Ná chindeétáʼanyó xíʼin na̱ káʼviyó xíʼin ña̱ xa̱a̱na ndasakáʼnuna Jehová

1, 2. a) ¿Nda̱chun xíka-ini savana ña̱ xa̱a̱na koona testigo Jehová? b) ¿Ndáaña sakúaʼayó nu̱ú artículo yóʼo?

TÁ NDA̱KAXIÚN ña̱ xa̱ún koún testigo Jehová, ¿á ni̱xi̱yo sava ña̱ ni̱xi̱ka-iniún xa̱ʼa̱? Sana xi̱yi̱ʼviún ndáaña ka̱ʼa̱n na̱ xi̱kachíñún xíʼin, na̱ migoún á na̱ veʼún xa̱ʼa̱ ña̱ nda̱kaxiún keʼún yóʼo á sana nda̱kanixi̱níún ña̱ va̱ása kuchiñún keʼún ña̱ káʼa̱n Ndióxi̱ xíʼún. Tá saá ndóʼún, sana kúnda̱a̱va-iniún xíʼin na̱ sa̱kán kíxáʼa káʼvi Biblia chi íxayo̱ʼvi̱ña xíʼinna ña̱ xa̱a̱na koona testigo Jehová.

² Ta̱ Jesús xi̱kunda̱a̱-inira xa̱ʼa̱ ña̱ xi̱yiʼví na̱ yiví xi̱sasiña nu̱úna ña̱ xa̱a̱na ndasakáʼnuna Jehová (Mat. 13:​20-22). Soo kǒo nísandákoondaʼa̱ra na̱ xi̱xika-ini ña̱ xa̱a̱na kundiku̱nnara. Tá ná keʼéyó nda̱a̱ táki̱ʼva ke̱ʼéra kivi chindeétáʼanyó xíʼin na̱ káʼviyó xíʼin. Ña̱ nu̱ú ná kotoyó ndáaña kúú ña̱ sási nu̱úna ña̱ xa̱a̱na ndasakáʼnuna Ndióxi̱. Ña̱ u̱vi̱ ná kuʼvi̱-inina kunina Jehová. Ña̱ u̱ni̱ ná nasamana ña̱ kéʼéna. Ta̱ ña̱ ku̱mí ná kundeé-inina ya̱ʼana nu̱ú tu̱ndóʼo. ¿Ndáa ki̱ʼva kundiku̱nyó yichi̱ ta̱ Jesús ta kuniñúʼuyó libro ña̱ naní Kivi koo si̱íún vitin ta saátu chí nu̱únínu ña̱ chindeétáʼanyó xíʼin na̱ káʼviyó xíʼin ña̱ xa̱a̱na koona testigo Jehová?

CHINDEÉTÁʼAN XÍʼINNA ÑA̱ KUNDA̱A̱-ININA NDÁAÑA SÁSI NU̱ÚNA

3. ¿Ndáaña xi̱ i̱xayo̱ʼvi̱ xíʼin ta̱ Nicodemo ña̱ xa̱a̱ra koora discípulo ta̱ Jesús?

³ Ta̱ Nicodemo kúú ta̱ xi̱niʼi yichi̱ nu̱ú na̱ judío, ta̱yóʼo ni̱xi̱yo iin ña̱ xi̱sasi nu̱úra ña̱ va̱ʼa xa̱a̱ra koora discípulo ta̱ Jesús. Sa̱kán i̱ñu̱ yo̱o̱ ki̱xáʼa ta̱ Jesús nátúʼunra xíʼin na̱ yiví, ta ta̱ Nicodemo nda̱kunira ta̱ Jesús kúú ta̱ Mesías (Juan 3:​1, 2). Soo ni saá xi̱ka̱ʼa̱n se̱ʼévara xíʼin ta̱ Jesús xa̱ʼa̱ ña̱ xi̱yiʼvíra xi̱xinira na̱ judío (Juan 7:13; 12:42). Sana nda̱kanixi̱níra ndáaña kundoʼora tá ná xa̱a̱ra koora discípulora.a

4. ¿Ndáa ki̱ʼva chi̱ndeétáʼan ta̱ Jesús xíʼi ta̱ Nicodemo ña̱ kunda̱a̱-inira ndáaña kúni̱ Ndióxi̱?

