¿Ndáaña keʼún ña̱ va̱ʼa ndakutáʼan tukún xíʼin Jehová?

KU̱A̱ʼÁNÍ na̱ hermano na̱ ke̱e ti̱xin congregación ndiʼi ku̱i̱ya̱ ndándikóna ti̱xin ñuu Ndióxi̱. Ná ndakanixi̱níyó nda̱saaví kúsi̱í-inina chí ndiví tá ndándikó iin tá iin na̱yóʼo (Luc. 15:7, 10). Tá ki̱taún ti̱xin ñuu Ndióxi̱ ta xa̱a̱ nda̱ndikóún, kivi kandíxaún ña̱ kúsi̱íní-ini ta̱ Jesús, na̱ ángel ta saátu Jehová. Soo koo sava ña̱ kivi kasi nu̱ún ña̱ ndakutáʼan vií tukún xíʼin Jehová. ¿Ndáaña kúú sava ña̱yóʼo ta ndáaña kivi chindeétáʼan xíʼún?

ÑA̱ KIVI KASI NU̱ÚN

Ni xa̱a̱ nda̱ndikó sava na̱ hermano ti̱xin congregación, táʼan ndákava-inina. Tá saá ndóʼún, sana kúnda̱a̱va-iniún xíʼin ña̱ ndo̱ʼo ta̱ rey David. Saáchi ni xa̱a̱ i̱xakáʼnu-ini Ndióxi̱ xa̱ʼa̱ra, ni̱ka̱ʼa̱nra ña̱yóʼo: “Ndíʼi̱ní-inii̱ xa̱ʼa̱ ña̱ va̱ása va̱ʼa ke̱ʼíi̱” (Sal. 40:12; 65:3). Ni xa̱a̱ ku̱a̱ʼá ku̱i̱ya̱ ndíkó savana ti̱xin ñuu Jehová, soo va̱ása va̱ʼa kúnina xa̱ʼa̱ ña̱ ke̱ʼéna ta kúkaʼan nu̱úna. Tá kúú, iin ñá hermana ñá naní Isabellea yáʼaka 20 ku̱i̱ya̱ ki̱tañá ti̱xin congregación, ñáyóʼo káchiñá: “Xi̱ ixayo̱ʼvi̱níña xíʼi̱n kandíxai̱ ña̱ kivi ixakáʼnu-ini Jehová xa̱ʼíi̱”. Saátu yóʼó tá ná ndakava-iniún kivi kuxíká tukún nu̱ú Jehová (Prov. 24:10). Chika̱a̱ ndee̱ ña̱ va̱ása kundoʼún ña̱yóʼo.

Inkana ndíʼi̱ní-inina tá kíxáʼana ndákanixi̱nína xa̱ʼa̱ ndiʼi ña̱ xíniñúʼu keʼéna ña̱ ndakutáʼan vií tukuna xíʼin Jehová. Tá nda̱ndikó ta̱ Antoine ti̱xin congregación, ña̱yóʼo ni̱ka̱ʼa̱nra: “Na̱ndósói̱ xa̱ʼa̱ ndiʼi ña̱ xi̱keʼíi̱ tá xi̱kui̱ testigo Jehová”. Xa̱ʼa̱ ña̱ ndóʼo savana ña̱yóʼo, kivi kasiña nu̱úna ña̱ keʼéna sava chiñu nu̱ú Ndióxi̱.

Ná ka̱ʼa̱nyó xa̱ʼa̱ iin ejemplo. Tá iin veʼe ndi̱ʼi-xa̱ʼa̱ña xa̱ʼa̱ ña̱ ndeéní ku̱un sa̱vi̱ kini, na̱ xíʼin veʼe yóʼo kivi ndi̱ʼiní-inina tá ná ndakanixi̱nína xa̱ʼa̱ ndiʼi ña̱ xíniñúʼu keʼéna ña̱ va̱ʼa sandáʼanaña. Ta ki̱ʼva saá kivi kundoʼún tá ki̱taún ti̱xin ñuu Jehová xa̱ʼa̱ ña̱ ni̱ki̱ʼviún iin ku̱a̱chi ndeé. Saáchi kivi ndakanixi̱níún ña̱ xíniñúʼu chika̱a̱níún ndee̱ ña̱ ndakutáʼan vií tukún xíʼin Jehová. Soo íyova na̱ chindeétáʼan xíʼún.

