Referencia Ña̱ Kéʼé na̱ Ndásakáʼnu Ndióxi̱ Tutu nu̱ú Va̱xi ña̱ Keʼéyó Reunión
2-8 TÍ NOVIEMBRE
ÑA̱ KÁʼA̱N BIBLIA XA̱ʼA̱ | ÉXODO 39, 40
“Va̱ʼaní xi̱ndiku̱n ta̱ Moisés ndiʼi ña̱ xi̱ka̱ʼa̱n Ndióxi̱ xíʼinra”
(Éxodo 39:32) Tasaá ndi̱ʼi ke̱ʼéna ña̱ tabernáculo á tienda ña̱ reunión. Ta na̱ ñuu Israel ke̱ʼéna ndiʼi ña̱ ni̱ka̱ʼa̱n Jehová xíʼin ta̱ Moisés. Ta ke̱ʼéna nda̱a̱ táki̱ʼva ni̱ka̱ʼa̱n ta̱ Moisés xíʼinna.
¿Á xíni̱ Jehová yi̱ʼi̱?
13 Ta̱ Moisés síín ni̱xi̱yora nu̱ú ta̱ Coré, “ta̱ Moisés xi̱kuura iin ta̱a ta̱ vitání-ini nu̱ú ndiʼika na̱ ta̱a na̱ ni̱xi̱yo nu̱ú ñuʼú” (Núm. 12:3). ¿Ama kúú ña̱ ni̱na̱ʼa̱ra ña̱ vitá ni̱xi̱yo-inira? Ni̱na̱ʼa̱ra ña̱yóʼo tá ni̱ka̱ʼa̱n Jehová xíʼinra keʼéra tabernáculo (Éxo. 7:6; 40:16). Nu̱ú Biblia va̱ása va̱xiña káʼa̱nña ña̱ ni̱ka̱ʼa̱n kúáchi ta̱ Moisés xa̱ʼa̱ ley ña̱ ta̱xi Jehová saátu va̱ása níka̱ʼa̱n kúáchira xa̱ʼa̱ ña̱ nda̱kaxin Jehová keʼéra. Ná ndakanixi̱níyó xa̱ʼa̱ ña̱ ni̱ka̱ʼa̱n Jehová xíʼinra ndáa ki̱ʼva keʼéra ña̱ tabernáculo, iin veʼe nu̱ú ndasakáʼnuna Jehová. Ni̱ka̱ʼa̱nra xíʼinra ndáa ki̱ʼva koo tela ña̱ kuniñúʼuna xíʼin ña̱ tabernáculo saátu color yi̱ʼva̱ ña̱ kuniñúʼuna ña̱ ixava̱ʼanaña ta saátu ndiʼika ña̱ʼa ña̱ kuniñúʼuna xíʼin ña̱ tabernáculo (Éxo. 26:1-6). Nda̱a̱ tá tiempo xi̱naʼá ta nda̱a̱ tiempo vitin, Jehová xíniñúʼura na̱ níʼi yichi̱ nu̱ú na̱ ñuura. Ta sava yichi̱ ndákava-iniyó tá káʼa̱nna xíʼinyó ndáaña xíniñúʼu keʼéyó. Soo Ndióxi̱ nda̱kúní íyo chiñu ña̱ kéʼéra ta va̱ʼaní kándíxara na̱ táxira chiñu ndaʼa̱ ña̱ kuniʼina yichi̱ nu̱ú na̱ ñuura. Ña̱kán tá ku̱a̱ʼá kúú ña̱ káʼa̱nra xíʼinyó keʼéyó, íyo iin xa̱ʼa̱ kúú ña̱ kéʼéraña. Chi saá ke̱ʼé ta̱ Moisés tá ni̱ka̱ʼa̱n Jehová xíʼinra ndáa ki̱ʼva keʼéra ña̱ tabernáculo, va̱ása nísa̱a̱ra xíʼin Jehová, ta va̱ása níndakanixi̱níra ña̱ kǒo níchindayáʼvi Jehová miíra ta ni va̱ása níndakanixi̱níra ña̱ sási Jehová nu̱úra ña̱ keʼéra ña̱ kúni̱ miíra. Chi nu̱úka ña̱ keʼéra saá, va̱ʼaní xi̱niso̱ʼora ndiʼi ña̱ ni̱ka̱ʼa̱n Jehová xíʼinra, ta xa̱ʼa̱ ña̱yóʼo ni̱ka̱ʼa̱nra xíʼin na̱ i̱xava̱ʼa ña̱ tabernáculo ña̱ viíní ná keʼénaña nda̱a̱ táki̱ʼva ni̱ka̱ʼa̱n Ndióxi̱ kooña (Éxo. 39:32). Vitání ni̱xi̱yo ini ta̱ Moisés, ta xi̱kunda̱a̱-inira ña̱ chiñu mií Jehová kúúña, ta xi̱kunda̱a̱-inira ña̱ mií Ndióxi̱ xi̱niñúʼu-ñaʼá ña̱ keʼéra ña̱ chiñu yóʼo.
(Éxodo 39:43) Tá xi̱to ta̱ Moisés ndiʼi chiñu ña̱ ke̱ʼéna, ki̱ʼinra kuenta ña̱ ke̱ʼéna nda̱a̱ táki̱ʼva ni̱ka̱ʼa̱n Jehová. Tasaá chi̱ka̱a̱ ta̱ Moisés bendición na̱yóʼo.
(Éxodo 40:1, 2) Tasaá ni̱ka̱ʼa̱n Jehová xíʼin ta̱ Moisés: 2 “Tá ná kixáʼa yo̱o̱ nu̱ú, ndachitáʼún ña̱ tabernáculo á tienda ña̱ reunión.
(Éxodo 40:16) Ta̱ Moisés ke̱ʼéra ndiʼi ña̱ ni̱ka̱ʼa̱n Jehová. Ta nda̱a̱ táki̱ʼva ni̱ka̱ʼa̱nra xíʼinra keʼéra, saá ke̱ʼéra.
w05 15/7 26 párr. 3
¿Á nda̱kú íyo iniyó xíʼin ndiʼi ña̱ kéʼéyó?
3 Hebreos 3:5 káʼa̱nña xa̱ʼa̱ ta̱ Moisés ña̱ nda̱kúní ni̱xi̱yo inira tá xi̱keʼéra chiñu. ¿Nda̱chun káʼa̱nyó ña̱ nda̱kúní ni̱xi̱yo ini ta̱ profeta Moisés? Saáchi tá i̱xava̱ʼara ña̱ tabernáculo, “ke̱ʼéra ndiʼi ña̱ ni̱ka̱ʼa̱n Jehová. Ta nda̱a̱ táki̱ʼva ni̱ka̱ʼa̱nra xíʼinra keʼéra, saá ke̱ʼéra” (Éxodo 40:16). Miíyó na̱ ndásakáʼnu Jehová náʼa̱yó ña̱ nda̱kú íyo iniyó tá kándíxayó ña̱ káʼa̱nra. Ta kǒo ndákooyó ña̱ ndasakáʼnuyóra tá yáʼayó nu̱ú iin prueba á nu̱ú iin tu̱ndóʼo, chi kúni̱yó nda̱kú koo-iniyó xíʼinra. Ta su̱ví ña̱ ya̱ʼayó nu̱ú iin prueba ña̱ káʼnuní ta xa̱a̱ kúúyó na̱ yiví nda̱kú-ini. Chi saá ni̱ka̱ʼa̱n ta̱ Jesús: “Na̱ yiví na̱ nda̱kú-ini xíʼin loʼo ña̱ʼa saátu nda̱kú-inina xíʼin ku̱a̱ʼákaña, ta na̱ yiví na̱ va̱ása nda̱kú-ini xíʼin loʼo ña̱ʼa saátu va̱ása nda̱kú-inina xíʼin ku̱a̱ʼákaña.” (Lucas 16:10). Xíniñúʼún nda̱kúní koo-iniyó xíʼin Ndióxi̱ ni túviyó ña̱ su̱ví ña̱ ndeé kúú prueba ña̱ va̱xi nu̱úyó.
Ná ndakanixi̱níyó xa̱ʼa̱ ña̱ kivi chindeé miíyó
(Éxodo 39:34) ñii̱ tí ndikachi ña̱ nda̱kaʼyi̱ xíʼin color kúaʼa, ñii̱ tí foca ta saátu cortina ña̱ ndataʼví ini ña̱ tabernáculo.
it-2 663
Ñii̱ tí foca
¿Ndáa mií ki̱ʼin na̱ ñuu Israel ñii̱ tí foca? Ña̱ tu̱ʼun tá·jasch ña̱ va̱xi nu̱ú Biblia káʼa̱nña xa̱ʼa̱ tí foca, ña̱kán ndáa mií ki̱ʼin na̱ ñuu Israel ñii̱ tí foca ña̱ xi̱niñúʼuna. Sava tí foca yóʼo íyorí lugar nu̱ú vi̱xinní ta savarí íyo nu̱ú loʼo kuití vi̱xin. Tiempo vitin ndáni̱ʼíkana tí foca frailes chí mar Mediterráneo, xíʼin inkaka lugar. Xa̱ʼa̱ ña̱ xáʼníní na̱ yiví tíyóʼo, xa̱a̱ va̱xi ndíʼirí, soo tá tiempo xi̱naʼá ni̱xi̱yoní tíyóʼo chí mar Mediterráneo ta saátu chí mar Rojo. Tá ku̱i̱ya̱ 1832, ña̱ Dictionary of the Holy Bible (de Calmet, pág. 139) va̱xi ña̱ tu̱ʼun yóʼo nu̱úña: “Íyo ku̱a̱ʼání tí foca isla válí ña̱ íyo chí mar Rojo, chí península ña̱ Sinaí”. (Va̱ʼatu kotoún ña̱ va̱xi nu̱ú The Tabernacleʼs Typical Teaching, de A. J. Pollock, Londres, pág. 47.)
it-2 664 párr. 1
Ñii̱ tí foca
Chi mar Rojo na̱ ñuu Egipto xi̱sikóna ta xi̱satána ña̱ʼa ña̱ xi̱kixi inkaka lugar. Ña̱kán na̱ ñuu Israel xi̱xini̱vana ñii̱ tí foca. Ña̱kán tá ke̱ena ña̱ ñuu Egipto sana nda̱kiʼinna ñii̱ tí foca ña̱ xi̱kuumiína ku̱a̱ʼa̱n xíʼinna, saátu nda̱kiʼinna ña̱ ta̱xi na̱ ñuu Egipto ndaʼa̱na ta saátu ku̱a̱ʼáka ña̱ʼa ña̱ ta̱xi na̱ ñuu yóʼo ndaʼa̱na. (Éx 12:35, 36.)
(Éxodo 40:34) Tasaá, ña̱ vi̱kó nda̱siña sa̱tá tienda ña̱ reunión, ta ndee̱ Jehová nda̱kutúña ini ña̱ tabernáculo.
¿Á ndáyáʼvi ña̱ kuni inkana ndáa chiñu kúú ña̱ kéʼéyó?
Ña̱ Biblia káʼa̱nña “ña̱ vi̱kó nda̱siña sa̱tá tienda ña̱ reunión, ta ndee̱ Jehová nda̱kutúña ini ña̱ tabernáculo” tándi̱ʼi ke̱ʼéna ña̱yóʼo (Éx. 40:34). Xíʼin ña̱yóʼo ni̱na̱ʼa̱ Ndióxi̱ ña̱ ku̱si̱í-inira xíʼin chiñu ña̱ ke̱ʼéna. ¿Ndáaña ndo̱ʼo ta̱ Bezalel xíʼin ta̱ Oholiab tá xi̱nira ña̱yóʼo túviún? Chiñu ña̱ ke̱ʼéna kǒo ki̱vi̱na níka̱ʼyí sa̱táña, soo ku̱si̱íníva-inina tá xi̱nina nda̱si Jehová iin vi̱kó sa̱tá tienda ña̱ reunión (Prov. 10:22). Ta tá ni̱ya̱ʼa ku̱a̱ʼá tiempo, ku̱si̱íníka inina chi ki̱ʼinna kuenta ña̱ na̱ ñuu Israel xi̱xiniñúʼukana ña̱yóʼo ña̱ ndasakáʼnuna Jehová. Tá ná ndatakuna nu̱ú ñuʼú xa̱á, ndakanda̱ní-inina ña̱ kunda̱a̱-inina chi ki̱ʼva quinientos ku̱i̱ya̱ xi̱niñúʼu na̱ ñuu Israel ña̱ tabernáculo ña̱ ndasakáʼnuna Jehová.
