Isaías
49 Kuniso̱ʼo ndóʼó na̱ ndóo chí isla,
viíní kuniso̱ʼo ndóʼó na̱ ndóo nu̱ú ñuu ña̱ íyo xíká.
Tá kúma̱níka kakui̱, ka̱na Jehová yi̱ʼi̱ ña̱ keʼíi̱ ña̱ kúni̱ra.
Ni̱ka̱ʼa̱nra ki̱víi̱ tá ndíkaa̱kai̱ ti̱xin siʼíi̱.
2 Nda̱a̱ táki̱ʼva íyo iin espada ña̱ xi̱ín* yuʼú saá nda̱sara yuʼíi̱,
chi̱se̱ʼéra yi̱ʼi̱ xíʼin ku̱nda̱ti̱* ndaʼa̱ra.
Nda̱sara yi̱ʼi̱ nda̱a̱ táki̱ʼva íyo iin flecha tú xi̱ín nu̱ú;
chi̱se̱ʼéra yi̱ʼi̱ ini ña̱ʼa nu̱ú ñúʼu flecha.
3 Ni̱ka̱ʼa̱nra xíʼi̱n: “Yóʼó kúú ta̱ káchíñu nu̱úi̱ Israel;
kuniñúʼi̱ yóʼó ña̱ va̱ʼa na̱ʼi̱ ña̱ káʼnu ña̱ kúúmiíi̱”.
4 Soo yi̱ʼi̱ ni̱ka̱ʼi̱n: “Kǒo xa̱ʼa̱ví ña̱ ndeéní ka̱chíñui̱.
Xi̱niñúʼi̱ ndeíi̱ xa̱ʼa̱ ña̱ʼa ña̱ va̱ása ndáyáʼvi.
Soo Jehová kúú ta̱ ndátiin ku̱a̱chi xíʼi̱n,
ta mií Ndióxi̱ kúú ta̱ chaʼvi yi̱ʼi̱”.
5 Jehová, ta̱ i̱xava̱ʼa yi̱ʼi̱ nani tá ndíka̱i̱ ti̱xin siʼíi̱, ke̱ʼéra yi̱ʼi̱ ña̱ kachíñui̱ nu̱úra,
ni̱ka̱ʼa̱nra xíʼi̱n ña̱ ku̱ʼi̱n ndakiʼii̱n ta̱ Jacob
ña̱ va̱ʼa ndakutáʼan na̱ ñuu Israel xíʼinra.
Yi̱ʼi̱ ndukáʼnui̱ nu̱ú Jehová,
ta Ndióxi̱ miíi̱ kúú ta̱ taxi ndee̱ ndaʼíi̱.
6 Ta̱yóʼo ka̱chira: “Va̱ása kachíñu kuitíún nu̱úi̱ ña̱ ndaniʼún na̱ tribu ta̱ Jacob
ta saátu ña̱ sandándikóún na̱ ñuu Israel na̱ ni̱ka̱ku.
Chi ta̱xitui̱ ña̱ ná koún nda̱a̱ táki̱ʼva íyo iin ñuʼu̱ ña̱ túu̱n nu̱ú na̱ ñuu,
tasaá sakǎkui̱ na̱ íyo iníísaá nu̱ú ñuʼú”.
7 Jehová ta̱ nda̱satá na̱ ñuu Israel, Ndióxi̱ ta̱ yi̱i̱, káʼa̱nra ña̱yóʼo xíʼin ta̱ kúndasína xínina, ta̱ va̱ása kúni̱ na̱ ñuu kunina, ta̱ káchíñu nu̱ú na̱ xáʼndachíñu:
“Na̱ xáʼndachíñu, kunina ta ndakunditana,
na̱ kúúmií chiñu ña̱ ndáyáʼvi kuxítína
xa̱ʼa̱ Jehová ta̱ nda̱kúní-ini keʼéna ña̱yóʼo,
Ndióxi̱ ta̱ yi̱i̱, Ndióxi̱ na̱ ñuu Israel, ta̱ nda̱kaxin yóʼó”.