Jehová káʼa̱nra ña̱yóʼo xíʼún: “Naʼandó ná ndasaviíyó ku̱a̱chi ña̱ kúúmiíyó” (Is. 1:18). Yóʼó xa̱a̱ chi̱ka̱ún ndee̱ ña̱ ndasaviún ku̱a̱chi ña̱ kúúmiíún xíʼin Jehová, ña̱kán kúʼvi̱ní-inira xínira yóʼó. Ndakanixi̱ní xa̱ʼa̱ ña̱yóʼo: Jehová kivi kuniñúʼura yóʼó ña̱ na̱ʼa̱ra nu̱ú ta̱ Ndi̱va̱ʼa ña̱ kúúra iin ta̱ vatá (Prov. 27:11).

Xa̱ʼa̱ ña̱ xa̱a̱ nda̱ndikóún nu̱ú Jehová, kúni̱ kachiña ña̱ xa̱a̱ ku̱yatiún nu̱úra ta ta̱yóʼo káʼa̱nra ña̱ kuyatinra nu̱ún (Sant. 4:8). Xa̱a̱ ndiʼina kúnda̱a̱-inina ña̱ xa̱a̱ nda̱ndikóún ti̱xin congregación, soo íyo inka ña̱ xíniñúʼu keʼún. Xíniñúʼu chika̱ún ndee̱ ña̱ kuʼvi̱ka-iniún kuniún Jehová chi ta̱yóʼo kúúra yiváún ta kúútura migoún. ¿Ndáa ki̱ʼva keʼúnña?

CHIKA̱A̱-INIÚN KEʼÚN ÑA̱ KUCHIÑÚN KEʼÚN

Chika̱a̱ ndee̱ keʼún ña̱ kuchiñu kuitíún saxínún. Ña̱ kítáʼún xíʼin Jehová nda̱a̱ táki̱ʼva íyo iin veʼe ña̱ ndi̱ʼi-xa̱ʼa̱ saá íyoña, soo táʼan níndichiva xa̱ʼa̱ña. Ña̱yóʼo kúni̱ kachiña ña̱ ndákaʼánvaún xa̱ʼa̱ ña̱ xíni̱ún xa̱ʼa̱ Jehová, xíʼin xa̱ʼa̱ ña̱ keʼé Reinora. Ta ña̱ va̱ʼa ndasaviún ña̱ kítáʼún xíʼin Jehová, xíniñúʼu natúʼun xíʼin na̱ yiví xa̱ʼa̱ra, ku̱ʼu̱n reunión ta kutáʼún xíʼin na̱ hermano. Vitin ná kotoyó sava ña̱ kivi keʼún.

Ka̱ʼa̱n ni̱ʼún xíʼin Jehová. Kúnda̱a̱-inira ña̱ íxayo̱ʼvi̱ña xíʼún ka̱ʼún xíʼinra saáchi va̱ása va̱ʼa kúniún xa̱ʼa̱ ku̱a̱chi ña̱ ni̱ki̱ʼviún nu̱úra (Rom. 8:26). Soo ni saá ndakundeún ka̱ʼún xíʼin Jehová ta ka̱ʼa̱n xíʼinra ña̱ kúni̱níún kutáʼún xíʼinra (Rom. 12:12). Ta̱ Andrej káchira: “Va̱ása va̱ʼa níxi̱kuni̱i̱ ta xi̱kukaʼanní nu̱úi̱. Soo tá xi̱sandíʼii̱ xi̱ka̱ʼi̱n xíʼin Jehová va̱ʼaní xi̱kuni̱i̱, ta va̱ása níxi̱ndi̱ʼi̱ka-inii̱”. Tá va̱ása xíni̱ún ndáaña ka̱ʼún xíʼin Jehová, ndakanixi̱ní xa̱ʼa̱ oración ña̱ ke̱ʼé ta̱ David tá nda̱ndikó-inira xa̱ʼa̱ ña̱ ke̱ʼéra, ña̱ va̱xi nu̱ú Salmo 51 xíʼin 65.

