Isaías
2 Ña̱yóʼo kúú ña̱ xi̱ni ta̱ Isaías se̱ʼe ta̱ Amoz xa̱ʼa̱ ñuu Judá xíʼin Jerusalén:
2 Ki̱vi̱ so̱ndíʼi, yuku̱ nu̱ú níndichi veʼe Jehová
tuunní kundichiña xi̱ní yuku̱
ta súkunka kooña nu̱ú ndiʼika xi̱kí,
ta yóʼo ku̱ʼu̱n ndiʼi na̱ ñuu.
3 Ku̱a̱ʼánína ku̱ʼu̱nna yóʼo ta kachina:
“Ná ku̱ʼu̱nyó ta ná ndaayó yuku̱ nu̱ú íyo veʼe Jehová,
veʼe Ndióxi̱ ta̱ Jacob.
Sanáʼa̱ra yichi̱ra nu̱úyó ta kakayó yichi̱ra”.
Saáchi chí Sion kana ley,
ta tu̱ʼun Jehová kanaña chí Jerusalén.
4 Miíra kúú ta̱ ndatiin ku̱a̱chi xíʼin na̱ ñuu
ta ndasaviíra ku̱a̱chi ña̱ kúúmiína.
Espadana, ndasanaña ya̱ta̱
ta lanzana, ndasanaña kiʼí.
Ndiʼi na̱ ñuu va̱ása kanitáʼankana xíʼin espada
ni va̱ása sakúaʼakana ku̱ʼu̱nna nu̱ú ku̱a̱chi ña̱ kanitáʼanna.
5 Ndóʼó na̱ veʼe ta̱ Jacob,
ná kakayó nu̱ú túun Jehová ñuʼu̱.
6 Saáchi yóʼó sa̱ndákoún na̱ ñuún na̱ veʼe ta̱ Jacob,
chi ndíku̱nna costumbre na̱ ndóo chí Oriente;
kéʼéna magia nda̱a̱ táki̱ʼva kéʼé na̱ filisteo
ta ku̱a̱ʼání se̱ʼe na̱ inka ñuu ndóo xíʼinna.
7 Ñuuna chu̱túña xíʼin plata ta saátu xíʼin oro,
ku̱a̱ʼání ña̱ ku̱i̱ká kúúmiína.
Ku̱a̱ʼání kuáyi̱ íyo ñuuna
ta ku̱a̱ʼání carreta kúúmiína.
8 Ñuuna chu̱túña xíʼin ndióxi̱ ña̱ va̱ása ndáyáʼvi.
Kúxítína nu̱ú ña̱ʼa ña̱ i̱xava̱ʼa miína,
nu̱ú ña̱ i̱xava̱ʼa miína xíʼin ndaʼa̱na.
9 Na̱ ta̱a kúxítína ta sákukaʼanna nu̱úna,
ta va̱ása kívi ixakáʼnu-iniún xa̱ʼa̱na.
10 Ki̱ʼvindó ti̱xin yu̱u̱ ta koose̱ʼéndó* ti̱xin yáká*
xa̱ʼa̱ ña̱ ndeéní sáa̱ Jehová,
xa̱ʼa̱ ña̱ íyoní ndee̱ra.
11 Na̱ ni̱nuní kúni ndakundeena*
ta na̱ kúta̱aní-ini kukaʼan nu̱úna.
Iinlá Jehová kúú ta̱ ndukáʼnu ki̱vi̱ saá.
12 Saáchi ki̱vi̱ Jehová ta̱ xáʼndachíñu nu̱ú na̱ ángel kúúña.
Ta va̱xira ña̱ taxira castigo ndaʼa̱ ndiʼi na̱ ni̱nuní kúni xíʼin na̱ kúta̱aní-ini,
taxira castigo ndaʼa̱ ndiʼina, ni ndáyáʼvina á va̱ása ndáyáʼvina.
13 Taxira castigo ndaʼa̱ ndiʼi yitu̱n tú cedro tú íyo chí Líbano tú súkunní,
saátu taxira castigo ndaʼa̱ ndiʼi yitu̱n tú naní roble tú íyo chí Basán,
14 taxira castigo ndaʼa̱ ndiʼi yuku̱ súkun
ta saátu ndaʼa̱ ndiʼi xi̱kí súkun,
15 taxira castigo ndaʼa̱ ndiʼi veʼe ña̱ súkun
ta saátu ndiʼi nama̱ ña̱ kútu̱ní ku̱vaʼa,
16 taxira castigo ndaʼa̱ ndiʼi barco tú Tarsis*
ta saátu ndaʼa̱ ndiʼi barco tú va̱ʼaní náʼa̱.
17 Ta̱a ta̱ ni̱nuní kúni ndakundeera,
ta̱ kúta̱aní-ini kukaʼan nu̱úra.
Iinlá Jehová kúú ta̱ ndukáʼnu ki̱vi̱ saá.
18 Ndiʼi-xa̱ʼa̱ ndióxi̱ na̱ va̱ása ndáyáʼvi.
19 Ta na̱ yiví ki̱ʼvina ti̱xin kavá,
ki̱ʼvina ti̱xin ya̱vi̱ ña̱ íyo nu̱ú ñuʼú,
xa̱ʼa̱ ña̱ ndeéní sáa̱ Jehová,
xa̱ʼa̱ ña̱ íyoní ndee̱ra,
tá ná sakándara ñuʼú, yi̱ʼvíní na̱ yiví.
20 Ki̱vi̱ saá, na̱ ta̱a kiʼinna ndióxi̱na ña̱ kǒo ndáyáʼvi ña̱ ku̱vaʼa xíʼin plata saátu xíʼin oro,
ña̱ ke̱ʼéna ña̱ kuxítína nu̱úña,
ta sakánanaña nu̱ú tí musaraña* xíʼin tí chináká,
21 ña̱ va̱ʼa koose̱ʼéna ini kavá
ta saátu ti̱xin yu̱u̱ náʼnu,
xa̱ʼa̱ ña̱ ndeéní sáa̱ Jehová,
xa̱ʼa̱ ña̱ íyoní ndee̱ra,
tá ná sakándara ñuʼú, yi̱ʼvíní na̱ yiví.
22 Xa̱ʼa̱ ña̱ va̱ʼa miíndó, va̱ása kundaaka-inindó na̱ yiví,
kuxíkándó nu̱úna chi ta̱chí kuitíva ndákiʼinna ña̱ va̱ʼa tákuna.
¿Nda̱chun xíniñúʼu kundaa-inindó na̱yóʼo?