8 Ña̱yóʼo kúú ña̱ káʼa̱n Jehová:
“Mií tiempo ña̱ va̱ʼaní, nda̱kuii̱n ña̱ ni̱ka̱ʼún
ta tiempo ña̱ va̱ʼa sakǎkui̱ yóʼó kúú ña̱ chi̱ndeétáʼi̱n xíʼún;
xi̱ndai̱ yóʼó ña̱ va̱ʼa koún nda̱a̱ táki̱ʼva íyo trato ña̱ ki̱ndoi̱ xíʼin na̱ ñuu,
ña̱ va̱ʼa nduvií nu̱ú ñuʼú,
ña̱ va̱ʼa ndakiʼinna herenciana ña̱ ndi̱ʼi-xa̱ʼa̱,
9 ña̱ va̱ʼa ka̱ʼún xíʼin na̱ ñúʼu veʼeka̱a ‘Keendó’,
ña̱ va̱ʼa ka̱ʼún xíʼin na̱ ñúʼu nu̱ú naa ‘Na̱ʼa̱ndó miíndó’.
Ndani̱ʼíndó ña̱ kuxundó yuʼú yichi̱,
yuʼú yichi̱ koo ku̱ʼu̱ kúii̱.
10 Va̱ása koo so̱ko nu̱úna ta ni va̱ása yichi̱na,*
va̱ása ndeéní kani kaʼní miína.
Saáchi ta̱ kúndáʼvi-ini xíni miína kúú ta̱ kuniʼi yichi̱ nu̱úna
ta kuniʼirana ku̱ʼu̱n xíʼinra nu̱ú íyoní ti̱kui̱í.
11 Ndiʼi yuku̱ ña̱ kúúmiíi̱, ndasai̱ña iin yichi̱,
ta súkun koo yichi̱ náʼnu ña̱ kúúmiíi̱.
12 Koto. Xíkání ke̱e na̱yóʼo va̱xina,
ta koto, na̱yóʼo va̱xina chí norte ta saátu chí nu̱ú kíʼvi ñu̱ʼu,*
ta na̱yóʼo ke̱ena chí ñuu Sinim”.
13 Ndiví, nda̱ʼyi̱ kóʼóndó* xa̱ʼa̱ ña̱ kúsi̱í-inindó, ta ná kusi̱í-ini ñuʼú.
Ná kusi̱í-ini yuku̱ ta ná nda̱ʼyi̱ kóʼóña xa̱ʼa̱ ña̱ kúsi̱í-iniña.
Saáchi Jehová sa̱ndíkora-ini na̱ ñuura
ta kúndáʼvi-inira xínira na̱ xóʼvi̱.*
14 Soo yuku̱ Sion xi̱kaʼa̱nkaña:
“Sa̱ndákoondaʼa̱ Jehová yi̱ʼi̱; na̱ndóso-ini Jehová xa̱ʼíi̱”.
15 ¿Á kivi nandóso-ini iin ñaʼá xa̱ʼa̱ se̱ʼe loʼoñá?*
¿Á kivi sandákooñá ña̱ kundáʼvi-iniñá kuniñá se̱ʼeñá ña̱ xi̱ndikaa̱ ti̱xinñá?
Ni ná nandóso-ini ñá ñaʼá yóʼo xa̱ʼa̱ se̱ʼeñá, yi̱ʼi̱ va̱ása nandóso-inii̱ xa̱ʼún.
16 Koto. Ini ndaʼíi̱ ka̱ʼyii̱ ki̱vi̱ún.
Ndiʼi tiempo xítoi̱ nama̱ ña̱ súkun ña̱ kúúmiíún.
17 Kamaní ndíkó na̱ se̱ʼún.
Na̱ sa̱ndíʼi-xa̱ʼa̱ yóʼó, kuxíkána nu̱ún.
18 Ndaniʼi nu̱ún ta iníí kotoún.
Ndiʼi na̱yóʼo ndákutáʼanna ta va̱xina nu̱ún.