Ndiʼi ki̱vi̱ kaʼviún Biblia. Ña̱yóʼo chindeétáʼanña xíʼún ña̱ kandíxakaún Jehová, ta kuʼvi̱-iniún kuniúnra (Sal. 19:7-11). Ta̱ Felipe káchira: “Ku̱xíkái̱ nu̱ú Jehová ta ke̱ʼíi̱ ña̱ va̱ása va̱ʼa nu̱úra, saáchi va̱ása níxi̱kaʼvii̱ tu̱ʼunra ndi̱ʼi̱ ki̱vi̱. Ta xa̱ʼa̱ ña̱ va̱ása níxi̱kunii̱ ndikó tukui̱ keʼíi̱ ña̱yóʼo, ki̱xáʼíi̱ káʼvi ni̱ʼii̱ Biblia”. Ña̱yóʼo kivi keʼétu miíún. Tá va̱ása xíni̱ún ndáaña kaʼviún xa̱ʼa̱, kivi ka̱ʼún xíʼin iin na̱ migoún na̱ xa̱a̱ xu̱xa-ini xíʼin tu̱ʼun Ndióxi̱ ña̱ ná chindeétáʼanna xíʼún.

Kutáʼan tuku xíʼin na̱ hermano. Sava na̱ ndándikó ti̱xin congregación túvina ña̱ sáa̱ na̱ hermano xíʼinna. Ñá Larissa káchiñá: “Xi̱kukaʼanní nu̱úi̱. Ta xi̱ndakanixi̱níi̱ ña̱ sa̱ndákavai̱-ini na̱ hermano xíʼin ña̱ ke̱ʼíi̱, ta ku̱a̱ʼání tiempo xi̱ndakanixi̱níi̱ saá”. Kivi kandíxaún ña̱ kúni̱va na̱ anciano xíʼin inkaka na̱ hermano chindeétáʼanna xíʼún ña̱ va̱ʼa ndakutáʼan vií tukún xíʼin Jehová (koto recuadro “Ña̱ kivi keʼé na̱ anciano”). Na̱yóʼo kúsi̱íní-inina xa̱ʼa̱ ña̱ nda̱ndikóún ta saátu kúni̱na ná kusi̱í-iniún (Prov. 17:17).

¿Ndáaña kivi keʼún ña̱ va̱ʼa kutáʼan tukún xíʼin na̱ hermano? Ku̱ʼu̱n ni̱ʼún reunión ta kitaún na̱túʼún xa̱ʼa̱ Ndióxi̱ xíʼin na̱ hermano. ¿Ndáa ki̱ʼva chindeétáʼan ña̱yóʼo xíʼún? Ta̱ Félix káchira: “Na̱ congregación xi̱kuʼvi̱ní-inina xi̱xinina yi̱ʼi̱ ta xi̱kuni̱na ná ndandikói̱. Ndiʼina chi̱ndeétáʼanna xíʼi̱n ña̱ kunda̱a̱-inii̱ ña̱ kúi̱ táʼan na̱ congregación, ña̱ xa̱a̱ i̱xakáʼnu-ini Jehová xa̱ʼíi̱ ta kivi ndakundeékai̱ kachíñui̱ nu̱úra” (koto recuadro “Ña̱ kivi keʼún”).

