Ndióxi̱ ndáara na̱ sóʼó
Tiempo vitin íyo yáʼaka 70 millón na̱ yiví na̱ va̱ása kívi kuniso̱ʼo, ta ku̱a̱ʼání na̱yóʼo xíniñúʼuna tu̱ʼun seña, ña̱ va̱ʼa natúʼunna xíʼin inkana ta yáʼaka 200 nu̱ú tu̱ʼun seña íyo. Soo ku̱a̱ʼání na̱ yiví íxandi̱va̱ʼana xíʼin na̱ va̱ása kívi kuniso̱ʼo. Ná kotoyó ndáaña káʼa̱n savana xa̱ʼa̱ na̱yóʼo:
“Iníísaá nu̱ú ñuʼú va̱ása íxato̱ʼóna derecho ña̱ kúúmií na̱ sóʼó á na̱ loʼoní xíniso̱ʼo” (Asociación Nacional de Sordos de Estados Unidos).
“Na̱ sóʼó na̱ ndóo ñuu ña̱ ndáʼviní kúú na̱ ndáʼviníka nu̱ú inkana, ta íxayo̱ʼvi̱níña xíʼinna ña̱ ku̱ʼu̱nna escuela, ña̱ ni̱ʼína chiñu á inkaka ña̱ʼa” (Federación Mundial de Sordos).
¿Ndáaña ndákanixi̱ní Ndióxi̱ xa̱ʼa̱ na̱ sóʼó? ¿Ndáaña káʼa̱n Biblia xa̱ʼa̱ na̱yóʼo? Ta, ¿ndáaña kéʼé na̱ testigo Jehová ña̱ va̱ʼa chindeétáʼanna xíʼinna?
¿Ndáaña ndákanixi̱ní Ndióxi̱ xa̱ʼa̱ na̱ sóʼó?
Tu̱ʼun Ndióxi̱ káʼa̱nña, ña̱ ndíʼi̱-ini Jehováa xa̱ʼa̱ na̱ sóʼó. Kúni̱ra ña̱ ná sakúaʼatu na̱yóʼo xa̱ʼa̱ra, ta va̱ása kúni̱ra kundasíyó kuniyóna.
Texto ña̱ va̱xi nu̱ú Biblia: “Va̱ása sakúisochiʼñaún iin na̱ sóʼó” (Levítico 19:14).
Ña̱ kúni̱ kachiña: Ley ña̱ ta̱xi Jehová ndaʼa̱ na̱ ñuu Israel tá xi̱naʼá xi̱ ixato̱ʼóña derecho na̱ sóʼó.
Texto ña̱ va̱xi nu̱ú Biblia: “Va̱ása ndáka̱xin Ndióxi̱ na̱ yiví” (Hechos 10:34).
Ña̱ kúni̱ kachiña: Jehová ndíʼi̱-inira xa̱ʼa̱ ndiʼi na̱ yiví ni nda̱a̱ ndáaka ñuuna á ni nda̱a̱ ndáaka tu̱ʼun káʼa̱nna, ta saátu ndíʼi̱-inira xa̱ʼa̱ na̱ sóʼó.
Texto ña̱ va̱xi nu̱ú Biblia: “Ta̱ Jesús nda̱kiʼinra ku̱a̱ʼa̱nra iníí ñuu náʼnu xíʼin ñuu válí [...] ta nátúʼunra tu̱ʼun va̱ʼa xa̱ʼa̱ Reino Ndióxi̱” (Mateo 9:35).
Ña̱ kúni̱ kachiña: Ta̱ Jesús ki̱xira nu̱ú ñuʼú yóʼo ña̱ va̱ʼa sanáʼa̱ra xa̱ʼa̱ Reino Ndióxi̱ ta sa̱náʼa̱ra ndáaña keʼé Reino yóʼo xa̱ʼa̱ ndiʼi na̱ yiví, nda̱a̱ na̱ va̱ása kívi kuniso̱ʼo (Mateo 6:10).
Texto ña̱ va̱xi nu̱ú Biblia: Ta̱ Jesús “sándaʼara na̱ kǒo kívi kuniso̱ʼo xíʼin na̱ kǒo kívi ka̱ʼa̱n” (Marcos 7:37).
