Ña̱ ndeéní nása̱ma clima nu̱ú ñuʼú yóʼo: ¿á kivi chindeétáʼan Biblia xíʼin na̱ xóʼvi̱ xíʼin ña̱ kúu yóʼo?
Tá ndeéní kúun sa̱vi̱, tá kúú huracán, tifón á tá va̱xi ta̱chí káva̱ ku̱a̱ʼání ña̱ʼa sándiʼi-xa̱ʼa̱ña ta kée tá mar nu̱ú ñúʼura. Tá ndeéní kúun sa̱vi̱ táya ñuʼú, ta xa̱ʼa̱ ña̱ kóyo taxa xíxi̱ yuku̱. Ta su̱ví nda̱saa ña̱yóʼo kuití kúúña, tá xa̱a̱ kǒo sa̱vi̱ kúun, á tá ndeéní niʼní á tá kóyo nieve kíxáʼa kúu desastre natural. Ku̱a̱ʼání na̱ yiví xóʼvi̱na tá yáʼana nu̱ú tu̱ndóʼo yóʼo, ¿á xa̱a̱ ndóʼo miíún táʼan ña̱yóʼo?
Ku̱a̱ʼání ñuu kúu táʼan tu̱ndóʼo yóʼo ta sava yichi̱ chi̱to̱ní kúuña, ta ku̱i̱ya̱ tá ku̱i̱ya̱ ndeéníka xíyoña. Iin informe ña̱ ta̱xi na̱ Federación Internacional de Sociedades de la Cruz Roja xíʼin ña̱ Media Luna Roja káchiña: “Na̱ ndóʼo-ini xíʼin tu̱ndóʼo yóʼo xa̱a̱ ku̱a̱ʼání ku̱a̱ʼa̱n ndúuna, ta saátu xa̱a̱ ku̱a̱ʼání ñuu sándiʼi-xa̱ʼa̱ sa̱vi̱ xa̱ʼa̱ ña̱ ndeéní kúunrá ta saátu tá xa̱a̱ kǒorá kúun ku̱a̱ʼání ña̱ʼa ndíʼi-xa̱ʼa̱, ta xa̱ʼa̱ ña̱yóʼo ku̱i̱ya̱ tá ku̱i̱ya̱ ku̱a̱ʼání na̱ yiví sándakoona ñuu nu̱ú íyona”.
Sava na̱ yáʼa nu̱ú tu̱ndóʼo yóʼo túkue̱ʼe̱na ta savana ndeéní kúsuchí-inina á ndíʼi̱-inina xa̱ʼa̱ ña̱yóʼo. Ku̱a̱ʼání na̱yóʼo ndíʼi-xa̱ʼa̱ veʼena á ndíʼi-xa̱ʼa̱ ña̱ʼana á nda̱a̱ sava yichi̱ xíʼi̱ na̱ veʼena.
¿Á xa̱a̱ ndóʼún táʼan ña̱yóʼo? Ña̱ Biblia kiviva chindeétáʼanña xíʼún. Xa̱a̱ ku̱a̱ʼání na̱ yiví chíndeétáʼanña xíʼin. ¿Ndáa ki̱ʼva chíndeétáʼanña xíʼinna? Ña̱yóʼo sándi̱koña-inina chi káʼa̱nña xíʼinna xa̱ʼa̱ ña̱ koo chí nu̱únínu, ta táxiña consejo ña̱ va̱ʼaní ndaʼa̱na (Romanos 15:4). Ta saátu, ña̱ Biblia ndákuiinña pregunta táʼan ña̱yóʼo: ¿nda̱chun táxi Ndióxi̱ ña̱ kúu tu̱ndóʼo yóʼo?, ¿á táxira castigo ndaʼa̱yó xa̱ʼa̱ iin ña̱ʼa ña̱ va̱ása va̱ʼa níkeʼéyó?
