ARTÍCULO ÑA̱ KAʼVIYÓ 19
¿Ndáaña keʼéyó ña̱ va̱ʼa kandíxayó ña̱ taxiva Jehová ñuyǐví xa̱á?
“Ki̱vi̱ káʼa̱nra iin ña̱ʼa, ¿á va̱ása keʼéraña?” (NÚM. 23:19).
YAA 142 Ná kǒo nandósóyó xa̱ʼa ña̱ ndátuyó
ÑA̱ KA̱ʼA̱NYÓ XA̱ʼA̱a
1, 2. Nani ndátuyó kixaa̱ ñuyǐví xa̱á, ¿ndáaña xíniñúʼu keʼéyó?
CHÍNDAYÁʼVINÍYÓ ña̱ káʼa̱n Jehová ndasaxa̱ára ñuyǐví ña̱ ndóoyó (2 Ped. 3:13). Ña̱ nda̱a̱ kúúña va̱ása xíni̱yó ama kúú ña̱ kixaa̱ ñuyǐví xa̱á, soo ndiʼi ña̱ xítoyó ñuyǐví yóʼo chíndeétáʼanña xíʼinyó kunda̱a̱-iniyó ña̱ xa̱a̱ ku̱yatinní kixaa̱ ñuyǐví xa̱á (Mat. 24:32-34, 36; Hech. 1:7).
2 Ni loʼo á xa̱a̱ ku̱a̱ʼá ku̱i̱ya̱ kúúyó testigo Jehová, soo ndiʼiyó xíniñúʼu chika̱a̱níyó ndee̱ ña̱ kandíxayó ña̱ kixaa̱ iin ñuyǐví xa̱á kundooyó. ¿Nda̱chun? Saáchi nda̱a̱ na̱ kándíxaní Ndióxi̱ kivi xa̱a̱na va̱ása kandíxakanara. Ta ta̱ apóstol Pablo ni̱ka̱ʼa̱nra ña̱ tá loʼoní kándíxayó Ndióxi̱, iin ku̱a̱chi ña̱ kamaní sándakava miíyó kúúña (Heb. 12:1). Ta ña̱ va̱ása kundoʼoyó ña̱yóʼo, xíniñúʼu kuumiíyó costumbre ña̱ kaʼviyó xa̱ʼa̱ ña̱ chindeétáʼan xíʼinyó ña̱ kandíxakayó ña̱ saxínuva Jehová ña̱ káʼa̱nra taxira ñuyǐví xa̱á kundooyó (Heb. 11:1).
3. ¿Ndáaña sakúaʼayó nu̱ú artículo yóʼo?
3 Nu̱ú artículo yóʼo sakúaʼayó xa̱ʼa̱ u̱ni̱ ña̱ chindeétáʼan xíʼinyó ña̱ kandíxaníyó ña̱ taxiva Jehová ñuyǐví xa̱á kundooyó. Ña̱ nu̱ú: ña̱ ndakanixi̱níyó ña̱ ni̱xi̱ʼi̱ ta̱ Jesús xa̱ʼa̱yó. Ña̱ u̱vi̱: ña̱ ndakanixi̱níyó xa̱ʼa̱ ndee̱ ña̱ kúúmií Jehová. Ta ña̱ u̱ni̱: ña̱ keʼéyó chiñu nu̱ú Ndióxi̱. Ta so̱ndíʼi kotoyó ndáa ki̱ʼva chindeétáʼan tu̱ʼun ña̱ ni̱ka̱ʼa̱n Jehová xíʼin ta̱ Habacuc xíʼinyó. Soo siʼna ná káʼa̱nyó nda̱chun kúú ña̱ xíniñúʼu kandíxaníyó ña̱ kixaa̱ iin ñuyǐví xa̱á kundooyó.
¿NDA̱CHUN XÍNIÑÚʼU KANDÍXANÍYÓ ÑA̱ KÁʼA̱N NDIÓXI̱?
4. ¿Ama kúú ña̱ xíniñúʼu kandíxaníyó Ndióxi̱?