“Chínaʼíi̱* xa̱ʼa̱ miíi̱, káchi Jehová,
na̱yóʼo koona nda̱a̱ táki̱ʼva íyo ti̱ko̱to̱ livi ña̱ nda̱kundixiún,
ta na̱yóʼo koona nda̱a̱ táki̱ʼva íyo ti̱ko̱to̱ ña̱ ndíxi iin ñá tíndaʼa̱.
19 Ni ndi̱ʼi-xa̱ʼa̱ nu̱ú ni̱xi̱yoún ta kǒoka na̱ yiví ndóo nu̱úña ta saátu ndi̱ʼi-xa̱ʼa̱ ñuʼún,
va̱ása naniña ña̱ kundoona nu̱úña,
xíkání kundoo na̱ sa̱ndíʼi-xa̱ʼa̱ yóʼó.
20 Na̱ se̱ʼún na̱ ka̱ku tá ni̱xi̱ʼi̱ inka na̱ se̱ʼún, ka̱ʼa̱nna ña̱yóʼo xíʼún:
‘Táñuní yóʼo ta va̱ása kívi koi̱ nu̱úña.
Kuná ña̱ va̱ʼa koi̱’.
21 Ta ndakani-iniún ña̱yóʼo:
‘Tá ni̱xi̱ʼi̱ se̱ʼi̱ ta ñá núma̱ kúi̱,
tá nda̱kiʼinna yi̱ʼi̱ ku̱a̱ʼi̱n inka ñuu ta nda̱kasina yi̱ʼi̱,
¿ndáana xíʼin se̱ʼe na̱ nda̱kiʼii̱n yóʼo?
¿Ndáana sa̱kúaʼnuna?
Ñá ki̱ndoo mitúʼunva kúi̱,
¿ndáa míí ke̱e na̱yóʼo?’”.
22 Ña̱yóʼo kúú ña̱ káʼa̱n táta káʼnu Jehová:
“Ndaniʼi̱ ndaʼíi̱ ña̱ va̱ʼa ná kuni na̱ ñuu ña̱yóʼo
ta kanindichii̱ iin yitu̱n ña̱ va̱ʼa ná kuni na̱ ñuu túyóʼo.
Kunumindaana na̱ se̱ʼún kixi xíʼinna
ta so̱ko̱na kundisona se̱ʼe-síʼún.
23 Na̱ xáʼndachíñu kúú na̱ kundaa yóʼó
ta ná se̱ʼe na̱ xáʼndachíñu kúú ná sachíchín yóʼó.
Kuxítína nu̱ún, tiʼvindaana yáká* xa̱ʼún,
tasaá kunda̱a̱-iniún ña̱ yi̱ʼi̱ kúú Jehová;
na̱ ndáa-ini yi̱ʼi̱ va̱ása kukaʼan nu̱úna”.
24 ¿Á kivi kindaana na̱ yiví ndaʼa̱ iin ta̱ kánitáʼan nu̱ú ku̱a̱chi ta̱ ndakúní?
¿Á kivi ndatavána na̱ nda̱kasi iin ta̱a ta̱ ndi̱va̱ʼaní-ini?
25 Ña̱yóʼo kúú ña̱ káʼa̱n Jehová:
“Kuchiñuvana kindaana na̱ nda̱kiʼin ta̱ ndakúní ta̱ xáʼa̱n nu̱ú ku̱a̱chi,
ta saátu kuchiñuna ndatavána na̱ nda̱kasi ta̱ ndi̱va̱ʼaní-ini.
Yi̱ʼi̱ kúú ta̱ kanitáʼan xíʼin na̱ kánitáʼan xíʼún
ta sakǎkui̱ na̱ se̱ʼún.
26 Taxii̱ ña̱ ná kaxí na̱ íxandi̱va̱ʼa xíʼún ku̱ñu miína,
ta nda̱a̱ táki̱ʼva xínina xíʼin vino vi̱si̱, saá xi̱nina xíʼin ni̱i̱na.
Ta ndiʼi na̱ yiví kunda̱a̱-inina ña̱ yi̱ʼi̱ kúú Jehová,
ta̱ sáka̱ku yóʼó, ta̱ nda̱satá yóʼó,
Ndióxi̱ ta̱ Jacob, Ndióxi̱ ta̱ ndakúní”.