Isaías
63 ¿Ndáa ta̱ kúú ta̱ va̱xi chí Edom ña̱ ndíkaa̱ chí Bozrá ta ndíxira ti̱ko̱to̱ ña̱ yéʼe̱ní,
ta̱ ndíxi ti̱ko̱to̱ ña̱ va̱ʼaní náʼa̱*
ta íyoní ndee̱ra va̱xira?
“Yi̱ʼi̱ kúúra, yi̱ʼi̱ kúú ta̱ káʼa̱n ña̱ nda̱kú,
yi̱ʼi̱ kúú ta̱ kúúmií ndee̱ ña̱ sakǎkui̱ ndóʼó”.
2 ¿Nda̱chun kúáʼa ti̱ko̱to̱ún,
ta nda̱chun íyoña nda̱a̱ táki̱ʼva íyo ti̱ko̱to̱ ña̱ ndíxi na̱ xáñi̱* tí uva?
3 “Iinlá yi̱ʼi̱ kúú ta̱ ni̱xa̱ñi̱rí nu̱ú xáñi̱narí.
Ta kǒo nda̱a̱ ni iinna níxi̱yo xíʼi̱n.
Tá ndeéní ni̱sa̱íi̱, ni̱xa̱ñi̱ndosói̱na ta kǒo nísandákoi̱ ña̱ keʼíi̱ ña̱yóʼo.
Ku̱ndaa ni̱i̱ ti̱ko̱to̱i̱ ta ni̱ka̱ʼyi̱ ndiʼiña.
4 Saáchi ki̱vi̱ ña̱ ndatii̱n ku̱a̱chi, xa̱a̱ ndíkaa̱ña níma̱i̱,
ta xa̱a̱ ki̱xaa̱ ku̱i̱ya̱ ña̱ ndasatái̱ ndóʼó.
5 Xi̱nii̱ ña̱ kǒo nda̱a̱ ni iin na̱ chindeétáʼan xíʼinna;
nda̱kanda̱ní-inii̱* saáchi kǒo níxi̱yo nda̱a̱ ni iin na̱ níka̱ʼa̱n ña̱ chindeétáʼanna xíʼinna.
Xi̱niñúʼi̱ ndaʼíi̱ ña̱ kúúmiíní ndee̱ ña̱ va̱ʼa sakǎkui̱na,
ta ña̱ sáa̱níi̱ kúú ña̱ chi̱ndeétáʼan xíʼi̱n.
6 Xa̱ʼa̱ ña̱ sáa̱níi̱ ni̱xa̱ñi̱i̱ na̱ ñuu válí,
nda̱a̱ táki̱ʼva íyo na̱ sa̱xínii̱ xíʼin ña̱ sái̱, saá ni̱xi̱yona
ta xa̱tai̱ ni̱i̱na nu̱ú ñuʼú”.
7 Ka̱ʼi̱n xa̱ʼa̱ ña̱ ke̱ʼé Jehová ña̱ ni̱na̱ʼa̱ra ña̱ ndixaní kúʼvi̱-inira* xínira miíyó,
ndasakáʼnui̱ Jehová xa̱ʼa̱ ndiʼi ña̱ ke̱ʼé Jehová xa̱ʼa̱yó,
xa̱ʼa̱ ndiʼi ña̱ va̱ʼa ña̱ ke̱ʼéra xa̱ʼa̱ na̱ ñuu Israel,
saáchi ku̱ndáʼviní-inira xi̱nirana ta ni̱na̱ʼa̱ra ña̱ ndixaní kúʼvi̱-inira xínirana.
8 Saáchi ta̱yóʼo ka̱chira: “Na̱yóʼo ndixa kúú na̱ ñui̱, se̱ʼi̱ na̱ nda̱kúní-ini”.
Tasaá sa̱kǎkurana.
9 Tá ni̱ndi̱ʼiní-inina, saátu ta̱yóʼo ni̱ndi̱ʼiní-inira.
Ta ta̱ nda̱kaxinra xíka xíʼin tu̱ʼunra kúú ta̱ sa̱kǎku na̱yóʼo.
Xa̱ʼa̱ ña̱ kúʼvi̱ní-inira xínirana ta kúndáʼvi-inira xínirana, nda̱satárana,
nda̱niʼirana ta chi̱ndeétáʼanra xíʼinna ndiʼi ku̱i̱ya̱ ña̱ xa̱a̱ ni̱ya̱ʼa.
