¿Ndáaña káʼa̱n Biblia xa̱ʼa̱ ña̱ íyoní so̱ko iníísaá ñuyǐví?
“Va̱ása kooka so̱ko”. Ña̱yóʼo kúú ña̱ kúni̱ na̱ chíñu na̱ íyo iníísaá ñuyǐví keʼéna tasaá kǒoka kundoʼo-ini na̱ yiví xa̱ʼa̱ ña̱yóʼo: Ndiʼi na̱ yiví koo ña̱ kuxuna.a Soo, ¿á kixaa̱ iin ki̱vi̱ ña̱ va̱ása kooka so̱ko? ¿Ndáa ña̱ káʼa̱n Biblia xa̱ʼa̱ ña̱yóʼo?
Ya̱chi̱ví ni̱ka̱ʼa̱n Biblia ña̱ kundoʼo-inina xa̱ʼa̱ ña̱ kuxuna
Biblia ni̱ka̱ʼa̱nña xa̱ʼa̱ “ki̱vi̱ nu̱ú ndíʼi” ña̱ kundoʼo-ini na̱ yiví xa̱ʼa̱ ña̱ kuxuna (2 Timoteo 3:1). Kǒoví ku̱a̱chi kúúmií Ndióxi̱ xa̱ʼa̱ ña̱ kúu yóʼo, soo xa̱a̱ ni̱ka̱ʼa̱nvara xíʼinyó ña̱ saá koo tiempo ña̱ ndóoyó (Santiago 1:13). Ná kotoyó ña̱ káʼa̱n u̱vi̱ profecía ña̱ va̱xi nu̱ú Biblia.
“Koo so̱ko” (Mateo 24:7). Nda̱a̱ táki̱ʼva káʼa̱n ña̱ profecía yóʼo, koo so̱ko ta xa̱a̱ síín síín lugar koo ña̱yóʼo. Kotondó iin informe ña̱ ta̱xi na̱ káʼvi va̱ʼa xa̱ʼa̱ ndáa ki̱ʼva kána ña̱ xíxi na̱ yiví: “Ku̱a̱ʼání ña̱ kéʼé na̱ yiví ña̱ va̱ása kooka so̱ko ta saátu ña̱ va̱ʼa ná koo ña̱ kuxu na̱ yiví”.b Soo, ku̱a̱ʼání millón na̱ yiví nu̱ú ku̱a̱ʼání país kǒo kívi ndani̱ʼína ña̱ kuxuna, ta xa̱ʼa̱ ña̱yóʼo ku̱a̱ʼánína xíʼi̱.
“Ta xi̱nii̱ iin kuáyi̱ tí ndáá, ta ta̱ yósó tíyóʼo níʼira iin balanza” (Apocalipsis 6:5). Tí kuáyi̱ xíʼin ta̱ yósó tíyóʼo ndánaʼa̱ña so̱ko ña̱ íyoní ki̱vi̱ nu̱ú ndíʼi ña̱ ndóoyó vitin.c Ta̱ yósó tí kuáyi̱ níʼira iin balanza ña̱ va̱ʼa tavára ki̱ʼva ña̱ kuxu na̱ yiví. Nani yósó ta̱ ta̱a yóʼo tí kuáyi̱ ku̱a̱ʼa̱nra, ni̱ka̱ʼa̱n iinna ña̱ yaʼviní koo ña̱ kuxu na̱ yiví ta saátu ni̱ka̱ʼa̱nna ña̱ vií va̱ʼa ná kuniñúʼunaña ta ná kǒo satívína ña̱ xíxina (Apocalipsis 6:6). Ndiʼi ña̱ xítoyó kúu tiempo vitin náʼa̱ña nu̱úyó ña̱ ndixaní kúú ña̱ ni̱ka̱ʼa̱n profecía yóʼo, chi ku̱a̱ʼání millón na̱ yiví ndóʼoní-inina ta kǒo kívi ndani̱ʼína ña̱ kuxuna.
Kǒoka so̱ko koo
Na̱ yiví na̱ káʼviva̱ʼa xa̱ʼa̱ ndiʼi ña̱ xíxi na̱ yiví káchina ña̱ ku̱a̱ʼáníva ña̱ʼa kána nu̱ú ñuʼú yóʼo ta nanivaña kuxu ndiʼi na̱ yiví na̱ íyo nu̱úña. Soo, ¿nda̱chun íyoní na̱ yiví na̱ yáʼa so̱ko? Ta, ¿ndáa ña̱ káʼa̱n Biblia keʼé Jehovád xa̱ʼa̱yó ta saá va̱ása kooka so̱ko?
