¿Ndáa ki̱ʼva ki̱xáʼa xa̱ʼa̱ na̱ testigo Jehová?

Historia ña̱ káʼa̱n xa̱ʼa̱ na̱ testigo Jehová na̱ íyo tiempo vitin ki̱xáʼaña tá xa̱a̱ kúni̱ ndiʼi ña̱ siglo XIX. Tá ku̱i̱ya̱ kán, iin tiʼvi loʼo na̱ xi̱kaʼvi ña̱ Biblia na̱ ni̱xi̱yo chí Pittsburgh (Pensilvania, Estados Unidos) ki̱xáʼana káʼvi va̱ʼana xa̱ʼa̱ tu̱ʼun Ndióxi̱. Ta xa̱ʼa̱ ña̱yóʼo ki̱xáʼana sákitáʼanna ña̱ nda̱a̱ ña̱ va̱xi nu̱ú Biblia xíʼin ña̱ sánáʼa̱na ti̱xin veʼe-ñu̱ʼu. Ta ki̱xáʼana nátúʼunna xíʼin inkana xa̱ʼa̱ ña̱ sákuaʼana. Ta̱vána libro, ta̱vána sava artículo nu̱ú periódico ta saátu ta̱vána tutu ña̱ kúúmiíyó vitin ña̱ naní La Atalaya. Anunciando el Reino de Jehová.

Iin ta̱ xi̱kaʼvi Biblia xi̱naníra Charles Taze Russell. Ta̱yóʼo xi̱kuu ta̱ nu̱ú ta̱ ke̱ʼé revista ña̱ La Atalaya ta sa̱náʼa̱ra inkana xa̱ʼa̱ ña̱ káʼa̱n Biblia tiempo saá, soo su̱ví ta̱yóʼo kúú ta̱ i̱xava̱ʼa ña̱ religión yóʼo. Chi ña̱ ke̱ʼé ta̱ Russell xíʼin inkaka na̱ xi̱kaʼvi ña̱ Biblia (saá xi̱nanína), kúú ña̱ sa̱náʼa̱na inkana xa̱ʼa̱ ña̱ sa̱náʼa̱ ta̱ Jesucristo ta saátu xi̱ndiku̱nna ña̱ ke̱ʼé na̱ congregación na̱ ni̱xi̱yo tá siglo nu̱ú. Ta̱ Jesús kúú ta̱ chi̱ndúʼú xa̱ʼa̱ ña̱ congregación tiempo xi̱naʼá, ña̱kán kúú ña̱ kándíxandi̱ ña̱ miíra kúútu ta̱ chi̱ndúʼú xa̱ʼa̱ congregación ña̱ kúúmiíndi̱ tiempo vitin (Colosenses 1:18-20).