⁴ Ta̱ Nicodemo xi̱kunda̱a̱-inira xíʼin ña̱ xi̱kaʼa̱n ley ña̱ ta̱xi Ndióxi̱, soo xi̱xiniñúʼura ña̱ chindeétáʼan iinna xíʼinra ña̱ kunda̱a̱-inira ndáaña kúú ña̱ kúni̱ Jehová ná xa̱a̱ra keʼéra. ¿Ndáa ki̱ʼva chi̱ndeétáʼan ta̱ Jesús xíʼinra? Ta̱vára tiempo ña̱ chi̱ndeétáʼanra xíʼinra, nda̱a̱ tá ñuú ni̱xi̱yo tu̱ʼvara ña̱ na̱túʼunra xíʼinra. Káxiní ni̱ka̱ʼa̱nra xíʼinra ndáaña xi̱niñúʼu keʼéra ña̱ va̱ʼa xa̱a̱ra koora discípulora, xi̱niñúʼu ndikó-inira xa̱ʼa̱ ku̱a̱chi ña̱ ni̱ki̱ʼvira, xa̱a̱ra ndakuchira ta saátu na̱ʼa̱ra ña̱ kándíxara se̱ʼe Ndióxi̱ (Juan 3:​5, 14-21).

5. ¿Ndáaña kivi keʼéyó ña̱ va̱ʼa chindeétáʼanyó xíʼin na̱ káʼviyó xíʼin ña̱ ndakunina ndáaña sási nu̱úna?

⁵ Sana iin na̱ káʼvi xíʼinyó xíni̱va̱ʼavana ña̱ káʼa̱n Biblia, soo xíniñúʼuna ña̱ chindeétáʼan iinna xíʼina ña̱ ndakunina ndáaña kúú ña̱ sási nu̱úna ña̱ xa̱a̱na ndasakáʼnuna Jehová. Sana ku̱a̱ʼání tiempo káchíñuna á sana iin na̱ veʼena sási nu̱úna ña̱ va̱ása xa̱a̱na koona testigo. ¿Ndáa ki̱ʼva kundiku̱ún yichi̱ ta̱ Jesús? Tavá tiempo ña̱ chindeétáʼún xíʼinna, tá kúú ña̱ kanaúnna ña̱ koʼona café xíʼún á ña̱ ku̱ʼu̱nndó iin lugar. Ña̱yóʼo kivi chindeétáʼan xíʼinna ña̱ ka̱ʼa̱nna xa̱ʼa̱ ña̱ íxayo̱ʼvi̱ xíʼinna. Saá kivi chindeétáʼún xíʼinna ña̱ nasamana ña̱ kéʼéna, tá ná ka̱ʼún xíʼinna xa̱ʼa̱ ña̱yóʼo saá kivi na̱ʼa̱na ña̱ kúʼvi̱-inina xínina Jehová ta su̱ví ña̱ sákusi̱ína-ini miíún.

6. ¿Ndáa ki̱ʼva chindeétáʼún xíʼin na̱ káʼviún xíʼin ña̱ va̱ʼa xa̱a̱na keʼéna ña̱ sákuaʼana? (1 Corintios 16:13).

⁶ Na̱ va̱ʼa xa̱a̱ iin na̱ káʼviyó xíʼin keʼéna ña̱ sákuaʼana, xíniñúʼu xa̱a̱na kandíxana Jehová chi ta̱yóʼo chindeétáʼan xíʼinna ña̱ xa̱a̱na keʼéna ña̱ kúnira (kaʼvi 1 Corintios 16:13). ¿Ndáa ki̱ʼva chindeétáʼún xíʼinna? Ndakanixi̱ní tá xi̱xaʼún escuela. ¿Ndáa na̱ maestro kúú na̱ xi̱kutóokaún sánáʼa̱ yóʼó? Sana na̱ xi̱chindeétáʼan xíʼún ta va̱ása kue̱ʼe̱ níxi̱yona. Keʼé nda̱a̱ táki̱ʼva xi̱keʼé na̱kán, va̱ása sanáʼa̱ kuitíúnna ndáaña kúú ña̱ kúni̱ Ndióxi̱ ná keʼéna. Ka̱ʼa̱n xíʼinna chi mií Jehová kúú ta̱ chindeétáʼan xíʼinna ña̱ nasamana ña̱ kéʼéna. ¿Ndáaña kivi keʼún ña̱ va̱ʼa chindeétáʼún xíʼin na̱ káʼviún xíʼin?

