Enero

Xi̱ni ta̱ Jesús ñá ñaʼá yóʼo, ta ku̱ndáʼviní-inira xi̱nirañá (Luc. 7:13). Ni̱kusuchíkaví-inira xíʼinñá ta kǒo níkundáʼvi kuití inira kunirañá, chi ndu̱kúra ki̱ʼva ña̱ chindeétáʼanra xíʼinñá. Ta vitákaví ni̱ka̱ʼa̱nra xíʼinñá: “Kǒo kuakukaún”. Soo va̱ása níka̱ʼa̱n kuitíra xíʼinñá, saáchi nda̱a̱ sa̱ndátakura se̱ʼeñá (Luc. 7:​14, 15). ¿Ndáaña sákuaʼayó xíʼin ña̱ ke̱ʼé ta̱ Jesús? Sákuaʼayó ña̱ xíniñúʼu kundáʼvi-iniyó kuniyó na̱ ni̱xi̱ʼi̱ na̱ veʼe. Nda̱a̱ táki̱ʼva ke̱ʼé ta̱ Jesús kiviva sakúaʼayó kundáʼvi-iniyó kuniyó na̱ ni̱xi̱ʼi̱ iin na̱ veʼe. Ña̱kán, siʼna ná kotoyó ndáaña ndóʼona, tándi̱ʼi ná kotoyó ndáaña kivi keʼéyó á ka̱ʼa̱nyó ña̱ va̱ʼa sandíkoyó-inina (Prov. 17:17; 2 Cor. 1:​3, 4; 1 Ped. 3:8). Tu̱ʼun ña̱ ka̱ʼa̱nyó xíʼinna á ña̱ʼa ña̱ keʼéyó xa̱ʼa̱na, va̱ʼaní sandíkoña-inina. w23.04 6 párr. 14, 15

Ni ku̱ndaa̱-ini ta̱ Jesús ña̱ ni̱xi̱ʼi̱ migora ta̱ Lázaro, u̱vi̱ka ki̱vi̱ ki̱ndoo̱ra ñuu kán ta saáví nda̱kiʼinra ku̱a̱ʼa̱nra chí Betania. Ta xa̱a̱ ku̱míví ki̱vi̱ ni̱xi̱ʼi̱ ta̱ Lázaro tá ni̱xa̱a̱ra ñuu Betania. Ña̱ xi̱kuni̱ ta̱ Jesús keʼéra kúú iin ña̱ va̱ʼa xa̱ʼa̱ na̱ migora ta xíʼin ña̱yóʼo ndukáʼnu Jehová (Juan 11:​6, 11, 17). ¿Ndáaña kivi keʼéyó xa̱ʼa̱ na̱ migoyó xíʼin ña̱ sa̱kúaʼayó nu̱ú relato yóʼo? Tá chi̱ndaʼá ñá María xíʼin ñá Marta chiñu ku̱a̱ʼa̱n nu̱ú ta̱ Jesús, va̱ása níka̱ʼa̱nná xíʼinra ña̱ ku̱ʼu̱nra chí ñuu Betania. Chi ña̱ ni̱ka̱ʼa̱nná xíʼin ta̱ Jesús kúú ña̱ ndeéndóʼo ta̱ migora (Juan 11:3). Tá ni̱xi̱ʼi̱ ta̱ Lázaro, ta̱ Jesús kiviva sandátakurara ni xíka íyora. Soo nda̱kaxinra ku̱ʼu̱nra ñuu Betania ña̱ va̱ʼa kotora ñá María xíʼin ñá Marta, chi náyóʼo va̱ʼaní xi̱kitáʼanná xíʼinra. ¿Á kúúmiíún iin na̱ migoún na̱ va̱ʼaní chíndeétáʼan xíʼún ni va̱ása ndúkú miíúnña nu̱úna? Tá saá íyoña, na̱kán chindeétáʼan xíʼún tá íyo ña̱ sándi̱ʼi̱-iniún (Prov. 17:17). Tá ná kundiku̱nyó yichi̱ ta̱ Jesús va̱ʼaní xa̱a̱yó kutáʼanyó xíʼin na̱ migoyó. w23.04 10 párr. 10, 11

Tá yáʼayó nu̱ú iin tu̱ndóʼo, sana kíxáʼayó ndákanixi̱níyó ña̱ va̱ása taxiví Jehová ñuyǐví xa̱á kundooyó. Soo tá saá ndákanixi̱níyó, ¿á kúni̱ kachiña ña̱ loʼoní kándíxayó Jehová? Va̱ásaví. Ná ka̱ʼa̱nyó xa̱ʼa̱ iin ejemplo. Tá kúúña tiempo vi̱xin, sana kixáʼayó ndakanixi̱níyó ña̱ va̱ása kixaa̱ví tiempo niʼní. Soo tiempo niʼní kíxaa̱vaña. Ta saátu tá ndákava-iniyó, sana kixáʼayó ndakanixi̱níyó ña̱ va̱ása kixaa̱ví ñuyǐví xa̱á, soo tá ndinuʼuní-iniyó kándíxayó Ndióxi̱, kandíxavayó ña̱ saxínura ña̱ káʼa̱nra keʼéra (Sal. 94:​3, 14, 15; Heb. 6:​17-19). Ta ña̱yóʼo kúú ña̱ chindeétáʼan xíʼinyó ña̱ siʼnaka chiñu Jehová kundi̱ʼi̱-iniyó xa̱ʼa̱. Saátu xíniñúʼu kandíxaníyó Jehová tá nátúʼunyó xa̱ʼa̱ra xíʼin na̱ yiví. Tá káʼa̱nyó xíʼinna xa̱ʼa̱ ñuyǐví xa̱á ña̱ taxira kundooyó, ku̱a̱ʼání na̱ yiví va̱ása kándíxa ña̱yóʼo (Mat. 24:14; Ezeq. 33:32). Soo ná va̱ása ndakanixi̱níyó nda̱a̱ táki̱ʼva ndákanixi̱ní na̱ yiví yóʼo. Ta ña̱ va̱ʼa kǒo kixáʼayó ndakanixi̱níyó saá, xíniñúʼu chikaa̱kayó ndee̱ ña̱ kandíxakayó Ndióxi̱. w23.04 27 párr. 6, 7

¿Á xa̱a̱ ndákanixi̱níún sava yichi̱ á ndákuiin Jehová oración ña̱ kéʼún nu̱úra? Tá saá ndóʼún, su̱ví iinlá yóʼó ndóʼo saá. Chi ku̱a̱ʼání na̱ hermano xa̱a̱ ndákanixi̱nína xa̱ʼa̱ ña̱yóʼo tá yáʼana nu̱ú iin tu̱ndóʼo ña̱ yo̱ʼvi̱ní. Sanatu kivi ixayo̱ʼvi̱ña xíʼin miíyó ña̱ kotoyó ndáa ki̱ʼva ndákuiin Jehová oraciónyó tá yáʼayó nu̱ú iin tu̱ndóʼo ña̱ sáxo̱ʼvi̱ní miíyó. Kivi kandíxayó ña̱ ndákuiin Jehová oración ña̱ kéʼé na̱ ndásakáʼnu miíra. Biblia káʼa̱nña xíʼinyó xa̱ʼa̱ Jehová ña̱ kúʼvi̱ní-inira xínira miíyó ta ndáyáʼviníyó nu̱úra (Ageo 2:7; 1 Juan 4:10). Xa̱ʼa̱ ña̱kán káʼa̱nra xíʼinyó ña̱ ná ka̱ʼa̱nyó xíʼinra ña̱ chindeétáʼanra xíʼinyó (1 Ped. 5:​6, 7). Saátu kúni̱ra chindeétáʼanra xíʼinyó ña̱ yatin kooyó xíʼinra ña̱ va̱ʼa kundeé-iniyó ya̱ʼayó nu̱ú nda̱a̱ ndáaka tu̱ndóʼo ña̱ kúúmiíyó. Nu̱ú Biblia ndáni̱ʼíyó ku̱a̱ʼání ña̱ káʼa̱n xíʼinyó ndáa ki̱ʼva nda̱kuiin Jehová oración na̱ xi̱ndasakáʼnu miíra tiempo xi̱naʼá. w23.05 8 párr. 1-4

