Isaías
32 Kotondó. Nda̱kúní kaʼndachíñu iin rey,
ta na̱ kúúmií chiñu ña̱ ndáyáʼvi nda̱kúní kaʼndachíñuna.
2 Ta iin tá iin na̱yóʼo koona nda̱a̱ táki̱ʼva íyo nu̱ú xíyo sávína
tá ndeéní káni ta̱chí,
nu̱ú kivi koo sávína tá ndeéní kúun sa̱vi̱,
koona nda̱a̱ táki̱ʼva íyo yu̱ta tá íyo nu̱ú ñuʼú yi̱chí,
koona nda̱a̱ táki̱ʼva íyo iin ku̱nda̱ti̱* ña̱ táxi yu̱u̱ káʼnu nu̱ú iin ñuʼú yi̱chí.
3 Tasaá na̱ va̱ʼa xíto, káxika kotona,
ta na̱ va̱ʼa xíniso̱ʼo, káxika kuniso̱ʼona.
4 Tasaá, na̱ kǒo ndákanixi̱ní xíʼin ña̱ kéʼéna, ndakanivaxi̱nína xa̱ʼa̱ ña̱ sákuaʼana
ta na̱ kǒo kívi ka̱ʼa̱n va̱ʼa, kama ka̱ʼa̱nna ta káxi ka̱ʼa̱nna.
5 Va̱ása ka̱ʼa̱nkana xíʼin ta̱ kíʼví ña̱ va̱ʼaní-inira,
ta va̱ása ka̱ʼa̱nkana xíʼin ta̱a ta̱ sándaʼvi ña̱ va̱ʼaní ta̱a kúúra;
6 saáchi ta̱ kíʼví ka̱ʼa̱nra nina ña̱ kíʼví
ta nina ña̱ va̱ása va̱ʼa ndakani-inira keʼéra,
chikaa̱ra-ini inkana ña̱ ku̱ʼu̱nna contra Ndióxi̱ ta ka̱ʼa̱nna ña̱ vatá* xa̱ʼa̱ Jehová,
tasaá va̱ása kuxu na̱ xíʼi̱ so̱ko̱
ta na̱ kúni̱ koʼo ti̱kui̱í va̱ása koʼona ti̱kui̱í.
7 Va̱ása va̱ʼa íyo ña̱ kéʼé ta̱a ta̱ sándaʼvi;
chíkaa̱ra-ini inkana ña̱ keʼéna ña̱ kaʼan nu̱ú
ta káʼa̱nra ña̱ vatá ña̱ va̱ʼa saxóʼvi̱ra* na̱ nda̱ʼví,
ni ña̱ ndixava kúú ña̱ káʼa̱nna.
8 Soo na̱ va̱ʼa-ini, kúni̱na va̱ʼa koo inina xíʼin inkana
ta chíkaa̱na ndee̱ ña̱ va̱ʼa koo inina xíʼin inkana.
9 “Ndóʼó ná ñaʼá ná kǒo ndíʼi̱-ini, ndakunditandó ta kuniso̱ʼondó ña̱ ka̱ʼi̱n.
Ndóʼó ná ñaʼá válí, ná va̱ása ndíʼi̱-ini, viíní kuniso̱ʼondó ña̱ ka̱ʼi̱n.
10 Tá ná ya̱ʼa iin ku̱i̱ya̱, ndóʼó ná va̱ása ndíʼi̱-ini, yi̱ʼvíndó,
saáchi tá ná ndiʼi tiempo ña̱ ndakayana uva, kǒorí ndakayandó.
11 Ndóʼó ná ñaʼá ná va̱ása ndíʼi̱-ini, kisindó xa̱ʼa̱ ña̱ yíʼvindó.
Ndóʼó ná va̱ása ndíʼi̱-ini, yi̱ʼvíndó.
Tavándó ti̱ko̱to̱ ña̱ ndíxindó
ta katúnndó ti̱ko̱to̱ ndayí* tokóndó.
12 Kanindó kándíkandó xa̱ʼa̱ ña̱ kúsuchí-inindó
xa̱ʼa̱ ñuʼúndó nu̱ú ni̱xi̱yo ku̱i̱ʼi ta saátu xa̱ʼa̱ tú uvandó tú va̱ʼaní xi̱taxi ku̱i̱ʼi.
13 Saáchi ndakutú tú iñú nu̱ú ñuʼú na̱ ñui̱;
ndakutúña veʼe nu̱ú kúsi̱í-inina,
saá kundoʼo ñuu ña̱ ni̱nuní kúni.
14 Saáchi veʼe súkun ña̱ kútu̱ní ndási, kindo̱o miíña;
kindo̱o mií ñuu nu̱ú xuxanní yuʼúna.
Xi̱kí ña̱ Ofel xíʼin veʼe súkun nu̱ú ndáana, kindo̱o miíña ndiʼi tiempo,
ta va̱ʼakaví kuni burro yukú kundoorí yóʼo,
ta koo ku̱ʼu̱ ña̱ kixáʼan* ndikachi,*
15 nda̱a̱ ná taxi Ndióxi̱ espíritu ndaʼa̱yó, ña̱ va̱xi chí ndiví
ta ñuʼú yi̱chí nduuña nu̱ú chíʼina
ta nu̱ú chíʼina nduuña iin yuku̱.
16 Tasaá nina ña̱ nda̱kú keʼé na̱ yiví nu̱ú ñuʼú yi̱chí
ta nina ña̱ nda̱kú keʼéna nu̱ú chíʼina.
17 Ta xa̱ʼa̱ ña̱ keʼéna ña̱ nda̱kú, va̱ʼaní kundoona,
va̱ása kundi̱ʼi-inina ta va̱ʼaní kundoona ndiʼi tiempo xa̱ʼa̱ ña̱ nda̱kúní koo ña̱ keʼéna.
18 Na̱ ñui̱ kundoona nu̱ú kǒo ku̱a̱chi koo,
va̱ása kundi̱ʼi-inina kundoona veʼena ta táxi̱nní koo nu̱ú ndakindee̱na.
19 Soo ñíí,* sandíʼi-xa̱ʼa̱ña yuku̱,
ta ndiʼi-xa̱ʼa̱ ndiʼi ñuu.
20 Kusi̱í-ini ndiʼi ndóʼó na̱ chíʼi nu̱ú ñúʼu ti̱kui̱í,
kusi̱í-inindó tá sáñándó si̱ndi̱ki̱ xíʼin burro sa̱na̱ndó”.