CHINDEÉTÁʼAN XÍʼINNA ÑA̱ KUʼVI̱KA-ININA KUNINA JEHOVÁ

7. ¿Ndáa ki̱ʼva chi̱ndeétáʼan ta̱ Jesús xíʼin na̱ yiví na̱ xi̱xiniso̱ʼo miíra ña̱ kuʼvi̱ka-inina kunina Jehová?

⁷ Ta̱ Jesús xi̱kunda̱a̱-inira tá xi̱kuʼvi̱-ini na̱ discípulora xi̱xinina Ndióxi̱ va̱ása ixayo̱ʼvi̱ña xíʼinna ña̱ keʼéna ña̱ sákuaʼana. Xa̱ʼa̱ ña̱kán xi̱sanáʼa̱ra miína ña̱ kivi chindeé miína ña̱ kuʼvi̱ka-inina kunina Jehová. Tá kúú, ni̱ka̱ʼa̱nra Jehová íyora nda̱a̱ táki̱ʼva íyo iin ta̱a ta táxi ndiʼi ña̱ʼa nda̱ʼa se̱ʼera (Mat. 7:​9-11). Sava na̱ yiví na̱ xi̱xiniso̱ʼo ta̱ Jesús va̱ása níxikuni̱ na̱ yivána miína. Ña̱kán, ndakanixi̱ní ndáa ki̱ʼva ndo̱ʼona tá ni̱ka̱ʼa̱nra xíʼinna xa̱ʼa̱ ejemplo ña̱ iin ta̱a va̱ʼaní nda̱kiʼinra se̱ʼera xa̱ʼa̱ ña̱ ndikóra nu̱úra ni ke̱ʼéra ku̱a̱ʼání ña̱ va̱ása va̱ʼa. Saá ku̱ndaa̱-inina ña̱ kúʼvi̱ní-ini Jehová xínira na̱ yiví (Luc. 15:​20-24).

8. ¿Ndáa ki̱ʼva chindeétáʼún xíʼin na̱ káʼviún xíʼin ña̱ kuʼvi̱ka-inina kunina Jehová?

⁸ Saátu kivi chindeétáʼún xíʼin na̱ káʼviún xíʼin ña̱ kuʼvi̱ka-inina kunina Jehová tá káʼún xíʼinna xa̱ʼa̱ ña̱ va̱ʼa ña̱ kúúmiíra. Ndiʼi yichi̱ ña̱ káʼvindó na̱ʼa̱ nu̱úna ndáa ki̱ʼva kítáʼan ña̱ sákuaʼana xíʼin ña̱ kúʼvi̱-ini Jehová xínira miíyó. Tá ná ka̱ʼa̱nndó xa̱ʼa̱ ña̱ ni̱xi̱ʼi̱ ta̱ Jesús chindeétáʼan xíʼinna ña̱ kotona ña̱ iin regalo kúú ña̱yóʼo ña̱ ta̱xi Ndióxi̱ ndaʼa̱na (Rom. 5:8; 1 Juan 4:10). Tá iin na̱ káʼviún xíʼin kúnda̱a̱-inina ña̱ kúʼvi̱ní-ini Ndióxi̱ xínira miína ña̱yóʼo chindeétáʼan xíʼinna ña̱ kuʼvi̱ka-inina kunina Jehová (Gál. 2:20).

9. ¿Ndáaña chi̱ndeétáʼan xíʼin ta̱ Michael ña̱ na̱samara ña̱ xi̱keʼéra?

