ÑA̱ NDÁKA̱TU̱ʼUN NA̱ VA̱LÍ KÚA̱AN
¿Ndáa ki̱ʼva chindeétáʼan ña̱ Biblia xíʼi̱n? Táʼví u̱ni̱: Chikaa̱ ndee̱ ña̱ kunda̱a̱ka-iniún xa̱ʼa̱ ña̱ sánáʼa̱ Biblia
Tá ná kunaún ña̱ Biblia letra kuití kotoún nu̱úña, soo kǒo ndakava-iniún. Ña̱ Biblia íyoña nda̱a̱ táki̱ʼva íyo iin mesa tú kúúmií ku̱a̱ʼání comida, kǒo kivi kuxu ndiʼún comida yóʼo, soo va̱ʼava kuxún loʼo ña̱ kivi chindeétáʼan xíʼún.
Tá kúni̱ún kunda̱a̱ va̱ʼa-iniún xíʼin ña̱ sánáʼa̱ Biblia, xíniñúʼu chi̱kaún ndee̱ ña̱ ndakanixi̱níún xa̱ʼa̱ ña̱ káʼviún. Ña̱ artículo yóʼo chindeétáʼan xíʼún.
Ta ña̱yóʼo kúú ña̱ ka̱ʼa̱nyó xa̱ʼa̱:
¿Nda̱chun xíniñúʼu ndakani va̱ʼa xi̱níún tá káʼviún Biblia?
Tá chíkaa̱kaún ndee̱ ña̱ kaʼviún Biblia va̱ʼaka kunda̱a̱-iniún xíʼinña, ndakanixi̱ní xa̱ʼa̱ ejemplo yóʼo. Tá chíka̱ún iin bolsa loʼo ña̱ té ini ti̱kui̱í niʼní loʼova ndákaʼyi̱rá, soo ta ná kundikaa̱ña ku̱a̱ʼáka tiempo va̱ʼaníka xáʼa̱nrá saá.
Ta ki̱ʼva saá kúu tá káʼviún ña̱ Biblia, kǒo xíniñúʼu kamaní kaʼviúnña, tavá loʼo tiempo ña̱ ndakanixi̱níún xa̱ʼa̱ ña̱ káʼviún, tá kéʼún ña̱yóʼo saá kúú ña̱ táxiún ke̱e ña̱ káʼviún xi̱níún ta xa̱a̱ña nda̱a̱ níma̱ún, chi ña̱yóʼo kúú ña̱ xi̱keʼé ta̱ ka̱ʼyí Salmo 119. Ta ña̱yóʼo ni̱ka̱ʼa̱nra xa̱ʼa̱ ley Ndióxi̱: “Ndiʼi tiempo ndákanixi̱níi̱ xa̱ʼa̱ña” (Salmo 119:97).
Ña̱yóʼo kǒo kúni̱ kachiña ña̱ iníí ki̱vi̱ xíniñúʼu kaʼviún Biblia ta ndakanixi̱níún xa̱ʼa̱ña. Chi ña̱ ke̱ʼé ta̱ Salmista kúú ña̱ ta̱vára tiempo ña̱ ndakanixi̱níra xa̱ʼa̱ ña̱ káʼa̱n tu̱ʼun Ndióxi̱, ta ña̱yóʼo chi̱ndeé miíra ña̱ nda̱kaxin viíra ña̱ keʼéra (Salmo 119:98-100).
“Iin yichi̱ siʼíi̱ ni̱ka̱ʼa̱nñá xíʼi̱n: ‘U̱xa̱ ki̱vi̱ kúú iin semana, tá ndiʼi ña̱ kútóún ku̱a̱ʼání tiempo táváún kéʼúnña. Xa̱ʼa̱ ña̱yóʼo, ¿á kivi taváún loʼo tiempo taxiún ndaʼa̱ Jehová?’” (Ñá Melanie).
Tá kíʼún kuenta xíʼin ndiʼi ña̱ káʼa̱n tu̱ʼun Ndióxi̱ va̱ʼaní ndaka̱xiún ndiʼi ña̱ kúni̱ún keʼún, tá kúú tá xa̱a̱ ndáka̱xiún na̱ migoún á tá xa̱a̱ kúni̱ún keʼún iin ña̱ va̱ása va̱ʼa.
¿Ndáa ki̱ʼva keʼún ña̱ va̱ʼa kunda̱a̱-iniún xíʼin ña̱ káʼviún nu̱ú Biblia?
Kaʼyí ña̱ kúni̱ún keʼún. Iin ñá loʼo kúa̱an ñá naní Julia káchiñá: “Kaʼyí nu̱ú iin tutu ndáa hora kúni̱ún kaʼviún Biblia, ndaka̱xín ndáaña kúni̱ún kaʼviún, mií kúni̱ún kaʼviúnña ta ama kúni̱ún kaʼviúnña”.
