5 Viíní natúʼunndó xíʼin se̱ʼendó

¿NDÁAÑA KÚNI̱ KACHI ÑA̱YÓʼO?

Ña̱ va̱ʼa vií natúʼun na̱ íyo se̱ʼe xíʼin na̱ va̱lí se̱ʼena xíniñúʼu ka̱ʼa̱nna xíʼinna xa̱ʼa̱ ña̱ ndóʼona xíʼin xa̱ʼa̱ ña̱ ndákanixi̱nína.

¿NDA̱CHUN NDÁYÁʼVINÍ ÑA̱YÓʼO?

Kivi ixayo̱ʼvi̱ña xíʼinyó ña̱ ka̱ʼa̱nyó xíʼin se̱ʼeyó na̱ xa̱a̱ ku̱a̱ʼá ku̱i̱ya̱. Tá ni̱xi̱yo válí se̱ʼún xi̱natúʼunna xíʼún xa̱ʼa̱ ndiʼi ña̱ xi̱ndoʼona, soo vitin xa̱ʼa̱ ña̱ xa̱a̱ xa̱ʼnuna si̱lóʼova nátúʼunna xíʼún, ta kǒo kúnda̱a̱ka-iniún ndáaña ndákanixi̱nína á ndáaña ndóʼona, ta ña̱ kéʼé na̱yóʼo íyoña nda̱a̱ táki̱ʼva íyo na̱ níndichi inka táʼví yuʼú yu̱ta. Tá saá kéʼéna, saá kúú ña̱ ndáyáʼviníka natúʼunyó xíʼinna.

¿NDÁAÑA KIVI KEʼÚN?

Keʼé ña̱ kútóo na̱ va̱lí se̱ʼún. Natúʼun xíʼinna ni xa̱a̱ ñuúní kúúña.

“Sava yichi̱ kivi ndakanixi̱níún ña̱yóʼo: ‘Xa̱a̱ inííví ki̱vi̱ inkáchi xi̱táʼanyó ta ¿nda̱a̱ vitinví kúni̱ún ka̱ʼún?’. Soo ¿nda̱chun va̱ása va̱ʼa keʼéyó ña̱yóʼo tá kúni̱ na̱ va̱lí se̱ʼeyó ka̱ʼa̱nna xíʼinyó xa̱ʼa̱ ña̱ ndóʼona? ¿Á su̱ví ña̱yóʼo kúú ña̱ kúni̱ ndiʼi miíyó na̱ íyo se̱ʼe ná keʼé na̱ va̱lí se̱ʼeyó?” (ñá Lisa).

“Kútóoníi̱ ya̱chi̱ ku̱su̱i̱n, soo sava yichi̱ va̱ʼaníka nátúʼi̱n xíʼin na̱ va̱lí se̱ʼi̱ na̱ xa̱a̱ náʼnu, tá xa̱a̱ yáʼa ma̱ʼñú ñuú” (ta̱ Herbert).

TEXTO ÑA̱ VA̱XI NU̱Ú BIBLIA: “Ña̱kán iin tá iinyó ná keʼéyó ña̱ kivi chindeétáʼan xíʼin inkana, ta su̱ví nda̱saa iinlá ña̱ kivi chindeétáʼan xíʼin miíyó” (1 Corintios 10:24).

Kǒo kundi̱ʼi̱-iniún xa̱ʼa̱ inka ña̱ʼa. Iin ta̱ íyo se̱ʼe káchira: “Sava yichi̱ tá káʼa̱n na̱ va̱lí se̱ʼi̱ xíʼi̱n, kíxáʼíi̱ ndákanixi̱níi̱ xa̱ʼa̱ inka ña̱ʼa, soo na̱yóʼo kíʼinvana kuenta tá kéʼíi̱ ña̱yóʼo”.

Tá saá ndóʼún, ndaʼava televisión ta va̱ása keʼékaún teléfono, tableta á inkaka ña̱ʼa. Viíní kuniso̱ʼún ña̱ káʼa̱n na̱ va̱lí se̱ʼún xíʼún, ni su̱ví ña̱ ndeéví kúú ña̱yóʼo, soo saá na̱ʼún ña̱ ndixa ndíʼi̱-iniún xa̱ʼa̱na.

“Ndáyáʼviní ña̱ ná kunda̱a̱-ini na̱ va̱lí se̱ʼeyó ña̱ ndíʼi̱-iniyó xa̱ʼa̱ ña̱ ndóʼona. Chi tá ná kǒo keʼéyó ña̱yóʼo, na̱ va̱lí se̱ʼeyó va̱ása kuni̱kana ka̱ʼa̱nna xíʼinyó ta nda̱a̱ ka̱ʼa̱nna xíʼin inkana ña̱ chindeétáʼanna xíʼinna” (ñá Maranda).

“Va̱ása kamaní sa̱ún tá va̱ása va̱ʼa íyo ña̱ ni̱ka̱ʼa̱n na̱ va̱lí se̱ʼún” (ta̱ Anthony).

TEXTO ÑA̱ VA̱XI NU̱Ú BIBLIA: “Kiʼinníndó kuenta ndáa ki̱ʼva xíniso̱ʼondó” (Lucas 8:18).

Kuniso̱ʼo tá xa̱a̱ káʼa̱n na̱ va̱lí se̱ʼún xíʼún. Sava yichi̱ kúni̱ka na̱ va̱lí natúʼunna xíʼin na̱ yivána tá kǒo ña̱ʼa kéʼéna.

“Ndi̱ʼi̱ va̱ʼaníka nátúʼunndi̱ tá ku̱a̱ʼa̱nndi̱ inka lugar xíʼin carro. Saáchi saá va̱ása xítondi̱ nu̱ú táʼanndi̱ tá nátúʼunndi̱” (ñá Nicole).

Saátu kivi natúʼunndó xíʼin na̱ va̱lí se̱ʼendó tá xa̱a̱ xíxindó.

“Tá xa̱a̱ xíxindi̱ saá kúú ña̱ nátúʼunndi̱ ndáaña kúú ña̱ va̱ʼa ndo̱ʼondi̱ á ña̱ va̱ása va̱ʼa ndo̱ʼondi̱ iníí ki̱vi̱. Xa̱ʼa̱ ña̱ kéʼéndi̱ ña̱yóʼo va̱ʼaníka kítáʼanndi̱, ta ña̱yóʼo sándakaʼánña ndi̱ʼi̱ ña̱ va̱ása xíniñúʼu ya̱ʼa iinlá miíndi̱ nu̱ú tu̱ndóʼo” (ta̱ Robin).

TEXTO ÑA̱ VA̱XI NU̱Ú BIBLIA: “Xíniñúʼu koo tu̱ʼvandó ña̱ kuniso̱ʼondó ña̱ káʼa̱n inkana, kúee koo inindó ka̱ʼa̱nndó” (Santiago 1:19).