4 Ndiʼi ki̱vi̱ íyo ku̱a̱ʼání ña̱ ndáka̱xinyó keʼéyó ta xíniñúʼu na̱ʼa̱yó á kándíxaníyó Ndióxi̱ tá ndáka̱xinyó keʼéyó ña̱yóʼo. Tá kúú, ndáka̱xinyó ndáana kutáʼan xíʼinyó, ndáaña sakúsi̱í-iniyó, ndáaña sakúaʼayó xa̱ʼa̱, ndáa ki̱ʼva keʼéyó xíʼin na̱ ti̱ndaʼa̱ xíʼinyó, ndáa ki̱ʼva sákuaʼnuyó se̱ʼeyó á ndáa chiñu kachíñuyó. Ta ña̱yóʼo kivi ndakanixi̱níyó xa̱ʼa̱: “¿Ndáaña náʼa̱ ndiʼi ña̱ ndáka̱xii̱n keʼíi̱? ¿Á náʼi̱ xíʼin ña̱ ndáka̱xii̱n keʼíi̱ ña̱ loʼova tiempo íyo ña̱ʼa ñuyǐví yóʼo ta xa̱a̱ ku̱nu̱míníva kixaa̱ ñuyǐví xa̱á? ¿Á ndákanixi̱níi̱ nda̱a̱ táki̱ʼva ndákanixi̱ní na̱ ñuyǐví yóʼo ña̱ va̱ása kivi kutakuyó ndiʼi saá tiempo?” (Mat. 6:19, 20; Luc. 12:16-21). Tá ná chika̱a̱yó ndee̱ ña̱ kandíxakayó ña̱ xa̱a̱ ku̱yatinní kixaa̱ ñuyǐví xa̱á, viíní koo ña̱ ndaka̱xinyó keʼéyó.
5, 6. ¿Nda̱chun xíniñúʼu kandíxaníyó Jehová tá yáʼayó nu̱ú tu̱ndóʼo? Ka̱ʼa̱n xa̱ʼa̱ iin ejemplo.
5 Yáʼatuyó nu̱ú tu̱ndóʼo nu̱ú xíniñúʼu na̱ʼa̱yó ña̱ kándíxaníyó Ndióxi̱. Tá kúú, tá íxandi̱va̱ʼana xíʼinyó, tá kúúmiíyó iin kue̱ʼe̱ ña̱ va̱ása kívi ndaʼa̱yó xíʼin á tá kúúmiíyó inkaka tu̱ndóʼo ña̱ kivi sandákava-iniyó. Sana tá sa̱kán kíxáʼa tu̱ndóʼo yóʼo nu̱úyó va̱ása íxayo̱ʼvi̱víña xíʼinyó. Soo tá xa̱a̱ naʼá ñúʼuyó ndaʼa̱ tu̱ndóʼo yóʼo xíniñúʼu kandíxaníyó Ndióxi̱ ña̱ va̱ʼa kundeé-iniyó ta kusi̱í-iniyó ndasakáʼnuyóra (Rom. 12:12; 1 Ped. 1:6, 7).
6 Tá yáʼayó nu̱ú iin tu̱ndóʼo, sana kíxáʼayó ndákanixi̱níyó ña̱ va̱ása taxiví Jehová ñuyǐví xa̱á kundooyó. Soo tá saá ndákanixi̱níyó, ¿á kúni̱ kachiña ña̱ loʼoní kándíxayó Jehová? Va̱ásaví. Ná ka̱ʼa̱nyó xa̱ʼa̱ iin ejemplo. Tá kúúña tiempo vi̱xin, sana kixáʼayó ndakanixi̱níyó ña̱ va̱ása kixaa̱ví tiempo niʼní. Soo tiempo niʼní kíxaa̱vaña. Ta saátu tá ndákava-iniyó, sana kixáʼayó ndakanixi̱níyó ña̱ va̱ása kixaa̱ví ñuyǐví xa̱á, soo tá ndinuʼuní-iniyó kándíxayó Ndióxi̱, kandíxavayó ña̱ saxínura ña̱ káʼa̱nra keʼéra (Sal. 94:3, 14, 15; Heb. 6:17-19). Ta ña̱yóʼo kúú ña̱ chindeétáʼan xíʼinyó ña̱ siʼnaka chiñu Jehová kundi̱ʼi̱-iniyó xa̱ʼa̱.
7. ¿Ndáaña va̱ása xíniñúʼu ndakanixi̱níyó?