Ndukú nu̱ú kivi kaʼviún. Iin ñá loʼo ñá naní Gianna káchiñá: “Nandukú iin lugar nu̱ú táxi̱n va̱ʼa kaʼviún ta ka̱ʼa̱n xíʼin na̱ veʼún ama kúú ña̱ kúni̱ún kaʼviún ña̱ va̱ʼa na̱ kǒo ka̱ʼa̱nna xíʼún”.
Tá xíniñúʼún iin tableta á iin teléfono tá káʼviún Biblia, ndaʼva ña̱ notificación. Ta va̱ʼaka tá iin Biblia ña̱ tutu ná kuniñúʼún. Na̱ ndíchi káchina, ña̱ tá káʼviún Biblia nu̱ú tutu, va̱ʼaníka kunda̱a̱-iniún xíʼin ña̱ káʼviún, soo tá káʼviún Biblia nu̱ú iin tableta á nu̱ú iin teléfono ixayo̱ʼvi̱níkaña xíʼún ña̱ kunda̱a̱ va̱ʼa-iniún xíʼin ña̱ káʼviún.
“Tá xa̱a̱ káʼvii̱ nu̱ú iin celular á nu̱ú iin tableta íxayo̱ʼvi̱níkaña xíʼi̱n ña̱ kunda̱a̱ va̱ʼa-inii̱ xíʼin ña̱ káʼvii̱ saáchi kíxaa̱ní notificación nu̱úi̱, á ku̱a̱nuu batería ña̱ teléfonoi̱ á kǒo señal, ña̱kán tá káʼvii̱ nu̱ú iin tutu, iinlá ña̱ ndíʼi̱-inii̱ xa̱ʼa̱ kúú ña̱ ná koo luz” (Ñá Elena).
Keʼé oración tá xa̱a̱ kixáʼún kaʼviún. Ka̱ʼa̱n xíʼin Jehová ña̱ ná chíndeéra yóʼó ña̱ va̱ʼa kunda̱a̱-iniún ta ndakaʼún xa̱ʼa̱ ña̱ káʼviún, tasaá kivi chindeétáʼan ña̱yóʼo xíʼún (Santiago 1:5).
Ña̱ va̱ʼa na̱ʼún nu̱ú Jehová ña̱ ndixa kúni̱ún keʼún ña̱ ni̱ka̱ʼún xíʼinra, nandukú xa̱ʼa̱ ña̱ káʼviún. ¿Ndáaña kivi keʼún? Tá xíniñúʼún ña̱ aplicación JW Library á káʼviún Biblia nu̱ú internet, kivi katavi̱ún nu̱ú iin versículo tasaá ndani̱ʼún ku̱a̱ʼáka ña̱ káʼa̱n xa̱ʼa̱ ña̱yóʼo á inkaka artículo ña̱ kítáʼan xíʼin ña̱yóʼo.
Nda̱ka̱tu̱ʼún miíún. Tá kúú: “¿Ndáaña sánáʼa̱ ña̱yóʼo yi̱ʼi̱ xa̱ʼa̱ Jehová? ¿Ndáa ña̱ va̱ʼa kúúmií Jehová kúni̱ sakúaʼi̱ keʼíi̱?” (Efesios 5:1). “¿Ndáaña kivi sakúaʼi̱ xíʼin ña̱ ka̱ʼvii̱ yóʼo? ¿Ndáa ki̱ʼva kuniñúʼi̱ña?” (Salmo 119:105). “¿Á kivi kuniñúʼi̱ ña̱ ka̱ʼvii̱ yóʼo ña̱ va̱ʼa chindeétáʼi̱n xíʼin inkana?” (Romanos 1:11).
Saátu kivi nda̱ka̱tu̱ʼún miíún: “¿Ndáa ki̱ʼva kítáʼan ña̱ ka̱ʼvii̱ yóʼo xíʼin tema ña̱ káʼa̱n Biblia xa̱ʼa̱?”. Iin pregunta ña̱ ndáyáʼviní kúú ña̱yóʼo. ¿Nda̱chun? Saáchi ndiʼi ña̱ va̱xi nu̱ú Biblia, tá kúú ña̱ va̱xi nu̱ú Génesis iinsaá nda̱a̱ Apocalipsis, inkáchi káʼa̱nña xa̱ʼa̱ ki̱ʼva ña̱ ndasayi̱i̱ Jehová ki̱vi̱ra ta kuniñúʼura Reinora ña̱ va̱ʼa keʼéra ña̱yóʼo, tasaá na̱ʼa̱ra ña̱ kúúmiíra derecho ña̱ kaʼndachíñura ta iinlá miíra kúú ta̱ va̱ʼaní xáʼndachíñu.