LECCIÓN 04

¿Ndáa ta̱ kúú Ndióxi̱?

Siaʼa ka̱naña nu̱ú tutu

Nda̱a̱ tá ki̱xáʼa íyo na̱ yiví nu̱ú ñuʼú yóʼo, saáví ki̱xáʼana ndásakáʼnuna ku̱a̱ʼání ndióxi̱ vatá. Soo ña̱ Biblia káʼa̱nña xa̱ʼa̱ iin Ndióxi̱ ta̱ káʼnuníka nu̱ú ndiʼika ndióxi̱ vatá (2 Crónicas 2:5). ¿Ndáa ta̱ kúúra? Ta, ¿nda̱chun káʼnuníkara nu̱ú ndiʼika ndióxi̱ na̱ ndásakáʼnu na̱ yiví? Nu̱ú ña̱ lección yóʼo sakuaʼún, ndáaña kúni̱ Ndióxi̱ ná kunda̱a̱-iniún xa̱ʼa̱ra.

1. ¿Ndáaña kúú ki̱vi̱ Ndióxi̱, ta nda̱chun va̱ʼa xíni̱yó ña̱ kúni̱ra ña̱ ná kunda̱a̱-iniyó xa̱ʼa̱ ki̱vi̱ra?

Nu̱ú ña̱ Biblia káʼa̱n Ndióxi̱ xíʼinyó ndáaña kúú ki̱vi̱ra: “Yi̱ʼi̱ kúú Jehová. Ña̱yóʼo kúú ki̱víi̱” (kaʼvi Isaías 42:5, 8). Ki̱vi̱ Ndióxi̱ ña̱ tu̱ʼun hebreo sa̱ndáya̱ʼanaña ta kúúña Jehová, ku̱a̱ʼání na̱ xíni̱ va̱ʼa káʼa̱nna ña̱ ki̱vi̱ra kúni̱ kachiña ña̱ “kivi keʼéra nda̱a̱ ndáaka ña̱ kúni̱ miíra”. Jehová kúni̱ra ña̱ ná kunda̱a̱-iniyó xa̱ʼa̱ ki̱vi̱ra (Éxodo 3:15). ¿Nda̱chun va̱ʼa kúnda̱a̱-iniyó xa̱ʼa̱ ña̱yóʼo? Saáchi miíra ta̱xi ña̱ ná kaʼyína ki̱vi̱ra yáʼaka 7,000 yichi̱ nu̱ú Biblia.a Soo Jehová kúú ki̱vi̱ Ndióxi̱ ta̱ nda̱a̱ chí ndiví xíʼin nu̱ú ñuʼú yóʼo (Deuteronomio 4:39).

2. ¿Ndáaña káʼa̱n Biblia xíʼinyó xa̱ʼa̱ Jehová?

Ña̱ Biblia káʼa̱nña, ña̱ iinlá Jehová kúú Ndióxi̱ ta̱ nda̱a̱ nu̱ú ndiʼika ndióxi̱ na̱ ndásakáʼnu na̱ yiví. ¿Nda̱chun? Saáchi Jehová kúú ta̱ káʼnuníka nu̱ú iníísaá ñuyǐví (kaʼvi Salmo 83:18). Ta iinlá miíra kúú ta̱ kúúmií ndiʼi ndee̱, ña̱yóʼo kúni̱ kachiña ña̱ kivi keʼéra ndiʼi ña̱ kúni̱ miíra. Ta saátu miíra kúú ta̱ ke̱ʼé ndiʼi ña̱ʼa, ke̱ʼéra ndiʼi ña̱ íyo chí ndiví ta saátu ke̱ʼéra ndiʼi ña̱ íyo nu̱ú ñuʼú yóʼo (Apocalipsis 4:8, 11). Ta iinlá Jehová kúú ta̱ íyo ndiʼi tiempo, ta ndiʼi tiempo koora (Salmo 90:2).

NÁ SAKUAʼAKAYÓ XA̱ʼA̱ÑA

Ná kotoyó nda̱chun xa̱a̱ síín íyo título ña̱ káʼa̱nna xíʼin Ndióxi̱ nu̱ú ki̱vi̱ra, ta iinlá miíra naní saá. Ta sakuaʼayó ndáa ki̱ʼva táxira ña̱ kunda̱a̱-iniyó xa̱ʼa̱ ki̱vi̱ra, ta saátu nda̱chun kúni̱ra ña̱ ná kunda̱a̱-iniyó xa̱ʼa̱ ki̱vi̱ra.