⁹ Ná kotoyó ña̱ ndo̱ʼo ta̱ Michael ta̱ ñuu Indonesia. Nani tá loʼovíra ku̱ndaa̱-inira xa̱ʼa̱ ña̱ nda̱a̱ soo kǒo níndakuchira. Tá xi̱kuumiíra 18 ku̱i̱ya̱ ku̱a̱ʼa̱nra inka ñuu ña̱ va̱ʼa kachíñura xíʼin tú camión. Tá ni̱ya̱ʼa ku̱i̱ya̱ ndi̱kóra ñuu Indonesia, ti̱ndaʼa̱ra ta ka̱ku iin ñá loʼo se̱ʼera, ta kachíñukavara inka ñuu ta xíka ni̱xi̱yora nu̱ú na̱ veʼera. Ta tá ni̱ya̱ʼa tiempo ñá síʼira xíʼin se̱ʼera ki̱xáʼana káʼvina Biblia ta nasamana ña̱ xi̱keʼéna. Tá ni̱xi̱ʼi̱ siʼí ta̱ Michael ndi̱kóra veʼera ña̱ va̱ʼa kundaara yivára ta ki̱xáʼara káʼvira Biblia. Tá ki̱xáʼara káʼvira lección 27 nu̱ú libro ña̱ naní, Kivi koo si̱íún vitin ta saátu chí nu̱únínu nu̱ú táʼví ña̱ naní “Ná sakuaʼakayó xa̱ʼa̱ña”, ña̱yóʼo ni̱xa̱a̱ña nda̱a̱ níma̱ra. Ki̱xáʼara xákura tá nda̱kanixi̱níra xa̱ʼa̱ ña̱ ku̱suchíní-ini Jehová tá ki̱ʼinra kuenta ña̱ ni̱xo̱ʼvi̱ní se̱ʼera. Ña̱ ni̱xi̱ʼi̱ ta̱ Jesús chi̱ndeétáʼanña xíʼinra ta ni̱xa̱a̱ra nda̱kuchira.

CHINDEÉTÁʼAN XÍʼIN NA̱ KÁʼVIÚN XÍʼIN ÑA̱ SIʼNAKA CHIÑU NDIÓXI̱ NÁ KEʼÉNA

10. ¿Ndáa ki̱ʼva chi̱ndeétáʼan ta̱ Jesús xíʼin na̱ discípulora ña̱ siʼnaka chiñu Ndióxi̱ kundi̱ʼi-inina xa̱ʼa̱? (Lucas 5:​5-11; koto na̱ʼná).

¹⁰ Na̱ discípulo ta̱ Jesús kama ki̱ʼinna kuenta ña̱ ta̱yóʼo kúú ta̱ Mesías ta̱ nda̱kaxin Ndióxi̱, soo xi̱xiniñúʼu chindeétáʼanna xíʼinna ña̱ kunda̱a̱-inina ña̱ natúʼunna xa̱ʼa̱ Ndióxi̱ kúú ña̱ ndáyáʼvika. Ta̱ Pedro xíʼin ta̱ Andrés xa̱a̱ ku̱a̱ʼáva tiempo xi̱kuuna discípulo ta̱ Jesús tá ni̱ka̱ʼa̱nra xíʼinna ña̱ sandákoona ndiʼi ña̱ xi̱kuumiína ta kundiku̱nnara (Mat. 4:​18, 19). Inkáchi chiñu xi̱keʼéna xíʼin ta̱ Santiago ta saátu xíʼin ta̱ Juan ña̱ xi̱tiinna ti̱a̱ká ta va̱ʼaní xi̱xi̱kóna (Mar. 1:​16-20). Tá sa̱ndákoo ta̱ Pedro xíʼin ta̱ Andrés chiñu ña̱ xi̱kuumiína sana ndeéníva ka̱chíñuna ña̱ va̱ʼa kǒo ña̱ʼa kuma̱ní nu̱ú na̱ veʼena ta saá kundiku̱nna ta̱ Jesús. ¿Ndáaña chi̱ndeétáʼan xíʼinna ña̱ siʼna chiñu Ndióxi̱ ni̱ndi̱ʼi-inina xa̱ʼa̱? Ña̱ ka̱ʼyí ta̱ Lucas káʼa̱nña, milagro ña̱ ke̱ʼé ta̱ Jesús chi̱ndeétáʼan xíʼinna ña̱ kandíxakana ña̱ mií Jehová taxi ña̱ xíniñúʼuna (kaʼvi Lucas 5:​5-11).

11. ¿Ndáaña kivi keʼéyó ña̱ va̱ʼa chindeétáʼanyó xíʼin na̱ káʼviyó xíʼin ña̱ kandíxakana Ndióxi̱?

¹¹ Miíyó va̱ása kivi keʼéyó milagro nda̱a̱ táki̱ʼva ke̱ʼé ta̱ Jesús soo kiviva ka̱ʼa̱nyó xíʼin na̱ káʼviyó xíʼin ña̱ chíndeétáʼanva Jehová xíʼin na̱ kúni̱ keʼé siʼna chiñura. Tá kúú, ¿á ndákaʼún ndáa ki̱ʼva chi̱ndeétáʼan Jehová xíʼún tá ki̱xáʼún xáʼún reunión? Sana siʼna ni̱ka̱ʼún xíʼin na̱ káchíñún nu̱ú ña̱ va̱ása ku̱a̱ʼáka hora kachíñún saáchi ña̱yóʼo xi̱sasiña nu̱ún ña̱ ku̱ʼún reunión. Ka̱ʼa̱n xíʼin na̱ káʼviún xíʼin ña̱ tá ki̱xáʼún kéʼún ña̱yóʼo ki̱ʼún kuenta ña̱ chi̱ndeétáʼanva Ndióxi̱ xíʼún ta ndu̱ndakúka ña̱ kándíxaúnra.