7 Saátu xíniñúʼu kandíxaníyó Jehová tá nátúʼunyó xa̱ʼa̱ra xíʼin na̱ yiví. Tá káʼa̱nyó xíʼinna xa̱ʼa̱ ñuyǐví xa̱á ña̱ taxira kundooyó, ku̱a̱ʼání na̱ yiví va̱ása kándíxana ña̱yóʼo (Mat. 24:14; Ezeq. 33:32). Soo ná va̱ása ndakanixi̱níyó nda̱a̱ táki̱ʼva ndákanixi̱ní na̱ yiví yóʼo. Ta ña̱ va̱ása kixáʼayó ndakanixi̱níyó saá, xíniñúʼu chika̱a̱kayó ndee̱ ña̱ kandíxakayó Ndióxi̱. Ná kotoyó u̱ni̱ ña̱ kivi keʼéyó.
ÑA̱ NDAKANIXI̱NÍYÓ XA̱ʼA̱ ÑA̱ NI̱XI̱ʼI̱ TA̱ JESÚS XA̱ʼA̱YÓ
8, 9. Ña̱ ndakanixi̱níyó xa̱ʼa̱ ña̱ chi̱ndaʼá Jehová se̱ʼera ni̱xi̱ʼi̱ra xa̱ʼa̱yó, ¿ndáa ki̱ʼva chindeétáʼanña xíʼinyó?
8 Iin ña̱ chindeétáʼanníka xíʼinyó ña̱ kandíxayó Ndióxi̱ kúú ña̱ ndakanixi̱níyó xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó. Saáchi ña̱ ni̱xi̱ʼi̱ ta̱ Jesús xa̱ʼa̱yó náʼa̱ña nu̱úyó ña̱ xi̱nuva ña̱ káʼa̱n Jehová keʼéra. Ña̱kán ndáyáʼviní taváyó tiempo ña̱ ndakanixi̱níyó xa̱ʼa̱ ndiʼi ña̱ ke̱ʼé Jehová ña̱ va̱ʼa chi̱ndaʼára se̱ʼera ni̱xi̱ʼi̱ra xa̱ʼa̱yó. Chi saá kúú ña̱ ndinuʼuní-iniyó kandíxayó ña̱ káʼa̱n Jehová ña̱ taxira ñuyǐví xa̱á kundooyó ta kutakuyó ndiʼi tiempo. Soo, ¿nda̱chun va̱ʼa káʼa̱nyó saá?
9 Ná ndakanixi̱níyó xa̱ʼa̱ ndiʼi ña̱ ke̱ʼé Jehová ña̱ chi̱ndaʼára se̱ʼera ni̱xi̱ʼi̱ra xa̱ʼa̱yó. Nda̱a̱ chí ndiví, Jehová chi̱ndaʼára se̱ʼera ta̱ mitúʼun ta̱ va̱ʼaní kítáʼan xíʼinra, ña̱ va̱ʼa kakura nu̱ú ñuʼú yóʼo ta koora iin na̱ yiví na̱ kǒo ku̱a̱chi. Ta tá ni̱xi̱yo ta̱ Jesús nu̱ú ñuʼú yóʼo ni̱xo̱ʼvi̱níra, ni̱ya̱ʼara nu̱ú tu̱ndóʼo ña̱ yo̱ʼvi̱ní ta xa̱ʼnínara. Ña̱yóʼo náʼa̱ña nu̱úyó ña̱ ndáyáʼviní ña̱ ke̱ʼé Jehová xa̱ʼa̱yó. Jehová kǒo nítaxira ña̱ xo̱ʼvi̱ní se̱ʼera xa̱ʼa̱yó ña̱ va̱ʼa kutakuyó loʼo kuití tiempo (Juan 3:16; 1 Ped. 1:18, 19). Chi xa̱ʼa̱ ña̱ ndáyáʼviní ke̱ʼéra, kivi kutakuyó ndiʼi tiempo nu̱ú ñuyǐví xa̱á.
