Na̱ hermano na̱ xa̱a̱ chée, Jehová chíndayáʼvira ña̱ nda̱kú íyo inindó

ÑA̱ INÍÍSAÁ ñuyǐví, na̱ anciano na̱ xa̱a̱ chée chíndayáʼvinína chiñu ña̱ kéʼéna ti̱xin ñuu Ndióxi̱. Ta ndiʼiyó kúni̱yó ña̱ ná chindeéna miíyó. Soo sa̱kán ni̱ka̱ʼa̱nna xíʼin na̱ anciano na̱ xa̱a̱ chée, ña̱ ná ndataxina sava chiñu ña̱ kúúmiína ndaʼa̱ na̱ anciano na̱ válí.

Soo nda̱a̱ tá ke̱ʼéna ña̱yóʼo, na̱ superintendente ña̱ circuito xíʼin na̱ instructor á na̱ sánáʼa̱ na̱ ñuu Ndióxi̱, ndákoona chiñuna xa̱ʼa ña̱ xa̱a̱ chéena tá kúú na̱ xa̱a̱ kúúmií 70 ku̱i̱ya̱. Saátu na̱ anciano na̱ kúúmií 80 ku̱i̱ya̱ ndákoona chiñuna ndaʼa̱ inka na̱ válíka ña̱ koona coordinador xíʼin na̱ Comité ña̱ Sucursal á na̱ anciano. ¿Nda̱saa kúni na̱ hermano yóʼo tá táxina chíndeétáʼan inkana xíʼinna? Náʼa̱na ña̱ nda̱kú íyo inina xíʼin Jehová ta saátu xíʼin na̱ ñuura.

Ta̱ Ken, ni̱xi̱yora iin coordinador ña̱ Comité ña̱ Sucursal ki̱ʼva 49 ku̱i̱ya̱, ta̱kán ndákaʼánra ta káchira: “Tá ku̱nda̱a̱-inii̱ xa̱ʼa ña̱yóʼo, va̱ʼaní ku̱nii̱. Chi mií ki̱vi̱ sa̱a̱ ni̱ka̱ʼi̱n xíʼin Jehová ña̱ xíniñúʼundi̱ iin coordinador ta̱ loʼoka”. Ku̱a̱ʼá na̱ hermano na̱ xa̱a̱ chée ña̱ iníísaá ñuyǐví ndákanixi̱nína táki̱ʼva ndákanixi̱ní ta̱ Ken. Ña̱ nda̱a̱ kúúña, ndiʼi na̱ hermano yóʼo kúsi̱í-inina tá chíndeétáʼanna xíʼin inka na̱ hermano, ta saátu sana ndákava-inina chi va̱ása kéʼékana ku̱a̱ʼá chiñu.

Ta̱ Esperandio, xi̱kuura coordinador nu̱ú na̱ anciano ti̱xin ña̱ congregación, miíra káʼa̱n ña̱ sava yichi̱ xi̱kusuchí-inira. Soo saátu sava yichi̱ xi̱xoʼvi̱ra xíʼin kue̱ʼe̱ ña̱ kúúmiíra ta xi̱niñúʼura tiempo ña̱ kundaara miíra. Soo chíka̱a̱níra ndeé ña̱ káchíñura nu̱ú Jehová ta saátu ña̱ chíndeétáʼanra xíʼin na̱ hermano.

Ta, ¿ndáaña kivi ka̱ʼa̱nyó xa̱ʼa na̱ hermano na̱ xi̱kuu superintendente viajante? Ta̱ Allan, ni̱xi̱yora superintendente ki̱ʼva 38 ku̱i̱ya̱, miíra káʼa̱n: “Iin nda̱kanda̱-inii̱ tá xi̱niso̱ʼi̱ ña̱yóʼo”. Soo kúnda̱a̱-inira ña̱ ku̱a̱ʼání ña̱ va̱ʼa ndákiʼinra xa̱ʼa ña̱ sánáʼa̱ra inka na̱ hermano na̱ válíka, ta va̱ʼaní káchíñura nu̱ú Jehová.

Ta̱ hermano Russell ni̱xi̱yora superintendente viajante ta saátu ni̱xi̱yora instructor ña̱ escuela teocrática ki̱ʼva 40 ku̱i̱ya̱. Nátúʼunra ña̱ miíra xíʼin ñá síʼíra xi̱ndakavaní-inina tá xa̱ʼa. Káchira: “Chi̱ndayáʼvinindi̱ chiñu ña̱ xi̱kuumiíndi̱ ta xi̱ndakanixi̱níndi̱ ña̱ kúúmiíkavandi̱ ndeé ña̱ keʼéndi̱ña”. Tiempo vitin u̱vi̱ saána chíka̱a̱nína ndée ña̱ kuniñúʼuna ña̱ xíni̱na, ña̱ va̱ʼa chindeétáʼanna xíʼin na̱ hermano na̱ íyo congregación nu̱ú íyona, ta na̱ hermano kúsi̱íní-inina xíʼinna.