12. a) ¿Nda̱chun iin ña̱ va̱ʼa kúú ña̱ ka̱ʼún xíʼin inka na̱ hermano ña̱ ku̱ʼu̱nna xíʼún ña̱ kaʼvindó xíʼin na̱ káʼviún xíʼin? b) ¿Ndáakaña kivi keʼún ña̱ va̱ʼa chindeétáʼún xíʼinna ña̱ siʼnaka chiñu Jehová kundi̱ʼi-inina xa̱ʼa̱? (Ka̱ʼa̱n xa̱ʼa̱ iin ejemplo).

¹² Tá ná kunda̱a̱-ini na̱ káʼviyó xíʼin xa̱ʼa̱ ndáaña ke̱ʼé inka na̱ hermano ña̱ siʼnaka chiñu Jehová ki̱xáʼana kéʼéna ña̱yóʼo chindeétáʼannívaña xíʼina. Kivi ka̱ʼún xíʼin xa̱a̱ síín síín na̱ hermano ña̱ ná ku̱ʼu̱nna xíʼún kaʼvina xíʼinna. Ka̱ʼa̱n xíʼinna ndáa ki̱ʼva ni̱xa̱a̱na ku̱ndaa̱-inina xa̱ʼa̱ ña̱ nda̱a̱ ta ndáaña ke̱ʼéna ña̱ siʼnaka chiñu Ndióxi̱ ni̱ndi̱ʼi-inina xa̱ʼa̱. Ta saátu kivi tavaún tiempo ña̱ kotoún video xíʼin na̱yóʼo ña̱ va̱xi nu̱ú libro ña̱ naní, Kivi koo si̱íún vitin ta saátu chí nu̱únínu nu̱ú táʼví ña̱ naní “Ná sakuaʼakayó xa̱ʼa̱ña” xíʼin nu̱ú táʼví ña̱ naní “Nandukúka xa̱ʼa̱ña”. Tá ná xa̱a̱ndó lección 37 kivi ka̱ʼún xíʼinna xa̱ʼa̱ texto ña̱ va̱xi nu̱ú video ña̱ naní Jehová taxira ña̱ xíniñúʼuyó.

CHINDEÉTÁʼAN XÍʼINNA ÑA̱ YA̱ʼANA NU̱Ú TU̱NDÓʼO

13. ¿Ndáa ki̱ʼva chi̱ndeétáʼan ta̱ Jesús xíʼin na̱ discípulora ña̱ ya̱ʼana nu̱ú tu̱ndóʼo?

¹³ Ku̱a̱ʼá yichi̱ ni̱ka̱ʼa̱n ta̱ Jesús xíʼin na̱ discípulora ña̱ ya̱ʼana nu̱ú ku̱a̱ʼá tu̱ndóʼo ta nda̱a̱ na̱ veʼena ixandi̱va̱ʼa xíʼinna (Mat. 5:11; 10:​22, 36). Tá kúma̱níka kuvi ta̱ Jesús ni̱ka̱ʼa̱nra xíʼinna ña̱ nda̱a̱ kivi kuvina xa̱ʼa̱ ña̱yóʼo (Mat. 24:9; Juan 15:20; 16:2). Ña̱ va̱ʼa ndakundeéna natúʼunna xa̱ʼa̱ tu̱ʼun Ndióxi̱ ni̱ka̱ʼa̱nra xíʼinna ña̱ ná kiʼinnína kuenta ta va̱ása kanitáʼanna xíʼin na̱ saá-ini xíni miína.

14. ¿Ndáaña kivi keʼéyó ña̱ va̱ʼa chindeétáʼanyó xíʼin na̱ káʼviyó xíʼin tá ná ya̱ʼana nu̱ú tu̱ndóʼo? (2 Timoteo 3:12).

