʼú,
ndeéní níʼi íxaa ndiʼi na̱ yiví na̱ xa̱a̱ síín síín ñuu na̱ nda̱taka.
Jehová ta̱ xáʼndachíñu nu̱ú na̱ ángel, sa̱ndátakara na̱ soldado ña̱ ku̱ʼu̱nna kanitáʼanna.
5 Nu̱ú iin ñuʼú ña̱ xíkání ndíkaa̱,
ña̱ ndíkaa̱ nda̱a̱ nu̱ú ndíʼi ndiví,
ki̱ta Jehová va̱xira xíʼin na̱yóʼo
ña̱ sandíʼi-xa̱ʼa̱na iníísaá ñuʼú yóʼo.
6 Kuakundó, saáchi xa̱a̱ ku̱yatin ki̱vi̱ Jehová.
Tá ná kixaa̱ ki̱vi̱ yóʼo, ta̱ kúúmií ndiʼi ndee̱, sandíʼi-xa̱ʼa̱ra ndóʼó.
7 Xa̱ʼa̱ ña̱kán, yi̱ʼvíníndó
ta kuvitá ndaʼa̱ndó.
8 Ndóʼó yi̱ʼvíníndó.
Kundi̱ʼiní-inindó ta xo̱ʼvi̱níndó,*
nda̱a̱ táki̱ʼva xóʼvi̱ iin ñaʼá tá káku se̱ʼeñá.
I̱yokaví ndakotondó nu̱ú táʼanndó,
ta kunaʼa̱ nu̱úndó ña̱ ndíʼi̱ní-inindó.
9 Kotondó, xa̱a̱ va̱xi ki̱vi̱ Jehová,
ki̱vi̱ saá, va̱ása kundáʼvi-inira kunira nda̱a̱ ni iinndó ta sa̱a̱níra xíʼinndó,
ta sandíʼi-xa̱ʼa̱ra ñuʼú yóʼo
ta saátu sandíʼi-xa̱ʼa̱ra na̱ kíʼvi ku̱a̱chi na̱ íyo nu̱úña.
10 Saáchi ki̱mi tí íyo chí ndiví ta saátu ndiʼi tiʼvi tíyóʼo,
va̱ása kutuu̱nkarí;
kunaa ñu̱ʼu* tá ná kitaña
ta va̱ása kutuu̱nka yo̱o̱.
11 Ndukúi̱ kuenta nu̱ú na̱ íyo nu̱ú ñuʼú yóʼo xa̱ʼa̱ ña̱ ndi̱va̱ʼaní-inina,
ta ndukúi̱ kuenta nu̱ú na̱ ndi̱va̱ʼaní-ini xa̱ʼa̱ ku̱a̱chi ña̱ ni̱ki̱ʼvina.
Sakúkaʼi̱n nu̱ú na̱ kúta̱aní-ini
ta sakúkaʼi̱n nu̱ú na̱ ni̱nuní kúni.
12 Loʼoní koo na̱ ta̱a nda̱a̱ táki̱ʼva loʼoní kúú oro ña̱ va̱ʼa,
ta loʼoní koo na̱ yiví nda̱a̱ táki̱ʼva loʼoní kúú oro ña̱ íyo chí Ofir.
13 Yi̱ʼi̱ Jehová, ta̱ xáʼndachíñu nu̱ú na̱ ángel,
sakísii̱ ndiví ta xa̱ʼa̱ ña̱ sáa̱níi̱, kisi ñuʼú,
ta kitaña nu̱ú íyoña.
14 Nda̱a̱ táki̱ʼva kéʼé yusu* tí kamaní xínu nu̱ú na̱ kúni̱ tiinrí, nda̱a̱ táki̱ʼva kéʼé tí ndikachi* tá kǒo ta̱ ndáarí,
saá keʼé iin tá iinndó, ndikóndó ñuundó;
iin tá iinndó kunundó ku̱ʼu̱nndó nu̱ú ñuʼúndó.
15 Tá ná ndani̱ʼína ndóʼó, kaʼnína ndóʼó xíʼin lanza,
tá ná tiinna ndóʼó, kaʼnína ndóʼó xíʼin espada.
16 Kuninu̱úndó tá ná sakúachi na̱ sáa̱-ini xíni ndóʼó na̱ se̱ʼendó,
ndakiʼinna ña̱ʼa ña̱ íyo veʼendó
ta tiin tuúnna* ñá síʼindó.
17 Chindaʼíi̱ na̱ ñuu Media ña̱ ku̱ʼu̱nna kanitáʼanna xíʼinndó,
nu̱ú na̱yóʼo va̱ása ndáyáʼviví plata
ni va̱ása kúsi̱í-inina xíʼin oro.
18 Xíʼin kuxu̱n kaʼnína na̱ va̱lí kúa̱an;
na̱yóʼo va̱ása kundáʼvi-inina kunina na̱ lée ni na̱ va̱lí.
19 Ta ñuu Babilonia, ña̱ ndáyáʼviníka nu̱ú ndiʼika ñuu,
ñuu ña̱ liviní ña̱ kúta̱aní-ini na̱ caldeo xíʼin,
kundoʼoña nda̱a̱ táki̱ʼva ndo̱ʼo Sodoma xíʼin Gomorra tá sa̱ndíʼi-xa̱ʼa̱ Ndióxi̱ ña̱yóʼo.
20 Nda̱a̱ ni iin ki̱vi̱ va̱ása ndikó na̱ yiví kundoona ñuu yóʼo,
nda̱a̱ ni iinna va̱ása kundoo nu̱úña.
Nda̱a̱ ni iin na̱ árabe va̱ása kanindichina veʼe loʼona nu̱ú ñuʼú yóʼo
ta na̱ ndáa ndikachi, va̱ása ku̱ʼu̱nna xíʼin ndikachi sa̱na̱na nu̱ú ñuʼú yóʼo.
21 Kití yukú tí íyo nu̱ú ñuʼú yi̱chí kúú tí kundoo kán;
ta ndakutú kalakoko* ini veʼe kán.
22 Kití yukú kúú tí nda̱ʼyi̱ ini veʼe súkun,
ta ini veʼe ña̱ liviní nu̱ú xi̱xaʼndachíñuna, ti̱na* yukú* nda̱ʼyi̱ iniña.
Xa̱a̱ ku̱yatin ki̱vi̱ ña̱ ndiʼi-xa̱ʼa̱ña ta ndáa si̱lóʼo ki̱vi̱ kíndo̱o”.