Iin ta̱a xítora chí ndiví tá ñuú. Ki̱vi̱ Jehová va̱xiña chí ndiví.

3. Ku̱a̱ʼání título kúúmií Ndióxi̱, soo iinláva kúú ki̱vi̱ra

Ña̱ va̱ʼa kunda̱a̱-iniún nda̱chun síín íyo ki̱vi̱ na̱ yiví nu̱ú título ña̱ káʼa̱nna xíʼinna, kotondó VIDEO ta ka̱ʼa̱nndó xa̱ʼa̱ ña̱yóʼo:

VIDEO: Íyo ku̱a̱ʼání título, soo iinláva kúú ki̱vi̱na (0:41)

¿Nda̱chun xa̱a̱ síín íyo iin ki̱vi̱ nu̱ú iin título, tá kúú táta?

Ña̱ Biblia káʼa̱nña, na̱ yiví ku̱a̱ʼání ndióxi̱ ndásakáʼnuna. Kaʼvindó Salmo 136:1-3 ta ka̱ʼa̱nndó xa̱ʼa̱ ña̱yóʼo:

¿Ndáa ta̱ kúú Ndióxi̱ ta̱ káʼnuka nu̱ú inka ndióxi̱?

4. Jehová kúni̱ra ña̱ ná kunda̱a̱-iniún xa̱ʼa̱ ki̱vi̱ra ta ná kuniñúʼúnña

¿Nda̱chun va̱ʼa kúnda̱a̱-iniyó ña̱ kúni̱ Jehová ña̱ ná kunda̱a̱-iniún xa̱ʼa̱ ki̱vi̱ra? Kotondó VIDEO ta ka̱ʼa̱nndó xa̱ʼa̱ ña̱yóʼo:

VIDEO: ¿Á íyo iin ki̱vi̱ Ndióxi̱? (iin táʼvíña) (3:11)

Iin na̱ʼná ña̱ va̱xi nu̱ú video ña̱ naní ¿Á íyo iin ki̱vi̱ Ndióxi̱?. Iin ta̱ ta̱a xítora ki̱vi̱ Ndióxi̱, Jehová, ña̱ va̱xi nu̱ú Salmo 83:18 nu̱ú Biblia ña̱ naní “King James Version” ña̱ ka̱na tá ku̱i̱ya̱ 1611.

¿Nda̱chun túviún ña̱ kúni̱ Jehová ña̱ ná kunda̱a̱-inina xa̱ʼa̱ ki̱vi̱ra?

Jehová kúni̱ra ña̱ ná kuniñúʼu na̱ yiví ki̱vi̱ra. Kaʼvindó Romanos 10:13 ta ka̱ʼa̱nndó xa̱ʼa̱ ña̱yóʼo:

¿Nda̱chun ndáyáʼviní ña̱ kuniñúʼuyó ki̱vi̱ Ndióxi̱, Jehová?
¿Ndáaña ndóʼún tá xíniñúʼu iinna ki̱vi̱ún tá káʼa̱nna xíʼún?
¿Ndáaña ndóʼo Jehová tá xíniñúʼún ki̱vi̱ra?

5. Jehová kúni̱ra ña̱ ná koún migora

Iin ñaʼá ñá ñuu Camboya ñá naní Soten ni̱ka̱ʼa̱nñá, ña̱ iin ña̱ va̱ʼaní kúú ña̱ sakuaʼayó xa̱ʼa̱ ki̱vi̱ Ndióxi̱. Kotondó VIDEO ta ka̱ʼa̱nndó xa̱ʼa̱ ña̱yóʼo:

VIDEO: Xi̱kuni̱i̱ sakuaʼi̱ xa̱ʼa̱ Ndióxi̱ ta̱ nda̱a̱ (8:18)

Na̱ʼná ña̱ va̱xi nu̱ú video ña̱ naní “Xi̱kuni̱i̱ sakuaʼi̱ xa̱ʼa̱ Ndióxi̱ ta̱ nda̱a̱”. 1. Ñá Soten íyoñá xa̱ʼa̱ iin yitu̱n chí yuku̱, ta xítoñá chí ndiví ta káʼa̱nñá xíʼin Ndióxi̱ ta̱ nda̱a̱. 2. Ta̱ Herold sánáʼa̱ra ñá Soten ña̱ ki̱vi̱ Ndióxi̱ kúú Jehová.

Nda̱a̱ táki̱ʼva xi̱toyó nu̱ú video, ña̱ ni̱xa̱a̱ ñá Soten na̱kunda̱a̱-iniñá xa̱ʼa̱ ki̱vi̱ Ndióxi̱, ¿ndáa ki̱ʼva chi̱ndeétáʼanña xíʼinñá?