Soo miíyó sana va̱ása ndóʼoyó táki̱ʼva ndóʼo na̱ hermano yóʼo. Soo ni saá, tá ná kaʼviyó ña̱ káʼa̱n 2 Samuel chindeétáʼanña xíʼinyó ña̱ va̱ʼa kunda̱a̱ka-iniyó nda̱saa kúnina.

IIN TA̱A TA̱ VITÁ-INI, TA XI̱KUNDA̱A̱-INIRA XA̱ʼA ÑA̱ KǑO KIVI KEʼÉRA

Ná ndakaʼányó xa̱ʼa ta̱ Absalón tá i̱xaso̱ʼora nu̱ú yivára, ta̱ rey David. Xi̱niñúʼu kita ta̱ David ñuu Jerusalén ta ku̱ʼu̱nra chí ñuu Mahanaim, chí yu̱ta Jordán. Tá ni̱xa̱a̱na kán, miíra xíʼin na̱ ta̱a na̱ kítáʼan xíʼinra ndi̱ʼi̱ ña̱ kuxuna. Ta ¿ndáaña ku̱u vitin?

U̱ni̱ na̱ ta̱a na̱ ñuu kán va̱ʼaní ni̱xi̱yo inina xíʼinna, chi ni̱xa̱ʼa̱nna nda̱kana cama ndaʼa̱na, xíʼin ña̱ kuxuna, ta saátu inka ña̱ʼa ña̱ xi̱niñúʼuna. Iin ta̱yóʼo xi̱kuu ta̱ Barzilai (2 Sam. 17:27-29). Tá sa̱ndákoo ta̱ Absalón ña̱ kanitáʼanra xíʼin yivára, ta nda̱a̱ saáví nda̱ndikó ta̱ David ñuu Jerusalén, soo ta̱ Barzilai ni̱xa̱ʼa̱nra nda̱karara chí yu̱ta Jordán. Tasaá ni̱ka̱ʼa̱n ta̱ David xíʼinra ña̱ ná ku̱ʼu̱nra xíʼinra chí ñuu Jerusalén, saátu ni̱ka̱ʼa̱nra xíʼinra ña̱ miíra taxi ña̱ kuxura, ni kǒo xíniñúʼu ta̱ Barzilai ña̱yóʼo chi ta̱ ku̱i̱ká xi̱kuura (2 Sam. 19:31-33). Soo ta̱ David chi̱ndayáʼvinírara, xa̱ʼa ña̱ va̱ʼaní ni̱xi̱yo inira xíʼinra, saátu ña̱ ku̱a̱ʼání ña̱ va̱ʼa sa̱náʼa̱-ña̱ʼara. Nu̱ú ta̱ Barzilai iin ña̱ va̱ʼaní kúúña koora ta kachíñura nu̱ú íyo ta̱ rey.

Soo ta̱ Barzilai vitání ni̱xi̱yo inira, ta ni̱ka̱ʼa̱nra xíʼin ta̱ David ña̱ xa̱a̱ kúúmiíra 80 ku̱i̱ya̱ “ta va̱ása kívika ndakanixi̱níra ndáaña kúú ña̱ va̱ʼa ta ndáaña kúú ña̱ va̱ása va̱ʼa”. ¿Ndáaña kúni̱ kachira? Soo xa̱a̱ tá ya̱chi̱ví ku̱a̱ʼání ña̱ ndíchi nda̱kiʼinra. Soo ni saá va̱ʼaníva consejo ña̱ xi̱taxira, nda̱a̱ táki̱ʼva xi̱taxi na̱ anciano consejo ndaʼa̱ ta̱ rey Rehoboam tá tiempo ni̱xi̱yora (1 Rey. 12:6, 7; Sal. 92:12-14; Prov. 16:31). Xa̱ʼa ña̱yóʼo, sana xa̱ʼa ña̱ ndóʼo ta̱ Barzilai xa̱ʼa ña̱ ku̱chéera ni̱ka̱ʼa̱nra. Nda̱a̱ ni̱ka̱ʼa̱nra ña̱ va̱ása kútóora ña̱ xíxira ta ni va̱ása xíniso̱ʼokara (Ecl. 12:4, 5). Xa̱ʼa ña̱yóʼo ni̱ka̱ʼa̱nra xíʼin ta̱ David ña̱ ná ku̱ʼu̱n ta̱ loʼo Kimham xíʼinra chí ñuu Jerusalén, ta sana se̱ʼe miívara xi̱kuu ta̱yóʼo (2 Sam. 19:35-40).