Ñá María va̱ʼaní xi̱kaʼviñá tu̱ʼun Ndióxi̱ ña̱kán va̱ʼaní xi̱kitáʼanñá xíʼin Jehová ta su̱ví ta̱ José kúú ta̱ níxi̱ka̱ʼa̱n xíʼinñá ña̱ keʼéñá ña̱yóʼo. Ta saátu xi̱taváñá tiempo ña̱ ndakanixi̱níñá xa̱ʼa̱ ña̱ xi̱kaʼviñá (Luc. 2:​19, 51). Xa̱ʼa̱ ña̱ va̱ʼaní xi̱kaʼvi ñá María tu̱ʼun Ndióxi̱, va̱ʼaní xi̱kitáʼanñá xíʼin yiíñá. Ta ku̱a̱ʼání ná hermana ná ndóo tiempo vitin chíkaa̱ná ndee̱ ña̱ kundiku̱nná yichi̱ ñá María. Ná kotoyó ña̱ ndo̱ʼo iin ñá hermana ñá naní Émiko. Ñáyóʼo káchiñá: “Tá ni̱xi̱yo kúa̱i̱n xi̱tavái̱ tiempo ña̱ kaʼvii̱ tu̱ʼun Ndióxi̱ ta ka̱ʼi̱n xíʼin Jehová. Soo tá ti̱ndaʼíi̱, yiíi̱ kúú ta̱ xi̱keʼé oración xa̱ʼa̱ u̱vi̱ saándi̱ ta xi̱chindeétáʼanra xíʼi̱n ña̱ kaʼvindi̱ tu̱ʼun Ndióxi̱. Xi̱kunda̱a̱-inii̱ ña̱ xi̱xiniñúʼu tavátu miíi̱ tiempoi̱ ña̱ va̱ʼa kaʼvii̱ tu̱ʼun Ndióxi̱. Ña̱kán vitin távái̱ tiempo ña̱ va̱ʼa ka̱ʼi̱n xíʼin Jehová, kaʼvii̱ tu̱ʼunra ta ndakanixi̱níi̱ xa̱ʼa̱ña” (Gál. 6:5). Ndóʼó ná xa̱a̱ ti̱ndaʼa̱ tá ná chika̱a̱níndó ndee̱ ña̱ vií kutáʼanndó xíʼin Jehová, saá kúú ña̱ kuʼvi̱níka-ini yiíndó kunira ndóʼó ta kusi̱íní-inira xíʼin ña̱ kéʼéndó (Prov. 31:30). w23.05 22 párr. 6

Tá xa̱a̱ xáʼnuvíyó saá sákuaʼayó ña̱ ixato̱ʼóyó Jehová á ña̱ yi̱ʼvíyó kuniyóra ta kǒo ña̱yóʼo kúúmiíyó tá kákuyó. Ta iin ki̱ʼva ña̱ keʼéyó ña̱yóʼo kúú ña̱ kotoyó ndiʼi ña̱ i̱xava̱ʼara, tá xítoyó ndiʼi ña̱ i̱xava̱ʼa Jehová kíʼinyó kuenta ña̱ ndíchiníra, ña̱ íyoní ndee̱ra ta kúʼvi̱ní-inira xínira miíyó, ña̱kán íxato̱ʼóníyóra ta kúʼvi̱ní-iniyó xíniyóra (Rom. 1:20). Inka ña̱ chindeétáʼan xíʼinyó ña̱ ixato̱ʼóníyó Jehová á ña̱ yi̱ʼvíyó kuniyóra kúú ña̱ ka̱ʼa̱n ni̱ʼiyó xíʼinra. Tá káʼa̱n ni̱ʼiyó xíʼinra ña̱yóʼo chindeétáʼan xíʼinyó ña̱ kǒo kaka-iniyó ña̱ ndixa íyora. Tá yáʼayó nu̱ú iin tu̱ndóʼo káʼa̱nyó xíʼinra ña̱ chindeétáʼanra xíʼinyó, tá kéʼéyó ña̱yóʼo saá kíʼinyó kuenta ña̱ kúúmiíníra ndee̱. Ta ná taxiníyó tíxa̱ʼvi ndaʼa̱ra xa̱ʼa̱ ña̱ ta̱xira se̱ʼera ni̱xi̱ʼi̱ xa̱ʼa̱yó chi xíʼin ña̱yóʼo ni̱na̱ʼa̱ra ña̱ kúʼvi̱ní-inira xínira miíyó. Tá yáʼayó nu̱ú iin tu̱ndóʼo ta xíniñúʼu ndaka̱xinyó ndáaña keʼéyó, káʼa̱nyó xíʼinra ña̱ chindeétáʼanra xíʼinyó chi ndíchiníra. Tá káʼa̱nyó xíʼin Jehová, ña̱yóʼo chindeétáʼanña xíʼinyó ña̱ ixato̱ʼóníyóra ta saátu ña̱ ndakaʼányó ña̱ kǒo xíniñúʼu keʼéyó iin ña̱ va̱ása va̱ʼa ña̱ sákuxíka miíyó nu̱úra. w23.06 15 párr. 6, 7

Jehová kúú ta̱ íxava̱ʼa ley, ta káxiní káʼa̱nra xíʼin na̱ ñuura ndáaña xíniñúʼu keʼéna. Tá kúú, na̱ Cuerpo Gobernante na̱ ni̱xi̱yo tá siglo nu̱ú ni̱ka̱ʼa̱nna ndáa u̱ni̱ ña̱ʼa kúú ña̱ xíniñúʼu kiʼinníyó kuenta xíʼin. Ña̱ nu̱ú, ña̱ kǒo xíniñúʼu ndasakáʼnuyó ndióxi̱ vatá chi iinlá Jehová kúú ta̱ xíniñúʼu ndukáʼnu. Ña̱ u̱vi̱, ña̱ ixato̱ʼóyó ni̱i̱ chi ña̱ yi̱i̱ kúú ña̱yóʼo. Ña̱ u̱ni̱, ná kǒo keʼéyó ku̱a̱chi kini, tá kúú ña̱ ku̱su̱nyó xíʼin na̱ kǒo nítindaʼa̱ xíʼinyó (Hech. 15:​28, 29). ¿Ndáaña kivi keʼéyó tiempo vitin tasaá kǒo taxiyó nasamana ña̱ ndákanixi̱níyó? Kǒo ndásakáʼnuyó ndióxi̱ vatá chi iinlá mií Jehová ndásakáʼnuyó. Jehová ni̱ka̱ʼa̱nra xíʼin na̱ ñuu Israel ña̱ iinlá miíra xi̱niñúʼu ndasakáʼnuna (Deut. 5:​6-10). Tá ni̱ka̱ʼa̱n ta̱ Ndi̱va̱ʼa xíʼin ta̱ Jesús ña̱ ná ndasakáʼnurara, ta̱ Jesús ni̱ka̱ʼa̱nra ña̱ iinlá Jehová kúú ta̱ xíniñúʼu ndukáʼnu (Mat. 4:​8-10). Xa̱ʼa̱ ña̱kán kǒo ndásakáʼnuyó santo á imagen ña̱ ñúʼu veʼe-ñu̱ʼu, ta ni kǒo ndásakáʼnuyó na̱ político, na̱ chíñu á na̱ sísikí, saáchi iinlá Jehová ta̱ i̱xava̱ʼa ndiʼi ña̱ʼa kúú ta̱ ndásakáʼnuyó (Apoc. 4:11). w23.07 14, 15 párr. 3, 4

Na̱ yiví na̱ kǒo ndásakáʼnu Jehová kúni̱na ku̱su̱nna xíʼin na̱ yiví na̱ ta̱ʼán tindaʼa̱ xíʼinna, ta saátu kútóonína kotonde̱ʼéna nu̱ú kée na̱ yiví chálá (Efes. 4:19). Xa̱ʼa̱ ña̱kán xíniñúʼu ndakundeéyó yi̱ʼvíyó kuniyó Jehová ta kuxíkáyó nu̱ú ña̱ kini. Nu̱ú Proverbios capítulo 9 káʼa̱nña xa̱ʼa̱ u̱vi̱ ná ñaʼá ná ndána̱ʼa̱ u̱vi̱ ña̱ʼa. Iinñá ndána̱ʼa̱ ña̱ ndíchi ta inkañá ndána̱ʼa̱ ña̱ kíʼví. U̱vi̱ saá ná ñaʼá ná ka̱ʼa̱nyó xa̱ʼa̱ vitin, káʼa̱nná xíʼin na̱ yiví kíʼví na̱ kǒo kúúmií ña̱ ndíchi ña̱ ná ku̱ʼu̱nna kuxuna veʼená (Prov. 9:​1, 4-6). Tá ná kuniso̱ʼoyó ña̱ káʼa̱n ñaʼá ndíchi kutakuvayó, soo tá ná kuniso̱ʼoyó ña̱ káʼa̱n ñaʼá ñá kíʼví na̱ kuviva kúúyó. Ná kixáʼayó ka̱ʼa̱nyó xa̱ʼa̱ “ñaʼá ñá kíʼví” (Prov. 9:​13-18). Kǒo kúkaʼan nu̱úñá ta kána kóʼóñá: “Ndiʼi na̱ kǒo xíni̱ á na̱ kíʼví ná kixina yóʼo”. Ta, ¿ndáaña ndóʼo na̱ ku̱a̱kiʼvi veʼeñá? “Kán íyo na̱ xa̱a̱ ndátu kuvi”. Ta tutu ña̱ Proverbios káʼa̱nña: “Ndiʼi na̱ xáa̱ veʼeñá na̱ kuvi kúúna” (Prov. 2:​11-19). Proverbios 5:​3-10 káʼa̱nña xa̱ʼa̱ inka ñaʼá ñá kininí kéʼé saáchi kéʼéñá ña̱ kúni̱ miíñá. Siaʼa káchi Proverbios xa̱ʼa̱ ñáyóʼo: “Na̱ ndíku̱n sa̱táñá na̱ kuvi kúúna”. w23.06 21, 22 párr. 6, 7