Ña̱ sákaku tu̱ndóʼo: Na̱ gobierno á na̱ chíñu kǒo ña̱ kívi keʼéna ña̱ va̱ása kooka na̱ ndáʼvi, xa̱ʼa̱ ña̱ su̱ví ndiʼi na̱ yiví íyo xu̱ʼún, íyoní so̱ko.
Ndáa ki̱ʼva ndiʼi-xa̱ʼa̱ña: Reino Ndióxi̱ kúú ña̱ kixáʼa kaʼndachíñu chi na̱ chíñu na̱ íyo ñuyǐví yóʼo, na̱ ku̱a̱chi kúúna ta kǒo kívi kaʼndachíñuna. Mií Reino Ndióxi̱ ndakiʼin chiñu ta ta̱ Jesucristo koo Rey (Daniel 2:44; Mateo 6:10). Tiempo vitin, na̱ yiví na̱ kǒo xu̱ʼún íxayo̱ʼviníña xíʼinna satána ña̱ kuxuna. Soo, Reino Ndióxi̱ ndasavií tu̱ndóʼo yóʼo. Biblia káʼa̱nña xa̱ʼa̱ ta̱ Jesús ta káchiña: “Ta̱kán chindeétáʼanra xíʼin na̱ nda̱ʼví, na̱ ndúkú ña̱ chindeétáʼanra xíʼinna, ta saátu chindeétáʼanra xíʼin na̱ vitá-ini ta saátu ndiʼi na̱ kǒo na̱ chindeétáʼan xíʼin. [...] Nu̱ú ñuʼú ku̱a̱ʼání ña̱ʼa koo kuxuna, chí yuku̱ ku̱a̱ʼáka ña̱ koo” (Salmo 72:12, 16).
Ña̱ sákaku tu̱ndóʼo: Xa̱ʼa̱ ña̱ íyo guerra ku̱a̱ʼání tu̱ndóʼo káku ta kíxáʼa kúma̱ní xu̱ʼún ndaʼa̱ na̱ yiví ña̱ satána ña̱ kuxuna.
Ndáa ki̱ʼva ndiʼi-xa̱ʼa̱ña: Jehová “Ndióxi̱ sándiʼi-xa̱ʼa̱ra ndiʼi ku̱a̱chi nu̱ú xáʼní-táʼanna iníísaá ñuyǐví. Sándiʼi-xa̱ʼara ndiʼi ña̱ʼa ña̱ xíniñúʼuna tá xáʼní táʼanna, ta xáʼmira carrona” (Salmo 46:9). Ndióxi̱ sándiʼi-xa̱ʼa̱ra na̱ yiví na̱ kútóoní ku̱a̱chi, ta saátu sándiʼi-xa̱ʼa̱ra ndiʼi ña̱ xíniñúʼuna ña̱ xáʼní-táʼanna. Tá ná xi̱nu ña̱yóʼo, ndiʼi na̱ yiví koo ña̱ kuxuna. Biblia káʼa̱nña: “Ku̱a̱ʼání na̱ yiví na̱ va̱ʼa kundoo, ta va̱ʼaní kundoona” (Salmo 72:7).
Ña̱ sákaku tu̱ndóʼo: Ki̱vi̱ ndeéní kúun sa̱vi̱ kini á ña̱ ni loʼo kǒo sa̱vi̱ kúun ndeéní ndíʼi-xa̱ʼa̱ ña̱ chíʼina ta xíʼi̱ kití sa̱na̱na.
Ndáa ki̱ʼva ndiʼi-xa̱ʼa̱ña: Ndióxi̱ va̱ása taxikara ña̱ kuun kini sa̱vi̱, ta va̱ása taxikara ña̱ ndeéní niʼní koo, xa̱ʼa̱ ña̱yóʼo ndiʼi ña̱ chiʼina va̱ʼaní kanaña. Biblia káchiña: Jehová “sáya̱a̱ra ta̱chí ña̱ ndeéní káni; ta kútási̱n ña̱ sísikí nu̱ú tá mar. [...] Ndásara ñuʼú yi̱chí iin lugar nu̱ú ñúʼu ti̱kui̱í nu̱ú íyo tú caña ta ñuʼú yi̱chí ndásaraña nu̱ú kána ti̱kui̱í. Ta táxira kán ña̱ ná koo na̱ xíʼi̱ so̱ko [...]. Na̱kán chíʼina ñuʼúna, chíʼina tú uva ta ku̱a̱ʼání ña̱ʼa ndákiʼinna nu̱úña” (Salmo 107:29, 35-37).