Ña̱ kaʼviyó nu̱ú Biblia
(Éxodo 39:8-21) Tándi̱ʼi, saá ke̱ʼéra bolsa cuadrado ña̱ kutikaa kándíka ta̱ Aarón. Táki̱ʼva ku̱ʼva ti̱ko̱to̱ ña̱ efod saá ku̱va̱ʼaña: ku̱va̱ʼaña xíʼin oro, yi̱ʼva̱ ña̱ azul, yi̱ʼva̱ ña̱ ku̱va̱ʼa xíʼin yixí tí ndikachi ña̱ color púrpura, yi̱ʼva̱ ña̱ kúaʼa xíʼin yi̱ʼva̱ ña̱ lino ña̱ va̱ʼaní. 9 Tá nda̱chitaʼnúna ña̱yóʼo ki̱ʼva 22 centímetro xíʼin 2 milímetro kúúña ña̱ káni̱ña, ta ki̱ʼva 22 centímetro xíʼin 2 milímetro kúúña ña̱ ndíka̱ña. 10 Ta ku̱mí fila ña̱ yu̱u̱ chi̱nundana nu̱ú ña̱yóʼo. Fila ña̱ nu̱ú chi̱nundana rubí, topacio xíʼin esmeralda. 11 Ta ña̱ fila u̱vi̱ chi̱nundana ña̱ turquesa, zafiro xíʼin ña̱ jaspe. 12 Ta ña̱ fila u̱ni̱ chi̱nundana ña̱ yu̱u̱ ña̱ naní léshem, ña̱ ágata xíʼin ña̱ amatista. 13 Ta ña̱ fila ku̱mí chi̱nundana ña̱ crisólito, ña̱ ónice xíʼin ña̱ jade. Ta ndiʼi yuʼú yu̱u̱ válí yóʼo chi̱nundana oro. 14 Ta ña̱ yu̱u̱ yóʼo kuumiíña ki̱vi̱ na̱ 12 se̱ʼe ta̱ Israel. Iin tá iin ki̱vi̱ ña̱ va̱xi yóʼo, ndánaʼa̱ña na̱ 12 tribu na̱ se̱ʼe na̱ ñuu Israel. 15 Ta saátu ke̱ʼéra cadena válí ña̱ kuniñúʼuna xíʼin bolsa cuadrado ña̱ kutikaa kándíka ta̱ Aarón. Táki̱ʼva íyo yi̱ʼva̱ ña̱ oro saá íyoña. 16 Tasaá ke̱ʼéna u̱vi̱ seʼe̱ xíʼin oro, ta chi̱tiinnarí u̱vi̱ saá esquina ña̱yóʼo, ña̱ íyo chí ni̱nu. 17 Tasaá chi̱ka̱a̱na yi̱ʼva̱ ña̱ oro ti̱xin tí seʼe̱ yóʼo ña̱ u̱vi̱ saá esquina ña̱ bolsa cuadrado ña̱ kutikaa kándíka ta̱ Aarón. 18 Tasaá sa̱yáʼana u̱vi̱ saá nu̱ú ña̱ yi̱ʼva̱ yóʼo ña̱ ndakutáʼanña xíʼin ña̱ kánuu chí so̱kó ña̱ ti̱ko̱to̱ yóʼo, ña̱ va̱ʼa tiinña bolsa cuadrado ña̱ kutikaa kándíka ta̱ Aarón. 19 Tándi̱ʼi, saá ke̱ʼéna inka u̱vi̱ seʼe̱ tí oro ta chi̱tiinarí u̱vi̱ saá esquina chí xa̱ʼa̱ña. 20 Ta saátu ke̱ʼéna inka u̱vi̱ seʼe̱ ta chi̱tiinarí chí nu̱ú ña̱ ti̱ko̱to̱ ña̱ efod, yatin nu̱ú tíin ña̱ cinturónña. 21 Tasaá sa̱yáʼana u̱vi̱ saá yi̱ʼva̱ ña̱ color azul yóʼo ti̱xin seʼe̱ tí oro ña̱ va̱ʼa tiinña ña̱ bolsa cuadrado ña̱ kutikaa kándíka ta̱ Aarón, yatin nu̱ú íyo cinturón ña̱ efod, nda̱a̱ táki̱ʼva ni̱ka̱ʼa̱n mií Jehová xíʼin ta̱ Moisés.
9-15 TÍ NOVIEMBRE
ÑA̱ KÁʼA̱N BIBLIA XA̱ʼA̱ | LEVÍTICO 1-3
“¿Nda̱chun xi̱taxina ofrenda?”
(Levítico 1:3) ”ʼTá iinna kúni̱na kaʼmina si̱ndi̱ki̱ ña̱ koorí ofrenda, che̱e xíniñúʼu koorí ta va̱ása xíniñúʼu kuumiírí kue̱ʼe̱. Xíʼin níma̱na taxinarí ndaʼa̱ Jehová chí yéʼé tienda ña̱ reunión.
(Levítico 2:1) ”ʼTa tá iinna ná taxina ofrenda ña̱ xíxi ndaʼa̱ Jehová, tá kúú ña̱ harina, mií ña̱ va̱ʼaní xíniñúʼu koo ña̱yóʼo. Ta xíniñúʼu chika̱a̱na aceite sa̱táña ta saátu xíniñúʼu chika̱a̱na olíbano sa̱táña.
(Levítico 2:12) ”ʼKivi koo ña̱yóʼo iin ofrenda ña̱ taxina ndaʼa̱ Jehová, soo va̱ása xíniñúʼu taxinaña nu̱ú ña̱ altár ña̱ kooña iin ña̱ xáʼa̱n támi nu̱ú Jehová.
it-2 523 párr. 1
Ofrenda
Ofrenda ña̱ xáʼmina nu̱ú Ndióxi̱. Ña̱ ofrenda yóʼo kǒo nda̱a̱ ni loʼoña níxi̱kindo̱o ndaʼa̱na chi ndiʼiña xi̱taxina ndaʼa̱ Jehová; Na̱ xi̱xaʼmi ña̱ ofrenda yóʼo nu̱ú Ndióxi̱, inííña saá xi̱xaʼmina nu̱úra. (Chitáʼanña xíʼin Jue 11:30, 31, 39, 40.) Ña̱ ofrenda yóʼo xi̱taxinaña ndaʼa̱ Jehová ña̱ ndakiʼinraña xa̱ʼa̱ ku̱a̱china. Ta táki̱ʼva ni̱xi̱yo ña̱ ofrenda ña̱ xi̱xaʼmina nu̱ú Ndióxi̱ saá ke̱ʼé ta̱ Jesucristo ña̱ nda̱taxira miíra xa̱ʼa̱ ku̱a̱chiyó.
it-2 525 párr. 8
Ofrenda
Ofrenda ña̱ xíxi. Ña̱ ofrenda yóʼo inkáchi xi̱taxinaña xíʼin ofrenda ña̱ comunión, ofrenda ña̱ xi̱xaʼmina nu̱ú Ndióxi̱, ofrenda ña̱ xi̱taxina xa̱ʼa̱ ku̱a̱china xíʼin ofrenda ña̱ ku̱i̱ʼi ña̱ nu̱ú ña̱ xi̱taxina; soo sava yichi̱ xa̱a̱ síín síín xi̱taxina ña̱ ofrenda yóʼo. (Éx 29:40-42; Le 23:10-13, 15-18; Nú 15:8, 9, 22-24; 28:9, 10, 20, 26-28; cap. 29.) Ta xi̱taxinaña ndaʼa̱ Ndióxi̱ xa̱ʼa̱ ña̱ va̱ʼaní ni̱xi̱yo inira xíʼinna saátu xa̱ʼa̱ ña̱ xi̱taxira bendición ndaʼa̱na; ta sava yichi̱ xi̱taxina aceite ta saátu olíbano xíʼin ña̱ ofrenda yóʼo. Ta xi̱kuchiñu taxina harina ña̱ kooña ofrenda, si̱ʼva̱ ña̱ xi̱yatan, torta ña̱ íyo táki̱ʼva íyo seʼe̱, galleta válí ña̱ xi̱yatan. Loʼo ña̱ ofrenda yóʼo xi̱chisónaña nu̱ú ña̱ altar nu̱ú xi̱xaʼmina kití, ta loʼoña xi̱xixi na̱ su̱tu̱, ta tá kúú ofrenda ña̱ comunión, loʼo ña̱yóʼo xi̱xixi míí na̱ xi̱taxiña. (Le 6:14-23; 7:11-13; Nú 18:8-11.) Ta ndiʼi ña̱ ofrenda yóʼo va̱ása níxiniñúʼu kuumiíña levadura á ñu̱ñú, ni ndutá tí higo, á ndiʼika ndutá ku̱i̱ʼi tá kivi sáku̱i̱ya̱ ña̱yóʼo. (Le 2:1-16.)
(Levítico 3:1) ”ʼTá iinna kúni̱na taxina iin sacrificio ña̱ kítáʼan viína xíʼin Jehová, si̱ndi̱ki̱ síʼí á che̱e xíniñúʼu koorí, ta va̱ása xíniñúʼu kuumiírí kue̱ʼe̱.
it-2 523 párr. 6
Ofrenda
Ofrenda ña̱ comunión (á ña̱ kítáʼan viína xíʼin Ndióxi̱). Tá xi̱taxi na̱ ñuu Israel ofrenda ña̱ comunión xi̱na̱ʼa̱ña ña̱ viíní kítáʼanna xíʼin Jehová. Na̱ xi̱taxi ofrenda yóʼo xi̱xixina loʼoña, ta loʼoña xi̱ndakiʼin ta̱ su̱tu̱ ta̱ xi̱taxi ña̱ ofrenda yóʼo ndaʼa̱ Ndióxi̱, saátu savaka na̱ su̱tu̱ na̱ xi̱chindeétáʼan xíʼinra xi̱ndakiʼinna loʼo ña̱yóʼo. Ta Jehová kúú ta̱ xi̱ndakiʼin ña̱ xi̱xaʼmina nu̱úra tá kúú ña̱ xa̱ʼan ña̱ xi̱xixi̱, saátu ni̱i̱, chi ña̱yóʼo kúú ña̱ xi̱taxi ña̱ kutaku tí kití yóʼo, xa̱ʼa̱ ña̱kán kuenta mií Ndióxi̱ xi̱kuuña. Ta na̱ xi̱taxi ña̱ ofrenda yóʼo, saátu na̱ su̱tu̱ ta saátu Jehová, nda̱a̱ táki̱ʼva íyo na̱ inkáchi xi̱xixi saá ni̱xi̱yona, ta xíʼin ña̱yóʼo xi̱na̱ʼa̱ña ña̱ viíní xi̱kitáʼanna xíʼin Jehová.
Ná ndakanixi̱níyó xa̱ʼa̱ ña̱ kivi chindeé miíyó
(Levítico 2:13) ”ʼNdiʼi ofrenda ña̱ xíxi ña̱ taxiún, xíniñúʼu chika̱ún ñi̱i̱n xíʼinña. Va̱ása xíniñúʼu kuma̱ní ñi̱i̱n xíʼin ofrenda ña̱ taxiún chi iin trato ña̱ ke̱ʼé Ndióxi̱ xíʼinndó kúú ña̱yóʼo. Ta ndiʼi tiempo tá ná taxiún ofrenda, xíniñúʼu chitáʼún ñi̱i̱n xíʼinña.