Na̱ anciano xíniñúʼu chikaa̱na ndee̱ ña̱ viíní ndakanixi̱nína tasaá chinúuna iin yichi̱ va̱ʼaní nu̱ú na̱ congregación (1 Tim. 3:​2, 3). Tá kúú, iin ta̱ anciano ta xa̱a̱ chéeka kǒo ndákanixi̱níra ña̱ káʼa̱n miíra kúú ña̱ xíniñúʼu kuniso̱ʼona, saáchi kúnda̱a̱-inira ña̱ mií Jehová kivi kuniñúʼura inka ta̱ anciano ña̱ ka̱ʼa̱nra iin ña̱ʼa ña̱ chindeétáʼan xíʼin ndiʼina. Ta tá inka na̱ anciano kíʼinna kuenta ña̱ va̱ʼava íyo ña̱ ni̱ka̱ʼa̱n ta̱yóʼo, kéʼévanaña ni xa̱a̱ síín síín ndákanixi̱nína. Tá vií ndákanixi̱níyó ku̱a̱ʼání ña̱ va̱ʼa ndákiʼinyó. Tá kúú, va̱ʼaka kítáʼanyó xíʼin na̱ hermanoyó ta kǒo ku̱a̱chi káku ti̱xin congregación. Xa̱a̱ síín íyo iin tá iinyó, ta xa̱a̱ síín costumbre kúúmiíyó, soo ña̱yóʼo chíndeétáʼanña xíʼinyó ña̱ va̱ʼaníka ndasakáʼnuyó Jehová. Ta saátu kúsi̱íní-iniyó chi kéʼéyó nda̱a̱ táki̱ʼva kéʼé Jehová, ña̱ viíní ndákanixi̱níyó ta kúnda̱a̱-iniyó xíʼin ña̱ ndóʼo inkana. w23.07 25 párr. 16, 17

Ta̱ Daniel xi̱kaʼvira profecía chi xi̱kuni̱ra kunda̱a̱-inira xa̱ʼa̱ ña̱ nda̱a̱ ta va̱ʼa ke̱ʼéra ña̱yóʼo chi vitá ni̱xi̱yo inira. Ta saátu xi̱kunda̱a̱-inira ña̱ mií Jehová táxira ña̱ ndíchi ndaʼa̱ na̱ yiví na̱ ndíku̱n ña̱ káʼa̱nra ta kándíxanara (Dan. 2:​27, 28). Ta̱ Daniel ni̱na̱ʼa̱ra ña̱ vitá íyo inira chi ni̱ka̱ʼa̱nra xíʼin Jehová ña̱ chindeétáʼanra xíʼinra (Dan. 2:18). Ta saátu viíní xi̱kaʼvira ña̱ va̱xi nu̱ú tu̱ʼun Ndióxi̱ ta viíní xi̱nandukúra xa̱ʼa̱ ña̱ xi̱kaʼvira (Jer. 25:​11, 12; Dan. 9:2). ¿Ndáa ki̱ʼva kundiku̱nyó yichi̱ ta̱ Daniel? Koto ndáa xa̱ʼa̱ kéʼúnña. ¿Nda̱chun káʼviún profecía ña̱ va̱xi nu̱ú Biblia? ¿Á xa̱ʼa̱ ña̱ kúni̱ún kunda̱a̱-iniún xa̱ʼa̱ ña̱ nda̱a̱ kúúña? Tá xa̱ʼa̱ ña̱kán kéʼúnña Jehová chindeétáʼanvara xíʼún (Juan 4:​23, 24; 14:​16, 17). Sava na̱ yiví káʼvina Biblia chi kúni̱na ndani̱ʼína ña̱ʼa ña̱ chindeétáʼan xíʼinna ña̱ ka̱ʼa̱nna xíʼin inka na̱ yiví ña̱ su̱ví ña̱ nda̱a̱ kúú ña̱ káʼa̱n ña̱yóʼo. Saátu kǒo kúni̱na kandíxana ña̱ káʼa̱n tu̱ʼun Ndióxi̱ chi kéʼéna ña̱ kúni̱ miívana, kúúña ña̱ va̱ʼa á ña̱ va̱ása va̱ʼa. Ña̱kán tá káʼviyó xa̱ʼa̱ profecía xíniñúʼu kaʼviyóña xa̱ʼa̱ ña̱ kúni̱yó sakúaʼayó xa̱ʼa̱ ña̱ nda̱a̱. w23.08 9 párr. 7, 8

Iin ña̱ kivi kasi nu̱úyó ña̱ kusi̱í-iniyó kachíñuyó nu̱ú Jehová kúú ña̱ chitáʼanyó miíyó xíʼin inkana (Gál. 6:4). Tá saá ná keʼéyó, kivi kixáʼayó keetáʼanyó xíʼin inkana á ña̱ kukúini̱-iniyó kuniyóna (Gál. 5:26). Ña̱kán, kivi ndakava-iniyó chi kǒo kívi keʼéyó nda̱a̱ táki̱ʼva kéʼé na̱kán. Tá ndátuyó iin ña̱ʼa soo va̱ása kama xínuña, kivi ndi̱ʼi̱ní-iniyó (Prov. 13:12). Ta saátu íyo ña̱ chitáʼanyó miíyó xíʼin inkana, chi ndátuyó ña̱ kixaa̱ ki̱vi̱ ña̱ kivi keʼéyó nda̱a̱ táki̱ʼva kéʼé na̱kán soo kǒo kuchiñuvíyó keʼéyóña, ta xa̱ʼa̱ ña̱kán ndákava-iniyó. Kǒo keʼún ña̱ʼa ña̱ kǒo kívi keʼún, saáchi Jehová kǒo íxandúxara xíʼún ña̱ keʼún iin chiñu ña̱ kǒo kuchiñún keʼún (2 Cor. 8:12). Kǒo kundi̱ʼi̱-iniún saáchi Jehová va̱ása chítáʼanra yóʼó xíʼin inkana (Mat. 25:​20-23). Ta̱kán chíndayáʼvira chiñu ña̱ kéʼún nu̱úra: ña̱ nda̱kú íyo iniún xíʼinra, ña̱ kúndeé-iniún tá yáʼún nu̱ú tu̱ndóʼo. w23.08 29 párr. 10, 11

¿Ndáa ki̱ʼva nda̱kuiin Jehová ña̱ ni̱ka̱ʼa̱n ta̱ Sansón xíʼinra? Jehová ke̱ʼéra iin milagro ta ki̱xáʼa kána ti̱kui̱í. Tá xi̱ʼi ta̱ Sansón ti̱kui̱í ndu̱ndakú tukura ta ndu̱va̱ʼa-inira (Juec. 15:19). Ku̱a̱ʼá ku̱i̱ya̱ ni̱ya̱ʼa tasaá ka̱ʼyí ta̱ Samuel tutu ña̱ Jueces, nisaá xi̱kanakava ti̱kui̱í yóʼo. Sana tá xi̱xini na̱ ñuu Israel nu̱ú xi̱kana ti̱kui̱í yóʼo, xi̱ndakaʼánna ña̱ tá ndáa-inina Jehová chindeétáʼanvara xíʼinna ya̱ʼana nu̱ú tu̱ndóʼo. Nda̱a̱ táki̱ʼva ke̱ʼé ta̱ Sansón ndiʼiyó xíniñúʼu ka̱ʼa̱nyó xíʼin Jehová ña̱ ná chindeétáʼanra xíʼinyó, ni xíni̱nívayó keʼéyó iin ña̱ʼa á ni va̱ʼaníva chiñu kéʼéyó nu̱úra, ndiʼivayó xíniñúʼu ña̱ chindeétáʼanra xíʼinyó. Ndákuniyó ña̱ kǒo kívi keʼéyó ndiʼi ña̱ʼa chi kúnda̱a̱-iniyó ña̱ xíniñúʼu chindeétáʼan Jehová xíʼinyó. Tá xi̱ʼi ta̱ Sansón ti̱kui̱í tá ta̱xi Jehová nda̱ʼara saá kúú ña̱ nda̱kiʼin tukura ndee̱ra. Nda̱a̱ táki̱ʼva ke̱ʼé ta̱ Sansón, ña̱ va̱ʼa kandíxayó Ndióxi̱ ná kuniñúʼuyó ndiʼi ña̱ táxi na̱ ñuura ndaʼa̱yó (Mat. 11:28). w23.09 4 párr. 9, 10