10 Soo na̱yóʼo i̱xaso̱ʼona nu̱úra ta sa̱kúsuchína-ini espíritu santora.
Ta tándi̱ʼi, ni̱sa̱a̱-inina xi̱ninara ta ka̱nitáʼanra xíʼinna.
11 Tasaá nda̱kaʼán na̱yóʼo xa̱ʼa̱ tiempo xi̱naʼá,
tá ni̱xi̱yo ta̱ Moisés, ta̱ xi̱kachíñu nu̱úra:
“¿Ndáa míí ku̱a̱ʼa̱n ta̱* sa̱yáʼa ndóʼó ma̱ʼñú mar ta saátu na̱ xi̱ndaa ndikachi* sa̱na̱ndó?
¿Ndáa míí ku̱a̱ʼa̱n ta̱ ta̱xi espíritu santo ndaʼa̱ ta̱yóʼo?
12 ¿Ndáa míí ku̱a̱ʼa̱n ta̱ xi̱niñúʼu ndee̱ra tá xi̱niʼira yichi̱ nu̱ú ta̱ Moisés?*
¿Ndáa míí ku̱a̱ʼa̱n ta̱ nda̱taʼví ti̱kui̱í nu̱ú na̱yóʼo ña̱ va̱ʼa ndakaʼánna xa̱ʼa̱ ki̱vi̱ra ndiʼi tiempo?
13 ¿Ndáa míí ku̱a̱ʼa̱n ta̱ sa̱yáʼa ndóʼó ma̱ʼñú ti̱kui̱í tá kúnúní,
ta va̱ása níkachiʼindó* tá ni̱xi̱kandó,
ta va̱ása níndoʼondó táki̱ʼva ndóʼo tí kuáyi̱ tá xíkarí nu̱ú ñuʼú yi̱chí?
14 Espíritu santo Jehová kúú ña̱ chi̱ndeétáʼan xíʼinndó ña̱ nda̱kindee̱ndó,
nda̱a̱ táki̱ʼva ndákindee̱ tí si̱ndi̱ki̱ chí yoso̱”.
Saá xi̱niʼún yichi̱ nu̱ú na̱ ñuún,
ña̱ va̱ʼa ndukáʼnu ki̱vi̱ún ña̱ liviní.
15 Nda̱a̱ chí ndiví, ña̱ yi̱i̱ní ña̱ liviní, nu̱ú súkun nu̱ú íyoún,
kotoún chí ni̱nu̱.
¿Ndáa míí ku̱a̱ʼa̱n ndeún ta á ndíʼi̱ka-iniún xa̱ʼa̱ndi̱?
¿Á kúʼvi̱ka-iniún xíniún ndi̱ʼi̱ ta á kúndáʼvika-iniún xíniún ndi̱ʼi̱?
Kǒoka ña̱yóʼo kéʼún xa̱ʼa̱ndi̱.
16 Yóʼó kúú yivándi̱;
ni va̱ása xíni̱ ta̱ Abrahán ndi̱ʼi̱
ni va̱ása ndákuni ta̱ Israel ndi̱ʼi̱,
yóʼó Jehová kúú yivándi̱.
Nda̱a̱ tá tiempo xi̱naʼáví kúún ta̱ nda̱satá ndi̱ʼi̱.
17 Jehová, ¿nda̱chun táxiún ña̱ keendi̱ nu̱ú yichi̱ún?
¿Nda̱chun táxiún ña̱ ndundeé níma̱ndi̱ ta va̱ása ixato̱ʼókandi̱ yóʼó?
Ndandikó nu̱ú na̱ káchíñu nu̱ún xa̱ʼa̱ ña̱ kúʼvi̱-iniún xíniúnna,
ndandikó nu̱ú na̱ tribu na̱ kúú herenciaún.
18 Loʼova tiempo xi̱ndoo na̱ ñuún na̱ yi̱i̱ nu̱ú ñuʼú ña̱ ta̱xiún ndaʼa̱na.
Na̱ sáa̱-ini xíni ndi̱ʼi̱, ni̱xa̱ñi̱ndosóna ñuʼú yóʼo.
19 Xa̱a̱ ku̱a̱ʼání tiempo íyondi̱ nda̱a̱ táki̱ʼva íyo na̱ kǒo níxaʼndachíñún nu̱ú,
nda̱a̱ táki̱ʼva íyo na̱ va̱ása níxi̱niʼi ki̱vi̱ún saá íyondi̱.