(Ezequiel 43:24) Ta taxiúnña ndaʼa̱ Jehová, ta na̱ su̱tu̱ chika̱a̱ ñi̱i̱n sa̱táña ta kaʼminaña ña̱ kooña iin ofrenda nu̱ú Jehová.
w04 15/5 22 párr. 1
Ña̱ káʼa̱n xa̱ʼa̱ libro ña̱ Levítico
2:13. ¿Nda̱chun kúú ña̱ xi̱chitáʼanna ñi̱i̱n xíʼin ndiʼi ofrenda ña̱ xi̱taxina? Su̱ví xa̱ʼa̱ ña̱ ya̱si̱nka koo ña̱ sacrificio kúúña. Saáchi iníísaá ñuyǐví, ku̱a̱ʼání na̱ yiví xíniñúʼuna ñi̱i̱n ña̱ chika̱a̱na xíʼin ña̱ʼa ña̱kán va̱ása ndiʼi-xa̱ʼa̱ kamaña. Ta ña̱ xi̱chitáʼanna ñi̱i̱n xíʼin ña̱ sacrificio ña̱ xi̱taxina, xi̱na̱ʼa̱ña ña̱ iin sacrificio ña̱ va̱ʼaní xi̱kuuña ta va̱ása ndiʼi-xa̱ʼa̱ kamaña.
(Levítico 3:17) ”ʼÑa̱yóʼo kúú ña̱ xíniñúʼu keʼéndó ta saátu na̱ se̱ʼendó nda̱a̱ ndáaka nu̱ú ndóona: nda̱a̱ ni iin ki̱vi̱ va̱ása xíniñúʼu kaxíndó xa̱ʼan ta saátu va̱ása xíniñúʼu kaxíndó ni̱i̱ʼ”.
Ña̱ sákuaʼayó xíʼin libro ña̱ Levítico
10 Ña̱ u̱ni̱ sákuaʼayó: táxiyó ndiʼi ña̱ va̱ʼa ña̱ kúúmiíyó ndaʼa̱ Jehová saáchi kúʼvi̱-iniyó xíniyóra. Nu̱ú Jehová xa̱ʼan tí kití kúú ña̱ va̱ʼaníka. Ta saátu ni̱ka̱ʼa̱nra ña̱ sava ña̱ ñúʼu inirí ndáyáʼviníña, tá kúú ña̱ nduchírí (kaʼvi Levítico 3:6, 12, 14-16). Xa̱ʼa̱ ña̱kán, xi̱kusi̱íní-ini Jehová tá xi̱taxi na̱ ñuu Israel xíʼin ndiʼi níma̱na ña̱ ñúʼu ini tí kití xíʼin xa̱ʼanrí ndaʼa̱ra. Tá xi̱taxi iin na̱ ñuu Israel iin ofrenda, xi̱na̱ʼa̱na ña̱ kúni̱na taxina mií ña̱ va̱ʼa ndaʼa̱ Jehová. Ki̱ʼva saá íyo ña̱ ke̱ʼé ta̱ Jesús, ña̱ ta̱xira ndiʼi ña̱ va̱ʼa ña̱ kúúmiíra ndaʼa̱ yivára, ña̱ ndasakáʼnurara xa̱ʼa̱ ña̱ kúʼvi̱ní-inira xínirara (Juan 14:31). Ta̱ Jesús xi̱kusi̱íní-inira xi̱keʼéra ña̱ kúni̱ Ndióxi̱ ta xi̱kuʼvi̱-inira xi̱xinira leyra (Sal. 40:8). Ni̱kusi̱íní-ini Jehová tá xi̱nira ndáa ki̱ʼva ka̱chíñu se̱ʼera nu̱úra.
11 Sacrificio ña̱ xi̱taxina xa̱ʼa̱ ña̱ kutáʼan viína xíʼin Jehová, xa̱ʼa̱ ña̱ kúni̱ miína xi̱taxinaña, ta xíʼin ña̱yóʼo xi̱na̱ʼa̱na ña̱ kúʼvi̱-inina xíninara. Ña̱ káchíñuyó nu̱ú Jehová nda̱a̱ táki̱ʼva íyo ña̱ sacrificio kán saá íyoña, saáchi saá náʼa̱yó ña̱ kúni̱yó xíniyóra. Ta táxiyó ndiʼi ña̱ va̱ʼa ña̱ kúúmiíyó ndaʼa̱ra, chi kúʼvi̱-iniyó xíniyóra xíʼin ndiʼi níma̱yó. Jehová kúsi̱íní-inira tá xítora ña̱ ku̱a̱ʼání na̱ yiví ndásakáʼnunara, xa̱ʼa̱ ña̱ kúʼvi̱-inina xíninara ta saátu ña̱ káʼa̱nra. Va̱ʼaní kúniyó tá kúnda̱a̱-iniyó ña̱ su̱ví nda̱saa ña̱ kéʼéyó ndáyáʼvi nu̱ú Jehová, chi nda̱chun kúú ña̱ kéʼéyóña. Tá kúú, tá xa̱a̱ ku̱chéeyó ta va̱ása kívika keʼéyó ndiʼi ña̱ kúni̱yó, Jehová va̱ása xítora ña̱ va̱ása kúchiñuyó keʼéyó. Sana ndákanixi̱níyó ña̱ loʼo kúú ña̱ kivi taxiyó ndaʼa̱ra, soo ta̱kán xítora ña̱ xa̱ʼa̱ ña̱ kúʼvi̱-iniyó xíniyóra kúú ña̱ kúni̱yó keʼéyó ndiʼi ña̱ kuchiñuyó. Kúsi̱íní-inira ndakiʼinra ndiʼi ña̱ va̱ʼa ña̱ kivi taxiyó ndaʼa̱ra.
w04 15/5 22 párr. 2
Ña̱ káʼa̱n xa̱ʼa̱ libro ña̱ Levítico
3:17. Xa̱ʼa̱ ña̱ xi̱kuu xa̱ʼan iin ña̱ va̱ʼaníka ta xi̱kuuña mií ña̱ ya̱si̱nníka, na̱ ñuu Israel xi̱kunda̱a̱-inina ña̱ kuenta mií jehová kúú ña̱yóʼo ta kǒo níxi̱xaxínaña (Génesis 45:18). Ña̱yóʼo sándakaʼánña miíyó ña̱ xíniñúʼu taxiyó mií ña̱ va̱ʼaka ndaʼa̱ Jehová (Proverbios 3:9, 10; Colosenses 3:23, 24).
Ña̱ kaʼviyó nu̱ú Biblia
(Levítico 1:1-13) Tasaá ka̱na Jehová ta̱ Moisés ta ni̱ka̱ʼa̱nra xíʼinra ini tienda ña̱ reunión. Ta ka̱chira xíʼinra: 2 “Ka̱ʼa̱n xíʼin na̱ ñuu Israel: ‘Tá iin ndóʼó ná taxindó kití ña̱ koorí ofrenda ndaʼa̱ Jehová, si̱ndi̱ki̱ á ndikachi xíniñúʼu koorí. 3 ”ʼTá iinna kúni̱na kaʼmina si̱ndi̱ki̱ ña̱ koorí ofrenda, che̱e xíniñúʼu koorí ta va̱ása xíniñúʼu kuumiírí kue̱ʼe̱. Xíʼin níma̱na taxinarí ndaʼa̱ Jehová chí yéʼé tienda ña̱ reunión. 4 Ta xíniñúʼu chinúuna ndaʼa̱na sa̱tá ña̱ ofrenda yóʼo, ta Ndióxi̱ ixakáʼnu-inira xa̱ʼa̱ ku̱a̱china xa̱ʼa̱ ña̱ ofrenda yóʼo. 5 ”ʼTa xíniñúʼu kivi tí si̱ndi̱ki̱ loʼo yóʼo nu̱ú Jehová. Ta na̱ se̱ʼe ta̱ Aarón, xíʼin na̱ su̱tu̱, na̱yóʼo xíniñúʼu kata yávána ni̱i̱rí nu̱ú ña̱ altar, ña̱ níndichi chí yéʼé tienda ña̱ reunión. 6 Kití tí taxina ofrenda, xíniñúʼu tavána ñii̱ sa̱tárí ta saátu sákuachi válínarí. 7 Na̱ se̱ʼe ta̱ Aarón na̱ kúú su̱tu̱, na̱yóʼo kúú na̱ xíniñúʼu chika̱a̱ ñuʼu̱ nu̱ú ña̱ altar ta chisóna titu̱n nu̱ú ñuʼu̱ ña̱ xíxi̱. 8 Ta na̱ se̱ʼe ta̱ Aarón na̱ kúú su̱tu̱, na̱yóʼo kúú na̱ chisó kití nu̱ú ña̱ altar nu̱ú xíxi̱ ñuʼu̱, chisóna ku̱ñurí, xa̱ʼanrí xíʼin xi̱nírí. 9 Xitirí xíʼin xa̱ʼa̱rí xíniñúʼu ndooña xíʼin ti̱kui̱í, ta ta̱ su̱tu̱ xíniñúʼu chisóraña nu̱ú ña̱ altar ña̱ kokoña, saáchi iin ofrenda ña̱ xáʼa̱n támi koo ña̱yóʼo nu̱ú Jehová. 10 ”ʼTá iin na̱ yiví kúni̱na kaʼmina iin ofrenda, ta kúni̱na taxina iin ndikachi loʼo á ti̱xúʼu loʼo, che̱e xíniñúʼu koorí ta va̱ása xíniñúʼu kuumiírí kue̱ʼe̱. 11 Ta xíniñúʼu kaʼnína tíyóʼo nu̱ú Jehová chí síi̱n ña̱ altar ña̱ xítondaa chí norte. Ta na̱ se̱ʼe ta̱ Aarón na̱ kúú su̱tu̱, na̱yóʼo kata yávána ni̱i̱ tíyóʼo iníí sa̱tá ña̱ altar. 12 Ta xíniñúʼu ta̱ʼnda̱ válí tíyóʼo, ta ta̱ su̱tu̱ kúú ta̱ xíniñúʼu chinúu xi̱nírí xíʼin xa̱ʼanrí sa̱tá titu̱n tú xíxi̱ nu̱ú ña̱ altar. 13 Ta xíniñúʼu ndoo xitirí xíʼin xa̱ʼa̱rí xíʼin ti̱kui̱í, ta ta̱ su̱tu̱ xíniñúʼu taxira ndiʼi ña̱yóʼo ña̱ kokoña nu̱ú ña̱ altar. Ta ña̱ ofrenda yóʼo, iin ña̱ xáʼa̱n támi koo ña̱yóʼo nu̱ú Jehová.
16-22 TÍ NOVIEMBRE
ÑA̱ KÁʼA̱N BIBLIA XA̱ʼA̱ | LEVÍTICO 4, 5
“Ná taxiyó mií ña̱ va̱ʼaka ndaʼa̱ Jehová”
(Levítico 5:5, 6) ”ʼTá iin na̱ ñuu Israel ná keʼé táʼan ña̱ ku̱a̱chi yóʼo, xíniñúʼu ka̱ʼa̱nna ndáa ki̱ʼva ni̱ki̱ʼvinaña. 6 Saátu xíniñúʼu taxina ofrenda ndaʼa̱ Jehová xa̱ʼa̱ ku̱a̱chi ña̱ ni̱ki̱ʼvina, ta xíniñúʼu taxina iin ndikachi loʼo á ti̱xúʼu loʼo xa̱ʼa̱ ku̱a̱china, ta síʼí xíniñúʼu koorí. Tasaá ta̱ su̱tu̱ taxira tíyóʼo ña̱ koorí sacrificio ña̱ va̱ʼa ixakáʼnu-ini Ndióxi̱ xa̱ʼa̱ ku̱a̱china.
it-2 524 párr. 13
Ofrenda
Ofrenda ña̱ xi̱taxina xa̱ʼa̱ ña̱ va̱ása va̱ʼa níxi̱keʼéna. Ña̱yóʼo kúútu ña̱ xi̱taxina xa̱ʼa̱ ku̱a̱chi ña̱ xi̱kiʼvina. Saáchi tá kǒo iin ña̱ʼa ña̱ va̱ása va̱ʼa níxi̱keʼéna, kǒo ku̱a̱chi níxi̱kiʼvina nu̱ú Ndióxi̱. Ta xi̱taxina ña̱ ofrenda yóʼo xa̱ʼa̱ ku̱a̱chi ña̱ ni̱ki̱ʼvina. Ta síín ni̱xi̱yo ña̱yóʼo nu̱ú ofrenda ña̱ xi̱taxina xa̱ʼa̱ ku̱a̱chi ña̱ ndeéka xi̱kiʼvina. Ta xi̱taxinaña xa̱ʼa̱ iin ña̱ va̱ása va̱ʼa níkeʼéna nu̱ú iin na̱ ñuu Israel á nu̱ú Jehová. Ta ña̱ xi̱taxina ña̱yóʼo, xi̱kuni̱na ña̱ ná kusi̱í tuku ini Jehová xíʼinna, saátu xi̱taxinaña xa̱ʼa̱ ña̱ xi̱kuni̱ tukuna ndakiʼinna bendición ña̱ xi̱ndakiʼinna tá ya̱chi̱ ta saátu xi̱taxinaña xa̱ʼa̱ ña̱ va̱ása ndakiʼinna castigo xa̱ʼa̱ ku̱a̱china. (Chitáʼanña xíʼin Isa 53:10.)