Ndakanixi̱ní ña̱ ndíka̱ún predicación ta iin na̱ yiví ki̱xáʼana káʼa̱nna ña̱ kini xa̱ʼa̱ Jehová á kúsi̱kindaana ña̱ káʼa̱n Biblia, ¿ndáaña chindeétáʼan xíʼinyó ña̱ vií ndakuiinyó yuʼúna? Ña̱ ndukúyó espíritu santo nu̱ú Jehová. Ná ka̱ʼa̱nyó xíʼinra ña̱ taxira ña̱ ndíchi ndaʼa̱yó ta saátu ña̱ vitá koo iniyó. Soo, ¿ndáaña kivi keʼéyó tá ki̱ʼinyó kuenta ña̱ va̱ása vií níndakuiinyó yuʼú na̱ yiví? Ná ka̱ʼa̱n tukuyó xíʼin Jehová ña̱ chindeétáʼanra xíʼinyó ña̱ vií ndakuiinyó yuʼúna inka yichi̱. Tá saá ná keʼéyó, Jehová taxira espíritu santora ndaʼa̱yó ña̱ va̱ʼa kǒo sa̱a̱ kamayó ta vií ndakuiinyó yuʼú na̱ yiví. Íyo sava texto ña̱ kivi chindeétáʼan xíʼinyó ña̱ vitá koo iniyó tasaá vií ndakuiinyó yuʼú na̱ yiví tá kíxáʼana káʼa̱nna ña̱ va̱ása va̱ʼa xíʼinyó. Ta espíritu santo kivi chindeétáʼan xíʼinyó ña̱ ndakaʼányó xa̱ʼa̱ ña̱yóʼo (Juan 14:26). Tá kúú, nu̱ú tutu ña̱ Proverbios va̱xi ña̱ kivi chindeétáʼan xíʼinyó ña̱ vií ndakuiinyó yuʼú inkana (Prov. 15:18). Ta saátu káʼa̱nña xíʼinyó ndáaña va̱ʼa ndakiʼinyó tá kǒo sáa̱ kamayó (Prov. 10:19; 17:27; 21:23; 25:15). w23.09 15 párr. 6, 7

Nda̱kúní ni̱xi̱yo ini ta̱ apóstol Pedro xíʼin Jehová ta ku̱a̱ʼání ku̱i̱ya̱ ka̱chíñura nu̱úra. Ni̱xi̱kara sa̱náʼa̱ra na̱ yiví xíʼin ta̱ Jesús, ta ta̱yóʼo kúú ta̱ nu̱ú ta̱ ni̱xa̱ʼa̱n sa̱náʼa̱ na̱ yiví na̱ inka ñuu, ta saátu xi̱kuura Cuerpo Gobernante. Tá si̱lóʼo kúma̱ní kuvira, Jehová ta̱xira inka chiñu ndaʼa̱ra. Ti̱xin ku̱i̱ya̱ 62 iinsaá nda̱a̱ ku̱i̱ya̱ 64, Jehová ni̱ka̱ʼa̱nra xíʼinra ña̱ ná kaʼyíra u̱vi̱ carta, ña̱ naní primera xíʼin segunda ña̱ Pedro (2 Ped. 1:​13-15). Tá ka̱ʼyí ta̱ Pedro carta yóʼo, na̱ cristiano na̱ ni̱xi̱yo tiempo saá ndeéní xi̱ndi̱ʼi̱-inina xa̱ʼa̱ tu̱ndóʼo ña̱ xi̱yaʼana (1 Ped. 1:6). Ni̱xi̱yo sava na̱ yiví na̱ xi̱sanáʼa̱ ña̱ vatá ti̱xin congregación, chi xi̱kuni̱na sandáʼvina na̱ hermano tasaá kixáʼana keʼéna ña̱ kini nu̱ú Jehová (2 Ped. 2:​1, 2, 14). Tiempo saá si̱lóʼoní xi̱kuma̱ní ña̱ sandíʼi-xa̱ʼa̱ na̱ romano ñuu Jerusalén ta saátu templo Jehová (1 Ped. 4:7). Ña̱kán carta ña̱ ka̱ʼyí ta̱ Pedro va̱ʼaní chi̱ndeétáʼanña xíʼin na̱ cristiano na̱ ni̱xi̱yo tiempo saá ña̱ ya̱ʼana nu̱ú tu̱ndóʼo. w23.09 26 párr. 1, 2

Ta̱ Jesús va̱ʼaní yichi̱ sa̱ndákoora nu̱úyó saáchi “sa̱kuaʼara ña̱ viíní kandíxara xa̱ʼa̱ ndiʼi ña̱ʼa ña̱ ni̱xo̱ʼvi̱ra”. Saátu miíyó xíniñúʼu sakúaʼayó kuniso̱ʼoyó tá yáʼayó nu̱ú tu̱ndóʼo. Ná ndakaʼányó ndáaña ku̱u tá ndeéní xi̱ndikaa̱ COVID-19. Ni̱ka̱ʼa̱n na̱ ñuu Ndióxi̱ xíʼinyó ña̱ va̱ása ndakutáʼankayó ti̱xin salón ña̱ koo reunión ta saátu ni̱ka̱ʼa̱nna ña̱ va̱ása ku̱ʼu̱nkayó veʼe tá veʼe ña̱ natúʼunyó xa̱ʼa̱ Ndióxi̱. ¿Ndáaña ndo̱ʼún xa̱ʼa̱ ña̱yóʼo? ¿Á i̱xayo̱ʼvi̱ña xíʼún kuniso̱ʼún? Ña̱ xi̱niso̱ʼún kúú ña̱ chi̱ndeétáʼan xíʼún ña̱ kǒo ña̱ níndoʼún, ta saátu chi̱ndeétáʼanña xíʼún ña̱ va̱ʼaka kutáʼún xíʼin Jehová ta saátu xíʼin na̱ hermano. Ta ña̱yóʼo kúú ña̱ chindeétáʼan xíʼinyó ña̱ kuniso̱ʼoyó ña̱ ka̱ʼa̱n na̱ ñuu Ndióxi̱ xíʼinyó tá ná kixáʼa ña̱ gran tribulación. Ta ña̱ kuniso̱ʼoyó kúú ña̱ chindeétáʼan xíʼinyó ña̱ ka̱kuyó (Job 36:11). Soo saátu xa̱ʼa̱ ña̱ kúʼvi̱-iniyó xíniyó Jehová ta kúni̱yó sakúsi̱íyó-inira kúú ña̱ xíniso̱ʼoyó ña̱ káʼa̱nra (1 Juan 5:3). Va̱ása kuchiñuyó chaʼviyó ndaʼa̱ Jehová xa̱ʼa̱ ndiʼi ña̱ va̱ʼa kéʼéra xa̱ʼa̱yó (Sal. 116:12). Soo íyo iin ña̱ kivi keʼéyó: ña̱ kuniso̱ʼoyó ndiʼi ña̱ káʼa̱n Jehová xíʼinyó ta saátu ña̱ káʼa̱n na̱ nda̱kaxinra kuniʼi yichi̱ nu̱úyó. Tá xíniso̱ʼoyó ndiʼi ña̱ káʼa̱n Jehová xíʼinyó saá náʼa̱yó ña̱ kúúyó na̱ ndíchi ta saátu sákusi̱íyó-inira (Prov. 27:11). w23.10 11 párr. 18, 19

