Isaías
57 Ndi̱ʼi-xa̱ʼa̱ na̱ nda̱kú-ini,
ta kǒoví na̱ ndíʼi̱-ini xa̱ʼa̱ ña̱yóʼo.
Xáʼnína na̱ ta̱a na̱ nda̱kú-ini,
soo nda̱a̱ ni iinna va̱ása níkiʼin kuenta ña̱ ni̱xi̱ʼi̱ na̱ nda̱kú-ini
ta va̱ása níxinina tu̱ndóʼo.
2 Na̱yóʼo va̱ása ndíʼi̱ka-inina.
Ndiʼi na̱ ke̱ʼé ña̱ nda̱kú, ndákindee̱na ya̱vi̱ nu̱ú ni̱ndu̱xu̱nna.*
3 “Soo kuyatin ndóʼó na̱ se̱ʼe ñá kéʼé ña̱ tási,
se̱ʼe ta̱ kéʼé ña̱ kini,* se̱ʼe iin ñá kísi̱ xíʼin ku̱a̱ʼá ta̱a.
4 ¿Ndáana kúsi̱kindaandó?
¿Ndáana ndándikandó yuʼúndó nu̱ú ta távándó yáa̱ndó* nu̱úna?
¿Á su̱ví se̱ʼe na̱ ku̱a̱kiʼvi ku̱a̱chi kúúndó?
¿Á su̱ví se̱ʼe na̱ káʼa̱n ña̱ vatá* kúúndó?
5 ¿Á su̱ví ndóʼó kúú na̱ xi̱kuni̱ní ku̱su̱n xíʼin inkana ma̱ʼñú yitu̱n náʼnu,
xa̱ʼa̱ ndiʼi yitu̱n tú kóʼo̱ní ndaʼa̱?
¿Á su̱ví ndóʼó kúú na̱ xáʼní se̱ʼe chí yoso̱
chí nu̱ú ni̱nda̱ta̱ yu̱u̱?
6 Ta vitin, ndaka̱xinndó ndióxi̱ndó ña̱ ku̱vaʼa xíʼin yu̱u̱,
ta yu̱u̱ yóʼo kúú ña̱ ndakiʼinndó koo herenciandó.
Sóko̱ndó nduta̱ nu̱ú* ña̱yóʼo ta táxindó ña̱ʼa ndaʼa̱ña.
¿Á xíniñúʼu kusi̱í-inii̱ xíʼin ña̱yóʼo?
7 Xi̱ní iin yuku̱ súkun i̱xatu̱ʼvandó xi̱tondó
ta nda̱andó kán ña̱ so̱kóndó ña̱ʼa.
8 Sa̱tá yéʼéndó ta saátu sa̱tá yitu̱n tú tíin yéʼéndó,
ka̱nindichindó iin ña̱ʼa ña̱ sandákaʼán ndóʼó xa̱ʼa̱ ña̱ʼa ña̱ ndásakáʼnundó.
Sa̱ndákoondó yi̱ʼi̱ ta ta̱vá ndiʼindó ti̱ko̱to̱ndó;
nda̱andó ta sa̱kútaʼandó ña̱ʼa nu̱ú xi̱tondó.
Ke̱ʼéndó iin trato xíʼin ña̱kán.
Xi̱kutóoníndó inkáchi ku̱su̱nndó xíʼinña nu̱ú xi̱to,
ta xi̱xitondó kaʼá na̱ ta̱a nu̱ú tátálásana.*
9 Níʼindó aceite xíʼin ku̱a̱ʼání perfume ni̱xa̱ʼa̱nndó nu̱ú ta̱ Mélec.*
Xíkání chi̱ndaʼándó na̱ ku̱a̱ʼa̱n xíʼin tu̱ʼunndó
ta nu̱undó ini Ya̱vi̱* nu̱ú ñúʼu na̱ ni̱xi̱ʼi̱.
10 Ku̱naandó ni̱xi̱kandó nu̱ú ku̱a̱ʼání yichi̱
soo va̱ása níka̱ʼa̱nndó ‘Su̱ví ña̱ ndáyáʼvi kúúña’.
Nda̱kiʼinndó ndee̱ndó,
ña̱kán kǒo níndakava-inindó.*
11 ¿Ndáana kúú na̱ ni̱yi̱ʼvíníndó xi̱nindó
ña̱kán ni̱ka̱ʼa̱nndó ña̱ vatá?
Va̱ása níndakaʼánndó xa̱ʼíi̱.
