¿Ndachun xíniñúʼu sákuaʼakaún xa̱ʼa ña̱ káʼa̱n Biblia?

1. ¿Ndáaña va̱ʼa ndakiʼún tá ná sákuaʼakaún xa̱ʼa ña̱ káʼa̱n Biblia?

Ta vitin xa̱xíni̱ún xa̱ʼa sava ña̱ káʼa̱n Biblia ta ña̱yóʼo chíndeé yóʼó ña̱ kuʼvi̱ka-iniún kuníún Jehová. Soo xíniñúʼu sákuaʼakaún xa̱ʼara (1 Pedro 2:2). Ña̱ va̱ʼa xa̱a̱ún kooún ndiʼi tíempo xíniñúʼu ndakundeún kaʼviún Biblia tasaá va̱ʼa xa̱a̱ún kuyatiún nu̱ú Jehová. Kaʼvi Juan 17:3 xíʼin Judas 21.

Tá ná sakuaʼakaún xa̱ʼa Ndióxi̱ ña̱yóʼo chindeé yóʼó ña̱ kandíxa va̱ʼakaúnra xíʼin ndiʼi-iniún, tasaá va̱ʼa keʼún ndiʼi ña̱ kúni̱ra (Hebreos 11:1, 6). Tá ki̱vi̱ kándíxayó Ndióxi̱ xíʼin ndiʼi-iniyó ña̱yóʼo chíndeé miíyó ña̱ sandakooyó ndiʼi ña̱ kini kéʼéyó. Kaʼvi Hechos 3:19.

2. ¿Ndáaña xíniñúʼu keʼún tasaá va̱ʼa chindeéún inkana?

Sana ku̱niún natúʼun xíʼin inkana xa̱ʼa ña̱ sákuaʼún chi ndiʼiyó kúni̱yó ka̱ʼa̱nyó tu̱ʼun va̱ʼa xíʼin na̱ yiví. Tá xa̱ku̱a̱ʼáka ku̱a̱ʼún kaʼviún Tu̱ʼun Ndióxi̱ saá kúú ña̱ sákuaʼa va̱ʼakaún kuniñúʼún Biblia ña̱ va̱ʼa natúʼun xíʼin inkana xa̱ʼa Jehová xíʼin xa̱ʼa ña̱ káʼa̱nra taxira ndaʼa̱ ndiʼi na̱ yiví. Kaʼvi Romanos 10:13-15.

Va̱ʼa kixaʼáún natúʼun xíʼin na̱ veʼún á na̱ mígoún. Vií ka̱ʼún xíʼinna kǒo káʼa̱n ndiva̱ʼún xíʼinna. Va̱ása ka̱ʼún xíʼinna ña̱ veʼe-ñu̱ʼuna va̱ása sánáʼa̱ña ña̱ nda̱a̱, va̱ʼaka natúʼun xíʼinna xa̱ʼa ña̱ káʼa̱n Jehová ña̱ koo chí nu̱únínu. Nakaʼún chi tá vií íyo iniún xíʼinna ndáyáʼvika ña̱yóʼo nu̱úka tu̱ʼun ka̱ʼún xíʼinna. Kaʼvi 2 Timoteo 2:24, 25.

3. ¿Ndáaña xíniñúʼu keʼún ta saá kutáʼan va̱ʼakaún xíʼin Ndióxi̱?

Tá ná kaʼviyó Biblia va̱ʼaní xa̱a̱yó kunda̱a̱-iniyó ña̱ káʼa̱n Jehová, tasaá va̱ʼaní xa̱a̱yó kutáʼan va̱ʼayó xíʼinra. Nda̱a̱ kivi xa̱a̱yó kutáʼanyó xíʼinra nda̱a̱ tá ítáʼan iin ta̱ loʼo xíʼin yivára. Kaʼvi 2 Corintios 6:18.

4. ¿Ndáaña va̱ʼa chindeé miíún ña̱ sakuaʼakaún xa̱ʼa Ndióxi̱?

Kǒo sándakooún ña̱ kaʼviún Biblia (Hebreos 5:13, 14). Ka̱ʼa̱n xíʼin iin na̱ testigo Jehová ná sanáʼa̱na yóʼó xíʼin tutu ña̱ naní ¿Qué enseña realmente la Biblia? Chi tá ná sákuaʼakaún xa̱ʼara saá si̱íníka koún. Kaʼvi Salmo 1:1-3 xíʼin 73:27, 28.

Nakaʼán chi tu̱ʼun va̱ʼa ña̱ va̱xi nu̱ú Biblia tu̱ʼun Jehová kúúña. Ta kivi kuyatiún nu̱ú Jehová tá ná ku̱ʼún veʼe nu̱ú ndákutáʼan na̱ Testigora (Hebreos 10:24, 25). Tá ná nda­kundeékaún keʼéún ña̱ kútóo Jehová saá kúú ña̱ kivi xa̱a̱ún kutakuún ndiʼi tíempo. Ña̱ va̱ʼaníka kúúña̱ ná ndakundeún sakuaʼún xa̱ʼa Jehová chi saá kúú ña̱ kivi kuyatin va̱ʼakaún nu̱úra. Kaʼvi 1 Timoteo 1:11 xíʼin 6:19.