Ña̱ kúni̱ kachiña: Ta̱ Jesús ni̱na̱ʼa̱ra ña̱ kivi sandáʼa Reino Ndióxi̱ na̱ sóʼó ña̱ va̱ʼa kixáʼana kuniso̱ʼona ta ka̱ʼa̱nna. Iin yichi̱ to̱ʼókaví keʼéra seña nu̱ú iin ta̱a ta̱ sóʼó, tasaá sa̱ndáʼarara (Marcos 7:31-35).
Texto ña̱ va̱xi nu̱ú Biblia: “Kuniso̱ʼo na̱ kǒo kívi kuniso̱ʼo” (Isaías 35:5).
Ña̱ kúni̱ kachiña: Jehová káʼa̱nra ña̱ kixaa̱ iin ki̱vi̱ ña̱ kuniso̱ʼova na̱ sóʼó (Isaías 29:18).
¿Ndáaña kéʼé na̱ testigo Jehová xa̱ʼa̱ na̱ sóʼó?
Na̱ testigo Jehová nátúʼunndi̱ xíʼin na̱ yiví na̱ kǒo kívi kuniso̱ʼo xa̱ʼa̱ ña̱ kúni̱ Ndióxi̱ keʼéra xa̱ʼa̱na. ¿Ndáa ki̱ʼva kéʼéndi̱ ña̱yóʼo? Távándi̱ video ña̱ Biblia ta saátu inkaka video ña̱ chíndeétáʼan xíʼinna kunda̱a̱-inina xíʼin ña̱ káʼa̱n Biblia, ta xa̱a̱ yáʼaka 100 nu̱ú tu̱ʼun ña̱ seña íyoña. Ta saátu, sánáʼa̱ndi̱na xa̱ʼa̱ Biblia ta kéʼéndi̱ reunión ña̱ xíyo tu̱ʼun seña, ta kǒo xu̱ʼún kíʼinndi̱ ña̱ va̱ʼa sanáʼa̱ndi̱ na̱ kúni̱ sakúaʼa xa̱ʼa̱ Ndióxi̱. ¿Nda̱chun va̱ása kíʼinndi̱ xu̱ʼún? Saáchi ta̱ Jesús ni̱ka̱ʼa̱nra ña̱yóʼo: “Va̱ása níchaʼvindó xa̱ʼa̱ ña̱yóʼo, ña̱kán va̱ása ndukúndó ña̱ʼa nu̱úna” (Mateo 10:8).
¿Ndáa míí kivi ndani̱ʼún ña̱yóʼo? Yóʼo nandukúnña:
Nu̱ú sitio ña̱ jw.org. Kúáʼan chí xi̱ní página yóʼo ta katavi̱ndaʼún nu̱ú káʼa̱nna “Tu̱ʼun”, ta kán ndaka̱xiún tu̱ʼun seña. Tándi̱ʼi kivi nandukún nda̱a̱ ndáaka ña̱ kúni̱ miíún.
Nu̱ú aplicación ña̱ naní JW Library Sign Language. Sanúu aplicación yóʼo ini celular á tableta ña̱ kúúmiíún, ta yóʼo kivi sánuún video ña̱ tu̱ʼun seña.
¿Ndáaña kúúmiíndi̱ ña̱ va̱ʼa kaʼvi na̱ sóʼó Biblia?
Tu̱ʼun Ndióxi̱ íyoña tu̱ʼun seña. Ña̱ Traducción del Nuevo Mundo kúú ña̱ nu̱ú va̱ʼa ka̱na tu̱ʼun seña, ta ña̱yóʼo xi̱kuu ña̱ tu̱ʼun seña americano. Xa̱a̱ ku̱a̱ʼáníka tu̱ʼun seña íyo ña̱ Traducción del Nuevo Mundo iníí saáña á iin táʼviña, ta ku̱i̱ya̱ tá ku̱i̱ya̱ kánaña ku̱a̱ʼáka tu̱ʼun. (Ña̱ va̱ʼa kotoún ndáa inkaka tu̱ʼun xa̱a̱ kánaña, koto recuadro “Ña̱ Traducción del Nuevo Mundo xa̱a̱ íyoña tu̱ʼun seña”).
Ña̱ va̱ʼa kunda̱a̱-iniún ndáaña kéʼéna ña̱ va̱ʼa sandáya̱ʼana Biblia tu̱ʼun seña, koto video ña̱ naní La Traducción del Nuevo Mundo completa en lenguaje de señas americano ya está disponible.