¹⁴ Nda̱a̱ táki̱ʼva ke̱ʼe ta̱ Jesús saá kivi keʼé miíyó, ná sanáʼa̱ viíyó na̱ káʼviyó xíʼin tá ná ya̱ʼana nu̱ú nda̱a̱ ndáaka tu̱ndóʼo. Tá kúú ndáaña kivi keʼé na̱ káchíñu xíʼinna, na̱ migona á na̱ veʼena xíʼinna (kaʼvi 2 Timoteo 3:12). Sava na̱ káchíñu xíʼinna kivi kusi̱kindaana miína xa̱ʼa̱ ña̱ síín íyo ña̱ kéʼéna ta saátu nda̱a̱ na̱ veʼena kivi ka̱ʼa̱nna ña̱ va̱ása va̱ʼa xa̱ʼa̱na xa̱ʼa̱ ña̱ kándíxana ña̱ va̱xi nu̱ú Biblia. Xa̱a̱ ya̱chi̱ka xíniñúʼu ka̱ʼún xíʼin na̱ káʼviún xíʼin xa̱ʼa̱ ña̱yóʼo, ña̱kán tá na̱ kixi tu̱ndóʼo nu̱úna sana xa̱a̱ koo tu̱ʼvavana ta kunda̱a̱-inina ndáaña keʼéna á ndáa ña̱ ka̱ʼa̱nna.

15. Tá iin na̱ veʼe na̱ káʼviyó xíʼin íyona contrana, ¿ndáaña keʼéyó ña̱ va̱ʼa chindeétáʼanyó xíʼinna?

¹⁵ Tá iin na̱ veʼe na̱ káʼviyó xíʼin íyona contrana kivi chika̱ún ndeé xíʼinna ña̱ ndakanixi̱nína ndáa xa̱ʼa̱ kúú ña̱ kéʼéna ña̱yóʼo. ¿Á ndákanixi̱nína ña̱ vatá kúú ña̱ sánáʼa̱ na̱ testigo? ¿Á va̱ása kúni̱na kunina na̱ testigo? Ki̱ʼva saá ndo̱ʼo ta̱ Jesús chí sava na̱ veʼera nda̱kanixi̱nína ña̱ xa̱a̱ ku̱a̱ʼa̱n sánavara (Mar. 3:21; Juan 7:5). Ndáyáʼviní ña̱ sanáʼún na̱ káʼviún xíʼin ña̱ kúee ná koo inina, to̱ʼó ná ka̱ʼa̱nna xíʼin ndiʼina ta saátu xíʼin na̱ veʼena.

16. ¿Ndáa ki̱ʼva chindeéyó na̱ káʼviyó xíʼin ña̱ to̱ʼó ná ka̱ʼa̱nna xa̱ʼa̱ ña̱ kándíxana?

¹⁶ ¿Ndáaña kivi keʼé na̱ káʼviyó xíʼin tá iin na̱ veʼena kúni̱na kunda̱a̱-inina xa̱ʼa̱ ña̱ káʼvina? Va̱ása ndi̱ku̱n ka̱ʼa̱nna xa̱ʼa̱ ndiʼi ña̱ xa̱a̱ xíni̱na chi sana sándiʼina-inina ta sana va̱ása kuni̱kana kunda̱a̱-inina xa̱ʼa̱ ña̱ nda̱a̱. Ka̱ʼa̱n xíʼin na̱ káʼviún xíʼin loʼo ná ka̱ʼa̱nna xíʼinna ta káxi ná kooña ta sana na̱ veʼe na̱yóʼo kuni̱kana ka̱ʼa̱nna xíʼin na̱yóʼo xa̱ʼa̱ Biblia inka yichi̱ (Col. 4:6). Ta saátu kivi ka̱ʼa̱nna xíʼin na̱ veʼena xa̱ʼa̱ sitio ña̱ kúúmiíyó nu̱ú jw.org. Ta saá na̱kán kivi ki̱ʼvina ama kúni̱ miína ta nda̱a̱ kivi nandukúkana ña̱ káʼa̱n xa̱ʼa̱ na̱ testigo Jehová.

17. ¿Ndáaña kivi kuniñúʼún ña̱ va̱ʼa sanáʼún na̱ káʼviún xíʼin ña̱ ndakuiinna pregunta ña̱ kéʼéna xa̱ʼa̱ na̱ testigo Jehová? (Koto na̱ʼná).

