¿Á xa̱a̱ xíniún xa̱ʼa̱ ña̱yóʼo?

¿Ndáa carreta kúú tú ku̱a̱ʼa̱n ta̱ eunuco etíope tá nda̱kutáʼan ta̱ Felipe xíʼinra?

ÑA̱ TU̱ʼUN griego ña̱ xi̱niñúʼuna ña̱ sa̱ndáya̱ʼana ña̱ tu̱ʼun “carro” nu̱ú Traducción del Nuevo Mundo xíniñúʼunaña ña̱ ka̱ʼa̱nna xa̱ʼa̱ ku̱a̱ʼání nu̱ú tú carreta (Hech. 8:​28, 29, 38). Sananí carreta tú ku̱a̱ʼa̱n ta̱ etíope su̱ví tú níxi̱xiniñúʼuna tá xi̱xa̱ʼa̱nna nu̱ú ku̱a̱chi níxi̱yonú, ta ni su̱ví tú níxi̱xiniñúʼuna tá xi̱xiyo carrera níxi̱yonú saáchi iin carreta tú chéekava ni̱xi̱yonú. Ná ka̱ʼa̱nyó xa̱ʼa̱ sava ña̱ʼa ña̱ chindeétáʼan xíʼinyó kunda̱a̱-iniyó xíʼin ña̱yóʼo.

Iin chiñu káʼnu xi̱kuumií ta̱ etíope ta kániní ni̱xa̱ʼa̱nra. Ta̱ etíope xi̱kuumiíra “iin chiñu káʼnu nu̱ú ñá Candace, ñá reina ñuu Etiopía, ta xi̱kiʼinra kuenta xíʼin ndiʼi xu̱ʼún ñáyóʼo” (Hech. 8:27). Ñuu Etiopía xi̱kindo̱oña nu̱ú ndíka̱a̱ ñuu Sudán tiempo vitin ta saátu nu̱ú ndíka̱a̱ táʼví sur ña̱ Egipto. Sana na̱samava carruaje tú xi̱xa̱ʼa̱n ta̱ etíope yóʼo, ta sana ku̱a̱ʼáníva ña̱ʼa xi̱niʼira ni̱xa̱ʼa̱n xíʼinra chi káni̱níva ni̱xa̱ʼa̱nra. Tá siglo nu̱ú, xa̱a̱ síín síín carreta xi̱xiniñúʼuna ña̱ va̱ʼa ku̱ʼu̱n na̱ yiví, iin túyóʼo xi̱kuu carreta tú xi̱kuumií cuatro rueda ta xi̱ndasi sa̱tánú. Iin tutu ña̱ káʼa̱n xa̱ʼa̱ Biblia káchiña: “Ku̱a̱ʼáka ña̱ʼa xi̱kivi kundiso tú carreta yóʼo ta va̱ʼaka xi̱kuni̱ na̱ yiví tá xi̱xa̱ʼa̱nna xíʼinnú ta káni̱ka xi̱xaʼa̱nnú” (Acts—An Exegetical Commentary).

Ta̱ káʼvi kúú ta̱ etíope tá ku̱yatin ta̱ Felipe nu̱úra. Biblia káchiña: “Ta̱ Felipe xi̱nura ta ku̱yatinra ta xi̱niso̱ʼora ña̱ ndeéní káʼvira libro ta̱ profeta Isaías” (Hech. 8:30). Carruaje tú xi̱xika na̱ yiví xíʼin tá ya̱chi̱ kúeeva xi̱xikanú, ña̱kán va̱ʼa káʼvi ta̱ etíope ku̱a̱ʼa̱nra ta va̱ʼa xi̱nu ta̱ Felipe ni̱xa̱a̱ra nu̱úra.

Ta̱ etíope “ni̱ka̱ʼa̱n ndáʼvira xíʼin ta̱ Felipe ña̱ ndaara koora xíʼinra” (Hech. 8:31). Na̱ xi̱xiniñúʼu carreta tú carrera na̱ xi̱xa̱ʼa̱n xáʼá kúúna xíʼin túyóʼo, soo carreta tú xi̱xika na̱ yiví ndíka̱va xi̱xiyo ininú ña̱kán va̱ʼa ni̱xa̱ʼa̱n ta̱ Felipe xíʼin ta̱ eunuco.

Kǒo sánanakayó ta̱ etíope nu̱ú tutu ña̱ kúúmiíyó ña̱ kánuura sa̱tá iin carreta tú xi̱xa̱ʼa̱n nu̱ú ku̱a̱chi á tú xi̱xiniñúʼuna tá xi̱keʼéna carrera saáchi vitin iin carreta tú chéeka sánanayó xíʼinra. Ta ke̱ʼéyó ña̱yóʼo chi saá káʼa̱n Hechos capítulo 8 xíʼin inkaka ña̱ nda̱ni̱ʼíyó ku̱u xi̱naʼá.