(Levítico 5:7) ”ʼSoo tá kǒo ndikachi kúúmiína ña̱ taxina xa̱ʼa̱ ku̱a̱china, xíniñúʼu taxina ndaʼa̱ Jehová u̱vi̱ tórtola á u̱vi̱ sa̱ta, iinrí táxina xa̱ʼa̱ ña̱ va̱ʼa ndoo ku̱a̱china ta inkarí taxina ña̱ va̱ʼa kaʼminarí nu̱ú Ndióxi̱.
Ná ndasakáʼnuyó Jehová ti̱xin congregación
4 Xíni̱va Jehová ña̱ su̱ví inkáchi íyo ndiʼiyó ta xa̱ʼa̱ ña̱yóʼo ndáyáʼviní ña̱ kéʼéyó nu̱úra. Ná ndakanixi̱níyó xa̱ʼa̱ sacrificio ña̱ xi̱taxi na̱ israelita. Na̱ xi̱kuumií xu̱ʼún xi̱taxina iin ti̱xúʼu. Na̱ ndáʼvi xi̱taxina u̱vi̱ saa válí. Soo tá iinna kǒo xu̱ʼúnna ña̱ kiʼinna saa válí taxina ndaʼa̱ Jehová, kivi taxina loʼo ña̱ harina (Lev. 5:7, 11). Ni va̱ása yaʼvi ña̱ harina yóʼo soo xi̱ndayáʼvivaña nu̱ú Jehová tá xi̱taxinaña ndaʼa̱ra, soo xi̱niñúʼu kooña mií ña̱ harina ña̱ va̱ʼaní.
(Levítico 5:11) ”ʼTa tá kǒo u̱vi̱ tórtola á u̱vi̱ sa̱ta ña̱ taxina, kivi taxina u̱vi̱ kilo ña̱ harina ña̱ va̱ʼaní xa̱ʼa̱ ku̱a̱chi ña̱ ni̱ki̱ʼvina.
Ná ndasakáʼnuyó Jehová ti̱xin congregación
4 Xíni̱va Jehová ña̱ su̱ví inkáchi íyo ndiʼiyó ta xa̱ʼa̱ ña̱yóʼo ndáyáʼviní ña̱ kéʼéyó nu̱úra. Ná ndakanixi̱níyó xa̱ʼa̱ sacrificio ña̱ xi̱taxi na̱ israelita. Na̱ xi̱kuumií xu̱ʼún xi̱taxina iin ti̱xúʼu. Na̱ ndáʼvi xi̱taxina u̱vi̱ saa válí. Soo tá iinna kǒo xu̱ʼúnna ña̱ kiʼinna saa válí taxina ndaʼa̱ Jehová, kivi taxina loʼo ña̱ harina (Lev. 5:7, 11). Ni va̱ása yaʼvi ña̱ harina yóʼo soo xi̱ndayáʼvivaña nu̱ú Jehová tá xi̱taxinaña ndaʼa̱ra, soo xi̱niñúʼu kooña mií ña̱ harina ña̱ va̱ʼaní.
Ná ndakanixi̱níyó xa̱ʼa̱ ña̱ kivi chindeé miíyó
(Levítico 5:1) ”ʼTá iin na̱ yiví xi̱nina á ku̱nda̱a̱-inina xa̱ʼa̱ iin na̱ ke̱ʼé ña̱ va̱ása va̱ʼa, ta xi̱nina ndiʼi ña̱ ku̱u. Ta ná nda̱ka̱tu̱ʼúnna ndáa na̱ xi̱ni á ndáa na̱ ku̱nda̱a̱-ini xa̱ʼa̱ ndiʼi ña̱ ku̱u, soo na̱ yiví na̱ ku̱nda̱a̱-ini yóʼo kǒo káʼa̱nna xa̱ʼa̱ ña̱ xi̱nina, iin ku̱a̱chi kúú ña̱yóʼo. Na̱yóʼo ndakiʼinna castigo saáchi va̱ása nínatúʼunna xa̱ʼa̱ ña̱ ku̱u.
Ná kǒo sandáʼviyó nda̱kúní ná koo ndiʼi ña̱ kéʼéyó
11 Jehová ta̱xira chiñu ndaʼa̱ na̱ anciano ña̱ kundaana na̱ ñúʼu ti̱xin congregación ta va̱ʼaníka keʼéna chiñuna tá ná ka̱ʼa̱nyó ña̱ nda̱a̱ xíʼinna. ¿Nda̱chun? Ná ka̱ʼa̱nyó xa̱ʼa̱ iin ña̱ʼa. Tá kúúmiíún iin kue̱ʼe̱ ta ku̱a̱ʼún nu̱ú ta̱ doctor, ¿á va̱ása ka̱ʼún xa̱ʼa̱ ndiʼi ña̱ ndóʼún xíʼinra? Tá ná kǒo ka̱ʼún ña̱ nda̱a̱, ¿á kivi chindeétáʼanra xíʼún? Saátu tá ná ki̱ʼviyó iin ku̱a̱chi ndeé nu̱ú Ndióxi̱ va̱ása xíniñúʼu chise̱ʼéyó ña̱yóʼo á ka̱ʼa̱nyó ña̱ vatá xa̱ʼa̱ña. Va̱ʼaka ná ku̱ʼu̱nyó nu̱ú na̱ anciano ta ka̱ʼa̱nyó ña̱ nda̱a̱ xíʼinna xa̱ʼa̱ ña̱ ke̱ʼéyó (Salmo 12:2; Hechos 5:1-11). Ná ka̱ʼa̱nyó xa̱ʼa̱ inkaña. ¿Ndáaña keʼún tá iin na̱ migoún ni̱ki̱ʼvina iin ku̱a̱chi ndeé? (Levítico 5:1). ¿Á ndakanixi̱níún: “Va̱ʼaní migo kúi̱ ta xa̱ʼa̱ ña̱yóʼo va̱ása natúʼi̱n xa̱ʼa̱na”? ¿Á ndakaʼánvaún ña̱ kivi chindeétáʼan na̱ anciano xíʼinna tasaá kivi xa̱a̱ tukuna koona migo Jehová? (Hebreos 13:17; Santiago 5:14, 15).
(Levítico 5:15, 16) “Tá iin na̱ ñuu Israel ni̱ki̱ʼvina ku̱a̱chi ña̱ ke̱ʼéna ña̱ʼa ña̱ yi̱i̱ ña̱ kúú kuenta Jehová, soo su̱ví ña̱ kúni miína kúú ña̱ níkeʼéna ña̱yóʼo, xíniñúʼu taxina ndikachi tí kǒo kue̱ʼe̱ kúúmií ndaʼa̱ Jehová xa̱ʼa̱ ku̱a̱china. Ta ya̱ʼvi tíyóʼo xíniñúʼu kooña táki̱ʼva ka̱ʼa̱n mií ta̱ su̱tu̱, nda̱a̱ táki̱ʼva íyo ña̱ xa̱a̱ nda̱kaxinna kuniñúʼuna ña̱ lugar santo. 16 Na̱yóʼo xíniñúʼu chaʼvína xa̱ʼa̱ ku̱a̱chi ña̱ ni̱ki̱ʼvina nu̱ú ña̱ lugar santo, ta saátu xíniñúʼu taxina inka 20 por ciento ña̱yóʼo nu̱ú ña̱ xa̱a̱ ta̱xina. Ndiʼi ña̱yóʼo xíniñúʼu taxinaña ndaʼa̱ ta̱ su̱tu̱, ta ta̱ su̱tu̱ taxira ña̱yóʼo ña̱ kooña ofrenda xa̱ʼa̱ ku̱a̱china ña̱ va̱ʼa ixakáʼnu-ini Ndióxi̱ xa̱ʼa̱na.
it-2 940 párr. 6
Ña̱ yi̱i̱
Kití xíʼin ña̱ʼa ña̱ xi̱chiʼina. Se̱ʼe nu̱ú tí si̱ndi̱ki̱, se̱ʼe nu̱ú tí ndikachi xíʼin se̱ʼe nu̱ú tí ti̱xúʼu, tí yi̱i̱ ni̱xi̱yo tíyóʼo ña̱ xi̱taxinarí ndaʼa̱ Jehová, ta va̱ása níxi̱xiniñúʼu nasa̱ma tíyóʼo. Xi̱taxinarí ndaʼa̱ Ndióxi̱, ta loʼorí xi̱taxina ndaʼa̱ na̱ su̱tu̱. (Nú 18:17-19.) Ku̱i̱ʼi ña̱ nu̱ú xíʼin ña̱ diezmo ña̱ yi̱i̱ xi̱kuuña, saátu ndiʼi sacrificio ña̱ xi̱taxina ña̱ yi̱i̱ xi̱kuu ña̱yóʼo. (Éx 28:38.) Ndiʼi ña̱ xi̱taxina ndaʼa̱ Jehová ña̱ yi̱i̱ xi̱kuuña, ta va̱ása níxi̱xiniñúʼu kuniñúʼunaña nda̱a̱ táki̱ʼva xi̱keʼéna xíʼin inka ña̱ʼa. Ta iin ejemplo kúú ña̱ xi̱ka̱ʼa̱n ña̱ ley xa̱ʼa̱ ña̱ diezmo. Tá iin ta̱a xi̱tavá síínra trigo ña̱ xi̱chiʼira ña̱ kooña diezmo, ta miíra á inkana ná kiʼin ña̱yóʼo ña̱ kuniñúʼuna xa̱ʼa̱ ña̱ kǒo níkiʼinna kuenta, na̱yóʼo va̱ása níxi̱ndiku̱nna ley Ndióxi̱ chi xi̱xina ña̱ʼa ña̱ yi̱i̱. Ña̱ Ley xi̱ka̱ʼa̱nña tá iin na̱ yiví xi̱kiʼvi táʼan ku̱a̱chi yóʼo xi̱xiniñúʼu ku̱a̱ʼáka ña̱ʼa taxina á 20 por ciento ña̱yóʼo xi̱xiniñúʼu taxina, saátu xi̱xiniñúʼu taxina iin ndikachi loʼo. Tasaá kúú ña̱ xi̱na̱ʼa̱na ña̱ xi̱ ixato̱ʼóna ña̱ʼa ña̱ yi̱i̱ ña̱ xi̱taxina ndaʼa̱ Jehová. (Le 5:14-16.)