Tá ná ka̱ʼa̱n iin ángel xíʼún, ¿á kuniso̱ʼúnra? Tiempo vitin, íyo iin ta̱ ángel ta̱ káʼa̱n xíʼin ndiʼi na̱ yiví na̱ xa̱a̱ síín síín ñuu na̱ xa̱a̱ síín síín tu̱ʼun káʼa̱n xíʼin na̱ xa̱a̱ síín síín tribu, ta káchira: “Ixato̱ʼóndó Ndióxi̱ ta ndasakáʼnundóra”, “ndasakáʼnundó ta̱ i̱xava̱ʼa ndiví xíʼin ñuʼú, tá mar xíʼin ndiʼi nu̱ú kána ti̱kui̱í” (Apoc. 14:​6, 7). Ndiʼiyó xíniñúʼu ndasakáʼnuyó Jehová chi ta̱kán kúú Ndióxi̱ ta̱ nda̱a̱, ta kúsi̱íní-iniyó ña̱ ndásakáʼnuyóra ti̱xin templo espiritual ña̱ kúúmiíra. Ta ña̱yóʼo iin ña̱ va̱ʼaní kúúña. ¿Ndáaña kúú templo espiritual ña̱ káʼa̱n Biblia xa̱ʼa̱? Ta, ¿ndáa míí kivi ndani̱ʼíyó ña̱ káʼa̱n xa̱ʼa̱ ña̱yóʼo? Ña̱ templo espiritual su̱ví iin veʼe ña̱ íyo nu̱ú ñuʼú yóʼo kúúña, chi ña̱yóʼo kúú ña̱ ndánaʼa̱ ndáa ki̱ʼva kúni̱ Jehová ña̱ ndasakáʼnuyóra ta xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kivi keʼéyó ña̱yóʼo. Tá siglo nu̱ú ta̱ apóstol Pablo ni̱ka̱ʼa̱nra ndáa ki̱ʼva kúú ña̱ kúni̱ Jehová ña̱ ndasakáʼnuyóra, ta kivi ndani̱ʼíyó ña̱ káʼa̱n xa̱ʼa̱ ña̱yóʼo nu̱ú carta ña̱ chi̱ndaʼára ku̱a̱ʼa̱n nu̱ú na̱ hebreo na̱ xi̱ndoo ñuu Judea. w23.10 24 párr. 1, 2

Ku̱i̱ya̱ 522 tiempo xi̱naʼá, na̱ xi̱saa̱-ini xi̱xini na̱ ñuu Ndióxi̱, kǒo nítaxikana ña̱ ndasaviína templo. Soo ta̱ Zacarías ni̱ka̱ʼa̱nra xíʼin na̱ judío ña̱ mií Jehová kuniñúʼura espíritu santora ña̱ chindeétáʼanra xíʼinna ña̱ ixava̱ʼana veʼe yóʼo. Ku̱i̱ya̱ 520, ta̱ rey Darío ni̱ka̱ʼa̱nra ña̱ kixáʼa tukuna ndasaviína veʼe yóʼo, ta saátu ta̱xira xu̱ʼún ndaʼa̱ na̱ judío ña̱ va̱ʼa keʼénaña, ta ni̱ka̱ʼa̱nra xíʼin na̱ chíñu na̱ xi̱ndoo ñuu kán ña̱ chindeétáʼanna xíʼinna (Esd. 6:​1, 6-10). Jehová ni̱ka̱ʼa̱nra xíʼin na̱ káchíñu nu̱ura ña̱ tá siʼna templo ná ndasaviína, miíra chindeétáʼan xíʼinna (Ageo 1:​8, 13, 14; Zac. 1:​3, 16). Ña̱ ni̱ka̱ʼa̱n na̱ profeta yóʼo xíʼin na̱ judío chi̱ndeétáʼanña xíʼinna ña̱ ki̱xáʼa tukuna ndásaviína templo ku̱i̱ya̱ 520, ta tá kúma̱níka xi̱nu 5 ku̱i̱ya̱ xa̱a̱ sa̱ndíʼina nda̱saviínaña. Ni ni̱ya̱ʼana nu̱ú tu̱ndóʼo, soo siʼnaka chiñu Jehová ni̱ndi̱ʼi-inina xa̱ʼa̱. Xa̱ʼa̱ ña̱kán, ku̱si̱í-inina nda̱sakáʼnuna Jehová (Esd. 6:​14-16, 22). w23.11 15 párr. 6, 7

Ku̱a̱’ání na̱ yiví xíniso̱ʼovana ña̱ káʼa̱nna xa̱ʼa̱ ta̱ Abrahán, soo kǒo xíni̱vínara. Soo, miíyó xíni̱vayóra ta kúnda̱a̱-iniyó xa̱ʼa̱ ña̱ ke̱ʼéra, tá kúú ña̱ Biblia káʼa̱nña xa̱ʼa̱ra ña̱ kúúra “yivá ndiʼi na̱ kándíxa Ndióxi̱” (Rom. 4:11). Soo, ¿á kivi keʼéyó nda̱a̱ táki̱ʼva ke̱ʼé ta̱ Abrahán ña̱ kandíxaníyó Ndióxi̱? Kiviva keʼéyóña. Ña̱ kivi chindeétáʼan xíʼinyó ña̱ kandíxayó Ndióxi̱ nda̱a̱ táki̱ʼva ke̱ʼé ta̱ Abrahán kúú ña̱ sakúaʼayó xa̱ʼa̱ ki̱ʼva ña̱ ni̱xi̱yora. Ndiʼi tiempo xi̱niso̱ʼo ta̱ Abrahán ña̱ ni̱ka̱ʼa̱n Ndióxi̱ xíʼinra, tá kúú nda̱kiʼinra ku̱a̱ʼa̱nra inka ñuu ta ku̱a̱ʼání ku̱i̱ya̱ ni̱xi̱yora ti̱xin veʼe válí, ta nda̱a̱ ta̱xira se̱ʼera ta̱ Isaac ña̱ koora iin sacrificio nu̱ú Ndióxi̱, xíʼin ña̱ ke̱ʼéra ni̱na̱ʼa̱ra ña̱ kándíxaníra Ndióxi̱. Ta xa̱ʼa̱ ña̱ ke̱ʼéra ndiʼi ña̱yóʼo, ku̱si̱íní-ini Ndióxi̱ xíʼinra ta saátu ni̱xa̱a̱ra ku̱ura migora (Sant. 2:​22, 23). Jehová kúni̱ra ña̱ ndiʼi miíyó ná keʼéyó ña̱ kútóora ta saátu ña̱ kooyó migora. Ña̱kán xi̱niñúʼura ta̱ Pablo xíʼin ta̱ Santiago ña̱ kaʼyína xa̱ʼa̱ ña̱ ke̱ʼé ta̱ Abrahán. w23.12 2 párr. 1, 2

Ndóʼó ná hermana, sakúaʼandó natúʼunndó xíʼin inkana. Ndiʼi miíyó na̱ ndásakáʼnu Ndióxi̱ ndáyáʼviní ña̱ sakúaʼayó natúʼun xíʼin táʼanyó. Ta̱ discípulo Santiago va̱ʼaní consejo ta̱xira ndaʼa̱yó. Tá va̱ʼaní xíniso̱ʼoyó tá káʼa̱nna xíʼinyó, saá kúú ña̱ náʼa̱yó ña̱ kúnda̱a̱-iniyó xíʼin ña̱ ndóʼona (1 Ped. 3:8). Tá kǒo kúnda̱a̱ va̱ʼa iniún xíʼin ña̱ káʼa̱nna xíʼún á xíʼin ña̱ ndóʼona, xíʼin ña̱ to̱ʼó nda̱ka̱tu̱ʼúnna tasaá vií ndakuiún yuʼúna (Prov. 15:​28, nota). Ndakanixi̱ní xa̱ʼa̱ ña̱yóʼo: “Ña̱ ka̱ʼi̱n xíʼinna, ¿á ña̱ nda̱a̱ kúúña? ¿Á chika̱a̱ña ndee̱ xíʼinna? ¿Á ña̱ to̱ʼó kúúña? ¿Á ña̱ va̱ʼa kúúña?”. Koto ndáa ná hermana kúú ná va̱ʼaní nátúʼun xíʼin inkana ta kundiku̱ún yichi̱ná (Prov. 31:26). Koto va̱ʼún ndáaña káʼa̱nná ta ndáa ki̱ʼva káʼa̱nnañá, sakúaʼa keʼún ña̱yóʼo tasaá kúú ña̱ va̱ʼaníka kitáʼún xíʼin inkana. w23.12 21 párr. 12