¹⁷ Kivi kuniñúʼún jw.org nu̱ú táʼví ña̱ naní “Ña̱ kúni̱ na̱ yiví kunda̱a̱-inina xa̱ʼa̱ na̱ testigo Jehová” ña̱ va̱ʼa sanáʼún na̱ káʼviún xíʼin ña̱ va̱ʼa ndakuiinna sava pregunta ña̱ kivi keʼé na̱ veʼena xíʼinna á na̱ káchíñu xíʼinna (2 Tim. 2:​24, 25). Nu̱ú ndíʼi iin tá iin lección ña̱ libro Kivi koo si̱íún vitin ta saátu chí nu̱únínu va̱xi iin recuadro ña̱ naní “Ña̱ káʼa̱n sava na̱ yiví”. Chindeétáʼan xíʼin na̱ káʼviún xíʼin ña̱ ná ka̱ʼa̱n miína xa̱ʼa̱ ña̱yóʼo. Saátu kivi ka̱ʼún xíʼinna ña̱ vií ná koo ña̱ ka̱ʼa̱nna. Táʼví yóʼo kúú ña̱ chindeétáʼan xíʼinna ña̱ va̱ʼa ka̱ʼa̱nna xa̱ʼa̱ ña̱ kándíxana.

18. ¿Ndáa ki̱ʼva chindeétáʼún xíʼin na̱ káʼviún xíʼin ña̱ keena natúʼunna xíʼin na̱ yiví xíʼin na̱ congregación? (Mateo 10:27).

¹⁸ Ta̱ Jesús ni̱ka̱ʼa̱nra xíʼin na̱ discípulora ña̱ ná ka̱ʼa̱nna xa̱ʼa̱ tu̱ʼun va̱ʼa xíʼin ndiʼi na̱ yiví (kaʼvi Mateo 10:27). Tá na̱ káʼviún xíʼin ndi̱ku̱n kama káʼa̱nna xa̱ʼa̱ ña̱ kándíxana, saá kúú ña̱ kandíxakana Jehová chi kiʼinna kuenta ña̱ chíndeétáʼanvara xíʼinna. ¿Ndáa ki̱ʼva chika̱ún ndee̱ xíʼinna ña̱ keena natúʼunna xíʼin na̱ yiví xíʼin na̱ congregación? Ki̱vi̱ tá xíyo campaña ña̱ predicación kivi ka̱ʼún xíʼinna ndáaña kivi keʼéna ña̱ va̱ʼa koona publicador ta ka̱ʼa̱n xíʼinna ña̱ ki̱vi̱ tá xíyo campaña saá kúúña va̱ása ixayo̱ʼvi̱ña xíʼinna ña̱ keena natúʼunna xíʼin na̱ yiví. Inka ña̱ kivi chindeétáʼan xíʼinna kúú ña̱ ya̱ʼana ti̱xin reunión ña̱ xíyo ma̱ʼñú semana. Saá kúú ña̱ sakúaʼana ña̱ va̱ása yi̱ʼvína ka̱ʼa̱nna xa̱ʼa̱ ña̱ kándíxana.

NA̱ʼA̱ NU̱Ú NA̱ KÁʼVIÚN XÍʼIN ÑA̱ KUCHIÑUVANA

19. ¿Ndáa ki̱ʼva ni̱na̱ʼa̱ ta̱ Jesús ña̱ xi̱ndaa-inira na̱ discípulora ta ndáa ki̱ʼva kundiku̱nyó yichi̱ra?

¹⁹ Tá kúma̱níka kuvi ta̱ Jesús ta ku̱ʼu̱nra chí ndiví ni̱ka̱ʼa̱nra xíʼin na̱ discípulora ña̱ ndikó tukura koora xíʼinna. Kǒo níkunda̱a̱-inina ña̱ koona chí ndiví xíʼin ta̱ Jesús kúú ña̱ ni̱ka̱ʼa̱nra xa̱ʼa̱. Soo ña̱ ki̱ʼinra kuenta xíʼin kúú ña̱ nda̱kú ni̱xi̱yo-inina ta su̱ví xa̱ʼa̱ ña̱ kǒo níkunda̱a̱-inina xíʼin (Juan 14:​1-5, 8). Ta̱ Jesús xi̱kunda̱a̱-inira ña̱ xi̱niñúʼu ya̱ʼa tiempo ña̱ va̱ʼa kunda̱a̱-inina xa̱ʼa̱ sava ña̱ʼa, tá kúú ña̱ ku̱ʼu̱nna chí ndiví (Juan 16:12). Saátu miíyó kivi na̱ʼa̱yó nu̱ú na̱ káʼviyó xíʼin ña̱ ndáava-iniyóna ta saátu ña̱ kúni̱vana ndasakáʼnuna Jehová.

