¿Nda̱chun va̱ása íxato̱ʼó-táʼanka na̱ yiví? | ¿Ndáaña káʼa̱n ña̱ Biblia xa̱ʼa̱ ña̱yóʼo?

Kininíka ki̱xáʼa kéʼé na̱ yiví: na̱ xáʼa̱n kútatan ndáʼyi̱na nu̱ú na̱ doctor, na̱ xáʼa̱n xíxi restauran ndáʼyi̱na nu̱ú na̱ xíko ña̱ʼa xíxina, na̱ xíka xíʼin tú avión ndáʼyi̱na nu̱ú na̱ chíndeétáʼan xíʼinna, na̱ va̱lí na̱ xáʼa̱n escuela ndáʼyi̱na nu̱ú na̱ maestrona, kúsi̱kindaanana ta íxandi̱va̱ʼana xíʼinna. Saátu sava na̱ chíñu kéʼéna ña̱ va̱ása va̱ʼa ta savana náʼa̱na ña̱ va̱ʼaní káchíñuna.

Biblia chíndeétáʼanña xíʼinyó ña̱ ixato̱ʼóyó inkana ta vií keʼéyó, ta saátu káʼa̱nña nda̱chun kúú ña̱ kǒo íxato̱ʼó-táʼanka na̱ yiví tiempo vitin.

¿Nda̱chun va̱ása íxato̱ʼó-táʼanka na̱ yiví?

Iníísaá ñuyǐví yóʼo va̱ása íxato̱ʼóka na̱ yiví ta kininíka ki̱xáʼana kéʼéna, saáchi ku̱a̱ʼání na̱ yiví va̱ása kéʼékana ña̱ va̱ʼa ta kǒo chíkaa̱kana ndee̱ ña̱ keʼéna ña-yóʼo.

• Ña̱ 22 ku̱i̱ya̱ ña̱ ni̱ya̱ʼa yóʼo, iin estudio ña̱ Gallup ña̱ sa̱kán ka̱na káʼa̱nña xa̱ʼa̱ na̱ ñuu Estados Unidos ña̱ ku̱a̱ʼánína kǒo íxato̱ʼókana.

• Sa̱kán íyo loʼo tiempo ke̱ʼéna iin encuesta ti̱xin 28 país ta 32,000 mil na̱ yiví ni̱ka̱ʼa̱nna ña̱ ku̱a̱ʼání na̱ yiví kǒo íxato̱ʼókana tiempo vitin.

Biblia ni̱ka̱ʼa̱nña ña̱ saá koo na̱ yiví tiempo vitin.

• “Soo xíniñúʼu kunda̱a̱-iniún ña̱ ki̱vi̱ nu̱ú ndíʼi, koo tiempo ña̱ yo̱ʼvi̱ní ta kǒo kundeé-inina xíʼinña. Saáchi na̱ yiví kuʼvi̱-inina kunina miína, kutóonína kuumiína xu̱ʼún, kuta̱a-inina, ni iinna kǒo kundayáʼvi nu̱úna, [...] va̱ása kandíxana ña̱ káʼa̱n na̱ yivána, va̱ása taxina tíxa̱ʼvi, va̱ása nda̱kú koo inina va̱ása ka̱ʼnu̱-inina, ndi̱va̱ʼaní koo inina” (2 Timoteo 3:1-3).

Tá kúni̱ún kunda̱a̱ka-iniún ndáa ki̱ʼva xínu profecía yóʼo kaʼvi artículo yóʼo “¿Predijo la Biblia cómo sería la gente en nuestros días?”.

Ña̱ kivi chindeétáʼan xíʼinyó ña̱ kooyó na̱ yiví va̱ʼa

Iníísaá ñuyǐví ku̱a̱ʼání na̱ yiví va̱ása íxato̱ʼókana, soo saátu ku̱a̱ʼánína sákuaʼana ixato̱ʼóna chi sákuaʼana ña̱ va̱xi nu̱ú Biblia. Chi ndiʼi ña̱ sánáʼa̱ Biblia va̱ʼaníña ta nina ña̱ nda̱a̱ káʼa̱nña xíʼinyó tiempo vitin ta saátu chí nu̱únínu (Salmo 111:8). Koto sava ejemplo yóʼo:

• ÑA̱ KÁʼA̱N BIBLIA: “Keʼéndó xíʼin inkana ndiʼi ña̱ kúni̱ndó keʼéna xíʼinndó” (Mateo 7:12).

  Ña̱ kúni̱ kachiña: Xíniñúʼu viíní ná keʼéyó xíʼin inkana nda̱a̱ táki̱ʼva kúni̱yó ná keʼéna xíʼinyó: va̱ʼa ná koo iniyó xíʼinna ta ná ixato̱ʼóyóna.

• ÑA̱ KÁʼA̱N BIBLIA: “Vitin ña̱ xa̱a̱ sa̱ndákoondó ndiʼi ña̱ vatá ña̱ xi̱keʼéndó, ka̱ʼa̱nndó ña̱ nda̱a̱ xíʼin táʼanndó” (Efesios 4:25).

  Ña̱ kúni̱ kachiña: Xíniñúʼu keʼéyó ta ka̱ʼa̱nyó ña̱ nda̱a̱.

Yóʼo ndani̱ʼún ña̱ káʼa̱nka xa̱ʼa̱ ña̱yóʼo:

• Tutu ña̱ La Atalaya “Una guía confiable para hacer lo correcto”.

• Artículo ña̱ naní “¿Nos ayuda la Biblia a ser tolerantes?”.