Jehová kivi kuniñúʼura na̱ veʼeyó, na̱ migoyó á na̱ anciano ña̱ va̱ʼa chindeétáʼanna xíʼinyó. Soo, tá ndákava-iniyó á tá kúni mitúʼunyó kǒo kúni̱yó kitáʼanyó xíʼin nda̱a̱ ni iin na̱ yiví, ta kúnda̱a̱va-ini Jehová xíʼin ña̱ ndóʼoyó. Soo, ¿ndáaña xíniñúʼu keʼéyó ña̱ va̱ʼa chindeétáʼanra xíʼinyó? Ná kǒo kuxíkáyó nu̱ú nda̱a̱ ni iinna, saáchi tá kǒo xíínyó kutáʼanyó xíʼin inkana saá ndákaniníkaxi̱níyó xa̱ʼa̱ tu̱ndóʼo ña̱ kúúmiíyó, ta xa̱ʼa̱ ña̱yóʼo kǒo ndaka̱xin viíyó ña̱ keʼéyó. Ndiʼiyó tá yáʼayó nu̱ú iin tu̱ndóʼo kúni̱yó koo mitúʼunyó ta ña̱ va̱ʼava kúú ña̱yóʼo, soo tá xa̱a̱ ku̱a̱ʼání tiempo kéʼéyó ña̱yóʼo saá kǒo táxiyó ña̱ chindeétáʼan Jehová xíʼinyó á ña̱ taxira ndee̱ ndaʼa̱yó. Ña̱kán, ná taxiyó ña̱ chindeétáʼan na̱ veʼeyó xíʼinyó, na̱ migoyó ta saátu na̱ anciano, saáchi mií Jehová xíniñúʼu na̱yóʼo ña̱ chindeétáʼanna xíʼinyó (Prov. 17:17; Is. 32:​1, 2). w24.01 23, 24 párr. 12, 13

Xa̱ʼa̱ voto ña̱ xi̱keʼé na̱ nazareo kǒo níxi̱xaʼndana ixí xi̱nína, tasaá xi̱naʼa̱na ña̱ xi̱ ixato̱ʼóna Jehová. Soo ni̱xi̱yo iin tiempo ña̱ kǒo ní xi̱ ixato̱ʼó na̱ ñuu Israel ña̱ xi̱keʼé na̱ nazareo. Xi̱niñúʼu ndakúní koo ini na̱ nazareo ña̱ va̱ʼa síín koona nu̱ú inkana (Amós 2:12). Tá xíniso̱ʼoyó ña̱ káʼa̱n Jehová, nda̱a̱ na̱ yiví na̱ kǒo ndásakáʼnu miíra kíʼinna kuenta ña̱ síín íyoyó. Ta xíniñúʼu ndakú koo iniyó ña̱ va̱ʼa na̱ʼa̱yó ña̱ kúúyó testigo Jehová nu̱ú káchíñuyó á escuela nu̱ú káʼviyó. Ta saátu xa̱ʼa̱ ña̱ ndi̱va̱ʼaní-ini na̱ yiví na̱ ndóo tiempo so̱ndíʼi vitin, íxayo̱ʼvi̱níña xíʼinyó ña̱ kuniso̱ʼoyó ña̱ káʼa̱n Jehová ta saátu ña̱ natúʼunyó xíʼin na̱ yiví xa̱ʼa̱ Reinora (2 Tim. 1:8; 3:13). Soo ná ndakaʼányó chi sákusi̱íyó-ini Jehová tá síín íyoyó nu̱ú na̱ yiví na̱ kǒo ndásakáʼnu miíra (Prov. 27:11; Mal. 3:18). w24.02 16 párr. 7; 17 párr. 9

Tá siglo nu̱ú ndiʼi na̱ yiví xi̱kiʼinna kuenta ña̱ xi̱kuʼvi̱ní-ini na̱ cristiano xi̱xinitáʼanna. Soo, ¿á kǒo ní ixayo̱ʼvi̱ña xíʼinna ña̱ na̱ʼa̱na ña̱yóʼo? Ná ka̱ʼa̱nyó xa̱ʼa̱ na̱ hermano na̱ xi̱ñuʼu congregación ña̱ ñuu Roma. Na̱ hermano yóʼo xa̱a̱ síín síín ni̱xi̱yona, savana xi̱kuuna na̱ judío ta va̱ʼaní xi̱xiniso̱ʼona ña̱ xi̱kaʼa̱n Ley ta̱ Moisés, soo saátu ni̱xi̱yo sava na̱ ke̱e inka ñuu ta xa̱a̱ síín síín costumbre xi̱kuumiína. Savana xi̱kuuna esclavo ta savana va̱ása níxikuuna esclavo, ta nda̱a̱ xi̱kuumiína na̱ xi̱kachíñu nu̱úna. Xa̱ʼa̱ ña̱kán, ¿ndáaña chindeétáʼan xíʼinna ña̱ kuʼvi̱-inina kunitáʼanna ta kǒo kundasí táʼanna? Ña̱yóʼo ni̱ka̱ʼa̱n ta̱ apóstol Pablo xíʼinna: “Viíní ndakiʼin-táʼanndó”. Ña̱ tu̱ʼun “viíní ndakiʼin-táʼanndó” kúni̱ kachiña, ña̱ vií ndakiʼinyó na̱ yiví ta va̱ʼa koo iniyó xíʼinna. Tá kúú, iin yichi̱ ta̱ Pablo ni̱ka̱ʼa̱nra xíʼin ta̱ Filemón ña̱ viíní ná ndakiʼinra ta̱ Onésimo ta̱ xi̱kuu esclavora, ta ni̱ka̱ʼa̱nra xíʼinra: “Viíní ndakiʼúnra” (Filem. 17). Ñá Priscila xíʼin ta̱ Áquila ku̱a̱ʼáníka ña̱ʼa xi̱xini̱na xa̱ʼa̱ Ndióxi̱ nu̱úka ña̱ xi̱xini̱ ta̱ Apolos, soo viíní ke̱ʼéna xíʼinra ta nda̱kiʼinnara ku̱a̱ʼa̱n xíʼinna (Hech. 18:26). Ni xa̱a̱ síín síín ni̱xi̱yo na̱ xi̱ndasakáʼnu Ndióxi̱ tiempo xi̱naʼá, soo kǒo nítaxina ña̱ ndataʼvi ña̱yóʼo miína saáchi viíní xi̱kitáʼanna. w23.07 6 párr. 13

Xa̱ʼa̱ ña̱ kúʼvi̱-iniún xíniún Jehová kúú ña̱ ndataxiún miíún ndaʼa̱ra. Ta su̱ví loʼo kuití tiempo kuʼvi̱-iniún kuniúnra, chi xa̱ʼa̱ ña̱ sákuaʼún xa̱ʼa̱ra kúnda̱a̱-iniún ndáa ki̱ʼva íyora ta ña̱yóʼo kúú ña̱ chindeétáʼanka xíʼún ña̱ kunda̱a̱-iniún xíʼin ña̱ káʼa̱nra (Col. 1:9). Vitin ña̱ xa̱a̱ káʼviún Biblia kúnda̱a̱-iniún 1) ña̱ ndixava íyo Jehová, 2) ña̱ xi̱niñúʼura espíritu santora ña̱ va̱ʼa ka̱ʼyi̱ Biblia, ta saátu 3) ña̱ kúúmiíra iin ñuu ta xíniñúʼura na̱yóʼo ña̱ saxínura ña̱ kúni̱ra keʼéra. Tá iin na̱ yiví kúni̱na ndataxina miína ndaʼa̱ Jehová, xa̱a̱ xíniñúʼu kunda̱a̱ loʼo inina xa̱ʼa̱ ña̱ káʼa̱n Biblia, saátu kéʼéna ña̱ kútóo Ndióxi̱ ta káʼa̱nna xíʼin inka na̱ yiví xa̱ʼa̱ ña̱ kándíxana (Mat. 28:​19, 20). Ta saátu kúʼvi̱ní-inina xínina Jehová ta iinlá miíra kúni̱na ndasakáʼnuna xíʼin ndiʼi níma̱na. ¿Á kéʼún ña̱yóʼo? w24.03 4 párr. 6, 7

