Ña̱ kusíkíyó xa̱ʼa̱ xu̱ʼún

¿Á va̱ása va̱ʼa kusíkína xa̱ʼa̱ xu̱ʼún?

ÑA̱ KÁʼA̱N NA̱ YIVÍ.

Ku̱a̱ʼá na̱ yiví káʼa̱nna ña̱ va̱ʼava kúú ña̱ kusíkína xa̱ʼa̱ xu̱ʼún nani íyo iin ley ña̱ káʼa̱n xa̱ʼa̱ ña̱yóʼo. Juego ña̱ kéʼé na̱ gobierno ña̱ naní lotería xíniñúʼuna xu̱ʼún yóʼo ña̱ chindeétáʼanna xíʼin inkana.

ÑA̱ KÁʼA̱N BIBLIA.

Biblia va̱ása káʼa̱n káxiña xíʼinyó xa̱ʼa̱ xu̱ʼún á kusíkíyó á va̱ása. Soo táxivaña consejo ndaʼa̱yó ña̱ va̱ʼa kunda̱a̱-iniyó ndáa ki̱ʼva xíto Jehová ña̱yóʼo.

Na̱ sásikí xa̱ʼa̱ xu̱ʼún ña̱ kéʼéna kúú ña̱ ndakiʼinna xu̱ʼún inkana, ta ña̱yóʼo kǒo kítáʼanña xíʼin ña̱ ni̱ka̱ʼa̱n ta̱ Jesús: “Kiʼinndó kuenta ña̱ va̱ása kutóoníndó ña̱ʼa” (Lucas 12:15). Na̱ yiví sásikína saáchi kúni̱na kuumiína ku̱a̱ʼá xu̱ʼún. Soo ku̱a̱ʼá yichi̱ kǒo ndákiʼinna xu̱ʼún ña̱ sásikína xa̱ʼa̱, na̱ tává juego yóʼo káʼa̱nna ña̱ ku̱a̱ʼání xu̱ʼún ndákiʼin na̱ sásikí yóʼo. Xa̱ʼa̱ ña̱ kúni̱ na̱ yiví ndukúikána xa̱ʼa̱ ña̱kán keʼéna apuesta ti̱xin veʼe ña̱ naní casino. Nu̱úka ña̱ chindeétáʼanna xíʼin na̱ yiví ña̱ kǒo kundi̱ʼi̱-inina xa̱ʼa̱ ña̱ kuumiína ña̱ ku̱i̱ká, ña̱ kéʼé juego yóʼo kúú ña̱ ndakiʼinna xu̱ʼún ta kǒo xóʼvi̱na xa̱ʼa̱ ña̱yóʼo.

Na̱ sásikí juego yóʼo kǒo ndíʼi̱-inina xa̱ʼa̱ inkana, saáchi ña̱ kéʼéna kúú ña̱ ndákiʼinna xu̱ʼún na̱ kǒo níkuchiñu kusíkí. Soo Biblia káʼa̱nña “Ná keʼéyó ña̱ kivi chindeétáʼan xíʼin inkana, ta su̱ví nda̱saa iinlá ña̱ kivi chindeétáʼan xíʼin miíyó” (1 Corintios 10:24). Ley ña̱ ta̱xi Ndióxi̱ ndaʼa̱ na̱ ñuu Israel xi̱ka̱ʼa̱nña “Va̱ása xíniñúʼu kuni̱ún kuumiíún ña̱ʼa inkana” (Éxodo 20:17). Tá iin na̱ sásikí kúni̱na kuchiñuna, ña̱ ndátuna kúú na̱ sásikí xíʼinna ná ti̱vína tasaá kindo̱ona xíʼin xu̱ʼúnna.

Biblia káʼa̱nña xíʼinyó ña̱ ná kǒo kandíxayó ña̱ suerte kúú ña̱ kivi chindeétáʼan xíʼinyó á ña̱ kivi ndasakúiká miíyó. Sava na̱ xi̱ndoo ñuu Israel tiempo xi̱naʼá, kǒo níkandíxakana Jehová ta ki̱xáʼana ndásakáʼnuna ndióxi̱ ña̱ kúúmií Suerte. ¿Ta ndáaña nda̱kanixi̱ní Jehová xa̱ʼa̱ ña̱yóʼo? Ta̱yóʼo ka̱chira: “Nda̱kundeéna keʼéna ña̱ʼa ña̱ va̱ása va̱ʼa nu̱úi̱ ta keʼéna ña̱ʼa ña̱ kǒo kutói̱” (Isaías 65:​11, 12).