Ña̱ kaʼviyó nu̱ú Biblia
(Levítico 4:27–5:4) ”ʼTá iin na̱ ñuu Israel su̱ví ña̱ kúni miína kúú ña̱ níki̱ʼvina ku̱a̱chi ta ke̱ʼéna ña̱ kǒo ni̱ka̱ʼa̱n Jehová xíʼinna keʼéna 28 á ki̱ʼintuna kuenta ña̱ ni̱ki̱ʼvina iin ku̱a̱chi, na̱yóʼo xíniñúʼu ku̱ʼu̱nna taxina iin ti̱xúʼu loʼo ña̱ koorí ofrenda xa̱ʼa̱ ku̱a̱chi ña̱ ni̱ki̱ʼvina. 29 Ta chinúuna ndaʼa̱na xi̱ní kití tí taxina koo ofrenda xa̱ʼa̱ ku̱a̱china ta xíniñúʼu kivi tíyóʼo nu̱ú xi̱taxina ofrenda ña̱ xi̱xaʼmina nu̱ú Ndióxi̱. 30 Ta̱ su̱tu̱, xíʼin nduku ndaʼa̱ra xíniñúʼu kakinra ni̱i̱ tíyóʼo ndiki̱ ña̱ altar, tasaá kata ndiʼira ni̱i̱ yóʼo xa̱ʼa̱ ña̱ altar. 31 Ta tavára ndiʼi xa̱ʼan tíyóʼo nda̱a̱ táki̱ʼva távána xa̱ʼan ña̱ ofrenda ña̱ táxina ña̱ kítáʼan va̱ʼana xíʼin Ndióxi̱. Ta ta̱ su̱tu̱ xíniñúʼu chisóraña nu̱ú ña̱ altar ña̱ kokoña, saáchi iin ofrenda ña̱ xáʼa̱n támi koo ña̱yóʼo nu̱ú Jehová. Tasaá ta̱ su̱tu̱ taxira tíyóʼo ña̱ koorí sacrificio ña̱ va̱ʼa ixakáʼnu-ini Ndióxi̱ xa̱ʼa̱ ku̱a̱china. 32 ”ʼSoo tá iin ndikachi loʼo kúni̱na taxina xa̱ʼa̱ ku̱a̱china, xíniñúʼu iin ndikachi síʼí koorí ta va̱ása xíniñúʼu kuumiírí kue̱ʼe̱. 33 Ta chinúuna ndaʼa̱na xi̱ní kití tí taxina koo ofrenda xa̱ʼa̱ ku̱a̱china ta xíniñúʼu kivi tíyóʼo xa̱ʼa̱ ku̱a̱china lugar nu̱ú xi̱taxina ofrenda ña̱ xi̱xaʼmina nu̱ú Ndióxi̱. 34 Ta̱ su̱tu̱, xíʼin nduku ndaʼa̱ra xíniñúʼu kakinra ni̱i̱ tíyóʼo ndiki̱ ña̱ altar xa̱ʼa̱ ku̱a̱china tasaá kata ndiʼira ni̱i̱ yóʼo xa̱ʼa̱ ña̱ altar. 35 Ta tavára ndiʼi xa̱ʼan tíyóʼo nda̱a̱ táki̱ʼva távána xa̱ʼan ña̱ ofrenda ña̱ táxina ña̱ kítáʼan va̱ʼana xíʼin Ndióxi̱. Ta ta̱ su̱tu̱ xíniñúʼu chisóraña nu̱ú ña̱ altar ña̱ kokoña, saáchi iin ofrenda ña̱ xáʼa̱n támi koo ña̱yóʼo nu̱ú Jehová. Tasaá ta̱ su̱tu̱ taxira tíyóʼo ña̱ koorí sacrificio xa̱ʼa̱ ku̱a̱chi ña̱ ni̱ki̱ʼvina tasaá ixakáʼnu-ini Ndióxi̱ xa̱ʼa̱ ku̱a̱china.
5 ”ʼTá iin na̱ yiví xi̱nina á ku̱nda̱a̱-inina xa̱ʼa̱ iin na̱ ke̱ʼé ña̱ va̱ása va̱ʼa, ta xi̱nina ndiʼi ña̱ ku̱u. Ta ná nda̱ka̱tu̱ʼúnna ndáa na̱ xi̱ni á ndáa na̱ ku̱nda̱a̱-ini xa̱ʼa̱ ndiʼi ña̱ ku̱u, soo na̱ yiví na̱ ku̱nda̱a̱-ini yóʼo kǒo káʼa̱nna xa̱ʼa̱ ña̱ xi̱nina, iin ku̱a̱chi kúú ña̱yóʼo. Na̱yóʼo ndakiʼinna castigo saáchi va̱ása nínatúʼunna xa̱ʼa̱ ña̱ ku̱u. 2 ”ʼTa tá iin na̱ yiví ti̱inna iin ña̱ yaku̱a̱, á iin kití yukú tí ni̱xi̱ʼi̱, á iin kití tí ni̱xi̱ʼi̱ tí kúúmiína veʼena á nda̱a̱ ndáaka kití tí ni̱xi̱ʼi̱, ta ni tá xi̱nina ña̱ ti̱innarí á ni tá kǒo níkiʼinna kuenta ta ti̱innarí, na̱ yiví yóʼo xáa̱na kúuna na̱ yaku̱a̱ xa̱ʼa̱ ña̱ ke̱ʼénarí. 3 Ta tá iin na̱ yiví va̱ása níkiʼinna kuenta ta ti̱inna iin na̱ yiví na̱ yaku̱a̱ní á iin ña̱ʼa ña̱ yaku̱a̱ nu̱ú Ndióxi̱, na̱ yiví yóʼo ni̱xa̱a̱na ku̱una na̱ yiví yaku̱a̱ní nu̱úra, ta ni̱xa̱a̱na kúúmiína ku̱a̱chi xa̱ʼa̱ ña̱yóʼo. 4 ”ʼTa tá iin na̱ yiví kamaní chi̱naʼána ña̱ keʼéna iin ña̱ʼa, kúúña ña̱ va̱ʼa á iin ña̱ va̱ása va̱ʼa, soo so̱ndíʼi ki̱ʼinna kuenta ña̱ kamaní chi̱naʼána ña̱ keʼénaña, soo kǒo níkeʼénaña, na̱yóʼo xáa̱na kúúmiína ku̱a̱chi.
23-29 TÍ NOVIEMBRE
ÑA̱ KÁʼA̱N BIBLIA XA̱ʼA̱ | LEVÍTICO 6, 7
“Ña̱ náʼa̱ ña̱ táxina tíxa̱ʼvi ndaʼa̱ Ndióxi̱”
(Levítico 7:11, 12) ”ʼTa ña̱yóʼo kúú ley ña̱ káʼa̱n xa̱ʼa̱ sacrificio ña̱ taxina xa̱ʼa̱ ña̱ kítáʼan viína xíʼin Jehová. 12 Tá ná taxina ña̱yóʼo xa̱ʼa̱ ña̱ kúni̱na taxina tíxa̱ʼvi ndaʼa̱ra, xíniñúʼu taxina si̱táva̱ʼa ña̱ kǒo levadura kúúmií, ña̱ kuva̱ʼa xíʼin aceite, galleta ña̱ kǒo levadura kúúmií, ña̱ kúúmií loʼo aceite, saátu taxina si̱táva̱ʼa ña̱ kuva̱ʼa xíʼin harina ña̱ va̱ʼaní, ña̱ kuva̱ʼa táki̱ʼva íyo seʼe̱.
Ña̱ sákuaʼayó xíʼin libro ña̱ Levítico
9 Ña̱ u̱vi̱ sákuaʼayó: ndásakáʼnuyó Jehová chi táxiyó tíxa̱ʼvi ndaʼa̱ra. Ná kotoyó inka ña̱ ndáyáʼviní ña̱ xi̱keʼé na̱ ñuu Israel ña̱ ndasakáʼnuna Ndióxi̱: ña̱ xi̱taxina ofrenda ña̱ va̱ʼa kutáʼan viína xíʼinra á ña̱ comunión. Nu̱ú libro ña̱ Levítico, sákuaʼayó ña̱ na̱ ñuu Israel kivi taxina iin sacrificio xa̱ʼa̱ ña̱ kutáʼan viína xíʼin Ndióxi̱ á ña̱ náʼa̱na ña̱ táxina tíxa̱ʼvi ndaʼa̱ra (Lev. 7:11-13, 16-18). Su̱ví xíʼin ña̱ ndúxa̱ níxi̱taxina ña̱ ofrenda yóʼo, chi xa̱ʼa̱ ña̱ kúni̱ miína xi̱taxinaña. Ta xi̱taxina ña̱ ofrenda yóʼo xa̱ʼa̱ ña̱ kúʼvi̱-inina xínina Jehová. Ta na̱ xi̱taxi ña̱ ofrenda, na̱ veʼena xíʼin na̱ su̱tu̱ kúú na̱ xi̱xixi ku̱ñu tí kití tí ta̱xina. Soo, sava táʼví tí kití yóʼo kuenta mií Jehová xi̱kuuña. ¿Ndáaña kúúña?
(Levítico 7:13-15) Ta ofrenda ña̱ taxina, xíniñúʼu kitáʼan si̱táva̱ʼa ña̱ kǒo levadura kúúmií xíʼinña, ña̱ íyo nda̱a̱ táki̱ʼva íyo seʼe̱, ta inkáchi taxina ña̱ sacrificio ña̱ táxina tíxa̱ʼvi ndaʼa̱ Ndióxi̱ xíʼin ña̱ ofrenda ña̱ kítáʼan viína xíʼinra. 14 Tá ná taxina ña̱ ofrenda yóʼo, xa̱a̱ síín síín ná koo si̱táva̱ʼa ña̱ taxina, ta ña̱ yi̱i̱ koo ña̱yóʼo nu̱ú Jehová. Ta ña̱yóʼo kúú ña̱ ndakiʼin ta̱ su̱tu̱ ta̱ kata yává ni̱i̱ kití tí taxina ndaʼa̱ Ndióxi̱ ña̱ kítáʼan viína xíʼinra. 15 Ku̱ñu ña̱ taxina sacrificio xa̱ʼa̱ ña̱ táxina tíxa̱ʼvi ndaʼa̱ Ndióxi̱ xa̱ʼa̱ ña̱ kítáʼan viína xíʼinra, mií ki̱vi̱ kán xíniñúʼu kuxunaña. Ta va̱ása xíniñúʼu taxiva̱ʼanaña ña̱ kuxunaña inka ki̱vi̱.
w00 15/8 15 párr. 15
Sacrificio ña̱ sa̱kúsi̱í-ini Ndióxi̱
15 Ofrenda ña̱ xi̱taxina xa̱ʼa̱ ña̱ kúni̱ miína, xi̱kuuña sacrificio ña̱ comunión, ña̱ káʼa̱n ña̱ capítulo 3 ña̱ Levítico xa̱ʼa̱. Saátu naníña “sacrificio ña̱ kítáʼan viína xíʼin Ndióxi̱”. Ta ña̱ tu̱ʼun “kítáʼan viíyó”, tu̱ʼun hebreo kúni̱ kachiña: kǒo ku̱a̱chi íyo. Saátu káʼa̱n ña̱ libro Studies in the Mosaic Institutions (Estudio de las instituciones mosaicas) xa̱ʼa̱ ña̱ tu̱ʼun “kítáʼan viíyó xíʼin Ndióxi̱” ta ña̱yóʼo kúú ña̱ káchiña: “Nu̱ú Biblia káʼa̱nña xa̱ʼa̱ ña̱ tu̱ʼun yóʼo, ña̱ kǒo ku̱a̱chi kúúmiíyó xíʼin Ndióxi̱ ña̱ si̱í kítáʼanyó xíʼinra ta vií kítáʼanyó xíʼinra”. Ña̱kán, sacrificio ña̱ comunión va̱ása níxi̱taxinaña ña̱ ndakutáʼan viína xíʼin Ndióxi̱, chi xi̱taxinaña xa̱ʼa̱ kítáʼan viína xíʼinra ta saátu xi̱taxinaña xa̱ʼa̱ ña̱ táxina tíxa̱ʼvi ndaʼa̱ra. Na̱ su̱tu̱ xíʼin na̱ xi̱taxi ña̱ sacrificio yóʼo xi̱xina tá xi̱sandíʼi ta̱ su̱tu̱ xi̱taxira ni̱i̱ xíʼin xa̱ʼan ndaʼa̱ Jehová (Levítico 3:17; 7:16-21; 19:5-8). Iin ki̱vi̱ ña̱ liviní xi̱xiyo ña̱yóʼo, saáchi na̱ xi̱taxi ña̱ sacrificio, na̱ su̱tu̱ ta saátu Jehová, nda̱a̱ táki̱ʼva íyo na̱ inkáchi xi̱xixi saá ni̱xi̱yo na̱yóʼo, ta xi̱na̱ʼa̱ña ña̱ viíní ni̱xi̱yo ña̱ xi̱kitáʼanna.