Ña̱ sákaku tu̱ndóʼo: Na̱ yiví na̱ kútóoní xu̱ʼún íxava̱ʼana ña̱ʼa ña̱ kuxu na̱ yiví ña̱ táva kue̱ʼe̱ xíʼinna ta saátu va̱ása xíinna ña̱ ná xa̱a̱ ña̱yóʼo ndaʼa̱ na̱ yiví na̱ ndixa xíniñúʼuña.
Ndáa ki̱ʼva ndiʼi-xa̱ʼa̱ña: Reino Ndióxi̱ sandíʼi-xa̱ʼa̱ña na̱ yiví na̱ sándáʼvi inkana ta saátu na̱ kéʼé ña̱ va̱ása va̱ʼa (Salmo 37:10, 11; Isaías 61:8). Biblia káʼa̱nña xa̱ʼa̱ Jehová ña̱ “ndásaviíra ku̱a̱chi xíʼin na̱ va̱ása vií níndatiinna ku̱a̱chi xíʼin ta táxira ña̱ xíxi na̱ xíʼi̱ so̱ko” (Salmo 146:7).
Ña̱ sákaku tu̱ndóʼo: Ku̱i̱ya̱ tá ku̱i̱ya̱, ku̱a̱ʼání ña̱ kána nu̱ú ñuʼú ña̱ xíxi na̱ yiví ndíʼi-xa̱ʼa̱ña.
Ndáa ki̱ʼva ndiʼi-xa̱ʼa̱ña: Reino Ndióxi̱ va̱ʼaní taxiña ña̱ kuxu na̱ yiví. Nani tá ni̱xiyó ta̱ Jesús nu̱ú ñuʼú yóʼo va̱ása níí satívíra ña̱ʼa ña̱ xi̱xixina. Tá kúú xi̱niñúʼura ndee̱ Ndióxi̱ ña̱ ta̱xira ña̱ xi̱xi yáʼaka 5,000 na̱ yiví. Tándi̱ʼi ni̱ka̱ʼa̱nra xíʼin na̱ discípulora: “Ndakayandó ndiʼi ña̱ ni̱ndo̱o, ña̱ va̱ʼa ná kǒo ndiʼi-xa̱ʼa̱ nda̱a̱ ni iinña” (Juan 6:5-13).
Reino Ndióxi̱ sandíʼi-xa̱ʼa̱ña ndiʼi tu̱ndóʼo ña̱ íyo nu̱úyó xa̱ʼa̱ ña̱ íyo so̱ko, ndiʼi na̱ yiví kusiíní-inina chi kooní ña̱ kuxuna (Isaías 25:6). ¿Ama xi̱nu ña̱yóʼo? Tá kúni̱ún kunda̱a̱-iniún xa̱ʼa̱ña, kaʼvi artículo ña̱ naní “¿Cuándo gobernará la Tierra el Reino de Dios?”.
a Agenda 2030 sobre el Desarrollo Sostenible, aprobada en el 2015 por todos los Estados Miembros de las Naciones Unidas.
b Informe realizado por la Organización de las Naciones Unidas para la Alimentación y la Agricultura, el Fondo Internacional de Desarrollo Agrícola, el Fondo de las Naciones Unidas para la Infancia, el Programa Mundial de Alimentos de las Naciones Unidas y la Organización Mundial de la Salud.
c Ña̱ va̱ʼa kunda̱a̱ka-iniún xa̱ʼa̱ ku̱mí na̱ yósó tí kuáyi̱ na̱ káʼa̱n tutu ña̱ Apocalipsis xa̱ʼa̱, koto artículo ña̱ naní “¿Qué representan los jinetes del Apocalipsis?”.
d Jehová kúú ki̱vi̱ Ndióxi̱ (Salmo 83:18). Koto artículo ña̱ naní “¿Ndáa ta̱ kúú Jehová?”.