ÑA̱ NDAKANIXI̱NÍYÓ XA̱ʼA̱ NDEE̱ ÑA̱ KÚÚMIÍ JEHOVÁ
10. Nda̱a̱ táki̱ʼva káʼa̱n Efesios 3:20, ¿ndáaña kivi keʼé Jehová?
10 Inka ña̱ chindeétáʼan xíʼinyó ña̱ kandíxakayó Jehová kúú ña̱ ndakanixi̱níyó xa̱ʼa̱ ndee̱ ña̱ kúúmiíra. Ta̱kán kúúmiíra ndee̱ ña̱ saxínura ndiʼi ña̱ káʼa̱nra keʼéra. Na̱ yiví ndákanixi̱nína ña̱ va̱ása kiviví ni̱ʼíyó ña̱ kutakuyó ndiʼi tiempo nu̱ú iin ñuyǐví xa̱á. Soo Jehová káʼa̱nra keʼéra ku̱a̱ʼání ña̱ʼa, ta nda̱a̱ ni iin na̱ yiví kǒo kuchiñu keʼé ña̱yóʼo. Ta Jehová kuchiñuvara keʼéraña chi ku̱a̱ʼání ndee̱ kúúmiíra (Job 42:2; Mar. 10:27). Ña̱kán ndiʼi ña̱ káʼa̱nra keʼéra kándíxavayóña ta va̱ása xíka-iniyó xa̱ʼa̱ña (kaʼvi Efesios 3:20).
11. Ka̱ʼa̱n xa̱ʼa̱ iin ña̱ ni̱ka̱ʼa̱n Jehová keʼéra (koto recuadro ña̱ naní “Sava ña̱ ke̱ʼé Jehová”).
11 Ná ndakanixi̱níyó xa̱ʼa̱ ña̱ ki̱ndoo Jehová keʼéra xa̱ʼa̱ na̱ xi̱ndasakáʼnu miíra tiempo xi̱naʼá, ni sana nda̱kanixi̱ní na̱yóʼo ña̱ va̱ása kivi xi̱nuña. Tá kúú, ni̱ka̱ʼa̱nra xíʼin ta̱ Abrahán xíʼin ñá Sara ña̱ koo iin se̱ʼena ni xa̱a̱ chéenína (Gén. 17:15-17). Saátu ni̱ka̱ʼa̱n Jehová xíʼin ta̱ Abrahán ña̱ taxira ñuʼú ña̱ Canaán kundoo na̱ se̱ʼe ta̱yóʼo. Soo na̱ se̱ʼe ta̱ Abrahán á na̱ ñuu Israel ku̱a̱ʼání ku̱i̱ya̱ ni̱xi̱yona esclavo chí ñuu Egipto. Ta sana nda̱kanixi̱nína ña̱ va̱ása xi̱nuví ña̱ ni̱ka̱ʼa̱n Jehová xíʼin ta̱ Abrahán. Soo sa̱xínuva Jehová ña̱ ki̱ndoora keʼéra. Tá ni̱ya̱ʼa ku̱a̱ʼá ku̱i̱ya̱, Jehová ni̱ka̱ʼa̱nra xíʼin ñá Elisabet ña̱ koo iin se̱ʼeñá ni xa̱a̱ chéeníñá. Saátu ni̱ka̱ʼa̱nra xíʼin ñá María, iin ñá loʼo kúa̱an ña̱ kaku iin se̱ʼeñá. Ta xíʼin ña̱yóʼo xi̱nu ña̱ ni̱ka̱ʼa̱n Jehová xa̱a̱ íyo ku̱a̱ʼání ku̱i̱ya̱ nu̱ú jardín ña̱ Edén (Gén. 3:15).
12. ¿Ndáaña káʼa̱n Josué 23:14 xíʼin Isaías 55:10, 11 xíʼinyó xa̱ʼa̱ ndee̱ ña̱ kúúmií Jehová?
12 Tá ndákanixi̱níyó xa̱ʼa̱ ndiʼi ña̱ ki̱ndoo Jehová keʼéra ta ndáa ki̱ʼva sa̱xínuraña, saá kúnda̱a̱-iniyó ña̱ kúúmiíníra ndee̱. Ta ña̱yóʼo chíndeétáʼanníña xíʼinyó ña̱ kandíxaníyó ña̱ taxi Jehová ñuyǐví xa̱á kundooyó (kaʼvi Josué 23:14;b Isaías 55:10, 11).c Ta xa̱ʼa̱ ña̱yóʼo koo tu̱ʼvayó ña̱ sanáʼa̱yó na̱ yiví xa̱ʼa̱ ñuyǐví xa̱á ña̱ su̱ví iin xa̱ni kúú ña̱yóʼo, chi ña̱ xi̱nu nu̱ú kúúvaña. Jehová ni̱ka̱ʼa̱nra ña̱yóʼo xa̱ʼa̱ ndiví xa̱á xíʼin iin ñuʼú xa̱á: “Kaʼyí tu̱ʼun yóʼo, saáchi na̱ yiví kivi kandíxanaña, ta mií ña̱ nda̱a̱ kúúña” (Apoc. 21:1, 5).
