Tá ná ndakuchiún: ku̱a̱ʼání bendición ndakiʼún

Ta̱ Jesús sa̱náʼa̱ra ña̱ va̱ʼa xa̱a̱yó kooyó na̱ cristiano, siʼna xíniñúʼu ndakuchiyó (kaʼvi Mateo 28:​19, 20). ¿Ndáaña kúni̱ kachi ña̱ ndakuchiyó? Ta, ¿ndáaña xíniñúʼu keʼé iin na̱ yiví ña̱ va̱ʼa xa̱a̱na ndakuchina?

1. ¿Ndáaña kúú ña̱ ndakuchiyó?

Tu̱ʼun ña̱ ndakuchi va̱xiña ti̱xin tu̱ʼun griego ta kúni̱ kachiña ña̱ “sa̱ʼvi níína ti̱xin ti̱kui̱í”. Tá nda̱kuchi ta̱ Jesús chi̱ka̱a̱níínara ti̱xin yu̱ta Jordán ta tá ndi̱ʼi ki̱tara ti̱xin ti̱kui̱í (Marcos 1:​9, 10). Tá ndákuchi na̱ cristiano na̱ nda̱a̱, saátu kíʼvi níí na̱yóʼo ti̱xin ti̱kui̱í.

2. ¿Ndáaña náʼa̱ iin na̱ yiví tá xa̱a̱ ndákuchina?

Tá iinna ndákuchina náʼa̱na ña̱ xa̱a̱ nda̱taxina miína ndaʼa̱ Jehová. Ta, ¿ndáaña xíniñúʼu keʼéyó ña̱ va̱ʼa ndataxiyó miíyó ndaʼa̱ Jehová? Xíniñúʼu keʼéyó iin oración nu̱úra ta ka̱ʼa̱nyó xíʼinra ña̱ kúni̱yó kachíñuyó nu̱úra ndiʼi tiempo. Ta ña̱yóʼo kéʼénaña tá kúma̱níka ndakuchina. Ti̱xin oración ña̱ kéʼé na̱ yiví na̱ kúni̱ ndataxi mií ndaʼa̱ Jehová káʼa̱nna xíʼinra ña̱ iinlá miíra ndasakáʼnuna, ta ña̱ ndáyáʼvika nu̱úna kúú ña̱ keʼéna ña̱ kúni̱ Ndióxi̱. Ta kúni̱na kundiku̱nna yichi̱ ta̱ Jesús xíʼin ña̱ sa̱náʼa̱ra, ta̱yóʼo ka̱chira: “Tá iinna kúni̱na kundiku̱nna yi̱ʼi̱ ná sandákoona keʼéna ña̱ kúni̱ miína [...] ta ná ndakundeéna kundiku̱nna yi̱ʼi̱” (Mateo 16:​24). Xa̱ʼa̱ ña̱ nda̱taxina miína ndaʼa̱ Jehová ta saátu ña̱ nda̱kuchina va̱ʼaní xa̱a̱na kutáʼanna xíʼinra ta saátu xíʼin inka na̱ ndásakáʼnu miíra.

3. ¿Ndáaña xíniñúʼu keʼéyó ña̱ va̱ʼa xa̱a̱yó ndakuchiyó?

Tá kúni̱ún ndakuchiún siʼna xíniñúʼu sakúaʼún xa̱ʼa̱ Jehová ta saátu ña̱ kandíxaúnra (kaʼvi Hebreos 11:6). Tá ku̱a̱ʼáka ña̱ʼa ná sakúaʼún xa̱ʼa̱ Jehová xa̱ún kandíxakaúnra ta kuʼvi̱ka-iniún kuniúnra. Ta ña̱yóʼo chindeétáʼanña xíʼún ña̱ kuni̱ún natúʼún xíʼin na̱ yiví ta saátu keʼún ña̱ káʼa̱n Biblia (2 Timoteo 4:2; 1 Juan 5:3). Tá xa̱a̱ kéʼé na̱ yiví ña̱ kúni̱ Jehová saá kivi xa̱a̱na ndataxina miína ndaʼa̱ra ta ndakuchina (Colosenses 1:​9, 10).a

NÁ SAKUAʼAKAYÓ XA̱ʼA̱ÑA

4. Ña̱ sánáʼa̱ ña̱ nda̱kuchi ta̱ Jesús miíyó

Ña̱ va̱ʼa kunda̱a̱ka-inindó xa̱ʼa̱ ña̱ nda̱kuchi ta̱ Jesús, kaʼvindó Mateo 3:​13-​17. Tá ndi̱ʼi ka̱ʼa̱nndó xa̱ʼa̱ ña̱yóʼo:

• ¿Á iin lée loʼo xi̱kuu ta̱ Jesús tá nda̱kuchira?

• Tá nda̱kuchira, ¿á loʼo kuití ti̱kui̱í sa̱káana xi̱níra? Tá saá, ¿ndáa ki̱ʼva nda̱kuchira?

Tá nda̱kuchi ta̱ Jesús saá ki̱xáʼara kéʼéra ña̱ ni̱ka̱ʼa̱n Ndióxi̱ xíʼinra. Kaʼvindó Lucas 3:​21-​23 xíʼin Juan 6:​38, ta ka̱ʼa̱nndó xa̱ʼa̱ ña̱yóʼo:

• Tá ndi̱ʼi nda̱kuchi ta̱ Jesús, ¿ndáa chiñu kúú ña̱ xi̱ndayáʼvika nu̱úra?