(Levítico 7:20) ”ʼTá iin na̱ yiví na̱ yaku̱a̱ ná kuxuna ku̱ñu kití tí táxina sacrificio ña̱ kítáʼan viína xíʼin Jehová, na̱yóʼo xíniñúʼu kuvina.
w00 15/8 19 párr. 8
Sacrificio ña̱ xi̱taxina ña̱ xi̱sakúsi̱í-ini Jehová
8 ¿Ndáa ki̱ʼva xi̱xiniñúʼu koo na̱ yiví na̱ xi̱taxi ofrenda? Ña̱ Ley xi̱ka̱ʼa̱nña ña̱ xi̱xiniñúʼu limpioní koo na̱yóʼo. Ña̱kán tá iin na̱ yiví ku̱yaku̱a̱na xa̱ʼa̱ ña̱ ke̱ʼéna iin ña̱ʼa ña̱ va̱ása va̱ʼa nu̱ú Ndióxi̱, siʼna xi̱xiniñúʼu taxina iin ofrenda xa̱ʼa̱ ku̱a̱china ña̱ va̱ʼa xa̱a̱ tukuna koona na̱ yiví limpio nu̱ú Jehová, tasaá kúú ña̱ va̱ʼa ndakiʼinra ofrenda ña̱ kaʼmina nu̱úra á sacrificio ña̱ comunión (Levítico 5:1-6, 15, 17). ¿Á chíndayáʼviyó ña̱ limpio kooyó nu̱ú Jehová? Tá kúni̱yó ña̱ ná kusi̱í-ini Ndióxi̱ xíʼinyó ña̱ ndásakáʼnuyóra, ná keʼéyó ndiʼi ña̱ va̱xi nu̱ú tu̱ʼunra. Ná kuniñúʼuyó ndiʼi ña̱ xíniñúʼu Ndióxi̱ ña̱ chindeétáʼanra xíʼinyó tá kúú: “na̱ anciano ti̱xin congregación” xíʼin ña̱ ni̱xi̱ʼi̱ ta̱ Jesús xa̱ʼa̱ ku̱a̱chiyó (Santiago 5:14; 1 Juan 2:1, 2).
Ná ndakanixi̱níyó xa̱ʼa̱ ña̱ kivi chindeé miíyó
(Levítico 6:13) Ndiʼi tiempo xíniñúʼu koko ñuʼu̱ nu̱ú ña̱ altar, ta va̱ása xíniñúʼu nda̱ʼva̱ña.
it-1 970
Ñuʼu̱
Ña̱ xi̱keʼéna ti̱xin ña̱ tabernáculo xíʼin ña̱ templo. Xi̱xiniñúʼuna ñuʼu̱ ti̱xin ña̱ tabernáculo ta saátu ti̱xin ña̱ templo. Ndiʼi xi̱ta̱a̱n xíʼin ndiʼi xi̱ku̱aá, ta̱ su̱tu̱ xi̱xiniñúʼu kaʼmira incienso nu̱ú ña̱ altar. (Éx 30:7, 8.) Ley ña̱ ta̱xi Ndióxi̱ xi̱ka̱ʼa̱nña ña̱ ndiʼi tiempo xi̱xiniñúʼu koko ñuʼu̱ nu̱ú ña̱ altar nu̱ú xi̱xaʼmina ofrenda. (Le 6:12, 13.) Na̱ judío káʼa̱nna ña̱ mií Ndióxi̱ kúú ta̱ nda̱kaʼmi ñuʼu̱ nu̱ú ña̱ altar tá xa̱ʼa̱, soo va̱ása káʼa̱n Biblia xa̱ʼa̱ ña̱yóʼo, ni ku̱a̱ʼá ní na̱ yiví ndákanixi̱ní ña̱ saá ni̱xi̱yoña. Chi ley ña̱ ta̱xi Ndióxi̱ ndaʼa̱ ta̱ Moisés, xi̱ka̱ʼa̱nña ña̱ na̱ se̱ʼe ta̱ Aarón kúú na̱ xi̱xiniñúʼu ndakaʼmi ñuʼu̱ nu̱ú ña̱ altar ta saátu chisóna titu̱n nu̱ú ñuʼu̱ ña̱ xi̱xixi̱ tá kúma̱níka chisóna ku̱ñu kití nu̱ú ña̱ altar, tí xi̱taxina koo sacrificio nu̱ú Ndióxi̱. (Le 1:7, 8.) Tá nda̱kaxinna ta̱ Aarón xíʼin na̱ se̱ʼera ña̱ xa̱a̱na koona su̱tu̱, ta̱xina iin sacrificio ndaʼa̱ Jehová xa̱ʼa̱ na̱yóʼo. Tasaá kúú ña̱ ki̱ta ñuʼu̱ ti̱xin ña̱ vi̱kó ña̱ xi̱núu sa̱tá ña̱ tabernáculo ta xa̱ʼmiña ndiʼi ofrenda ña̱ xi̱ndóso nu̱ú ña̱ altar. Ta su̱ví ña̱ ñuʼu̱ yóʼo kúú ña̱ níndakaʼmi titu̱n tú xi̱ndóso nu̱ú ña̱ altar, chi ña̱ xa̱ʼmi ña̱ ñuʼu̱ yóʼo kúú ku̱ñu xíʼin xa̱ʼan ña̱ xi̱ndóso nu̱ú ña̱ altar. Ta ñuʼu̱ ña̱ xa̱a̱ xíxi̱ nu̱ú ña̱ altar xíʼin ñuʼu̱ ña̱ ki̱ta ti̱xin ña̱ vi̱kó, iin nda̱kutáʼan u̱vi̱ saá ña̱yóʼo ta xa̱ʼmiña ndiʼi ofrenda ña̱ xi̱ndóso nu̱ú ña̱ altar. (Le 8:14–9:24.) Saátu ku̱u tá sa̱ndíʼi ta̱ Salomón ke̱ʼéra oración tá nda̱taxira ña̱ templo ndaʼa̱ Jehová, ki̱xi ñuʼu̱ i̱xaa Jehová ta xa̱ʼmiña ndiʼi sacrificio. (2Cr 7:1; kotondó ña̱ va̱xi nu̱ú Jue 6:21; 1Re 18:21-39; 1Cr 21:26, káʼa̱nña xa̱ʼa̱ inkaka ejemplo nu̱ú ki̱xi ñuʼu̱ i̱xaa Jehová ta xa̱ʼmiña ndiʼi ofrenda ña̱ ta̱xi na̱ xi̱ndasakáʼnu miíra.)
(Levítico 6:25) “Ka̱ʼa̱n xíʼin ta̱ Aarón ta saátu xíʼin na̱ se̱ʼera: ‘Ña̱yóʼo kúú ley ña̱ káʼa̱n xa̱ʼa̱ ofrenda ña̱ taxina xa̱ʼa̱ ku̱a̱china. Kití tí taxina xa̱ʼa̱ ku̱a̱china, tíyóʼo xíniñúʼu kaʼnínarí nu̱ú Jehová mií lugar nu̱ú xáʼnína kití tí xáʼmina nu̱úra. Ta ña̱ ofrenda yóʼo, iin ña̱ yi̱i̱ní kooña.
si 27 párr. 15
Libro u̱ni̱ ña̱ va̱xi nu̱ú Biblia: Levítico
15 3) Xi̱niñúʼu taxina iin ofrenda xa̱ʼa̱ ku̱a̱china tá ke̱ʼéna iin ña̱ va̱ása va̱ʼa ta saátu tá su̱ví ña̱ kúni̱ miína kúú ña̱ níkeʼénaña. Ta kití tí xi̱taxina xa̱ʼa̱ ku̱a̱china, xa̱a̱ síín síín ni̱xi̱yorí, xa̱a̱ síín ni̱xi̱yo tí xi̱taxina xa̱ʼa̱ ku̱a̱chi na̱ su̱tu̱ xa̱a̱ síín ni̱xi̱yo tí xi̱taxina xa̱ʼa̱ na̱ ñuu Israel. Xa̱a̱ síín ni̱xi̱yo ofrenda ña̱ xi̱xaʼmina nu̱ú Ndióxi̱ ta saátu ofrenda ña̱ comunión, ña̱ xi̱taxina xíʼin ndiʼi níma̱na ndaʼa̱ Ndióxi̱, chi ofrenda ña̱ xi̱taxina xa̱ʼa̱ ku̱a̱chi ña̱ xi̱kiʼvina nu̱ú Ndióxi̱, iin ña̱ xi̱xiniñúʼu taxina kúú ña̱yóʼo (4:1-35; 6:24-30).
Ña̱ kaʼviyó nu̱ú Biblia
(Levítico 6:1-13) Ta Jehová ni̱ka̱ʼa̱nra xíʼin ta̱ Moisés: 2 “Tá iin na̱ yiví ni̱ki̱ʼvina ku̱a̱chi ta va̱ása nda̱kú níxi̱yo inina xíʼin Jehová xa̱ʼa̱ ña̱ sa̱ndáʼvina na̱ táʼanna xa̱ʼa̱ iin ña̱ʼa ña̱ nda̱koo na̱yóʼo ndaʼa̱na ña̱ kundaana, ta á i̱xakuíʼnana ña̱ʼa inkana á sa̱ndáʼvina 3 á nda̱ni̱ʼína iin ña̱ʼa ña̱ nda̱ñúʼu soo sa̱si yuʼúna xa̱ʼa̱ ña̱yóʼo ta saátu á chínaʼána xa̱ʼa̱ ndiʼi ku̱a̱chi ña̱ ku̱a̱kiʼvina ña̱ káʼa̱nna ña̱ va̱ása níkeʼénaña, ña̱yóʼo kúú ña̱ xíniñúʼu keʼéna: 4 tá ndixa ni̱ki̱ʼvina ña̱ ku̱a̱chi yóʼo, na̱yóʼo xíniñúʼu ndataxina ña̱ʼa ña̱ i̱xakuíʼnana á ña̱ʼa ña̱ ki̱ʼinna xa̱ʼa̱ ña̱ sa̱ndáʼvina, á ña̱ʼa ña̱ nda̱koona ndaʼa̱na á ña̱ʼa ña̱ nda̱niʼína 5 á nda̱a̱ ndáaka ña̱ʼa ña̱ chi̱naʼána xa̱ʼa̱, ña̱ su̱ví kúú ña̱ nda̱a̱, na̱yóʼo xíniñúʼu chaʼvína xa̱ʼa̱ña, ta chinúukana inka 20 por ciento ña̱yóʼo ña̱ ndataxina ndaʼa̱ na̱ xíʼin kuentaña, tá ná kunda̱a̱-inina ña̱ na̱yóʼo kúú na̱ kúúmií ku̱a̱chi. 6 Na̱yóʼo xíniñúʼu kuniʼina iin ndikachi loʼo tí kǒo kue̱ʼe̱ kúúmií ku̱ʼu̱nna nu̱ú ta̱ su̱tu̱ xa̱ʼa̱ ku̱a̱chi ña̱ ni̱ki̱ʼvina, ta xíniñúʼu kitáʼan ya̱ʼvirí xíʼin ña̱ʼa ña̱ ki̱ʼinna. 7 Ta̱ su̱tu̱ taxira tíyóʼo ña̱ koorí ofrenda ndaʼa̱ Jehová tasaá ixakáʼnu-inira xa̱ʼa̱ nda̱a̱ ndáaka ku̱a̱chi ni̱ki̱ʼvina”. 8 Tasaá ni̱ka̱ʼa̱nka Jehová xíʼin ta̱ Moisés. Ta ka̱chira: 9 Ña̱yóʼo kúú ña̱ ka̱ʼún xíʼin ta̱ Aarón ta saátu xíʼin na̱ se̱ʼera: Ña̱yóʼo kúú ley ña̱ káʼa̱n xa̱ʼa̱ ofrenda ña̱ xáʼmina nu̱ú Ndióxi̱. Ña̱ ofrenda yóʼo kundósoña nu̱ú ña̱ altar nu̱ú xíxi̱ ñuʼu̱ iníísaá ñuú nda̱a̱ ná tu̱vi, ta va̱ása xíniñúʼu nda̱ʼva̱ ñuʼu̱ nu̱ú ña̱ altar. 10 Ta ta̱ su̱tu̱ xíniñúʼu kundixira ti̱ko̱to̱ ña̱ lino ña̱ ku̱va̱ʼa kundixira, ta saátu xíniñúʼu kundixira xatu loʼo ña̱ lino ña̱ ku̱ʼva kundixira. Tasaá tavára ya̱a̱ ña̱ ofrenda ña̱ ni̱xi̱xi̱ nu̱ú ña̱ altar ta chindooraña chí síi̱n ña̱ altar yóʼo. 11 Tasaá tavára ti̱ko̱to̱ra ta ndakundixira inkaña, tasaá tavára ya̱a̱ ta ku̱ndakaraña iin lugar limpio chí sa̱tá ña̱ campamento. 12 Xíniñúʼu koko ñuʼu̱ nu̱ú ña̱ altar, ta va̱ása xíniñúʼu nda̱ʼva̱ña. Ndiʼi xi̱ta̱a̱n, ta̱ su̱tu̱ xíniñúʼu kaʼmira titu̱n nu̱ú xíxi̱ ñuʼu̱ nu̱ú ña̱ altar ta kán chinúura ofrenda ña̱ kokoña, ta xíniñúʼu kaʼmira xa̱ʼan nu̱ú ña̱ altar ña̱ kooña sacrificio ña̱ kítáʼan viína xíʼin Ndióxi̱. 13 Ndiʼi tiempo xíniñúʼu koko ñuʼu̱ nu̱ú ña̱ altar, ta va̱ása xíniñúʼu nda̱ʼva̱ña.