Ñá Abigaíl ti̱ndaʼa̱ñá xíʼin ta̱ Nabal, iin ta̱a ta̱ kue̱ʼe̱ní ta ku̱a̱ʼání ña̱ va̱ása va̱ʼa xi̱keʼéra káchi Biblia (1 Sam. 25:3). Sana i̱xayo̱ʼvi̱níña xíʼin ñá Abigaíl ña̱ kooñá xíʼin ta̱yóʼo. Iin ki̱vi̱ ku̱u iin tu̱ndóʼo ta xa̱ʼa̱ ña̱yóʼo kivi kita ñá Abigaíl ku̱ʼu̱nñá ta sandákooñá ta̱ Nabal. Saáchi ta̱ David xi̱kuni̱ra kaʼníra ta̱ Nabal xa̱ʼa̱ ña̱ ni̱ka̱ʼa̱n-ndi̱va̱ʼara xa̱ʼa̱ na̱ káchíñu nu̱úra ta saátu xa̱ʼa̱ miíra (1 Sam. 25:​9-13). Kiviva kita ñá Abigaíl ku̱ʼu̱nñá ta taxiñá ña̱ kaʼní ta̱ David ta̱ Nabal, soo nu̱úka ña̱ keʼéñá ña̱yóʼo ni̱ka̱ʼa̱nñá xíʼin ta̱ David ña̱ ná ixakáʼnu-inira xa̱ʼa̱ ta̱ Nabal (1 Sam. 25:​23-27). ¿Nda̱chun ke̱ʼéñá ña̱yóʼo? Xi̱kuʼvi̱ní-ini ñá Abigaíl xi̱xiniñá Jehová ta nu̱ú miíñá xi̱ndayáʼviní ña̱ xi̱ndakanixi̱ní Jehová xa̱ʼa̱ ña̱ tíndaʼa̱ na̱ yiví. Ña̱kán, xa̱ʼa̱ ña̱ xi̱kuni̱ñá sakúsi̱íñá-ini Ndióxi̱, kǒo nítaxiñá ña̱ kaʼnína yii̱ñá xíʼin ndiʼika na̱ ni̱xi̱yo veʼeñá. Kamaní ni̱xa̱ʼa̱nñá nu̱ú ta̱ David chi kǒo níxi̱kuni̱ñá ña̱ kaʼníra ta̱ Nabal. w24.03 16 párr. 9, 10

Íyo sava na̱ hermano na̱ loʼoní ña̱ʼa kúúmií xa̱ʼa̱ ña̱ kúni̱na ku̱a̱ʼáka tiempo kachíñuna nu̱ú Jehová, ¿á íyo táʼan na̱yóʼo ti̱xin congregación nu̱ú ndíka̱ún? ¿Á xíni̱ún iin na̱ chíkaa̱ ndee̱ ña̱ síín koona nu̱ú na̱ va̱lí na̱ káʼvi xíʼinna escuela? ¿Á xíni̱ún iin na̱ sa̱kán ki̱xáʼa káʼvi xa̱ʼa̱ Ndióxi̱ ña̱ íxandi̱va̱ʼa na̱ veʼena xíʼinna xa̱ʼa̱ ña̱ nda̱kú íyo inina xíʼin Jehová? Ná ka̱ʼa̱nyó xíʼinna ña̱ va̱ʼaní kéʼéna saáchi chíkaa̱na ndee̱ ña̱ ndasakáʼnuna Jehová (Filem. 4, 5, 7). Jehová kíʼinra kuenta ña̱ xíʼin ndinuʼu-iniyó káchíñuyó nu̱úra, xa̱ʼa̱ ña̱kán chíkaa̱níyó ndee̱ ña̱ saxínuyó ña̱ ki̱ndooyó keʼéyó nu̱úra tá nda̱kuchiyó. Ta saátu táxira ña̱ na̱ʼa̱yó nu̱úra ña̱ kúʼvi̱ní-iniyó xíniyóra (Prov. 23:​15, 16). Ña̱kán ná chikaa̱yó ndee̱ ña̱ kachíñuyó nu̱ú Jehová xíʼin ndinuʼu-iniyó. w24.02 18 párr. 14; 19 párr. 16

Ná ndakanixi̱níyó ña̱ ku̱u tá xa̱a̱ ku̱yatin ndiʼi ña̱ ku̱i̱ya̱ 29, tá ki̱xáʼa ta̱ Jesús nátúʼunra xa̱ʼa̱ Ndióxi̱. Iin ki̱vi̱, miíra xíʼin siʼíra ñá María ni̱xa̱ʼa̱nna iin vikó tíndaʼa̱ chí ñuu Caná. Ñá María chíndeétáʼanñá xíʼinna ña̱ ndakiʼinñá na̱ yiví na̱ kíxaa̱ vikó kán. Soo ku̱u iin ña̱ʼa ña̱ va̱ása ndátu na̱ tíndaʼa̱ yóʼo xíʼin na̱ veʼena. Ndi̱ʼi vino tá xíʼina. Ña̱kán kamaní nda̱kiʼin ñá María ku̱a̱ʼa̱nñá nu̱ú se̱ʼeñá ta̱ Jesús ña̱ ka̱ʼa̱nñá xíʼinra ña̱ ndi̱ʼi tá vino (Juan 2:​1-3). ¿Ndáaña ke̱ʼé ta̱ Jesús? Nda̱sara ti̱kui̱í vino (Juan 2:​9, 10). Tá ni̱xi̱yo ta̱ Jesús nu̱ú ñuʼú yóʼo ku̱a̱ʼání milagro ke̱ʼéra. Ta xi̱niñúʼura ndee̱ ña̱ ta̱xi yivára ndaʼa̱ra ña̱ va̱ʼa chindeétáʼanra xíʼin ku̱a̱ʼání na̱ yiví. Tá kúú, iin yichi̱ sa̱kúxura 5,000 na̱ ta̱a ta inka yichi̱ sa̱kúxura 4,000 na̱yóʼo. Ta xíʼin u̱vi̱ saá milagro ña̱ ke̱ʼéra yóʼo, tá ná ndakaʼviyó nda̱a̱ ná ñaʼá xíʼin na̱ va̱lí, yáʼaka 27,000 kúú na̱ ta̱xira xi̱xi (Mat. 14:​15-21; 15:​32-38). Ta saátu sava yichi̱ sa̱ndáʼara na̱ ndeéndóʼo (Mat. 14:14; 15:​30, 31). w23.04 2 párr. 1, 2

Tá yáʼayó nu̱ú iin tu̱ndóʼo koo ki̱vi̱ ña̱ kǒo kuni̱yó keʼéyó ni iin ña̱ʼa. Nda̱a̱ táki̱ʼva ndo̱ʼo ta̱ Elías, ta ña̱ kúni̱ kuitíyó keʼéyó kúú ña̱ ku̱su̱nyó ta kǒo ndako̱oyó (1 Rey. 19:​5-7). Saátu miíyó tá ndákava-iniyó á xóʼvi̱yó, xíniñúʼuyó ña̱ chindeétáʼan Jehová xíʼinyó ña̱ va̱ʼa ndasakáʼnuyóra. Mií Jehová sándi̱ko-iniyó. Tá ni̱ya̱ʼa ta̱ rey David nu̱ú ku̱a̱ʼá tu̱ndóʼo ta xi̱saa̱-inina xi̱xininara, ki̱ʼinra kuenta ña̱ ni̱xi̱yova Jehová xíʼinra, xa̱ʼa̱ ña̱kán ni̱ka̱ʼa̱nra: “Ndaʼa̱ kúaʼún tíinña yi̱ʼi̱” (Sal. 18:35). Jehová kivi kuniñúʼura inka na̱ yiví ña̱ va̱ʼa chindeétáʼanra xíʼinyó, tá kúú tá nda̱kavaní-ini ta̱ David ta̱ Jonatán ni̱xa̱ʼa̱nra xi̱torara ta chi̱kaa̱níra ndee̱ xíʼinra (1 Sam. 23:​16, 17). Saátu tá nda̱kava-ini ta̱ Elías, Jehová xi̱niñúʼura ta̱ Eliseo ña̱ va̱ʼa chindeétáʼanra xíʼinra (1 Rey. 19:​16, 21; 2 Rey. 2:2). w24.01 23 párr. 10-12