ÑA̱ KOO CHÍ NU̱ÚNÍNU

Ña̱ xa̱a̱ ku̱nda̱a̱-iniyó xa̱ʼa sava na̱ anciano tá ki̱xaʼá ña̱ artículo yóʼo, náʼa̱ña ña̱ ndo̱ʼona nda̱a̱ táki̱ʼva ndo̱ʼo ta̱ Barzilai. Ña̱kán ná kiʼinyó kuenta xíʼin ña̱ ndo̱ʼo ta̱ Barzilai, chi ta̱yóʼo ni̱ka̱ʼa̱nra xa̱ʼa ña̱ kǒo kívi keʼé iinlá miíra. Soo tiempo ña̱ ndóoyó vitin, ndáyáʼviní ndakanixi̱níyó xa̱ʼa ña̱ xíniñúʼu na̱ anciano inka na̱ chindeétáʼan xíʼinna ña̱ va̱ʼa nda̱kú íyo inina.

Na̱ anciano na̱ xa̱a̱ chée, va̱ʼaní-inina chi va̱ʼaní kúni̱na tá kǒo kúúmiíkana sava chiñu ti̱xin congregación. Chi táxina ña̱ ndákiʼin inka na̱ hermano na̱ válí chiñu ña̱ xi̱kuumiína, tasaá va̱ʼa kuaʼnuka na̱ ñuu Ndióxi̱. Ña̱kán, nda̱a̱ sava mií na̱ hermano yóʼo sánáʼa̱na na̱ hermano válíka, sana saá ke̱ʼé ta̱ Barzilai xíʼin se̱ʼera á saátu ke̱ʼé ta̱ apóstol Pablo xíʼin ta̱ Timoteo (1 Cor. 4:17; Filip. 2:20-22). Na̱ hermano na̱ válí, náʼa̱na ña̱ kúúna “na̱ chíndeétáʼan xíʼinna” ta saátu ‘ndásandakúna-ini na̱ kándíxa ta̱ Jesúsʼ (Efes. 4:8-12; chitáʼanña xíʼin Números 11:16, 17, 29).

ÑA̱ KIVI KEʼÉYÓ ÑA̱ VA̱ʼA KACHIÑUKAYÓ NU̱Ú NDIÓXI̱

Iníísaá ñuyǐví, ku̱a̱ʼání na̱ hermano va̱ʼaní kéʼéna chiñuna, ta saátu ku̱a̱ʼáka chiñu kéʼéna nu̱ú Jehová.

“Ña̱ kéʼíi̱ vitin chíndeéña yi̱ʼi̱, ña̱ va̱ʼaka chindeétáʼi̱n xíʼin yií sava ná hermana na̱ kǒo kúú testigo”, káchi ta̱ Marco, ta̱ ni̱xi̱yo superintendente viajante, ki̱ʼva 19 ku̱i̱ya̱.

Ta̱ Geraldo, ni̱xi̱yora superintendente viajante ti̱xin 28 ku̱i̱ya̱, káchira: “Ñá síʼíi̱ xíʼin miíi̱ kúni̱ndi̱ keʼékandi̱ inka chiñu nu̱ú Ndióxi̱, tá kúú ña̱ chindeétáʼandi̱ xíʼin na̱ kúxíka nu̱ú Ndióxi̱, ta saátu sánáʼa̱ka̱ndi̱ inka na̱ yiví xa̱ʼa Ndióxi̱”. Nátúʼunra ña̱ xa̱a̱ káʼvira xíʼin 15 na̱ yiví, ta saátu ku̱a̱ʼání na̱ ku̱xíka nu̱ú Ndióxi̱ xáʼa̱nna reunión vitin.