Ña̱ va̱ʼa kaʼviún Biblia sanúu aplicación JW Library Sign Language. Yóʼo kivi nandukún iin tá iin versículo.
Ta̱ Dmytro xíʼin ñá Vita va̱ása kívi kuniso̱ʼona, soo va̱ʼa xíniso̱ʼo na̱ se̱ʼena. Koto ndáaña va̱ʼa ndákiʼinna xa̱ʼa̱ ña̱ káʼvina Biblia ña̱ tu̱ʼun seña ndiʼi ki̱vi̱.
Video ña̱ ndákani xa̱ʼa̱ tu̱ʼun Ndióxi̱. Ndi̱ʼi̱ na̱ testigo Jehová távándi̱ video ña̱ tu̱ʼun seña ña̱ chíndeétáʼan xíʼin na̱ yiví kunda̱a̱-inina xa̱ʼa̱ consejo ña̱ va̱xi nu̱ú Biblia ta sákuaʼana kundiku̱nnaña. ¿Ndáana ku̱a̱ʼa̱n consejo yóʼo nu̱ú?
Káʼvindi̱ Biblia xíʼin na̱ yiví. Kivi sanáʼa̱ndi̱ yóʼó xa̱ʼa̱ Biblia, ta ña̱ tu̱ʼun seña kooña, koo iin kuití na̱ sanáʼa̱ yóʼó. Ka̱ʼa̱n xíʼin iinna ña̱ ná ku̱ʼu̱nna kotona yóʼó, tasaá kunda̱a̱-iniún ndáa ki̱ʼva íyoña.
Ta̱ Jeson Senajonon íyora chí Filipinas ta xa̱ʼa̱ ña̱ sa̱náʼa̱nara xa̱ʼa̱ Biblia, vitin va̱ʼaní kítáʼanra xíʼin Ndióxi̱. Koto ndáaña ndo̱ʼora.
Ta̱ Mario Antúnez xi̱kuura pastor evangélico chí Honduras. Koto ndáa ki̱ʼva ni̱xa̱a̱ra sa̱kúaʼara xa̱ʼa̱ Biblia, kaʼvi ña̱ nátúʼun xa̱ʼa̱ra ña̱ naní “Tenía muchas preguntas y pocas respuestas”.
Reunión xíʼin Asamblea. Íyo congregación xíʼin grupo ña̱ tu̱ʼun seña iníísaá ñuyǐví, nu̱ú ndátaka ku̱a̱ʼání na̱ sóʼó ndiʼi semana ña̱ va̱ʼa ndasakáʼnuna Ndióxi̱ ta sakúaʼana xa̱ʼa̱ra. Ta saátu ndiʼi ku̱i̱ya̱ kéʼéndi̱ reunión ña̱ náʼnuka ta asamblea káʼa̱nndi̱ xíʼinña, yóʼo sákuaʼakandi̱ xa̱ʼa̱ Ndióxi̱. Tá xíyo asamblea xíyotu na̱ sándaya̱ʼaña tu̱ʼun seña. Ta saátu íyo tutu ña̱ távándi̱ tu̱ʼun braille.
Ndani̱ʼí iin congregación ña̱ íyo yatin nu̱ú íyoún.
Koto ndáa asamblea kuumiíndi̱.
Kivi ku̱ʼún xíʼinndi̱ ña̱ ndakaʼányó xa̱ʼa̱ ña̱ ni̱xi̱ʼi̱ ta̱ Jesús, ña̱yóʼo kúú reunión ña̱ ndáyáʼvika kúúmiíndi̱ ku̱i̱ya̱ tá ku̱i̱ya̱.
Ta̱ José Luis Ayala íyora chí México, nani tá ka̱kura va̱ása kívi ka̱ʼa̱nra ta tá ni̱ya̱ʼa ku̱i̱ya̱ va̱ása níkivika kotora. Koto ndáa ki̱ʼva chi̱ndeétáʼan inkana xíʼinra ña̱ ki̱xáʼara sánáʼa̱ra inkana xa̱ʼa̱ Ndióxi̱.
a Jehová kúú ki̱vi̱ Ndióxi̱ (Salmo 83:18). Koto artículo ña̱ naní “¿Ndáa ta̱ kúú Jehová?”.