Ña̱ va̱ʼa xa̱a̱yó kooyó migo iin na̱ yiví, ña̱ siʼna kúnda̱a̱-iniyó xa̱ʼa̱ kúú ki̱vi̱na. Kaʼvindó Santiago 4:8a ta ka̱ʼa̱nndó xa̱ʼa̱ ña̱yóʼo:

¿Ndáaña kútóo Jehová keʼún?
¿Á túviún ña̱ kuxini̱ún ki̱vi̱ Ndióxi̱ ta kuniñúʼúnña kivi chindeétáʼanña xíʼún ña̱ kuyatinkaún nu̱úra? Ta, ¿nda̱chun?

ÑA̱ KÁʼA̱N SAVA NA̱ YIVÍ: “Xa̱ʼa̱ ña̱ iinlá Ndióxi̱ íyo, va̱ása ndáyáʼviví ndáa ki̱ʼva káʼa̱nyó xíʼinra”.

¿Á kándíxaún ña̱ ki̱vi̱ Ndióxi̱ kúú Jehová?
¿Ndáa ki̱ʼva ka̱ʼún xíʼin inkana ña̱ kúni̱ Ndióxi̱ ña̱ ná kuniñúʼuyó ki̱vi̱ra?

ÑA̱ XA̱A̱ SA̱KUAʼAYÓ

Jehová kúú ki̱vi̱ Ndióxi̱ ta̱ nda̱a̱, kúni̱ra ña̱ ná kunda̱a̱-iniyó xa̱ʼa̱ ki̱vi̱ra ta kuniñúʼuyóña, tasaá va̱ʼa xa̱a̱yó kooyó migora.

Ná ndakaʼányó xa̱ʼa̱ ña̱yóʼo

¿Nda̱chun síín íyo Jehová nu̱ú ndiʼi ndióxi̱ na̱ ndásakáʼnu na̱ yiví?
¿Nda̱chun xíniñúʼu kuniñúʼuyó ki̱vi̱ Ndióxi̱?
¿Á kúni̱ Jehová ña̱ ná koún migora? ¿Nda̱chun va̱ʼa kúnda̱a̱-iniún?

Ki̱vi̱ ña̱ sa̱ndíʼún ka̱ʼviún lección yóʼo:

Kivi keʼún ña̱yóʼo

Tá káʼún xa̱ʼa̱ Ndióxi̱, kuniñúʼu ki̱vi̱ra, Jehová.

Inkaka ña̱ kivi keʼún:

Inkaka ña̱ kivi keʼé miíún

NANDUKÚKA XA̱ʼA̱ÑA

Koto u̱ʼu̱n ña̱ʼa ña̱ náʼa̱ ña̱ ndixa íyo Ndióxi̱.

“¿Á ndixa íyo Ndióxi̱?” (Artículo ña̱ va̱xi nu̱ú jw.org)

Sakuaʼa nda̱chun kivi kandíxayó ña̱ ndiʼi tiempo íyo Ndióxi̱.

“¿Ndáana i̱xava̱ʼa Ndióxi̱?” (La Atalaya, 1 tí agosto ku̱i̱ya̱ 2014)

Koto nda̱chun xíniñúʼu kuniñúʼuyó ki̱vi̱ Ndióxi̱ ni kǒo xíni̱yó ndáa ki̱ʼva xi̱ka̱ʼa̱nnaña tá ya̱chi̱.

“¿Ndáa ta̱ kúú Jehová?” (Artículo ña̱ va̱xi nu̱ú jw.org)

¿Á ndáyáʼvi ndáa ki̱ʼva káʼa̱nyó xíʼin Ndióxi̱? Koto nda̱chun káʼa̱nyó ña̱ iinlá kúú ki̱vi̱ Ndióxi̱.

“¿Nda̱saa ki̱vi̱ Ndióxi̱ íyo?” (Artículo ña̱ va̱xi nu̱ú jw.org)

a Nu̱ú táʼvi 1 ña̱ folleto Ña̱ táxi yichi̱ nu̱úyó ña̱ va̱ʼa sakuaʼakayó xa̱ʼa Biblia kán ndani̱ʼíkaún ña̱ káʼa̱n xa̱ʼa̱ ndáaña kúni̱ kachi ki̱vi̱ Ndióxi̱, ta saátu kunda̱a̱-iniún nda̱chun sa̱kútaʼana ki̱vi̱ Ndióxi̱ nu̱ú sava Biblia.