Su̱ví iin castigo Ndióxi̱ kúúña
Su̱ví ku̱a̱chi Ndióxi̱ kúú ña̱ ndóʼo na̱ yiví. Ña̱ Biblia káchiña “nda̱a̱ ni iin na̱ yiví kǒo kívi kotondosóna Ndióxi̱ ña̱ keʼéra ña̱ va̱ása va̱ʼa, ta ni ta̱yóʼo va̱ása xítondosóra nda̱a̱ ni iin na̱ yiví” (Santiago 1:13). Ña̱kán, su̱ví ku̱a̱chi Ndióxi̱ kúúña ña̱ íyo ndiʼi tu̱ndóʼo yóʼo.
Ña̱ nda̱a̱ kúúvaña, ña̱ Biblia káʼa̱nña tá tiempo xi̱naʼá Ndióxi̱ xi̱niñúʼura sa̱vi̱ á inkaka ña̱ʼa ña̱ ta̱xira castigo ndaʼa̱ na̱ yiví na̱ xi̱keʼé ña̱ʼa ña̱ va̱ása va̱ʼa. Tá saá, ¿nda̱chun síínní ni̱xi̱yo ña̱yóʼo nu̱ú ña̱ kúu tiempo vitin? Tiempo vitin, iin kamava kúu tundóʼo yóʼo ta kǒo nátúʼunña xíʼinyó, ta sáxo̱ʼvi̱ña na̱ yiví na̱ va̱ʼa ta saátu na̱ kéʼé ña̱ va̱ása va̱ʼa. Tá tiempo xi̱naʼá, Ndióxi̱ xa̱a̱ ya̱chi̱ka xi̱natúʼunra xíʼin na̱ yiví xa̱ʼa̱ ña̱ kuu, ta xi̱ka̱ʼa̱nra ndáa xa̱ʼa̱ kúú ña̱ kuuña ta saátu xi̱chindeétáʼanra xíʼin na̱ yiví va̱ʼa. Tá kúú, tá chi̱ndaʼá Ndióxi̱ iin diluvio ki̱xi sa̱tá iníísaá ñuyǐví tá tiempo ta̱ Noé, ke̱ʼéra u̱ni̱ ña̱ʼa: ya̱chi̱ na̱túʼunra xíʼinna, ta ni̱ka̱ʼa̱nra xíʼinna ndáa xa̱ʼa̱ kúú ña̱ sakúunra sa̱vi̱ ta saátu xi̱ndaara ta̱ Noé xíʼin na̱ veʼera (Génesis 6:13; 2 Pedro 2:5).
Tá kúni̱ún kunda̱a̱-iniún xa̱ʼa̱ ña̱yóʼo koto artículo ña̱ naní “¿Ndáaña káʼa̱n Biblia xa̱ʼa̱ tu̱ndoʼo?”.
Ndióxi̱ ndíʼi̱-inira xa̱ʼa̱ na̱ xóʼvi̱
Ña̱ Biblia káʼa̱nña xa̱ʼa̱ Jehováa ña̱ kúni̱níra xínira miíyó ta xóʼvi̱ra tá xítora ña̱ xóʼvi̱yó. Koto u̱vi̱ ejemplo yóʼo.
Isaías 63:9: “Tá ni̱ndi̱ʼiní-inina, saátu ta̱yóʼo [Ndióxi̱] ni̱ndi̱ʼiní-inira”.
Ña̱ kúni̱ kachiña: Jehová xóʼvi̱ra tá xítora ña̱ xóʼvi̱yó.
1 Pedro 5:7: “Chi ta̱yóʼo ndíʼi̱ní-inira xa̱ʼa̱ndó”.
Ña̱ kúni̱ kachiña: Jehová kúni̱ra ña̱ va̱ʼa ná kundooyó.
Xa̱ʼa̱ ña̱ kúni̱ní Jehová xínira miíyó kúni̱ra chindeétáʼanra xíʼinyó. ¿Ta ndáaña xíniñúʼu Jehová ña̱ chindeétáʼanra xíʼinyó? Ña̱ Biblia. Nu̱ú ña̱yóʼo ndáni̱ʼíyó ku̱a̱ʼání consejo ña̱ kivi chindeétáʼan xíʼinyó, ta saátu káʼa̱nña xíʼinyó xa̱ʼa̱ ña̱ koo chí nu̱únínu nu̱ú va̱ása kuun kinika sa̱vi̱ á ta̱chí kini á inkaka tu̱ndóʼo (2 Corintios 1:3, 4).