VA̱ÁSA NDAKAVA-INIÚN

Tá xa̱a̱ chíka̱ún ndee̱ ña̱ ndakutáʼan tukún xíʼin Jehová, ta̱ Ndi̱va̱ʼa ndakundeéra chindaʼára ku̱a̱ʼání tu̱ndóʼo nu̱ún ña̱ sandákavara-iniún (Luc. 4:13). Tá kúni̱ún koo tu̱ʼvaún, vitin kúú ña̱ xíniñúʼu chika̱ún ndee̱ ña̱ ndakutáʼan viíún xíʼin Ndióxi̱.

Ña̱yóʼo káʼa̱n Jehová xa̱ʼa̱ ndikachi sa̱na̱ra: “Tí nda̱ñúʼu ku̱ʼi̱n nandukúi̱, ta tí ni̱ta̱ni̱ ku̱ʼi̱n ndakiʼi̱nrí ta sukúndai̱ iin ti̱ko̱to̱ nu̱ú tu̱kue̱ʼe̱rí ta chika̱i̱ ndee̱ xíʼin tí ku̱vitá” (Ezeq. 34:16). Xa̱a̱ ku̱a̱ʼánína chíndeétáʼan Jehová xíʼin ña̱ va̱ʼa ndakutáʼan vií tukuna xíʼinra, ña̱kán kivi kandíxaún ña̱ saátu kúni̱ra chindeétáʼanra xíʼún ña̱ ndakutáʼan vií tukún xíʼinra.

Ña̱ kivi keʼé na̱ anciano

Ku̱a̱ʼání ña̱ kivi keʼé na̱ anciano ña̱ va̱ʼa chindeétáʼanna xíʼin na̱ hermano na̱ ndándikó ti̱xin congregación, ña̱ va̱ʼa ndakutáʼan tukuna xíʼin Jehová. Ná ka̱ʼa̱nyó xa̱ʼa̱ sava ña̱ kivi keʼéna.

Chika̱a̱na ndee̱ xíʼinna. Ta̱ apóstol Pablo xi̱kunda̱a̱-inira ña̱ iin na̱ ndándikó-ini kivi kundi̱ʼi̱ní-inina xa̱ʼa̱ ña̱ kúsuchíní-inina (2 Cor. 2:7). Sana kúkaʼan nu̱úna ta ndákavaní-inina. Ña̱kán, ta̱ apóstol Pablo ni̱ka̱ʼa̱nra xíʼin na̱ hermano ña̱ ixakáʼnu-inina xa̱ʼa̱ iin na̱ ni̱ki̱ʼvi ku̱a̱chi ta sandíkona-inina. Na̱ ndándikó ti̱xin congregación xíniñúʼu ka̱ʼa̱nna xíʼinna ña̱ kúʼvi̱ní-ini Jehová xínirana ta saátu na̱ hermano. Ta va̱ása ndakava-ini na̱yóʼo tá ná ka̱ʼa̱nna xíʼinna ña̱ va̱ʼaní íyo chiñu ña̱ kéʼéna, ta chíndeétáʼanna xíʼinna.

Ka̱ʼa̱nna xa̱ʼa̱na xíʼin Ndióxi̱. “Tá káʼa̱n iin na̱ yiví na̱ nda̱kúní-ini xíʼin Ndióxi̱, ña̱ káʼa̱n na̱yóʼo kúúmiíníña ndee̱” (Sant. 5:16). Ñá Larissa ñá xa̱a̱ ni̱ka̱ʼa̱nyó xa̱ʼa̱ káchiñá: “Na̱túʼi̱n xíʼin na̱ anciano xa̱ʼa̱ ña̱ xi̱xika-inii̱, ta saátu xa̱ʼa̱ ña̱ xi̱sandíʼi̱-inii̱. Ta na̱yóʼo ni̱ka̱ʼa̱nna xa̱ʼíi̱ xíʼin Ndióxi̱ ta ki̱ʼi̱n kuenta ña̱ va̱ása sáa̱na xíʼi̱n. Saáchi xi̱kuni̱na chindeétáʼanna xíʼi̱n ña̱ ndakutáʼan vií tukui̱ xíʼin Jehová”. Iin ta̱ hermano ta̱ naní Theo káchira: “Oración ña̱ xi̱keʼé na̱ anciano, chi̱ndeétáʼanña xíʼi̱n ña̱ kunda̱a̱-inii̱ ña̱ kúʼvi̱ní-ini Jehová xínira yi̱ʼi̱, ta va̱ása kíʼinra kuenta xíʼin ña̱ va̱ása va̱ʼa kéʼíi̱ chi ña̱ kíʼinkara kuenta xíʼin kúú ña̱ va̱ʼa kéʼíi̱”.