30 TÍ NOVIEMBRE NDA̱A̱ 6 TÍ DICIEMBRE
ÑA̱ KÁʼA̱N BIBLIA XA̱ʼA̱ | LEVÍTICO 8, 9
“Iin ña̱ náʼa̱ ña̱ táxi Jehová bendición ndaʼa̱yó”
(Levítico 8:6-9) Tasaá ni̱ka̱ʼa̱n ta̱ Moisés xíʼin ta̱ Aarón ta saátu xíʼin na̱ se̱ʼera ña̱ ná kuyatinna, tasaá sa̱kúchirana. 7 Ta tándi̱ʼi saá sa̱ndáku̱ndixira ta̱ Aarón iin ti̱ko̱to̱ ña̱ káni̱, ta ka̱túnra iin cinturón toko̱ ta̱yóʼo, ta saátu sa̱ndáku̱ndixira ta̱yóʼo iin ti̱ko̱to̱ ña̱ kǒo ndaʼa̱, ta chí sa̱tá ña̱yóʼo nda̱chinúura iin ti̱ko̱to̱ ña̱ efod, ta nda̱katúnra iin cinturón toko̱ ta̱yóʼo. 8 Tasaá ka̱tunra ña̱ bolsa cuadrado kándíka ta̱ Aarón, ta kán chi̱ka̱a̱ra ña̱ Urim xíʼin ña̱ Tumim. 9 Ta chi̱núura ña̱ turbante xi̱ní ta̱yóʼo, ta chí te̱ʼéra chi̱tiin ta̱ Moisés iin ka̱a ña̱ yéʼe̱ní ña̱ ku̱va̱ʼa xíʼin oro, iin ña̱ náʼa̱ ña̱ mií Ndióxi̱ nda̱kaxin ta̱yóʼo ña̱ koora su̱tu̱, nda̱a̱ táki̱ʼva íyo ña̱ ni̱ka̱ʼa̱n Jehová xíʼin ta̱ Moisés.
(Levítico 8:12) Tándi̱ʼi, saá sa̱káara loʼo aceite tá yi̱i̱ xi̱ní ta̱ Aarón, ta̱ nda̱kaxinra koo su̱tu̱.
it-1 1239
Ki̱vi̱ nu̱ú ña̱ ki̱xáʼa na̱ su̱tu̱ káchíñuna
Ta̱ Moisés sa̱kúchira ta̱ Aarón xíʼin se̱ʼera ta̱ Nadab, ta̱ Abihú, ta̱ Eleazar xíʼin ta̱ Itamar (á ni̱ka̱ʼa̱nra xíʼinna ña̱ ná kuchina) ta xi̱niñúʼuna ti̱kui̱í tá xi̱ñuʼu ini tina ña̱ xi̱ndichi patio ña̱ tabernáculo, ta tándi̱ʼi saá sa̱ndáku̱ndixi ta̱ Moisés ti̱ko̱to̱ ta̱ Aarón ña̱ ku̱va̱ʼa kundixira ña̱ koora su̱tu̱. (Nú 3:2, 3.) Ta livikaví ti̱ko̱to̱ nda̱kundixi ta̱ Aarón, ta ña̱yóʼo xi̱na̱ʼa̱ña ña̱ xi̱ndayáʼviní chiñu ña̱ xi̱keʼéra. Tándi̱ʼi, saá ki̱xáʼa ta̱ Moisés chi̱ka̱a̱ra aceite sa̱tá ña̱ tabernáculo, saátu keʼéra xíʼin ndiʼi ña̱ʼa ña̱ ñúʼu iniña, saá ke̱ʼéra xíʼin ña̱ altar nu̱ú kaʼmina ofrenda nu̱ú Ndióxi̱, saá ke̱ʼéra xíʼin tina ña̱ cobre ta saátu ke̱ʼéra xíʼin ndiʼika ña̱ʼa ña̱ kuniñúʼuna ti̱xin ña̱ veʼe yóʼo. Tasaá ni̱xa̱a̱ ña̱yóʼo ku̱uña kuenta mií Ndióxi̱ ta iinlá ti̱xin ña̱ tabernáculo kuniñúʼuna ndiʼi ña̱ʼa yóʼo. Tándi̱ʼi, ta̱ Moisés chi̱ka̱a̱ra loʼo aceite xi̱ní ta̱ Aarón. (Le 8:6-12; Éx 30:22-33; Sl 133:2.)
(Levítico 9:1-5) Ta ña̱ ki̱vi̱ u̱na̱, ta̱ Moisés ka̱nara ta̱ Aarón xíʼin na̱ se̱ʼera ta saátu ndiʼika na̱ xi̱ku̱a̱ʼa̱ ña̱ ñuu Israel. 2 Ta ni̱ka̱ʼa̱nra xíʼin ta̱ Aarón: “Kiʼin iin si̱ndi̱ki̱ loʼo tí kǒo kue̱ʼe̱ kúúmií ta taxiúnrí ndaʼa̱ Ndióxi̱ ña̱ koorí ofrenda xa̱ʼa̱ ku̱a̱chi na̱ ñuu Israel ta saátu taxiún iin ndikachi tí kǒo kue̱ʼe̱ kúúmií ña̱ koorí ofrenda ña̱ taxiún ndaʼa̱ Jehová. 3 Soo ña̱yóʼo kúú ña̱ ka̱ʼún xíʼin na̱ ñuu Israel: ‘Kiʼinndó iin ti̱xúʼu che̱e ña̱ koorí ofrenda xa̱ʼa̱ ku̱a̱chindó, saátu taxindó iin si̱ndi̱ki̱ loʼo xíʼin iin ti̱xúʼu loʼo tí kǒo kue̱ʼe̱ kúúmií tí iin ku̱i̱ya̱ ña̱ koorí ofrenda ña̱ kaʼmindó nu̱ú Ndióxi̱ 4 ta saátu taxindó iin si̱ndi̱ki̱ xíʼin iin ndikachi ndaʼa̱ Jehová ña̱ koorí sacrificio xa̱ʼa̱ ña̱ kítáʼan viíndó xíʼinra, saátu taxindó ofrenda ña̱ xíxi ta chika̱a̱ndó aceite xíʼin ña̱yóʼo, saáchi vitin kúú ña̱ kita Jehová nu̱úndóʼ”. 5 Tasaá níʼina ndiʼi ña̱ʼa ña̱ ni̱ka̱ʼa̱n ta̱ Moisés xíʼinna ni̱xa̱a̱na yéʼé tienda ña̱ reunión. Tasaá ku̱yatin ndiʼi na̱ ñuu Israel ta xi̱kunditana nu̱ú Jehová.
Ña̱ sákuaʼayó xíʼin libro ña̱ Levítico
13 Ña̱ ku̱mí sákuaʼayó: Jehová táxira bendición ndaʼa̱ na̱ ñuura. Ná ka̱ʼa̱nyó xa̱ʼa̱ ña̱ ku̱u tá ku̱i̱ya̱ 1512 tá tiempo xi̱naʼá, tá i̱xava̱ʼana tabernáculo xa̱ʼa̱ yuku̱ ña̱ Sinaí (Éx. 40:17). Ta̱ Moisés kúú ta̱ ni̱ka̱ʼa̱n ña̱ koo ta̱ Aarón xíʼin na̱ se̱ʼera su̱tu̱. Ta na̱ ñuu Israel nda̱kutáʼanna ña̱ kotona ndáa ki̱ʼva taxi na̱ su̱tu̱ yóʼo, ña̱ nu̱ú yichi̱ sacrificio ndaʼa̱ Jehová (Lev. 9:1-5). ¿Ndáa ki̱ʼva ni̱na̱ʼa̱ Jehová ña̱ kúsi̱í-inira xíʼin na̱ nda̱ka̱xinna koo su̱tu̱? Tá ta̱xi ta̱ Aarón xíʼin ta̱ Moisés bendición ndaʼa̱ na̱ ñuu Israel, Jehová chi̱ndaʼára iin ñuʼu̱ chí ndiví ña̱ va̱ʼa kaʼmiña ndiʼi sacrificio ña̱ ndóo nu̱ú ña̱ altar (kaʼvi Levítico 9:23, 24).
(Levítico 9:23, 24) Tándi̱ʼi, saá ni̱ki̱ʼvi ta̱ Moisés xíʼin ta̱ Aarón ti̱xin tienda ña̱ reunión; tasaá ke̱ena ta ta̱xina bendición ndaʼa̱ na̱ ñuu Israel. Tasaá, na̱ ñuu Israel xi̱nina ndee̱ Jehová, 24 Ta iin ñuʼu̱ chi̱ndaʼá Jehová ta xa̱ʼmiña xa̱ʼan ña̱ níndosó nu̱ú ña̱ altar. Tá xi̱ni na̱ ñuu Israel ña̱yóʼo, nda̱kanda̱ní-inina ta ni̱nda̱ʼyi̱nína ta xi̱kuxítina nda̱a̱ nu̱ú ñuʼu̱.
Ña̱ sákuaʼayó xíʼin libro ña̱ Levítico
13 Ña̱ ku̱mí sákuaʼayó: Jehová táxira bendición ndaʼa̱ na̱ ñuura. Ná ka̱ʼa̱nyó xa̱ʼa̱ ña̱ ku̱u tá ku̱i̱ya̱ 1512 tá tiempo xi̱naʼá, tá i̱xava̱ʼana tabernáculo xa̱ʼa̱ yuku̱ ña̱ Sinaí (Éx. 40:17). Ta̱ Moisés kúú ta̱ ni̱ka̱ʼa̱n ña̱ koo ta̱ Aarón xíʼin na̱ se̱ʼera su̱tu̱. Ta na̱ ñuu Israel nda̱kutáʼanna ña̱ kotona ndáa ki̱ʼva taxi na̱ su̱tu̱ yóʼo, ña̱ nu̱ú yichi̱ sacrificio ndaʼa̱ Jehová (Lev. 9:1-5). ¿Ndáa ki̱ʼva ni̱na̱ʼa̱ Jehová ña̱ kúsi̱í-inira xíʼin na̱ nda̱ka̱xinna koo su̱tu̱? Tá ta̱xi ta̱ Aarón xíʼin ta̱ Moisés bendición ndaʼa̱ na̱ ñuu Israel, Jehová chi̱ndaʼára iin ñuʼu̱ chí ndiví ña̱ va̱ʼa kaʼmiña ndiʼi sacrificio ña̱ ndóo nu̱ú ña̱ altar (kaʼvi Levítico 9:23, 24).