ÑA̱ KEʼÉYÓ CHIÑU NU̱Ú NDIÓXI̱
ÑA̱ REUNIÓN
¿Ndáa ki̱ʼva chíndeétáʼan ña̱yóʼo xíʼinyó ña̱ kandíxakayó ña̱ káʼa̱n Ndióxi̱ keʼéra? (Koto párrafo 13).
13. ¿Ndáa ki̱ʼva chíndeétáʼan reunión xíʼinyó ña̱ kandíxakayó ña̱ káʼa̱n Jehová?
13 Ña̱ u̱ni̱ ña̱ kivi chindeétáʼan xíʼinyó ña̱ kandíxakayó Ndióxi̱ kúú ña̱ keʼéyó chiñu nu̱úra. Ná ndakanixi̱níyó ndáa ki̱ʼva chíndeétáʼanní reunión xíʼinyó. Ñá Anad ñá xa̱a̱ ku̱a̱ʼání tiempo káchíñu nu̱ú Jehová, xi̱ndikaa̱ñá Betel, xi̱kuuñá precursora especial ta saátu kéʼéñá inkaka chiñu nu̱ú Jehová. Káchiñá: “Reunión, nda̱a̱ táki̱ʼva íyo iin ka̱a ña̱ tíin tú barco ña̱ va̱ása nduvanú saá íyoña nu̱úi̱, chi chíndeétáʼanníña xíʼi̱n ña̱ kandíxakai̱ Jehová. Ni tá sava yichi̱ na̱ hermano na̱ yáʼa ti̱xin reunión va̱ása viíní sánáʼa̱na á va̱ása káʼa̱nna xa̱ʼa̱ iin ña̱ʼa xa̱á, soo ni saá chíka̱a̱níi̱ ndee̱ ña̱ kuniso̱ʼi̱ ña̱ sánáʼa̱na. Ta ña̱yóʼo chíndeétáʼanníña xíʼi̱n ña̱ kandíxakai̱ Jehová”. Saátu ti̱xin reunión xíniso̱ʼoyó comentario na̱ hermanoyó ña̱ chíndeétáʼanní xíʼinyó ña̱ kandíxakayó Jehová (Rom. 1:11, 12; 10:17).
ÑA̱ NATÚʼUNYÓ XA̱ʼA̱ NDIÓXI̱
¿Ndáa ki̱ʼva chíndeétáʼan ña̱yóʼo xíʼinyó ña̱ kandíxakayó ña̱ káʼa̱n Ndióxi̱ keʼéra? (Koto párrafo 14).
14. Tá kéeyó nátúʼunyó xa̱ʼa̱ Ndióxi̱, ¿ndáa ki̱ʼva chíndeétáʼanña xíʼinyó?
14 Saátu tá kéeyó nátúʼunyó xa̱ʼa̱ Ndióxi̱ chíndeétáʼanníña xíʼinyó ña̱ kandíxakayó ña̱ káʼa̱nra keʼéra (Heb. 10:23). Ñá Barbara ñá xa̱a̱ yáʼaka 70 ku̱i̱ya̱ kúú testigo Jehová káchiñá: “Ña̱ kítai̱ nátúʼi̱n xa̱ʼa̱ Ndióxi̱ kúú ña̱ chíndeétáʼanní xíʼi̱n ña̱ kandíxai̱ ña̱ káʼa̱nra keʼéra. Tá nátúʼi̱n xa̱ʼa̱ra xíʼin na̱ yiví ta saátu xa̱ʼa̱ ña̱ káʼa̱nra ke̱ʼéra chí nu̱únínu, ña̱yóʼo chíndeétáʼanníña xíʼi̱n ña̱ kandíxakai̱ra”.