5. Kiviva xa̱ún ndakuchiún

Sana yíʼvíún tá ndákanixi̱níún ña̱ ndataxiún miíún ndaʼa̱ Ndióxi̱ xíʼin ña̱ ndakuchiún. Soo tá ná sakúaʼakaún xa̱ʼa̱ Jehová va̱ʼaka xa̱ún kuxini̱únra, va̱ása kaka-iniún ña̱ ndaka̱xiún keʼún ña̱ ndáyáʼviní yóʼo. Ña̱ va̱ʼa kunda̱a̱-iniún xa̱ʼa̱ sava na̱ yiví na̱ ke̱ʼé ña̱yóʼo, kotondó VIDEO.

VIDEO: Ndasandakú ña̱ kítáʼún xíʼin Jehová (1:​11)

Kaʼvindó Juan 17:3 xíʼin Santiago 1:5, ta ka̱ʼa̱nndó xa̱ʼa̱ ña̱yóʼo:

• ¿Ndáaña kivi chindeétáʼan xíʼin iin na̱ yiví ña̱ koo tu̱ʼvana ña̱ ndakuchina?

1. Ndátaxiyó miíyó ndaʼa̱ Jehová tá káʼa̱nyó xíʼinra ña̱ kúni̱yó kachíñuyó nu̱úra ndiʼi tiempo.

2. Tá ndákuchiyó náʼa̱yó nu̱ú ndiʼi na̱ yiví ña̱ xa̱a̱ nda̱taxiyó miíyó ndaʼa̱ Ndióxi̱.

6. Tá ndákuchina xáa̱na ndúuna na̱ ñuu Jehová

Tá ndákuchiyó ndúuyó táʼan iin familia na̱ va̱ʼaní kítáʼan na̱ íyo iníísaá ñuyǐví. Ni nda̱a̱ ndáaka ñuu ke̱eyó á ña̱ xi̱keʼéyó tá ya̱chi̱, ndiʼiyó inkáchi íyo ña̱ kándíxayó ta kéʼéyó ña̱ káʼa̱n Biblia. Kaʼvindó Salmo 25:​14 xíʼin 1 Pedro 2:​17, ta ka̱ʼa̱nndó xa̱ʼa̱ ña̱yóʼo:

• Nda̱a̱ táki̱ʼva káʼa̱n ña̱ versículo yóʼo ña̱ ndakuchiyó, ¿ndáa ki̱ʼva chindeétáʼanña xíʼinyó?

ÑA̱ XA̱A̱ SA̱KUAʼAYÓ

Ta̱ Jesús ni̱ka̱ʼa̱nra ña̱ va̱ʼa xa̱a̱yó kooyó na̱ cristiano xíniñúʼu ndakuchiyó. Ña̱ va̱ʼa keʼéyó ña̱yóʼo xíniñúʼu chika̱a̱níyó ndee̱ ña̱ kandíxaníkayó Jehová ta keʼéyó ña̱ káʼa̱nra ta ndataxiyó miíyó ndaʼa̱ra.

Ná ndakaʼányó xa̱ʼa̱ ña̱yóʼo

• ¿Ndáaña kúú ña̱ ndakuchiyó ta nda̱chun ndáyáʼviníña?

• ¿Ndáa ki̱ʼva kítáʼan ña̱ ndataxiyó miíyó ndaʼa̱ Ndióxi̱ xíʼin ña̱ ndakuchiyó?

• ¿Ndáaña siʼna xíniñúʼu keʼé iin na̱ yiví tá kúma̱níka ndataxina miína ndaʼa̱ Ndióxi̱ ta ndakuchina?

NANDUKÚKA XA̱ʼA̱ÑA

Kunda̱a̱-ini xa̱ʼa̱ ña̱ va̱ása va̱ʼa ndákanixi̱nína xa̱ʼa̱ ña̱ ndakuchiyó ta ndáaña ndixa kúni̱ kachi ña̱yóʼo.

“¿Ndáaña kúni̱ kachi ña̱ ndakuchiyó?” (Artículo ña̱ va̱xi nu̱ú jw.org)

Kaʼvi xa̱ʼa̱ sava ña̱ chindeétáʼan xíʼún ña̱ xa̱ún ndakuchiún.

“Ña̱ kúʼvi̱-iniyó xíniyó Jehová chíndaʼáña miíyó ña̱ ndakuchiyó” (Tutu Ña̱ Nátúʼun xíʼinyó, tí marzo ku̱i̱ya̱ 2020)

Kaʼvi xa̱ʼa̱ iin ta̱a ta̱ nda̱kuchi soo kǒo ní keʼéraña xa̱ʼa̱ ña̱ ni̱kusi̱í kuití inira.

“Xi̱kuni̱na ña̱ ná ndani̱ʼí miíi̱ ña̱ nda̱a̱” (La Atalaya, 1 tí febrero u̱i̱ya̱ 2013)

Koto ña̱ xa̱a̱yó ndakuchiyó iin ña̱ ndáyáʼviní kúú ña̱ keʼéyó ña̱yóʼo ta saátu ndáa ki̱ʼva ixatu̱ʼvaún miíún ña̱ keʼúnña.

“¿Á xa̱a̱ xíniñúʼu ndakuchii̱?” (Lo que los jóvenes preguntan. Respuestas prácticas [volumen 2], capítulo 37)