Consejo ña̱ va̱xi nu̱ú Biblia ndiʼi tiempo chíndeétáʼanña xíʼinyó

NDAKANIXI̱NÍ ña̱ xítoún ña̱ʼa ña̱ yatání ña̱ íyo ti̱xin iin museo. Ndiʼiña xa̱a̱ yatáníña, ni̱nda̱ta̱ña ta xa̱a̱ cháchindandiʼiña. Ta savaña kúma̱ní iin táʼvíña. Soo íyo inkaña ta kǒo nda̱a̱ ni iin ña̱ʼa níndoʼoña, xa̱ʼa̱ ña̱ vií íyoña náʼa̱ña ndáa ki̱ʼva viíní na̱kuva̱ʼaña. Tasaá ndáka̱tu̱ʼún ta̱ níʼi yichi̱ nu̱ún ña̱ kotoún ña̱ íyo ti̱xin museo kán, ta káchiún: “¿Á xa̱áka ña̱yóʼo nu̱ú inkakaña?”. Ta ta̱yóʼo káchira: “Va̱ása, saáchi ña̱yóʼo kúú ña̱ yatáníka ta nda̱a̱ ni iin yichi̱ ta̱ʼán sandáʼanaña”. Ta tuku ndáka̱tu̱ʼún: “¿Á ndiʼi tiempo chi̱ka̱a̱ va̱ʼanaña iin kuití lugar?”. Ta tuku káʼa̱nra xíʼún: “Va̱ása, chi ña̱yóʼo ku̱a̱ʼáníka nu̱ú tu̱ndóʼo ni̱ya̱ʼaña, ta nda̱a̱ xi̱kuni̱na sandíʼi-xa̱ʼa̱naña”. Ña̱kán sana ndákanixi̱níún: “¿Ndáa ña̱ʼa na̱kuva̱ʼaña?”.

Táki̱ʼva íyo ña̱ ni̱ka̱ʼa̱nyó xa̱ʼa̱ yóʼo saá íyo ña̱ Biblia. Saáchi ña̱yóʼo kúú ña̱ yatáníka nu̱ú ndiʼika libro, ña̱ nda̱a̱ kúúvaña íyo inka ña̱ ka̱ʼyína tá ya̱chi̱ nda̱a̱ táki̱ʼva íyo ña̱ xa̱a̱ ni̱ka̱ʼa̱nyó xa̱ʼa̱, tá ni̱ya̱ʼa tiempo ña̱yóʼo ku̱a̱ʼa̱n ndíʼi-xa̱ʼa̱vaña. Ña̱ xi̱ka̱ʼa̱n ña̱yóʼo xa̱ʼa̱ ña̱ ciencia na̱samavaña, xa̱ʼa̱ ña̱ xa̱a̱ síín íyo ña̱ kúnda̱a̱-inina xa̱ʼa̱ ña̱ ciencia tiempo vitin. Ta consejo ña̱ xi̱ka̱ʼa̱n ña̱yóʼo xa̱ʼa̱ ta̱tán, vitin nda̱a̱ kivi taxiña iin kue̱ʼe̱ ndaʼa̱ na̱ yiví nu̱úka ña̱ chindeétáʼanña xíʼinna. Ku̱a̱ʼání ña̱ xa̱a̱ ka̱ʼyína tá tiempo xi̱naʼá ndáa sava táʼvívaña kíndo̱o, saáchi savaña xa̱a̱ nda̱ñúʼuvaña á ndi̱ʼi-xa̱ʼa̱ va̱ʼaña.

Soo ña̱ Biblia xa̱a̱ síínva íyo ña̱yóʼo. Chi xa̱a̱ yáʼaka 3,500 ku̱i̱ya̱ íyoña soo íyo níka̱a̱ña. Ta ni ku̱a̱ʼá yichi̱ xi̱kuni̱na sandíʼi-xa̱ʼa̱naña, tá kúú xa̱ʼmina savaña, va̱ása nítaxikana ña̱ kaʼvi na̱ yiví ña̱yóʼo ta xi̱ka̱ʼa̱nna ña̱ va̱ása va̱ʼa xa̱ʼa̱ña, soo ña̱ káʼa̱nña xa̱ʼa̱ kǒo ña̱ʼa níndoʼoña. Nu̱úka ña̱ nasa̱ma ña̱ va̱xi nu̱ú Biblia, va̱ʼaníka chíndeétáʼanña xíʼinyó nda̱a̱ tiempo vitin (koto recuadro ña̱ naní “¿Anticuada, o adelantada para su tiempo?”).