ÑA̱ KAʼVIYÓ TU̱ʼUNRA NDIʼI KI̱VI̱
¿Ndáa ki̱ʼva chíndeétáʼan ña̱yóʼo xíʼinyó ña̱ kandíxakayó ña̱ káʼa̱n Ndióxi̱ keʼéra? (Koto párrafo 15).
15. Ña̱ kaʼviyó tu̱ʼun Ndióxi̱ ndiʼi ki̱vi̱, ¿ndáa ki̱ʼva chíndeétáʼanña xíʼinyó? (Koto na̱ʼná).
15 Ña̱yóʼo kúú inka ña̱ chíndeétáʼan xíʼinyó ña̱ kandíxakayó ña̱ káʼa̱n Jehová keʼéra: Ña̱ kaʼviyó tu̱ʼunra ndiʼi ki̱vi̱. Iin ña̱ chíndeétáʼanní xíʼin ñá Susan kúú ña̱ ndáka̱xinñá iin hora ña̱ káʼviñá. Ñáyóʼo káchiñá: “Ki̱vi̱ Domingo káʼvii̱ Tutu Ña̱ Nátúʼun xíʼinyó ña̱ kaʼviyó inka semana. Lunes xíʼin martes káʼvii̱ xa̱ʼa̱ reunión ña̱ koo ma̱ʼñú semana. Ta ki̱vi̱ ña̱ kíndo̱oka nu̱úi̱ káʼvii̱ xa̱ʼa̱ iin ña̱ nda̱kaxii̱n ña̱ kúni̱kai̱ sakúaʼi̱ xa̱ʼa̱”. Xa̱ʼa̱ ña̱ ndáka̱xin ñá Susan hora ña̱ kaʼviñá va̱ʼaní chíndeétáʼanña xíʼinñá ña̱ kandíxakañá Jehová. Iin ña̱ chíndeétáʼanní xíʼin ñá Irene ñá xa̱a̱ ku̱a̱ʼání ku̱i̱ya̱ ndíkaa̱ central mundial ña̱ kandíxakañá Jehová kúú ña̱ káʼviñá xa̱ʼa̱ profecía. Ñáyóʼo káchiñá: “Ndákanda̱ní-inii̱ tá xítoi̱ ña̱ va̱ʼaní xínu ndiʼi profecíae ña̱ káʼa̱n Jehová”.
NÁ VA̱ÁSA KAKA-INIYÓ CHI ÑA̱ XI̱NU KÚÚVAÑA
16. ¿Nda̱chun va̱ʼa kúnda̱a̱-iniyó ña̱ ni̱ka̱ʼa̱n Jehová xíʼin ta̱ Habacuc kivitu chindeétáʼanña xíʼin miíyó tiempo vitin? (Hebreos 10:36, 37).
16 Sava na̱ ndásakáʼnu Jehová xa̱a̱ ku̱a̱ʼání ku̱i̱ya̱ ndátuna ña̱ kixaa̱ ki̱vi̱ ña̱ ndiʼi-xa̱ʼa̱ ñuyǐví yóʼo. Savana ndákanixi̱nína ña̱ xa̱a̱ xi̱niñúʼu ndiʼi-xa̱ʼa̱vaña. Jehová kúnda̱a̱va-inira xíʼin ña̱ ndóʼo na̱ ndásakáʼnu miíra. Ta ña̱yóʼo ni̱ka̱ʼa̱nra xíʼin ta̱ profeta Habacuc: “Saáchi kúma̱níva kixaa̱ ki̱vi̱ ña̱ xi̱nu ña̱yóʼo, ta xa̱a̱ ku̱nu̱míní xi̱nu tu̱ʼun yóʼo, ta ña̱ kixa̱a̱ kúúvaña. Ni ná kukuachi̱ña, koo tu̱ʼvaníún kundatúnña, saáchi xi̱nuvaña. Va̱ása kukuachi̱ña” (Hab. 2:3). ¿Á nda̱saa xíʼin ta̱ Habacuc ni̱ka̱ʼa̱n Jehová tu̱ʼun yóʼo? ¿Á chíndeétáʼantuña xíʼin miíyó nda̱a̱ tiempo vitin? Jehová xi̱niñúʼura ta̱ apóstol Pablo ña̱ va̱ʼa ka̱ʼa̱nra xíʼin na̱ cristiano ña̱ ná kundoo tu̱ʼvanína nani ndátuna ná kixaa̱ ñuyǐví xa̱á (kaʼvi Hebreos 10:36, 37). Ni túviyó ña̱ kúáchi̱ní Jehová, ná ndakaʼányó chi ña̱ xi̱nu kúúva ña̱ kúni̱ra keʼéra ta va̱ása kuachi̱ra.