Jehová va̱ʼaní-inira ta ku̱a̱ʼání ña̱ʼa táxira ndaʼa̱yó. Ña̱yóʼo kúú ña̱ va̱ʼaní ndána̱ʼa̱ ñaʼá ñá ndíchi ñá káʼa̱n Proverbios capítulo 9 xa̱ʼa̱, saáchi xa̱a̱ nda̱saviíñá ndiʼi ña̱ʼa, xa̱a̱ i̱xaviíñá ku̱ñu xíʼin tá vino, ta saátu xa̱a̱ chi̱ndósoñá ndiʼi ña̱ʼa nu̱ú mesa (Prov. 9:2). Ta saátu, táki̱ʼva káʼa̱n versículo 4 xíʼin 5, ñaʼá ñá ndána̱ʼa̱ ña̱ “ndíchi” káʼa̱nñá xíʼin na̱ yiví na̱ kǒo xíni̱: “Naʼandó, ta kuxundó ña̱ xíxii̱”. ¿Nda̱chun xíniñúʼu kuniso̱ʼoyó ña̱ káʼa̱n ñá ñaʼá yóʼo? Saáchi Jehová kúni̱ra kundaara miíyó ta taxira ña̱ ndíchi ndaʼa̱yó. Ya̱chi̱ka káʼa̱nra xíʼinyó, saáchi kǒo kúni̱ra ná kixi tu̱ndóʼo nu̱úyó ni ña̱ xo̱ʼvi̱yó xa̱ʼa̱ ña̱ ke̱ʼéyó tá ya̱chi̱, ña̱kán chíndeétáʼanra xíʼin na̱ nda̱kú íyo ini xíʼinra ña̱ ndíchiní koona (Prov. 2:7). Tá íxato̱ʼóyó Jehová ta xíniso̱ʼoyó ña̱ káʼa̱nra saá kúú ña̱ va̱ása keʼéyó nda̱a̱ ni iin ña̱ kini ta kusi̱íní-iniyó (Sant. 1:25). w23.06 23 párr. 15

Sana kúni̱yó keʼéyó ku̱a̱ʼáka chiñu nu̱ú Jehová, soo sana kǒo kívika keʼéyó ña̱yóʼo. Ni saá, kándíxanívayó ña̱ ndáyáʼviní ña̱ kéʼéyó nu̱ú Jehová. ¿Nda̱chun va̱ʼa kúnda̱a̱-iniyó ña̱yóʼo? Jehová ni̱ka̱ʼa̱nra xíʼin ta̱ profeta Zacarías ña̱ ná keʼéra iin corona ta ná kuniñúʼura oro xíʼin plata ña̱ xi̱taxi na̱ judío na̱ ni̱ndo̱o Babilonia ña̱ keʼéra ña̱yóʼo (Zac. 6:11). Ña̱ corona yóʼo chindeétáʼanña xíʼinna ña̱ ndakaʼánna ña̱ va̱ʼaní ni̱xi̱yo ini na̱ judío na̱ ni̱ndo̱o chí ñuu Babilonia (Zac. 6:14). Ña̱kán kǒo xíka iniyó ña̱ kǒo nándósó-ini Jehová xa̱ʼa̱ ndiʼi ña̱ kéʼéyó ña̱ ndasakáʼnuyóra ni yáʼayó nu̱ú tu̱ndóʼo. Kúnda̱a̱-iniyó ña̱ xa̱a̱ ki̱vi̱ so̱ndíʼi kúú ña̱ ndóoyó ta xo̱ʼvi̱níkavayó xa̱ʼa̱ tu̱ndóʼo ña̱ yáʼayó nu̱ú (2 Tim. 3:​1, 13). Soo kǒo xíniñúʼu kundi̱ʼi̱ní-iniyó ta yi̱ʼvíyó. Ná ndakaʼányó ña̱ ni̱ka̱ʼa̱n Jehová xíʼin na̱ xi̱ndasakáʼnu miíra tiempo tá ni̱xi̱yo ta̱ Ageo: “Yi̱ʼi̱ íyoi̱ xíʼinndó, kǒo yi̱ʼvíndó” (Ageo 2:​4, 5). Saátu miíyó kándíxaníyó ña̱ tá siʼna chiñu Ndióxi̱ kéʼéyó, miíra chindeétáʼan xíʼinyó. w23.11 19 párr. 20, 21

Jehová ta̱xira ña̱ ná ka̱ʼyi̱ ndiʼi ña̱ ke̱ʼé ta̱ Pedro nu̱ú Biblia, saáchi kúni̱ra ña̱ ná sakúaʼayó ku̱a̱ʼání ña̱ ndáyáʼvi xíʼin ña̱yóʼo (2 Tim. 3:​16, 17). Tá káʼviyó xa̱ʼa̱ ta̱ Pedro kúnda̱a̱-iniyó ña̱ ni̱xi̱yora nda̱a̱ táki̱ʼva íyo miíyó saáchi ku̱a̱ʼání ña̱ i̱xayo̱ʼvi̱ xíʼinra. Soo, ña̱yóʼo chíndeétáʼanña xíʼinyó kunda̱a̱-iniyó ña̱ mií Jehová kǒo ndátura ña̱ ndiʼi tiempo viíní keʼéyó iin ña̱ʼa, saáchi kúnda̱a̱-inira ña̱ kúúyó na̱ yiví ku̱a̱chi soo kúni̱ra ná chikaa̱yó ndee̱ ña̱ nda̱kú koo iniyó xíʼinra ni íyo ña̱ íxayo̱ʼvi̱ xíʼinyó. Tá túviyó ña̱ xa̱a̱ sa̱ndákooyó kéʼéyó iin ña̱ va̱ása va̱ʼa, soo ndíkó tukuyó kéʼéyóña tá yáʼa tiempo, ná chikaa̱níyó ndee̱ ña̱ kǒo keʼékayóña. Ndiʼiyó káʼa̱nyó á kéʼéyó ña̱ va̱ása va̱ʼa xíʼin inkana ta tándi̱ʼi ndíkoní-iniyó xa̱ʼa̱ ña̱ ke̱ʼéyó. Tá ná chikaa̱yó ndee̱ ña̱ kǒo keʼéyó ña̱ va̱ása va̱ʼa, Jehová chindeétáʼanvara xíʼinyó (1 Ped. 5:10). Ni sava yichi̱ ta̱ Pedro ke̱ʼéra ña̱ va̱ása va̱ʼa soo ku̱ndáʼvi-ini ta̱ Jesús xi̱nirara, ta ña̱yóʼo kivi chindeétáʼanña xíʼinyó ña̱ ndakundeéyó kachíñukayó nu̱ú Jehová. w23.09 20, 21 párr. 2, 3

Ta̱ Jesús kuchiñuvara sandáʼara ta̱ Lázaro, nda̱a̱ táki̱ʼva káʼa̱n texto ña̱ káʼviyó ki̱vi̱ vitin. Soo ta̱kán ke̱ʼéra iin ña̱ʼa ña̱ nda̱kanda̱ní-inina xíʼin. Ta ña̱yóʼo ni̱ka̱ʼa̱nra xíʼin ñá Marta: “Ndatakuva ku̱ʼvaún”. Ta ka̱chira xíʼinñá: “Yi̱ʼi̱ kúú ta̱ sándataku na̱ yiví ta yi̱ʼi̱ kúú ta̱ táxi ña̱ tákuna” (Juan 11:​23, 25). Tasaá íyovaña, chi Jehová ta̱xira ndee̱ ndaʼa̱ ta̱ Jesús ña̱ va̱ʼa sandátakura na̱ ni̱xi̱ʼi̱. Tá ku̱u ña̱yóʼo, ta̱ Jesús xa̱a̱ sa̱ndátakuvara iin ñá loʼo tá ni̱ya̱ʼa loʼo tiempo ña̱ ni̱xi̱ʼi̱ñá, ta saátu sa̱ndátakura iin ta̱ loʼo mií ki̱vi̱ ña̱ ni̱xi̱ʼi̱ra (Luc. 7:​11-15; 8:​49-55). Soo, ¿á kivi sandátakura iin na̱ xa̱a̱ ku̱a̱ʼa̱n ku̱mí ki̱vi̱ ni̱xi̱ʼi̱ ta xa̱a̱ ki̱xáʼa táʼyi̱ ku̱ñuna? Ñá María ku̱ʼva ta̱ Lázaro ku̱yatinñá nu̱ú ta̱ Jesús ta ni̱ka̱ʼa̱nñá xíʼinra táʼan ña̱ ni̱ka̱ʼa̱n ñá Marta xíʼinra: “Táta, tá níxi̱yoún yóʼo, va̱ása kuviví ku̱ʼvai̱” (Juan 11:32). Tá xi̱ni ta̱ Jesús ña̱ ndeékaví xákuna, ku̱suchíní-inira. Ta xa̱ʼa̱ ña̱ kúndáʼvi-inira xínira na̱ migora, ki̱xáʼara xákura xíʼinna. Ta̱ Jesús kúnda̱a̱va-inira ña̱ kúsuchíní-iniyó tá xíʼi̱ iin na̱ veʼeyó, ña̱kán kúni̱ra sandíʼi-xa̱ʼa̱ra ña̱ xíʼi̱yó. w23.04 10, 11 párr. 12, 13