ÑA̱ VA̱ʼA ÑA̱ XÍNIÑÚʼU KUUMIÍYÓ TIEMPO VITIN

Soo ni saá, sana kivi ndakanixi̱níún xa̱ʼa̱ ña̱yóʼo: “¿Á kivika chindeétáʼan consejo ña̱ va̱xi nu̱ú Biblia xíʼinyó?”. Ña̱ va̱ʼa kunda̱a̱-iniyó xa̱ʼa̱ ña̱yóʼo, ndakanixi̱ní xa̱ʼa̱ tu̱ndóʼo ña̱ yáʼa na̱ yiví nu̱ú. ¿Ndáaña kúú tu̱ndóʼo ña̱ ndeéníka yáʼana nu̱ú? Sana ndákanixi̱níún xa̱ʼa̱ guerra, ña̱ íxayaku̱a̱na nu̱ú ñuʼú yóʼo, ña̱ káni táʼanna á ña̱ íxakuíʼnána. Ta vitin koto ndáaña sánáʼa̱ ña̱ Biblia, tá kéʼún ña̱yóʼo ndakanixi̱ní xa̱ʼa̱ ña̱yóʼo: “¿Á va̱ʼaka koo nu̱ú ñuyǐví yóʼo tá ndiʼiyó ná keʼé ña̱ va̱ʼa ña̱ káʼa̱n ña̱ Biblia?”.

ÑA̱ VIÍ KUTÁʼAN NDIʼIYÓ

“Si̱íní íyo na̱ ndúkú ndáa ki̱ʼva keʼéna ña̱ va̱ʼa kǒo ku̱a̱chi koo, saáchi se̱ʼe Ndióxi̱ xa̱a̱na koona” (Mateo 5:9). “Tá kívika, chika̱a̱níkandó ndee̱ ña̱ vií kutáʼanndó xíʼin ndiʼi na̱ yiví” (Romanos 12:18).

ÑA̱ KUNDÁʼVI-INIYÓ KUNIYÓ INKANA TA IXAKÁʼNU-INIYÓ XA̱ʼA̱NA

“Si̱íní íyo na̱ kúndáʼvi-ini xíni inkana, saáchi inkana kundáʼvi-inina kuninana” (Mateo 5:7). “Kǒo sandákoondó ña̱ kundeé-inindó xíʼin ña̱ kéʼé inkana xíʼinndó ta xíʼin ndiʼi níma̱ndó koo káʼnu-inindó xa̱ʼa̱na, ni íyo iin ña̱ va̱ása va̱ʼa ke̱ʼéna xíʼinndó. Jehováa xíʼin ndiʼi níma̱ra i̱xakáʼnu-inira xa̱ʼa̱ndó, xa̱ʼa̱ ña̱kán saátu xíniñúʼu keʼé miíndó” (Colosenses 3:13).

ÑA̱ KǑO KUNDASÍYÓ KUNITÁʼANYÓ

Ndióxi̱ “iin ta̱a kuití kúú ta̱ i̱xava̱ʼara, ta ti̱xin ta̱yóʼo kúú ña̱ ki̱xi ndiʼi na̱ ñuu ña̱ va̱ʼa sandákutúna iníí nu̱ú ñuʼú” (Hechos 17:26). “Vitin kúnda̱a̱-inii̱ ña̱ va̱ása ndáka̱xin Ndióxi̱ na̱ yiví nda̱a̱ ndáaka ñuuna ndákiʼinvarana tá ndixa íxato̱ʼónara ta kéʼéna ña̱ va̱ʼa nu̱úra” (Hechos 10:34, 35).

ÑA̱ KUNDAAYÓ ÑUʼÚ NU̱Ú NDÓOYÓ

“Jehová ta̱xira ña̱ ná koo ta̱ ta̱a nu̱ú jardín ña̱ Edén ña̱ va̱ʼa chiʼira nu̱úña ta kundaaraña” (Hechos 17:26). Ndióxi̱ sandíʼi-xa̱ʼa̱ra na̱ sándiʼi-xa̱ʼa̱ ñuʼú yóʼo (Revelación [Apocalipsis] 11:18).