17. ¿Ndáa ki̱ʼva xi̱ndiku̱n iin ñá hermana consejo ña̱ ta̱xi Jehová ndaʼa̱ ta̱ Habacuc?
17 Ku̱a̱ʼání na̱ hermano va̱ʼaní ndíku̱nna consejo Jehová, saáchi íyo tu̱ʼvana ni xa̱a̱ ku̱a̱ʼání ku̱i̱ya̱ ndátuna. Ná kotoyó ña̱ kéʼé iin ñá hermana ñá naní Louise, ñáyóʼo ki̱xáʼañá ndásakáʼnuñá Jehová nda̱a̱ tá ku̱i̱ya̱ 1939. Ñáyóʼo káchiñá: “Va̱ása níndakanixi̱níi̱ ña̱ xa̱i̱ kuumiíi̱ 18 ku̱i̱ya̱i̱ ti̱xin ñuyǐví yóʼo, chi nda̱kanixi̱níi̱ ña̱ ya̱chi̱kava kixaa̱ ña̱ Armagedón, soo va̱ása níkixaa̱víña. Ta ña̱ chi̱ndeétáʼan xíʼi̱n ña̱ kundatui̱ kúú ña̱ ka̱ʼvii̱ xa̱ʼa̱ na̱ kúeení ni̱xi̱yo ini. Tá kúú, ta̱ Noé, ta̱ Abrahán, ta̱ José xíʼin inkaka na̱ xi̱ndasakáʼnu Jehová, va̱ʼaní xi̱ndatuna ña̱ saxínu Jehová ña̱ ni̱ka̱ʼa̱nra. Ña̱ kándíxai̱ ña̱ xi̱nu ña̱ káʼa̱n Ndióxi̱ keʼéra, va̱ʼaní chíndeétáʼanña xíʼi̱n ta saátu chíndeétáʼanña xíʼin inka na̱ hermano ña̱ va̱ása nandósóna ña̱ xa̱a̱ ku̱nu̱míní kixaa̱ ñuyǐví xa̱á”. Sana nda̱a̱ táki̱ʼva ndákanixi̱ní ñá hermana yóʼo saátu ndákanixi̱ní na̱ hermano na̱ xa̱a̱ ku̱a̱ʼání ku̱i̱ya̱ ndásakáʼnu Jehová.
18. ¿Ndáa ki̱ʼva chíndeétáʼan ña̱ʼa ña̱ i̱xava̱ʼa Jehová xíʼinyó ña̱ kandíxayó ña̱ taxivara ñuyǐví xa̱á kundooyó?
18 Ña̱ nda̱a̱ kúúña ta̱ʼán kixaa̱ví ñuyǐví xa̱á, soo kixaa̱vaña. Nda̱a̱ táki̱ʼva ku̱u xíʼin ki̱mi, yitu̱n, kití xíʼin na̱ yiví. Chi ni̱xi̱yo iin tiempo ña̱ kǒo nda̱a̱ ni iin ña̱yóʼo níxi̱yo, soo vitin íyovaña chi Jehová kúú ta̱ i̱xava̱ʼa ndiʼiña (Gén. 1:1, 26, 27). Ta kǒo nda̱a̱ ni iin na̱ yiví kivi ka̱ʼa̱n ña̱ kǒoña íyo chi xítovayó íyoña. Ta ki̱ʼva saá keʼé Jehová xíʼin ñuyǐví xa̱á, káʼa̱nra taxiraña ndaʼa̱yó ta saxínuvaraña. Ndiʼi tiempo kundooyó nu̱ú ña̱yóʼo ta va̱ása kuumiíkayó kue̱ʼe̱. Tá ná kixaa̱ tiempo ña̱ taxi Jehová ñuyǐví xa̱á kundooyó, kuni nu̱úyó ña̱yóʼo nda̱a̱ táki̱ʼva xítoyó ndiʼi ña̱ʼa ña̱ íyo tiempo vitin (Is. 65:17; Apoc. 21:3, 4).