Si̱lóʼoní tiempo kúma̱ní ta ndiʼi-xa̱ʼa̱ ndiʼi tu̱ndóʼo yóʼo
Nu̱ú ña̱ Biblia Jehová káʼa̱nra: “Kǒo kaka-inindó ña̱ ndakiʼinvandó iin ña̱ va̱ʼa chí nu̱únínu” (Jeremías 29:11). Ndióxi̱ kǒo kúni̱ra ña̱ ndoʼo-iniyó xíʼin ndiʼi ña̱ kúu yóʼo, tá kúú sa̱vi̱ á ta̱chí kini, ña̱ kúni̱ra kúú ña̱ kusi̱í-iniyó kooyó nu̱ú ñuʼú yóʼo tá ná kooña iin paraíso (Génesis 1:28; 2:15; Isaías 32:18).
Iinlá Reino Ndióxi̱ va̱ʼa keʼé ndiʼi ña̱yóʼo. ¿Ta ndáaña kúú Reino yóʼo? Iin gobierno ña̱ íyo chí ndiví kúúña, ta ta̱ Jesús kúú ta̱ kaʼndachíñu (Mateo 6:10). Xa̱ʼa̱ ña̱ ndíchiní ta̱ Jesús ta íyo ndee̱ ndaʼa̱ra va̱ʼaní kundaara ñuʼú yóʼo, ta kǒoka ña̱ʼa ixandi̱va̱ʼa xíʼinña. Tá ni̱xi̱yora nu̱ú ñuʼú yóʼo, ni̱na̱ʼa̱ra ndee̱ ña̱ kúúmiíra (Marcos 4:37-41). Nu̱ú ñuyǐví xa̱á sanáʼa̱ra miíyó ña̱ kundaayó ndiʼi ña̱ íyo nu̱ú ñuʼú yóʼo, saá vií kooyó tasaá kotoyó ña̱ ndixa ndíchiníra (Isaías 11:2). Tá ná kaʼndachíñu ta̱ Jesús nu̱ú ñuʼú yóʼo kiʼinra kuenta ña̱ ná kǒo ni iinkana xo̱ʼvi̱ xíʼin ndiʼi ña̱ kúu yóʼo, tá kúú ña̱ kúun ndeé sa̱vi̱, ña̱ xíkaní ta̱chí á inkaka ña̱ kúu yóʼo.
Sana ndákanixi̱níún ama kúú ña̱ xi̱nu ndiʼi ña̱yóʼo. Tá kúni̱ún kunda̱a̱-iniún xa̱ʼa̱ ña̱yóʼo koto artículo ña̱ naní “¿Cuándo gobernará la Tierra el Reino de Dios?”.
¿Ndáaña kivi keʼún vitin?
Consejo ña̱ táxi Biblia va̱ʼa chindeéña yóʼó tá kúma̱níka kuu iin desastre natural, tá xa̱a̱ kúuña á tá xa̱a̱ ni̱ya̱ʼaña.
Tá kúma̱níka kuuña: Koo tu̱ʼvaún ña̱ kamaní keʼún ña̱ʼa.
Ña̱ káʼa̱n Biblia: “Na̱ ndíchi kúnda̱a̱-inina ndáaña kúú ña̱ va̱ása va̱ʼa ta kúxíkana nu̱úña, soo na̱ kíʼvi kéʼévanaña ta xóʼvi̱na” (Proverbios 22:3).
Ña̱ kúni̱ kachiña: Ndakanixi̱ní xa̱ʼa̱ iin desastre natural ña̱ kivi koo nu̱ú íyoún, saá kúú ña̱ koo tu̱ʼvaún ña̱ kamaní keʼún ña̱ʼa tasaá kundaún na̱ veʼún.
