¿Á íyo iin na̱ kivi kaʼndachíñu nu̱ú ñuʼú yóʼo ndiʼi tiempo? | ¿Ndáaña káʼa̱n Biblia xa̱ʼa̱ ña̱yóʼo?

Ndiʼi na̱ chíñu na̱ íyo iníí ñuyǐví ku̱a̱yaʼana nu̱ú tu̱ndóʼo. Kánitáʼan na̱ yiví, ta xa̱ʼa̱ ña̱ kǒo inkáchi ndáka̱xinna na̱ kaʼndachíñu íyo ku̱a̱chi xíʼin táʼanna. Ta nda̱a̱ na̱ chíñu na̱ kúúmiíní ndee̱ ki̱xáʼa íyo tu̱ndóʼo nu̱úna.

Biblia káʼa̱nña ña̱ íyova iin na̱ chíñu na̱ kaʼndachíñu ndiʼi tiempo. Sana xa̱a̱ xíniso̱ʼún káʼa̱nna xa̱ʼa̱ ña̱yóʼo. Ña̱yóʼo kúú gobierno ña̱ ni̱ka̱ʼa̱n ta̱ Jesús xa̱ʼa̱ nu̱ú ña̱ oración ña̱ padrenuestro.

“Siaʼa xíniñúʼu ka̱ʼa̱nndó xíʼinra: ‘Yivándi̱ ta̱ íyo chí ndiví, ná nduyi̱i̱ ki̱vi̱ún. Ná kixaa̱ ki̱vi̱ ña̱ kaʼndachíñún. Ná koo ña̱ kúni̱ miíún, táki̱ʼva íyo chí ndiví, saá ná koo nu̱ú ñuʼú yóʼo’” (Mateo 6:9, 10).

¿Ndáaña káʼa̱n Biblia xa̱ʼa̱ Reino yóʼo?

Reino yóʼo ndiʼi tiempo kooña

Reino yóʼo nda̱a̱ chí ndiví xáʼndachíñuña.

Ta̱ Jesús ni̱ka̱ʼa̱nra xíʼinña “Reino Ndióxi̱ ña̱ íyo chí ndiví” (Mateo 4:17; 5:3, 10, 19, 20). Ña̱kán ni̱ka̱ʼa̱nra: “Su̱ví ñuyǐví yóʼo kúú nu̱ú xáʼndachíñui̱” (Juan 18:36).

Reino yóʼo kúú ña̱ kaʼndachíñu ta kǒoka inka na̱ chíñu koo.

Biblia káchiña: “Tá ná kaʼndachíñura, sandíʼi-xa̱ʼa̱ra ndiʼi na̱ chíñu yóʼo ta sakúachi válírana, ta iinlá ña̱ kaʼndachíñura kúú ña̱ koo ndiʼi tiempo” (Daniel 2:44).

Ta̱ Jesús kúú Rey ña̱ Reino yóʼo, “ta va̱ása ndiʼi-xa̱ʼa̱ ña̱ kaʼndachíñura”.

Biblia káchiña: “Ndiʼi tiempo kúú ña̱ kuisochíñura nu̱ú na̱yóʼo ta va̱ása ndiʼiña, ni va̱ása ndiʼi-xa̱ʼa̱ ña̱ kaʼndachíñura” (Daniel 7:13, 14).

Reino yóʼo ndasava̱ʼaña nu̱ú ñuʼú yóʼo ta va̱ʼaní kundooyó chi kǒoka tu̱ndóʼo koo.

Biblia káchiña: “Iin tá iinna kundoona xa̱ʼa̱ tú uvana saátu xa̱ʼa̱ tú higona, ta nda̱a̱ ni iinna kǒo sayíʼvi-ñaʼá” (Miqueas 4:4).

Sakúaʼaka xa̱ʼa̱ Reino yóʼo

Tá ni̱xi̱yo ta̱ Jesús nu̱ú ñuʼú yóʼo, ña̱ ni̱ndi̱ʼi̱ka-inira xa̱ʼa̱ kúú ña̱ na̱túʼunra “tu̱ʼun va̱ʼa xa̱ʼa̱ Reino Ndióxi̱” (Mateo 9:35). Ta saátu ni̱ka̱ʼa̱nra ña̱yóʼo:

“Ta natúʼunna tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú yóʼo ña̱ va̱ʼa kunda̱a̱-ini ndiʼi na̱ yiví tasaá ndiʼi-xa̱ʼa̱ ñuyǐví” (Mateo 24:14).

Tiempo vitin xa̱a̱ yáʼaka 240 país xíʼin ñuu válí nátúʼunyó xa̱ʼa̱ Reino Ndióxi̱. ¿Ndáa ña̱ va̱ʼa taxi Reino yóʼo ndaʼa̱yó? ¿Ndáaña xíniñúʼu keʼún ña̱ va̱ʼa ndakiʼún ña̱yóʼo? Káʼa̱nndi̱ xíʼún ña̱ ná sakúakaún xa̱ʼa̱ Reino yóʼo.

Koto video ¿Ndáa ki̱ʼva kaʼndachíñu Ndióxi̱?