NÁ KǑO KUTÓOYÓ KUUMIÍYÓ KU̱A̱ʼÁNÍ ÑA̱ʼA Á ÑA̱ KEʼÉYÓ ÑA̱ KINI

“Kiʼinndó kuenta ña̱ va̱ása kutóoníndó ña̱ʼa, saáchi ni ku̱a̱ʼání kúú ña̱ʼa ña̱ kúúmií iin na̱ yiví va̱ása taxiña ña̱ kutakuna” (Lucas 12:15). “Ni loʼo va̱ása kutóondó ka̱ʼa̱nndó xa̱ʼa̱ ku̱a̱chi kini á nda̱a̱ ndáaka ña̱ yaku̱a̱ á ña̱ ka̱ʼa̱nndó xa̱ʼa̱ ña̱ kuumiíndó ku̱a̱ʼání ña̱ʼa, chi na̱ ndásakáʼnu Ndióxi̱ va̱ása xíniñúʼu keʼéna ña̱yóʼo” (Efesios 5:3).

ÑA̱ VIÍ KEʼÉYÓ NDIʼI ÑA̱ʼA TA SAÁTU ÑA̱ VIÍ KACHÍÑUYÓ

“Kúni̱ndi̱ ña̱ viíní keʼéndi̱ ndiʼi ña̱ʼa” (Hebreos 13:18). “Na̱ íxakuíʼná ná kǒo ixakuíʼnákana, va̱ʼaka ndeéní ná kachíñuna” (Efesios 4:28).

ÑA̱ CHINDEÉTÁʼANYÓ XÍʼIN NA̱ KÚMA̱NÍ ÑA̱ʼA NU̱Ú

“Sándi̱kondó-ini na̱ nda̱kava-ini, ta chindeétáʼanndó xíʼin na̱ vitá kúni, ta kúee koo inindó xíʼin ndiʼina” (1 Tesalonicenses 5:14). Xíniñúʼu “kiʼinyó kuenta xíʼin na̱ ni̱xi̱ʼi̱ yivá ta saátu ná ñaʼá ná ni̱xi̱ʼi̱ yií tá yáʼana nu̱ú tu̱ndóʼo” (Santiago 1:27).

Ña̱ Biblia va̱ása káʼa̱n kuitíña xíʼinyó xa̱ʼa̱ ña̱yóʼo, saáchi saátu sánáʼa̱ña miíyó ña̱ kundayáʼviña nu̱úyó ta keʼéyóña ndiʼi tiempo. Tá ku̱a̱ʼáka na̱ yiví ná keʼé ña̱ káʼa̱n ña̱yóʼo, ¿á su̱ví ña̱ nda̱a̱ kúú ña̱ va̱ʼaní chindeétáʼanña xíʼin na̱ yiví ña̱ va̱ása kooní tu̱ndóʼo nu̱úna? Ña̱ nda̱a̱ kúúña, consejo ña̱ va̱xi nu̱ú Biblia va̱ʼaníka chíndeétáʼanña xíʼinyó tiempo vitin. Soo, ¿ndáa ki̱ʼva kivi chindeétáʼan ña̱ Biblia xíʼún?

¿NDÁA KI̱ʼVA KIVI CHINDEÉTÁʼAN ÑA̱ BIBLIA XÍʼÚN TIEMPO VITIN?

Iin ta̱a ta̱ ndíchiníka ni̱xi̱yo nu̱ú ñuʼú yóʼo ni̱ka̱ʼa̱nra: “Ña̱ va̱ʼa ña̱ kéʼé iin na̱ yiví kúú ña̱ náʼa̱ ña̱ kúúna na̱ ndíchi” (Mateo 11:19). ¿Á su̱ví ña̱ nda̱a̱ kúú ña̱yóʼo? Iin ki̱ʼva ña̱ kunda̱a̱-iniyó á va̱ʼa iin consejo kúú ña̱ keʼéyó ña̱ káʼa̱nña, tasaá kotoyó ndáa ki̱ʼva chíndeétáʼanña xíʼinyó. Xa̱ʼa̱ ña̱kán, iin ña̱ va̱ʼava kúú ña̱ ndakanixi̱níún xa̱ʼa̱ ña̱yóʼo: “Tá ndixa va̱ʼaní káʼa̱n ña̱ Biblia, ¿á va̱ása xíniñúʼu chindeétáʼanña xíʼi̱n ña̱ viíka koi̱? ¿Á ndixa kivi chindeétáʼanña xíʼi̱n ña̱ ndasavií tu̱ndóʼo ña̱ kúúmiíi̱ tiempo vitin?”. Ná ka̱ʼa̱nyó xa̱ʼa̱ iin ejemplo.