Ña̱ xa̱a̱ ndo̱ʼo inkana: “Ndeéní ni̱xi̱xi̱ chí nu̱ú ni̱xi̱yondi̱ ta kamaní ke̱endi̱ ku̱a̱ʼa̱nndi̱. Ni̱yi̱ʼvíní na̱ yiví ta va̱ása níxikunda̱a̱-ini̱na ndáaña keʼéna. Soo ndi̱ʼi̱, xa̱a̱ ni̱xi̱yo tu̱ʼvavandi̱, ni̱xi̱yo tu̱ʼva mochilandi̱ nu̱ú xi̱ñuʼu ndiʼi ña̱ʼa tá kúú, ta̱tán xíʼin ti̱ko̱to̱ ña̱ xi̱xiniñúʼundi̱. Iin ña̱ va̱ʼaní kúú ña̱ ni̱xi̱yo tu̱ʼvandi̱” (Tamara, California, Estados Unidos).
Tá xa̱a̱ kúuña: Kundi̱ʼi̱-iniún xa̱ʼa̱ ña̱ ndáyáʼvika.
Ña̱ káʼa̱n Biblia: “Ni ku̱a̱ʼání kúú ña̱ʼa ña̱ kúúmií iin na̱ yiví va̱ása taxiña ña̱ kutakuna” (Lucas 12:15).
Ña̱ kúni̱ kachiña: Ña̱ tákuyó ndáyáʼvikaña nu̱ú inkaka ña̱ʼa.
Ña̱ xa̱a̱ ndo̱ʼo inkana: “Tá sa̱ndíʼi-xa̱ʼa̱ tifón tá naní Lawinb veʼendi̱ va̱ása níxikunda̱a̱-inii̱ ndáaña keʼíi̱ ta ni va̱ása níndakani vií xi̱níi̱ xa̱ʼa̱ ña̱ keʼíi̱. Tasaá ni̱ka̱ʼi̱n xíʼin Jehová ta na̱túʼi̱n xíʼinra xa̱ʼa̱ ña̱ xi̱ndoʼi̱, ta ki̱ʼi̱n kuenta ni ndi̱ʼi-xa̱ʼa̱ ndiʼi veʼendi̱, ni̱kakuvandi̱” (Leslie, Filipinas).
Tá xa̱a̱ ni̱ya̱ʼaña: Kǒo kundi̱ʼi̱ní-iniún xa̱ʼa̱ ña̱ kuu inka ki̱vi̱.
Ña̱ káʼa̱n Biblia: “Nda̱a̱ ni iin yichi̱ kǒo kundi̱ʼi̱ní-inindó xa̱ʼa̱ ki̱vi̱ taa̱n, saáchi iin iin ki̱vi̱ xa̱a̱ kúúmiíña tu̱ndóʼo” (Mateo 6:34).
Ña̱ kúni̱ kachiña: Kǒo kundi̱ʼi̱ní-iniún xa̱ʼa̱ ña̱ koo inka ki̱vi̱.
Ña̱ xa̱a̱ ndo̱ʼo inkana: “Tá ni̱ki̱ʼvi ku̱a̱ʼání ti̱kui̱í veʼi̱ tá ni̱ya̱ʼa tá huracán tá naní Irma ni̱ndi̱ʼi̱ní-inii̱. Xi̱niñúʼu nda̱kaxii̱n ku̱a̱ʼání ña̱ʼa keʼíi̱ ta va̱ása níxi̱kunda̱a̱-inii ndáaña ndakaxii̱n keʼíi̱, tasaá nda̱kaʼíi̱n xa̱ʼa̱ consejo ña̱ káʼa̱n Biblia ña̱ va̱ása xíniñúʼu kundi̱ʼi̱ní-iniyó xa̱ʼa̱ ndáaña kuu inka ki̱vi̱. Iin ña̱ va̱ʼaní kúú ña̱ chi̱ndeé Jehová yi̱ʼi̱ ña̱ táxi̱n koo inii̱” (Sally, Florida, Estados Unidos).
Tá kúni̱ún kunda̱a̱ka-iniún xa̱ʼa̱ táʼan ña̱yóʼo, koto artículo ña̱ naní “Cuando golpea un desastre. Qué hacer para sobrevivir”.