Ta va̱ása níndi̱ʼi-inindó xa̱ʼa̱ nda̱a̱ ni iin ña̱ʼa.
Xa̱ʼa̱ ña̱ va̱ása níka̱ʼi̱n ta kǒo níkiʼi̱n kuenta xíʼin ña̱ ke̱ʼéndó,
ndóʼó va̱ása níyi̱ʼvíndó kunindó yi̱ʼi̱.
12 Taxii̱ ná kunda̱a̱-inina xa̱ʼa̱ ku̱a̱chindó, saátu xa̱ʼa̱ ña̱ ke̱ʼéndó
ta kǒo ña̱ va̱ʼa ndakiʼinndó xa̱ʼa̱ ña̱yóʼo.
13 Tá ná nda̱ʼyi̱ kóʼóndó* ta ndukúndó na̱ chindeétáʼan xíʼinndó,
ndiʼi ña̱ʼa ña̱ ndásakáʼnundó va̱ása sakǎkuña ndóʼó.
Ku̱ʼu̱n ndiʼi ña̱yóʼo xíʼin ta̱chí,
xíʼin ta̱chí yuʼú kuití na̱ yiví ndachíña,
soo na̱ ndáa-ini yi̱ʼi̱, ndakiʼinna ñuʼú yóʼo ta kundoona nu̱úña
ki̱ʼvina kundoona nu̱ú yuku̱i̱ ña̱ yi̱i̱.
14 Ta ka̱ʼa̱nna: ‘Keʼéndó iin yichi̱, keʼéndóña. Ndasaviíndó yichi̱.
Sakútaʼandó ña̱ʼa ña̱ kivi kasi yichi̱ nu̱ú ku̱a̱ʼa̱n na̱ ñui̱’”.
15 Saáchi ña̱yóʼo kúú ña̱ káʼa̱n ta̱ súkunní íyo,
ta̱ táku ndiʼi tiempo ta ña̱ yi̱i̱ kúú ki̱vi̱ra:
“Yi̱ʼi̱ íyoi̱ nu̱ú súkun, nu̱ú yi̱i̱
soo saátu íyoi̱ xíʼin na̱ ndákava-ini ta saátu na̱ vitá-ini,
ña̱ va̱ʼa chikai̱ ndee̱ xíʼin na̱ vitá-ini,
ña̱ va̱ʼa ndasandakúi̱-ini na̱ nda̱kava-ini.
16 Saáchi su̱ví ndiʼiví tiempo koi̱ contra xíʼinna ni su̱ví ndiʼiví tiempo sa̱íi̱ xíʼinna;
chi tá saá ná keʼíi̱ kuvitávana nu̱úi̱ ta va̱ása kooka ndee̱na;
kuvitá na̱ yiví na̱ i̱xava̱ʼi̱.
17 Ni̱sa̱íi̱ xa̱ʼa̱ ku̱a̱chi ña̱ ni̱ki̱ʼvina xa̱ʼa̱ ña̱ sándaʼvina ta kíʼinna xu̱ʼún,
ña̱kán ka̱nii̱na ta xa̱ʼa̱ ña̱ sáa̱níi̱ chi̱se̱ʼíi̱ nu̱úi̱ nu̱úna.
Soo na̱yóʼo kǒo nísandákoona ña̱ ixaso̱ʼona ta xi̱keʼéna ña̱ xi̱kuni̱ miína.
18 Xi̱nii̱ ña̱ kéʼéna soo sandáʼi̱na ta kuniʼii̱ yichi̱ nu̱úna
sandíko tukui̱ inina ta saátu sandíkoi̱-ini na̱ kúsuchí-ini xíʼinna”.
19 “Chindeétáʼi̱n xíʼinndó ña̱ ndasakáʼnundó yi̱ʼi̱.
Ndóʼó na̱ íyo xíká xíʼin na̱ íyo yatin, va̱ʼaní kundoondó ta kǒo ña̱ sandíʼi̱-inindó
ta yi̱ʼi̱ sandáʼa ndóʼó”, káchi Jehová.
20 “Soo na̱ ndi̱va̱ʼa-ini íyona nda̱a̱ táki̱ʼva íyo tá mar tá ndeéní kánda̱ nu̱ú
tá tává yu̱ku̱* ña̱ ñúʼu inirá ta saátu nda̱ʼyi̱.
21 Nina na̱ ndíʼi̱-ini kúú na̱ ndi̱va̱ʼa-ini”, káchi Ndióxi̱ miíi̱.