Ñá Dianab ku̱a̱ʼání ña̱ xi̱keʼéñá, si̱íní ni̱xi̱yoñá ta va̱ʼaní xi̱kuniñá xa̱ʼa̱ ña̱yóʼo, soo iin kama na̱sama ki̱ʼva ña̱ íyoñá saáchi ni̱ya̱ʼañá nu̱ú ku̱a̱ʼá tu̱ndóʼo, ni̱xi̱ʼi̱ ñá loʼo se̱ʼeñá, ta yiíñá sa̱ndákoorañá ta saátu xi̱kuma̱ní xu̱ʼún nu̱úñá. Ñáyóʼo káchiñá: “Va̱ása níxi̱kunda̱a̱ka-inii̱ ndáaña keʼíi̱ saáchi va̱ása níxi̱yoka ñá loʼo se̱ʼi̱, ni yiíi̱ ta ni veʼe nu̱ú koi̱. Ndi̱ʼi-xa̱ʼa̱ ndiʼi ña̱ va̱ʼa ña̱ xi̱kuumiíi̱, ta ni va̱ása níxi̱kunda̱a̱ka-inii̱ ndáa na̱ yiví kúi̱, ta ni va̱ása níxi̱yoka ndeíi̱, ta ni kǒoka ña̱ va̱ʼa níxi̱ndatui̱”.

Ñá Diana va̱ʼaníka na̱kunda̱a̱-iniñá xíʼin ña̱ tu̱ʼun yóʼo: “Ku̱i̱ya̱ ña̱ tákuyó kúúña 70 ku̱i̱ya̱, tá ndakúní-iniyó xa̱a̱yó 80 ku̱i̱ya̱va, soo ndiʼi ku̱i̱ya̱ yóʼo va̱ása va̱ʼaka ndóoyó, ta iin kama yáʼa ku̱i̱ya̱ yóʼo tá xíʼi̱vayó” (Salmo 90:10).

Ña̱ va̱ʼa ni̱ya̱ʼa ñá Diana nu̱ú tu̱ndóʼo, na̱ndukúñá consejo ña̱ va̱xi nu̱ú Biblia ta va̱ʼaní chi̱ndeétáʼan ña̱yóʼo xíʼinñá. Nda̱a̱ táki̱ʼva sakuaʼayó nu̱ú ña̱ inka u̱ni̱ artículo, ku̱a̱ʼání na̱ yiví ki̱ʼinna kuenta ña̱ tá ndíku̱nna consejo ña̱ va̱xi nu̱ú Biblia, va̱ʼaní chíndeétáʼanña xíʼinna ña̱ ndasaviína tu̱ndóʼo ña̱ kúúmiína. Ki̱ʼinna kuenta ña̱ íyo ña̱ Biblia nda̱a̱ táki̱ʼva íyo tutu ña̱ ni̱ka̱ʼa̱nyó xa̱ʼa̱ chí nu̱ú ki̱xáʼa ña̱ artículo yóʼo. Ña̱ Biblia va̱ása kítáʼanña xíʼin nda̱a̱ ni iin libro, saáchi tá yáʼa ku̱i̱ya̱ ña̱ libro kán va̱ása ndáyáʼvika ña̱ káʼa̱nña. ¿Á xa̱ʼa̱ ña̱ xa̱a̱ síín íyo ña̱ Biblia kúúña? ¿Á ndixa tu̱ʼun Ndióxi̱ kúú ña̱ va̱xi nu̱úña ta su̱ví tu̱ʼun na̱ ta̱a kúúña? (1 Tesalonicenses 2:13).

Sanatu ndákanixi̱níún ña̱ loʼo kuitíva tiempo tákuyó ta xóʼvi̱níyó. ¿Ndáa míí nándukún ña̱ kivi sandíko-iniún, ña̱ chindeétáʼan xíʼún á iin consejo, tá ndíʼi̱ní-iniún xa̱ʼa̱ ña̱ yáʼún nu̱ú tu̱ndóʼo?

Ná kotoyó ndáa u̱ni̱ ki̱ʼva kivi chindeétáʼan ña̱ Biblia xíʼún. Kivi chindeétáʼanña xíʼún:

1. Ña̱ kuxíkaún nu̱ú tu̱ndóʼo.

2. Ña̱ ndasaviún tu̱ndóʼo tá íyoña nu̱ún.

3. Ña̱ kundeé-iniún ya̱ʼaún nu̱ú iin tu̱ndóʼo ña̱ va̱ása kívi nasamaún.

Nu̱ú ña̱ inka artículo ka̱ʼa̱nyó xa̱ʼa̱ u̱ni̱ saá ña̱yóʼo.