Ná ndakanixi̱níyó xa̱ʼa̱ ña̱ kivi chindeé miíyó
(Levítico 8:6) Tasaá ni̱ka̱ʼa̱n ta̱ Moisés xíʼin ta̱ Aarón ta saátu xíʼin na̱ se̱ʼera ña̱ ná kuyatinna, tasaá sa̱kúchirana.
¿Nda̱chun xíniñúʼu limpio kooyó?
6 Ña̱ limpioní ni̱xi̱yo na̱ su̱tu̱, ndáyáʼviní ña̱yóʼo nu̱úyó tiempo vitin. Na̱ yiví na̱ káʼviyó Biblia xíʼin ndákanda̱-inina tá xítona ña̱ limpioní íyo lugar nu̱ú ndákutáʼanyó ndásakáʼnuyó Jehová saátu ña̱ limpioní íyoyó. Soo ña̱ limpioní ni̱xi̱yo na̱ su̱tu̱ sándakaʼántuña miíyó ña̱ saátu limpioní xíniñúʼu koo níma̱ na̱ xáa̱ ndúu ñuu Jehová (kaʼvi Salmo 24:3, 4; Is. 2:2, 3). Jehová kúni̱ra ña̱ limpioní ná koo níma̱yó, saátu limpioní ná koo ña̱ ndákanixi̱níyó ta saátu limpioní ná koo miíyó. Xa̱ʼa̱ ña̱kán xíniñúʼu kotoyó ndáa ki̱ʼva íyo ña̱ ñúʼu níma̱yó ta saátu ña̱ ndákanixi̱níyó. Tá ná keʼéyó ña̱yóʼo, saá kúú ña̱ kunda̱a̱-iniyó á íyo ña̱ xíniñúʼu nasamayó (2 Cor. 13:5). Ta tá iin na̱ ndásakáʼnu Jehová na̱ xa̱a̱ nda̱kuchi xítona nu̱ú kée na̱ chálá, ná nda̱ka̱tu̱ʼún xíʼin miína ña̱yóʼo: “¿Á náʼi̱ ña̱ kúi̱ iin na̱ yiví limpio?”, tasaá ndóʼona, ná ndukúna iin na̱ chindeétáʼan xíʼinna ña̱ ndakoona ña̱ kotona ña̱yóʼo (Sant. 5:14).
(Levítico 8:14-17) Tándi̱ʼi, saá níʼina tí si̱ndi̱ki̱ tí koo ofrenda xa̱ʼa̱ ku̱a̱chi na̱ ñuu Israel ni̱xa̱a̱na, ta ta̱ Aarón xíʼin na̱ se̱ʼera chi̱núuna ndaʼa̱na xi̱ní tí si̱ndi̱ki̱ yóʼo, tí taxina koo ofrenda xa̱ʼa̱ ku̱a̱china. 15 Ta ta̱ Moisés xa̱ʼníra tíyóʼo ta xíʼin nduku ndaʼa̱ra xa̱kinra ni̱i̱ tíyóʼo ndiki̱ ña̱ altar, tasaá nda̱saa yi̱i̱ra ña̱ altar yóʼo. Ta xa̱ta ndiʼira ni̱i̱ yóʼo xa̱ʼa̱ ña̱ altar, ña̱ va̱ʼa xa̱a̱ña nduyi̱i̱ña tasaá va̱ʼa kuniñúʼuna ña̱yóʼo. 16 Tándi̱ʼi, saá ki̱ʼinra xa̱ʼan ña̱ íyo sa̱tá xitirí saátu ki̱ʼinra apéndicerí ta saatu sa̱ta̱xáʼárí ta ki̱ʼinra u̱vi̱ saá nduchírí xíʼin xa̱ʼan ña̱ íyo sa̱táña, ta xa̱ʼmiraña nu̱ú ña̱ altar. 17 Ta ñii̱ tí si̱ndi̱ki̱ saátu ku̱ñurí xíʼin si̱ʼvírí ni̱ka̱ʼa̱nra ña̱ ná kaʼmina ña̱yóʼo chí sa̱tá ña̱ campamento, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.
it-2 416 párr. 1
Ta̱ Moisés
Ndióxi̱ nda̱kaxinra ta̱ Moisés ña̱ va̱ʼa kuniñúʼurara ña̱ keʼéra trato xíʼin na̱ ñuu Israel, ta va̱ʼaní ni̱xa̱a̱ ta̱ Moisés xi̱táʼanra xíʼin Ndióxi̱, nda̱a̱ táki̱ʼva kéʼé ta̱ Jesús, ta̱ xi̱niñúʼu Ndióxi̱ ña̱ ke̱ʼéra iin trato xa̱á. Ni̱i̱ kití tí ta̱xina koo sacrificio, ta̱ Moisés xa̱ta yávára ña̱yóʼo sa̱tá libro ña̱ trato, chi ña̱yóʼo kúú ña̱ nda̱naʼa̱ Jehová ña̱ ke̱ʼéra trato xíʼin na̱ ñuura. Tá ka̱ʼvi ta̱ Moisés libro ña̱ trato nu̱ú na̱ ñuu yóʼo ni̱ka̱ʼa̱nna ña̱ kundiku̱nna ña̱ trato yóʼo. (Éx 24:3-8; Heb 9:19.) Ta ña̱ xi̱niñúʼu Jehová ta̱ Moisés ña̱ kuniʼira yichi̱ nu̱ú na̱ ñuura, ta̱yóʼo xi̱to á va̱ʼa ku̱va̱ʼa ña̱ tabernáculo tándi̱ʼi ku̱va̱ʼaña ta saátu xi̱tora á va̱ʼa ku̱va̱ʼa ndiʼi ña̱ʼa ña̱ kuniñúʼuna ti̱xinña nda̱a̱ táki̱ʼva ni̱ka̱ʼa̱n Ndióxi̱ xíʼinra, ta ta̱yóʼotu kúú ta̱ ke̱ʼé vikó xa̱ʼa̱ na̱ nda̱kaxin Ndióxi̱ koo su̱tu̱, tasaá chi̱ka̱a̱ra loʼo aceite tá yi̱i̱ xi̱ní ta̱ Aarón ta̱ kúú su̱tu̱ káʼnu ta saátu ke̱ʼéra xíʼin ña̱ tabernáculo. Ta tándi̱ʼi, saá xi̱to ta̱ Moisés chiñu ña̱ nu̱ú ña̱ ke̱ʼé na̱ su̱tu̱. (Éx 25–29; Le 8, 9.)
Ña̱ kaʼviyó nu̱ú Biblia
(Levítico 8:31–9:7) Tasaá ni̱ka̱ʼa̱n ta̱ Moisés xíʼin ta̱ Aarón xíʼin na̱ se̱ʼera: “Sachíʼyo̱ndó ku̱ñu yóʼo chí yéʼé tienda ña̱ reunión. Ta kán kuxundóña xíʼin si̱táva̱ʼa ña̱ ñúʼu ini canasta, ña̱ ku̱va̱ʼa kuxu na̱ koo su̱tu̱, nda̱a̱ táki̱ʼva íyo ña̱ ni̱ka̱ʼa̱n Ndióxi̱ xíʼi̱n: ‘Ta̱ Aarón xíʼin na̱ se̱ʼera kuxuñaʼ. 32 Ta ku̱ñu ña̱ kindo̱o xíʼin si̱táva̱ʼa ña̱ kindo̱o, xíniñúʼu kaʼmindó ña̱yóʼo. 33 Va̱ása xíniñúʼu kuxíkándó yéʼé tienda ña̱ reunión ti̱xin ña̱ u̱xa̱ ki̱vi̱, nda̱a̱ ná ndiʼi vikó ña̱ nda̱kaxin Ndióxi̱ ndóʼó koondó su̱tu̱, chi ki̱ʼva u̱xa̱ ki̱vi̱ kuniñúʼuna xíʼinndó ña̱ xa̱a̱ndó koondó su̱tu̱. 34 Jehová ni̱ka̱ʼa̱nra xíʼinyó ña̱ keʼéyó ña̱yóʼo ña̱ va̱ʼa xa̱a̱ndó koondó su̱tu̱. 35 Ta ndóʼó kindo̱ondó yéʼé tienda ña̱ reunión káʼñu xíʼin ñuú, ta ki̱ʼva u̱xa̱ ki̱vi̱ keʼéndó ña̱yóʼo, ta keʼéndó ndiʼi chiñu ña̱ ni̱ka̱ʼa̱n Jehová xíʼinndó keʼéndó, tasaá kúú ña̱ va̱ása kuvindó; chi saá ni̱ka̱ʼa̱n Ndióxi̱ xíʼi̱n”. 36 Ta ña̱ ni̱ka̱ʼa̱n Jehová xíʼin ta̱ Moisés ka̱ʼa̱nra xíʼin ta̱ Aarón xíʼin na̱ se̱ʼera, ke̱ʼénaña.
9 Ta ña̱ ki̱vi̱ u̱na̱, ta̱ Moisés ka̱nara ta̱ Aarón xíʼin na̱ se̱ʼera ta saátu ndiʼika na̱ xi̱ku̱a̱ʼa̱ ña̱ ñuu Israel. 2 Ta ni̱ka̱ʼa̱nra xíʼin ta̱ Aarón: “Kiʼin iin si̱ndi̱ki̱ loʼo tí kǒo kue̱ʼe̱ kúúmií ta taxiúnrí ndaʼa̱ Ndióxi̱ ña̱ koorí ofrenda xa̱ʼa̱ ku̱a̱chi na̱ ñuu Israel ta saátu taxiún iin ndikachi tí kǒo kue̱ʼe̱ kúúmií ña̱ koorí ofrenda ña̱ taxiún ndaʼa̱ Jehová. 3 Soo ña̱yóʼo kúú ña̱ ka̱ʼún xíʼin na̱ ñuu Israel: ‘Kiʼinndó iin ti̱xúʼu che̱e ña̱ koorí ofrenda xa̱ʼa̱ ku̱a̱chindó, saátu taxindó iin si̱ndi̱ki̱ loʼo xíʼin iin ti̱xúʼu loʼo tí kǒo kue̱ʼe̱ kúúmií tí iin ku̱i̱ya̱ ña̱ koorí ofrenda ña̱ kaʼmindó nu̱ú Ndióxi̱ 4 ta saátu taxindó iin si̱ndi̱ki̱ xíʼin iin ndikachi ndaʼa̱ Jehová ña̱ koorí sacrificio xa̱ʼa̱ ña̱ kítáʼan viíndó xíʼinra, saátu taxindó ofrenda ña̱ xíxi ta chika̱a̱ndó aceite xíʼin ña̱yóʼo, saáchi vitin kúú ña̱ kita Jehová nu̱úndóʼ”. 5 Tasaá níʼina ndiʼi ña̱ʼa ña̱ ni̱ka̱ʼa̱n ta̱ Moisés xíʼinna ni̱xa̱a̱na yéʼé tienda ña̱ reunión. Ta ku̱yatin ndiʼi na̱ ñuu Israel ta xi̱kunditana nu̱ú Jehová. 6 Tasaá ni̱ka̱ʼa̱n ta̱ Moisés: “Ña̱yóʼo kúú ña̱ ni̱ka̱ʼa̱n Jehová keʼéndó ña̱ va̱ʼa kunindó ndee̱ra”. 7 Tasaá ni̱ka̱ʼa̱n ta̱ Moisés xíʼin ta̱ Aarón: “Kuyatin xíʼin ofrenda ña̱ kaʼmiún nu̱ú Ndióxi̱ ta taxiña xa̱ʼa̱ na̱ veʼún, xa̱ʼa̱ miíún xíʼin xa̱ʼa̱ na̱ ñuu, nda̱a̱ táki̱ʼva íyo ña̱ ni̱ka̱ʼa̱n Jehová”.