20. ¿Ndáa ki̱ʼva ni̱na̱ʼa̱ ñá Chifundo ña̱ xi̱ndaa-iniñá ñá Alinafe?

²⁰ Ndáyáʼviní ña̱ kundaa-iniyó na̱ káʼviyó xíʼin ña̱ kúni̱vana keʼéna ña̱ va̱ʼa. Iin ñá hermana ñá ñuu Malaui ñá naní Chifundo ki̱xáʼañá káʼviñá xíʼin ñá Alinafe iin ñá loʼo ñá católica. Tá ni̱xa̱a̱ná lección 14 ña̱ libro Kivi koo si̱íún vitin ta saátu chí nu̱únínu, ñá Chifundo ni̱nda̱ka̱tu̱ʼunñá ñá káʼviñá xíʼin ndáaña ndákanixi̱níñá xa̱ʼa̱ ña̱ kuniñúʼuñá na̱ʼná ña̱ va̱ʼa ndasakáʼnuñá Ndióxi̱. Ñá Alinafe ni̱saáníñá ta ni̱ka̱ʼa̱nñá: “Iin tá iinyó xíni̱ ndáaña keʼéyó”. Ñá Chifundo nda̱kanixi̱níñá ña̱ va̱ása kuni̱kavíñá kaʼviñá xíʼinñá soo xi̱kaʼvikavañá, saáchi xi̱kunda̱a̱-iniñá ña̱ tá ná ya̱ʼa tiempo sana kunda̱a̱va-iniñá ña̱ va̱ása xíniñúʼu kuniñúʼuñá na̱ʼná ña̱ va̱ʼa ndasakáʼnuñá Ndióxi̱. Tá ni̱ya̱ʼa loʼo yo̱o̱ ñá Chifundo ke̱ʼéñá pregunta xíʼinñá ña̱ va̱xi nu̱ú lección 34 “¿Ndáa ki̱ʼva xa̱a̱ chíndeétáʼan Biblia xíʼún ta saátu ña̱ sákuaʼún xa̱ʼa̱ Jehová, ta̱ kúú Ndióxi̱ ta̱ nda̱a̱?”. Ñá Chifundo káchiñá: “Ñá Alinafe ku̱a̱ʼání ña̱ʼa va̱ʼa ni̱ka̱ʼa̱nñá ta iin ña̱yóʼo ni̱ka̱ʼa̱nñá xa̱ʼa̱ na̱ testigo ña̱ kǒo kéʼéna ña̱ va̱ása va̱ʼa ña̱ káʼa̱n Biblia ña̱ kǒo xíniñúʼu keʼéyó”. Tá ni̱ya̱ʼa loʼo tiempo ñá ñaʼá yóʼo va̱ása níxi̱xiniñúʼukañá na̱ʼná ña̱ ndasakáʼnuñá Ndióxi̱ ta saá nda̱kuchiñá.

21. ¿Ndáa ki̱ʼva chindeétáʼanyó xíʼin na̱ káʼviyó xíʼin ña̱ xa̱a̱na kachíñuna nu̱ú Jehová?

²¹ Kúnda̱a̱-iniyó Ndióxi̱ kúú tá chíndeétáʼan xíʼinna, soo saátu miíyó kivi chindeétáʼanyó xíʼin na̱ káʼviyó xíʼin ña̱ ná xa̱a̱na ndasakáʼnuna Jehová (1 Cor. 3:7). Va̱ása sánáʼa̱ kuitíyóna ndáaña kúni̱ Jehová ná kéʼéna chi saátu sánáʼa̱yóna ña̱ ná kuʼvi̱-inina kuninara. Ta saátu ná chindeétáʼanyó xíʼinna ña̱ siʼna chiñu Ndióxi̱ ná kundi̱ʼi-inina xa̱ʼa̱, ta ná sanáʼa̱yóna ña̱ ná kandíxana Jehová tá yáʼana nu̱ú tu̱ndóʼo. Tá náʼa̱yó nu̱ú na̱ káʼviyó xíʼin ña̱ kándíxayó Jehová saa kúú ña̱ chíndeétáʼanyó xíʼinna ña̱ kandíxanara ta ndakú koo-inina kachíñuna nu̱úra.