Xóʼvi̱ní-iniyó tá xíʼi̱ iin na̱ veʼeyó

“Xa̱a̱ yáʼaka 39 ku̱i̱ya̱ kúú ña̱ ti̱ndaʼíi̱ xíʼin ñá Sofíaa tasaá ni̱xi̱ʼi̱ñá xa̱ʼa̱ iin kue̱ʼe̱ ña̱ naʼání xi̱kuumiíñá. Na̱ migoi̱ chi̱ndeétáʼannína xíʼi̱n ta saátu yi̱ʼi̱, xi̱keʼíi̱ ku̱a̱ʼání ña̱ʼa. Soo, iin ku̱i̱ya̱ví ni̱xo̱ʼvi̱ní-inii̱ xa̱ʼa̱ñá. Sava yichi̱ va̱ʼa xi̱kuni̱i̱, ta sava yichi̱ xi̱kusuchíní-inii̱. Ta saátu vitin, ni xa̱a̱ ni̱ya̱ʼa u̱ni̱ ku̱i̱ya̱ ña̱ ni̱xi̱ʼi̱ñá, sava yichi̱ ndákaʼánníi̱ xa̱ʼa̱ñá ta xóʼvi̱ní-inii̱” (Ta̱ Kostas).

¿Á xa̱a̱ ni̱xi̱ʼi̱ iin na̱ veʼún? Sana ndóʼún táki̱ʼva ndo̱ʼo ta̱ Kostas. Tá xíʼi̱ na̱ ti̱ndaʼa̱ xíʼinyó á na̱ veʼeyó á na̱ migoyó, ndeéní xóʼvi̱-iniyó ta ni kǒo ña̱ kítáʼan xíʼin ña̱yóʼo, saátu káchi na̱ xíni̱ va̱ʼa xa̱ʼa̱ ña̱yóʼo. Iin artículo ña̱ ka̱na nu̱ú iin revista ña̱ naní The American Journal of Psychiatry káchiña “tá xíʼi̱ iin na̱ yiví, ña̱yóʼo kúú ña̱ ndeéníka sáxo̱ʼvi̱-iniyó ta naʼání kúsuchí-iniyó xa̱ʼa̱ ña̱yóʼo”. Ña̱kán tá xíʼi̱ iin na̱ veʼeyó, sana ndáka̱tu̱ʼunyó miíyó ña̱yóʼo: “¿Nda̱saakaví tiempo kundoʼi̱ ña̱yóʼo? ¿Á kixaa̱ tiempo ña̱ kusi̱í-inii̱? ¿Ndáaña kivi sandíko-inii̱?”.

Nu̱ú ña̱ ¡Despertad! yóʼo ndakuiinyó pregunta yóʼo. Nu̱ú inka artículo ka̱ʼa̱nyó xa̱ʼa̱ ndáaña kivi keʼéyó tá íxayo̱ʼvi̱ña xíʼinyó tá sa̱kán ni̱xi̱ʼi̱ iin na̱ veʼeyó. Ta nu̱ú inkaka artículo ka̱ʼa̱nyó xa̱ʼa̱ ndáaña kivi chindeétáʼan xíʼinyó ña̱ va̱ʼa ya̱ʼayó nu̱ú ña̱yóʼo.

Kúni̱ndi̱ ña̱ ná sandíko revista yóʼo inindó ta ná chindeétáʼanña xíʼin ndiʼi na̱ xóʼvi̱ xa̱ʼa̱ ña̱ ni̱xi̱ʼi̱ iin na̱ veʼena.