Ta̱ Allan, ta̱ xa̱a̱ ni̱ka̱ʼa̱nyó xa̱ʼa chí nu̱ú kíxaʼá ña̱ artículo yóʼo, káchira: “Vitin iinlá kuití kúú ña̱ ndíʼi̱-inindi̱ xa̱ʼa, ña̱ natúʼunndi̱ xa̱ʼa Ndióxi̱. Kútóoníndi̱ natúʼunndi̱ nu̱ú íyo ku̱a̱ʼá na̱ yiví, ta kúú nu̱ú ya̱ʼvi á nu̱ú íyondi̱. Xa̱a̱ u̱vi̱ na̱ ndóo yatin xíʼinndi̱ xáʼa̱nna xíʼindi̱ veʼe nu̱ú ndátakandi̱”.

¿Á táʼan na̱ hermano na̱ nda̱kiʼin inka chiñu yóʼo kúú miíún? Inka ña̱ kivi keʼún ña̱ va̱ʼa inkáchi kachíñún xíʼin Jehová, kúú ña̱ natúʼún xíʼin na̱ hermano na̱ válíka xa̱ʼa ña̱ xíni̱ún. Ta̱ Russell, ta̱ xa̱a̱ ni̱ka̱ʼa̱nyó xa̱ʼa, káchira: “Jehová sánáʼa̱ra ta xíniñúʼura na̱ hermano na̱ válíka ña̱ va̱ʼaka kachíñuna nu̱úra. Na̱ ñuu Ndióxi̱ ku̱a̱ʼání ña̱ va̱ʼa ndákiʼinna xa̱ʼa ña̱ va̱ʼaní chíndeétáʼan na̱ va̱lí yóʼo xíʼinna ta sánáʼa̱nana” (koto ña̱ recuadro “Chindeétáʼan xíʼin na̱ hermano válíka ña̱ va̱ʼa ná kachíñukana nu̱ú Jehová”).

JEHOVÁ CHÍNDAYÁʼVIRA NA̱ NDA̱KÚ ÍYO INI

Tá xa̱a̱ na̱sama chiñu ña̱ kéʼún, va̱ása ndakava-iniún. Chiñu ña̱ xa̱a̱ ke̱ʼún xíʼin ndiʼi níma̱ún chi̱ndeétáʼanña xíʼin ku̱a̱ʼání na̱ yiví, ta kivi keʼékavaún ña̱yóʼo. Ta na̱yóʼo va̱ása ndakoona ña̱ kuʼvi̱-inina kunina yóʼó.

Soo ña̱ ndáyáʼvika kúúña, nu̱ú Jehová va̱ʼaní chiñu kéʼún. Ta ta̱yóʼo ni̱ka̱ʼa̱nra ña̱ kǒo nandósóra “xa̱ʼa chiñu ña̱ kéʼéndó nu̱úra xíʼin xa̱ʼa ña̱ náʼa̱ndó ña̱ kúʼvi̱-inindó xínindó ki̱vi̱ra, ta saátu ña̱ chíndeétáʼanndó xíʼin na̱ ñuura ta kǒo sandákoondóna” (Heb. 6:10). Ña̱ tu̱ʼun yóʼo náʼa̱ña nu̱úyó ña̱ su̱ví xa̱ʼa ña̱ʼa ña̱ ke̱ʼéyó tá ya̱chi̱ kuití ndákaʼánra xa̱ʼa. Yóʼó ndáyáʼviníún nu̱ú Jehová, ta ta̱yóʼo kǒo nandósó-inira xa̱ʼa chiñu ña̱ kéʼún nu̱úra vitin xíʼin xa̱ʼa ña̱ ke̱ʼún nu̱úra tá ya̱chi̱.

Soo, ¿tá miíyó ta̱ʼán ndakiʼinyó inka chiñu? Ni saá xíniñúʼu kunda̱a̱-iniyó xa̱ʼa ña̱yóʼo. ¿Nda̱chun?

Saáchi sana kítáʼanyó xíʼin sava na̱ hermano na̱ nda̱kiʼin inka chiñu ti̱xin ñuu Ndióxi̱, na̱yóʼo kivi sanáʼa̱na miíyó ndiʼi ña̱ xíni̱na. Va̱ʼaní kunda̱a̱-iniyó tá ná ndukúyó consejo nu̱úna. Ta ná kotoyó nda̱saa xíniñúʼuna ña̱ xíni̱na ña̱ va̱ʼa keʼéna chiñu ña̱ kúúmiína nu̱ú Ndióxi̱ vitin.

Ni kúúyó iin hermano na̱ xa̱a̱ chée na̱ nda̱kiʼin inka chiñu á ni kúúyó iin hermano á hermana na̱ kivi sakuaʼa nu̱ú na̱ hermano na̱ xa̱a̱ chée, ná ndakaʼányó chi Jehová chíndayáʼvira ndiʼi na̱ káchíñu nu̱úra.