Koona migona. Na̱ ndándikó ti̱xin ñuu Ndióxi̱, xíniñúʼu koo migona ti̱xin congregación. Iin ta̱ anciano ta̱ naní Justin káchira: “Ndiʼi tiempo ná ka̱ʼa̱nyó xíʼinna ña̱ keena natúʼunna xíʼinyó xa̱ʼa̱ Ndióxi̱, ta saátu ku̱ʼu̱nyó kotoyóna veʼena. Ta ndáyáʼviní ña̱ kooyó migona”. Inka ta̱ anciano ta̱ naní Henry káchira: “Tá xíto na̱ hermano ña̱ kítáʼan na̱ anciano xíʼin na̱ ndándikó ti̱xin congregación, saátu keʼé na̱yóʼova”.

Chindeétáʼanna xíʼinna ña̱ kaʼvina tu̱ʼun Ndióxi̱. Na̱ hermano na̱ xu̱xa-ini kivi chindeétáʼanna xíʼin na̱ nda̱ndikó ti̱xin congregación ña̱ kaʼvina tu̱ʼun Ndióxi̱. Iin ta̱ anciano ta̱ naní Darko káchira: “Kútóoníi̱ natúʼi̱n xíʼin inkana xa̱ʼa̱ ña̱ ndáni̱ʼíi̱ nu̱ú tu̱ʼun Ndióxi̱, ta ná kotona ña̱ kúsi̱í-inii̱ tá káʼvii̱”. Inka ta̱ anciano ta̱ naní Clayton káchira: “Káʼi̱n xíʼinna ña̱ ná nandukúna relato ña̱ va̱xi nu̱ú tu̱ʼun Ndióxi̱, ña̱ kítáʼan xíʼin ña̱ ndóʼona”.

Kundaanana. Na̱ ndándikó ti̱xin congregación, xíniñúʼu kotona na̱ anciano nda̱a̱ táki̱ʼva íyo na̱ ndáa miína, ta su̱ví nda̱a̱ táki̱ʼva íyo iin na̱ ndátiin ku̱a̱chi xíʼinna (Jer. 23:4). Ndóʼó na̱ anciano, ndiʼi tiempo kuniso̱ʼondó ña̱ káʼa̱n na̱ ndándikó ti̱xin congregación, ta ka̱ʼa̱nndó tu̱ʼun va̱ʼa xíʼinna. Ka̱ʼa̱n ni̱ʼindó xíʼinna. Iin ta̱ anciano ta̱ naní Marcus káʼa̱nra ndáaña kéʼéra tá xáʼa̱nra xítorana: “Káʼvindi̱ tu̱ʼun Ndióxi̱ ta káʼa̱nndi̱ xa̱ʼa̱ña, káʼa̱nndi̱ xíʼinna ña̱ va̱ʼaní íyo chiñu ña̱ kéʼéna, ta sándakaʼánndi̱na ña̱ kúsi̱íní-inindi̱ ta saátu Jehová xa̱ʼa̱ ña̱ chi̱ka̱a̱nína ndee̱ nda̱ndikóna nu̱úra. Tá sándiʼindi̱, kíndo̱ondi̱ ndáa ki̱vi̱ ku̱ʼu̱nndi̱ kotondi̱na”.

a Nu̱ú artículo yóʼo na̱sama ki̱vi̱na.