Ndixava sava ñuu, xu̱ʼún ña̱ ndákiʼinna xa̱ʼa̱ ña̱ sásikína ña̱yóʼo chíndeétáʼanna xíʼin na̱ ku̱a̱ʼa̱n escuela á ña̱ chíndeétáʼanna xíʼin na̱ yiví, ta ña̱yóʼo chíndeétáʼanvaña xíʼin na̱ yiví soo xu̱ʼún yóʼo ke̱eña nu̱ú sásikí na̱ kúni̱ka ndukúiká, va̱ása xíniñúʼu kuni̱ún kuumiíún ña̱ kúúmií inkana.

“Va̱ása xíniñúʼu kuni̱ún kuumiíún ña̱ʼa inkana” (Éxodo 20:17).

¿Ndáaña va̱ása va̱ʼa ndóʼo na̱ yiví na̱ kutóoní kusíkí?

ÑA̱ KÁʼA̱N BIBLIA.

Biblia káʼa̱nña xíʼinyó ña̱yóʼo “ta na̱ kúni̱ní ndukúiká, íyoní ña̱ sándaʼvi miína ta kóyona ndaʼa̱ña ta kíxáʼa kútóona ku̱a̱ʼání ña̱ʼa ña̱ va̱ása ndáyáʼvi ta ña̱yóʼo sáxo̱ʼvi̱níñana ta ndíʼi-xa̱ʼa̱na íxaaña” (1 Timoteo 6:9). Xa̱ʼa̱ ña̱ kúni̱na koo ku̱a̱ʼání xu̱ʼúnna kúú ña̱ sásikína. Ña̱yóʼo saxóʼvi̱níña miíyó ña̱kán tu̱ʼun Ndióxi̱ káʼa̱nña xíʼinyó ña̱ ná kǒo kuʼunníyó sa̱táña (Efesios 5:3).

Ña̱ kéʼé ña̱ sásikína yóʼo kúú ña̱ ná kunina koo ku̱a̱ʼá xu̱ʼúnna. Biblia káʼa̱nña ña̱ ku̱nina koo ku̱a̱ʼání xu̱ʼúnna ku̱a̱ʼání tu̱ndóʼo va̱xi nu̱úna xa̱ʼa̱ ña̱yóʼo. Xa̱ʼa̱ ña̱ kúni̱na koo ku̱a̱ʼání xu̱ʼúnna ndiʼi tiempo ndíʼi̱-inina xa̱ʼa̱ ña̱yóʼo. Ta xa̱ʼa̱ ña̱yóʼo nda̱a̱ kivi kiʼin kue̱ʼe̱ miína ta saátu kivi xa̱a̱na sandákoona ña̱ kándíxana Ndióxi̱. Tu̱ʼun Ndióxi̱ káʼa̱nña na̱ kúni̱ koo ku̱a̱ʼání ña̱ʼa “ku̱a̱ʼání tu̱ndóʼo kíxi nu̱úna” (1 Timoteo 6:10).

Na̱ yiví na̱ kúni̱ koo ku̱a̱ʼání xu̱ʼún va̱ása si̱í íyo inina saáchi ndiʼi tiempo ña̱ ndúkúna kúú ku̱a̱ʼá xu̱ʼún. Eclesiastés 5:10 káchiña: “Na̱ kúni̱ní xíni xu̱ʼún ku̱a̱ʼákaña kúni̱na, ta na̱ kúni̱ní xíni ña̱ ku̱i̱ká ku̱a̱ʼákaña kúni̱na”.

Ku̱a̱ʼání na̱ yiví na̱ xi̱kuni̱ kusíkí xa̱ʼa̱ xu̱ʼún vitin va̱ása kívi sandákoonaña. Chí Estados Unidos ku̱a̱ʼání na̱ yiví kútóona kusíkína xa̱ʼa̱ xu̱ʼún.

Proverbios 20:21 sanáʼa̱ña miíyó na̱ yiví na̱ kúni̱ní koo ku̱a̱ʼá ña̱ʼa kivi xa̱a̱na ndukúikána, soo kǒo ndakiʼinna bendición Ndióxi̱. Ta na̱ yiví na̱ kutóoní kusíkí xa̱ʼa̱ xu̱ʼún kivi xa̱a̱na kuníká ku̱a̱ʼána á nda̱a̱ kivi xa̱a̱na sandákoona na̱ migona, chiñuna ta nda̱a̱ na̱ veʼena. Consejo ña̱ táxi Biblia ndaʼa̱yó chíndeétáʼanña xíʼinyó ña̱ va̱ása kixi tu̱ndóʼo nu̱úyó.

“Ta na̱ kúni̱ní ndukúiká, íyoní ña̱ sándaʼvi miína ta kóyona ndaʼa̱ña ta kíxáʼa kútóona ku̱a̱ʼání ña̱ʼa ña̱ va̱ása ndáyáʼvi ta ña̱yóʼo sáxo̱ʼvi̱níñana ta ndíʼi-xa̱ʼa̱na íxaaña”. (1 Timoteo 6:9)