19. ¿Ndáaña kivi keʼéyó ña̱ va̱ʼa kandíxakayó ña̱ káʼa̱n Jehová keʼéra?
19 Nani ndátuyó ná kixaa̱ ñuyǐví xa̱á, ná chika̱a̱níyó ndee̱ ña̱ kandíxaníyó ña̱ xi̱nu ña̱ káʼa̱n Jehová keʼéra. Ná ndakanixi̱níyó xa̱ʼa̱ ña̱ ta̱xi Jehová se̱ʼera ni̱xi̱ʼi̱ra xa̱ʼa̱yó, ná ndakanixi̱níyó xa̱ʼa̱ ndee̱ ña̱ kúúmií Jehová ta ná ndakundeéyó kachíñuyó nu̱úra. Tá saá ná keʼéyó, ndakiʼinyó ña̱ ni̱ka̱ʼa̱nra taxira ndaʼa̱yó xa̱ʼa̱ ña̱ kándíxaníyóra ta kúee íyo iniyó (Heb. 6:11, 12; Rom. 5:5).
YAA 139 ¿Á koún ñuyǐví xa̱á?
a Tiempo vitin ku̱a̱ʼání na̱ yiví va̱ása kándíxana ña̱ káʼa̱n Jehová taxira iin ñuyǐví xa̱á kundooyó. Ndákanixi̱nína ña̱ iin cuento kuitíva kúúña. Soo miíyó kándíxaníyó ña̱ xi̱nuva ndiʼi ña̱ káʼa̱n Jehová keʼéra. Soo xíniñúʼu ndakundeéyó sakúaʼayó xa̱ʼa̱ Jehová ña̱ va̱ʼa kandíxayó ña̱ saxínura ña̱ káʼa̱nra keʼéra. Nu̱ú artículo yóʼo kotoyó ndáa ki̱ʼva keʼéyóña.
b Josué 23:14: “Kotondó, saáchi xa̱a̱ ku̱nu̱mí kuvii̱, ta ndóʼó xíni̱ va̱ʼandó ña̱ ndiʼi tu̱ʼun va̱ʼa ña̱ ni̱ka̱ʼa̱n Jehová xa̱a̱ ni̱xi̱nuvaña. Ndiʼi ña̱ ni̱ka̱ʼa̱nra keʼéra xa̱ʼa̱ndó, xa̱a̱ ni̱xi̱nuvaña. Ta nda̱a̱ táki̱ʼva íyo ña̱ ni̱ka̱ʼa̱nra keʼéra xa̱ʼa̱ndó saá íyo ña̱ ke̱ʼévara. Kǒo nda̱a̱ ni iinña níkuma̱ní”.
c Isaías 55:10, 11: “Saáchi, nda̱a̱ táki̱ʼva kúun sa̱vi̱ xíʼin ña̱ kóyo nieve ta kǒo ndándikóña chí ndiví nda̱a̱ ná sákutuña nu̱ú ñuʼú xíʼin ndiʼi ña̱ʼa ña̱ kána nu̱úña, ta taxiña ña̱ kuxu na̱ yiví xíʼin si̱ʼva ndaʼa̱ na̱ chíʼi, 11 saá koo tu̱ʼun ña̱ xa̱a̱ ni̱ka̱ʼi̱n. Ña̱ xi̱nu nu̱ú kúuvaña; ta kooña nda̱a̱ táki̱ʼva kúni̱ miíi̱, ta ndiʼi ña̱yóʼo va̱ʼaní xi̱nu nu̱úña”.
d Na̱sama ki̱vi̱ñá.
e Nu̱ú ña̱ Índice de las publicaciones Watch Tower, kivi ki̱ʼviún nu̱ú káʼa̱nña “Profecía”, ta ti̱xin ña̱yóʼo kivi ndani̱ʼún ku̱a̱ʼáníka artículo ña̱ káʼa̱n xa̱ʼa̱ profecía ña̱ va̱xi nu̱ú Biblia. Tá kúú ña̱ naní “Lo que Jehová predice se cumple sin falta”, ña̱ va̱xi nu̱ú tutu La Atalaya 1 tí enero ña̱ ku̱i̱ya̱ 2008.